NGÉ SARYA 3
3
1Ni-əya̰də́ adə̄ ndin̄ kem ɓēé i yā nāań ngán Israel gə̄ ń rɔ̄ɔ̄n̄ yā taāń dɔ nang kə́ Kanaan kété aĺ ɓáý ní. 2Ni-sāā i kadə̄ ngán Israel kə́ gō gogə́ gə̄ ń rɔ̄ɔ̄n̄ kété aĺ ɓáý ní ndóōnəń loo rɔ̄ɔ̄. 3De gə̄ ń ni əya̰də́ adə̄ ndin̄ kem ɓēé ní i mban̄g kə́ mí gə̄ yā Pilistin gə̄ ō, Kanaan gə̄ malang ō, Sidon gə̄ kə Hibi gə̄ ń ndin̄ dɔ mbal̄ gə̄ kə́ Liban tə́ ní ō. Nin̄ əlan̄ gír ndi i mbal̄ Hermon tə́ bátə́ ugə̄ń Lebo Hamat. 4Kɔ́ɔ̄ɓē sāā i nāā ngán Israel gə̄ kə ta kūl̄də́ yā ka̰ā̰ ké a rāān̄ yá̰a̰ gə̄ ń ni-əndā ta Moijə tə́ adə̄ əda kaadə́ gə̄ ní wa. 5Adə̄ ngán Israel gə̄ ndin̄ dan Kanaan gə̄ tə́ ō, Het gə̄ tə́ ō, Amor gə̄ tə́ ō, Periji gə̄ tə́ ō, Hibi gə̄ tə́ ō, Yebus gə̄ tə́ ō. 6Nin̄ táān̄ ngáńdə́ kə́ dəyá̰ gə̄ ō, adə̄n̄ ngáńdə́ kə́ dəyá̰ gə̄ táān̄ yādə́ kə́ dəngam gə̄ ō, nin̄ rāān̄ ɓesə̄ yādə́ gə̄ ō.
Ngé sarya gə̄
Otəniel
7Ngán Israel gə̄ rāān̄ yá̰á̰ kə́ nel̄ Kɔ́ɔ̄ɓē Nə́ɓā alé. Dɔdə́ ndígə̄nalən kɔ̄ɔ́, adə̄ rāān̄ ɓesə̄ Baal gə̄ ō, Asera gə̄ ō. 8Wōn̄g rāā Kɔ́ɔ̄ɓē sedə́ adə̄ əladə́ kem jī Kusan Risataim, mban̄g kə́ Mesopotami#3.8 Mesopotami: Á̰a̰ī Tkg 24.10 tə́. Ngán Israel gə̄ rāān̄ kəla yā Kusan Risataim ɓāl̄ sɔ́sɔ́. 9Nin̄ nōōn̄ kə̄ dɔ Kɔ́ɔ̄ɓē tə́ kadə̄ dḭḭ̄də́, anī Kɔ́ɔ̄ɓē əla kə nge kajədə́ kógə̄ḿ adə̄ ajədə́. I Otəniel ngōn̄ Kenas ń gidə Kaleb ní. 10Ndíĺ Kɔ́ɔ̄ɓē reē dɔ Otəniel adə̄ no o̰o̰ ɓē dɔ ngán Israel gə̄ tə́. Ni-aw̄ rɔ̄ɔ̄ tə́ anī Kɔ́ɔ̄ɓē əla Kusan Risataim mban̄g kə́ Mesopotami kem jīn tə́ adə̄ tetən rɔ̄ɔ̄. 11Loo ń noō tə́ ɓē tél ndi lɔm ɓāl̄ kutə sɔ́. Gō tə́ anī Otəniel ngōn̄ Kenas oy.
Ehud
12Ngán Israel gə̄ rāān̄ yá̰á̰ kə́ nel̄ Kɔ́ɔ̄ɓē aĺ ɓáý to̰. Adə̄ Kɔ́ɔ̄ɓē sə̄lā Egəlon mban̄g kə́ Moab dɔdə́ tə́. 13Egəlon ɔy Amon gə̄ ō, Amalek gə̄ ō, gōn tə́ reē rɔ̄ɔń ngán Israel gə̄. Nin̄ taān̄ ɓē kə́ Jeriko ń kāgə̄ túmbur gə̄ i ngá̰ý tū tə́ ní. 14Ngán Israel gə̄ rāān̄ ɓəlo yā mban̄g Egəlon ɓāl̄ kutə gidə i sɔ́sɔ́. 15Nin̄ nōōn̄ kə̄ dɔ Kɔ́ɔ̄ɓē tə́ kadə̄ dḭḭ̄də́. Anī Kɔ́ɔ̄ɓē əla kə nge kajədə́ kógə̄ḿ adə̄də́. Deē ní i Ehud ngōn̄ Gera. Ni i Benjamḛ ba i gel. Ngán Israel gə̄ tīrə̄n̄ dɔ yá̰a̰ adə̄nən̄ kadə̄ aw̄ń adə̄ Egəlon, mban̄g kə́ Moab. 16Ehud oo kəyā kə́ katə dām̄ jōó, kə́ ngālən asə kíl deē kógə̄ḿ. Do̰ō̰ kəyā ní dɔ ɓúrən kə́ ko̰ō̰ tə́, ba əla kūbə̄ dɔ tə́. 17Ba aw̄ kə dɔ yá̰á̰ kə́ tīr̄ ní kadə̄ Egəlon tə́. Tá Egəlon i de kə́ bo lútə́ lútə́. 18Dan ń Ehud adə̄n yá̰á̰ kə́ tīr̄ ní oy anī, ni-tél kə de gə̄ ń ətōn̄ yá̰á̰ ní. 19Dan ń aw̄ ugə̄n̄ loo ń ɓesə̄ mbal̄ gə̄ i tū tə́ á i loo kə́ ngɔr kə́ Gilgal ní anī tél dɔ tə́ aw̄ əda mban̄g na: Á mban̄g, najə̄ kə́ kadə̄ m-ə́daī to laā, ba i najə̄ kə́ kadə̄ kə́ de kə́ rang oō alé. Mban̄g əda ngé kəla yān gə̄ kadə̄ teēn̄ ndágá, anī nin̄ teēn̄ malang ba əya̰nən̄. 20Egəlon ndi i kem kújə kə́ dɔɔ́ kə́ kemən sɔl̄ lum tə́. Ehud ndɔ́tə̄ kə̄ rɔ̄n tə́ ba ədan na: Najə̄ ń kadə̄ m-ə́daī ní i najə̄ kə́ ḭḭ rɔ̄ Nə́ɓā tə́. Anī Egəlon ḭḭ kɔ̄ɔ́ dɔ kōr̄ kāgə̄ mbang yān tə́. 21Ehud əla jī gelən ɔrə̄ń kaskar dām̄ ɓúrən kə́ ko̰ó̰ ba ɔsəń kem mban̄g. 22Kəyā ní udə kem mban̄g tə́ malang kə̄ kūlən gēé. Yibə̄ mban̄g ɔr tan dɔ kəyā ní tə́, tɔdɔ̄ Ehud ɔr kəyā ní kɔ̄ɔ́ kem mban̄g tə́ alé. 23Gō tə́ anī Ehud utə̄ ta kújə kə lakélé ba teē kem ngōn̄ kújə́ kə́ ta róbə́ tə́ aw̄ kɔ̄ɔ́. 24Ngé kəla yā mban̄g gə̄ reē ugə̄n̄ anī a̰a̰n̄ ta róbə́ kújə i kə́ kutə́ kɔ̄ɔ́. Nin̄ ədan̄ na: Majanī mban̄g aw̄ i ta wa tə́ kem kújə́ kə́ sɔl̄ lum tə́. 25Banī kɔr rāādə́ loo ngóō tə́ kadə̄ mban̄g teē ta kújə. Anī nin̄ kɔ́ gə̄ unən̄ lakélé teēnəń ta. Ɓáa a̰a̰n̄ kadə̄ kɔ́ɔ̄də́ i kə́ oy kɔ̄ɔ́ adə̄ nīnə́n to nang tə́. 26a ɔrən̄ bā̰ā̰ ɓáý anī Ehud a̰ȳ aw̄ kɔ̄ɔ́. Ni-mān̄ loo ń ɓesə̄ mbal̄ gə̄ i tū tə́ ní ba a̰ȳ aw̄ Seira. 27Dan ń ugə̄ loo ní tə́ anī, kɔ̄ŕ tōw̄ dɔ mbal̄ yā Epəraim tə́ ɓāŕəń ngán Israel gə̄. Gō tə́ anī risən̄ kɔ̄ɔ́ dɔ mbalá, nəkɔ́ i kété no ngán Israel gə̄ tə́. 28Ni-ədadə́ na: Úniī gōḿ tɔdɔ̄ madə̄ ba̰ā̰sí gə̄ ń i de gə̄ kə́ dɔ nang kə́ Moab tə́ ní, Kɔ́ɔ̄ɓē əladə́ kem jīsí tə́ kɔ̄ɔ́ ɓá. Ngán Israel unən̄ gō Ehud, aw̄ taān̄ loo kudə Jurdḛ yā Moab gə̄. Əya̰n̄ deē kógə̄ḿ adə̄ mān̄ tū tə́ alé. 29Ndɔ̄ ń noō tə́ tɔ̄lə̄n̄ Moab gə̄ dūbūú kutə, kə́ ngan̄g ngan̄g gə̄ kə́ nin̄ i go̰ rɔ̄ɔ̄ gə̄ malang. De kógə̄ḿ kə́ teē gətóo. 30Əla gír ndɔ̄ ń noō tə́ ní Moab gə̄ əlan̄ dɔdə́ nang tə́ no ngán Israel gə̄ tə́ ō, ɓē tél ndi lɔm ɓāl̄ kutə̄ sɔ́sɔ́ ō.
Samgar
31De kə́ utə̄ gō Ehud i Samgar ngōn̄ Anat. Ni-tɔ̄l̄ Pilistin gə̄ ɓú mehḛ́ kə kāgə̄ rāā gír man̄g gēé. Ni-ajə ngán Israel gə̄ ō.
Currently Selected:
NGÉ SARYA 3: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.
