NŌŌ RƆ̄ 1
1
Jerusalem i dəyá̰ kə́ ngaa koy kə́ kəya̰ kɔ̄ɔ́
1Jerusalem ń i ɓē kə́ kété de gə̄ i ngá̰ý kemeé ní,
i ba̰ý á ngɔlaā əya̰nən̄ kɔ̄ɔ́ kə kérneé ní?
I ba̰ý á ndi tītə̄ dəyá̰ kə́ ngaa koy beé ní?
Ni ń rīn ɓār̄ ngá̰ý dan nápar de gə̄ tə́ ō,
ni i ngār kə́ dɔ ngán ɓē gə̄ tə́ ō ní,
i najə̄ rí tə́ á a rāā kəla ngámbá ní?
2Ni nōō ba tél nōō dan ndɔ̄ɔ́, man̄ nōō nɔ̄l̄ kumən malang.
Dan ngé sāān gə̄ tə́ malang ní, nge kə́ asə sɔl̄ kemən gətóo.
Dɔ madə̄ njə̄rān gə̄ malang ndigə̄nal dɔn tə́ kɔ̄ɔ́.
Nin̄ télən̄ madə̄ ba̰ā̰n gə̄.
3Əhɔn̄ Juda aw̄n̄ seneé, ni i kə rɔ̄sɔlɔ̄ɔ́.
Aw̄ i kə̄ ɓəloó.
Ni-ndi i dan nápar de gə̄ tə́, adə̄ a̰a̰ loo ndi lɔm alé.
Ngé rāā kumən ndoō tə́ gə̄ malang ngɔ̄də̄ əhɔnən̄ kɔgə̄ loo kógə̄ḿ tə́.
4Róbə́ kə́ ta reē kə̄ Siyo̰ tə́ gə̄ ndə̄ngān̄ rɔ̄də́,
tɔdɔ̄ de gə̄ njə̄rān̄ dɔ tə́ yā reēń rāā nāā gə̄ tə́ to̰ alé.
Bápə́ kə́ ta róbə ndogə̄ kə́ Siyo̰ tə́ gə̄ malang i kə́ nujəń kɔ̄ɔ́.
Ngé tun̄ yá̰a̰ yān gə̄ malang to̰ō̰n̄ rus rus.
Rɔ̄ ngámandə yān gə̄ nel̄də́ aĺ ō, wurən nəkɔ́ atə̄n ngá̰ý ō.
5Ngé rɔ̄ɔ̄n gə̄ tetənə̄n̄ rɔ̄ɔ̄,
madə̄ ba̰ā̰n gə̄ ndin̄ loo yādə́ majə,
tɔdɔ̄ Kɔ́ɔ̄ɓē rāān adə̄ tɔ́gən gətóo
najə̄ mbātə́ najə̄ yān kə́ ngá̰ý tə́.
Ngé rɔ̄ɔ̄n gə̄ əhɔn̄ ngánən gə̄ adə̄ njə̄rān̄ kété nodə́ tə́ yā kaw̄ń sedə́ ɓəloó.
6Ɔsən̄ gɔn ngōmandə kə́ Siyo̰ to̰ alé,
ngār yān gə̄ tél ton̄ tītə̄ wāl̄ gə̄ kə́ əngen̄ mú kə́ mbōl̄ aĺ ō,
sɔlə̄n̄ yélélé no nge rāādə́ ndoō tə́ ō.
7Kem ndɔ̄ gə̄ ń toō ń Jerusalem ndiń kə rɔ̄sɔlɔ̄ɔ́ ō, dáyń dɔɔ́ ō ní,
əga kemən dɔ yá̰á̰ kə́ majə ngá̰ý gə̄ malang kə́ kété gə̄ tə́.
Dan ń gír deē yān gə̄ əsōn̄ kem jī ngé rɔ̄ɔ̄də́ gə̄ tə́
kanjə̄ kadə̄ deē kógə̄ḿ dḭḭ̄n ní,
ngé rɔ̄ɔ̄n gə̄ a̰a̰nən̄ ba əgōn̄ dɔ tɔ́gən kə́ gətóó tə́.
8Jerusalem rāā yá̰á̰ kə́ majaĺ adə̄ ni téĺ yá̰á̰ kə́ yḛr.
Ngé gə̄ malang ń ɔsən̄ gɔnən ní kídə̄nən̄ kɔ̄ɔ́ dan ń a̰a̰n̄ kadə̄ gírən i karī ní.
Nəkɔ́ gə̄gē a to̰ō̰ ō, tūr̄ gidən ō.
9Tə́ra yḛr ní to tu kūbə̄ kə́ gírən tə́.
I yá̰á̰ kə́ ni-əndā kemən dɔ tə́ kadə̄ a rāā yá̰a̰ alé.
Ni-əsō i kəsō kə́ to ɓōĺ ngá̰ý,
de kə́ a asə sɔl̄ kemən gətóo.
Adə̄ əda na: Kɔ́ɔ̄ɓē á̰a̰ rɔ̄sɔl̄ yāḿ, tɔdɔ̄ madə̄ ba̰ā̰ḿ tetəm̄ rɔ̄ɔ̄.
10Nge rɔ̄ɔ̄ḿ əla jīn ɔyń yá̰a̰ yāḿ kə́ majə ngá̰ý gə̄ malang kɔ̄ɔ́.
Jerusalem a̰a̰ nápar de gə̄ ń ɔ̄gə̄də́ kaw̄ dan ngé kán̄ naā yāí gə̄ tə́ ní
loo kudə tə́ kem loo kə́ táĺ yān tə́.
11Gír deē yān gə̄ malang a nōōn̄ i ɓō, nin̄ a sāān̄ i yá̰a̰ kəsa.
Adə̄n̄ yá̰a̰ yādə́ kə́ majə ngá̰ý gə̄ gíŕ yá̰a̰ kəsa tə́,
tām̄ kadə̄ kə n-ndin̄neé kə kumdə́.
Anī ni ndɔ̄ȳ Nə́ɓā, ə́da na: Kɔ́ɔ̄ɓē, á̰á̰ kídə̄ ń kídə̄mə̄n̄ toó.
12Sḭḭ̄ malang ń ā ī-mānī kum róbə́ ń toō tə́ ní, yá̰á̰ kə́ beē rāāsí alé.
Ə̄ndāī ma̰ȳ ō, á̰a̰ī ō, ké wur kɔl kə́ tītə̄ yāḿ ń toō i noó wa,
kə́ tītə̄ nge ń tōr̄ rɔ̄ḿ ngá̰ý toō, adə̄ i nge ń
Kɔ́ɔ̄ɓē rāā adə̄ m̄-ndi kum tə́ ndɔ̄ wōn̄g yān kə́ ngá̰ý tə́ ní.
13Ni-ndi i dɔɔ́ nú ba əla hor adə̄ udə kem kə̄ngāḿ tə́.
Ni i kɔ́ɔ̄ yá̰a̰. Ni-ənī réng róbə́ḿ tə́, rāām̄ adə̄ m-ə̄sō kə gōḿ.
Rāām̄ adə̄ m̄-tél dəyá̰ kə́ deē teē tan tə́ alé,
rɔ̄ḿ tōrə̄m̄ kə dɔ ndɔ̄ gə̄ ō.
14Á̰a̰ī njúkə mbātə́ najə̄ yāḿ gə̄ n i kə́ rákə̄də́ ta naā tə́ toó.
Ni do̰ō̰ naā tə́ kə jīneé ō, əga míndə́ḿ tə́ ō.
Kɔ́ɔ̄ɓē taā tɔ́gə́ḿ kɔ̄ɔ́.
Ni əlam̄ kem jī de kə́ m-ásə rɔ̄ɔ̄də́ dɔḿ tə́ aĺ gə̄ tə́.
15Kɔ́ɔ̄ɓē tə̄ɓā go̰ rɔ̄ɔ̄ gə̄ malang ń i seḿ ní kɔ̄ɔ́.
Ni-ɔsə dɔ de kə́ ngá̰ý gə̄ naā tə́ kə rīḿ, kadə̄ reē rējə̄n̄ balsáa yāḿ gə̄.
Kɔ́ɔ̄ɓē mbə́rē ngōmandə kə́ Juda tə́
tītə̄ kan̄ kāgə̄ nduú beē.
16Yá̰á̰ ń m̄-nōō najə̄n tə́ ní, rāā adə̄ kumḿ tetə man̄ jōó mbak.
Tɔdɔ̄ nge sɔl̄ kemḿ ō, nge kadə̄m̄ tɔ́gə kadə̄ m̄-ndiń kə kumḿ ō, ɔr̄ rɔ̄n kɔ̄ɔ́ sa̰y rɔ̄ḿ tə́.
Ngánə́ḿ gə̄ nujən̄ kɔ̄ɔ́, tɔdɔ̄ tɔ́gə madə̄ ba̰ā̰ḿ tɔȳ yādə́.
17 Siyo̰ ɔy jīn kə̄ dɔɔ́ rāań ɓɔ́, banī de kə́ sɔl̄ kemən gətóo.
Kɔ́ɔ̄ɓē adə̄ ndūn ngé rɔ̄ɔ̄ Jakob gə̄ ń ndi gīrə̄n̄ gidən ní kadə̄ ənīnən̄ rɔ̄ɔ̄.
Jerusalem tél yá̰á̰ kə́ yḛr dɔ dandə́ tə́.
18Kɔ́ɔ̄ɓē rāā i yá̰á̰ kə́ gōtə́,
tɔdɔ̄ m̄-mbātə́ rāā yá̰a̰ gə̄ ń ni ədam̄ kadə̄ m̄-rāā ní.
Ōōī, sḭḭ̄ gír de gə̄ malang, á̰a̰ī wur kɔl yāḿ,
əhɔn̄ ngámandə yāḿ gə̄ ō, balsáa yāḿ gə̄ ō
aw̄n̄ sedə́ dɔ nang kə́ rang tə́.
19m̄-ɓāŕ ngé sāāḿ gə̄, banī nin̄ gól̄mə̄n̄.
Ngé tun̄ yá̰a̰ yāḿ gə̄ ō, kum kɔ̄ɔ́ yāḿ gə̄ ō, oyn̄ kem ɓēé dan ń a sāān̄neé
yá̰a̰ kəsa kə́ tadə́ tə́ yā kajəń ní.
20Kɔ́ɔ̄ɓē, á̰a̰ wur kɔl yāḿ, kemḿ təngām̄ ngá̰ý loon tə́.
Ngarā̰ kemḿ nujə, tɔdɔ̄ mā i nge mbātə́ najə̄ rɔ̄kum.
Kaskar tɔ̄ɔ̄ kōōdə́ kə gō gidə looó ō, yo nujə loo kem ɓēé ō.
21De gə̄ oōn̄ kōōḿ ń m̄-to̰ō̰ń ní, de kə́ yā sɔl̄ kemḿ gətóo.
Madə̄ ba̰ā̰ḿ gə̄ malang oōn̄ kōō yá̰á̰ kə́ to kum kaȳ aĺ ń rāām̄ ní.
Anī rāān̄ rɔ̄nel̄ najə̄ yá̰á̰ ń ī-rāā seḿ tə́ ní. Kə́ rɔ̄kum tə́ tā anī, i ḭ̄ n ī-rāā yá̰á̰ ní.
Ī-rāā ādə̄ ndɔ̄ ń ə́da najə̄n kété ní reē ugə̄.
Ādə̄ nin̄ tél ton̄ tītə̄ḿ mā beé ō!
22Ādə̄ kem ndul yādə́ gə̄ malang ton̄ kə̄ dɔ ndágá ta kumií tə́ ō,
ī-rāādə́ yá̰á̰ ń ī-rāā seḿ najə̄ mbātə́ najə̄ yāḿ gə̄ malang tə́ ní ō.
Tɔdɔ̄ m̄-nōō rɔ̄ḿ ngá̰ý ō, rɔ̄ḿ tōrə̄m̄ kə̄ loo gə̄ tə́ ō.
Currently Selected:
NŌŌ RƆ̄ 1: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.