NGÉ SARYA 17
17
Loo ndɔ̄ȳ Nə́ɓā yā Mika
1De kógə̄ḿ ndi gō nang kə́ mbalá yā Epəraim tə́, rīn na i Mika. 2Ndɔ̄ kə́rēý tə́ anī deē ní əda kó̰o̰n na: Arjā̰a̰ yāí kə́ njáŕ sélē dūbú kə ɓú kógə̄ḿ ń deē ɓogə á ī-ndɔ̄ĺ ta kumḿ tə́ ní, to jīḿ tə́ laā, i mā n m-ɔ́y. Anī kó̰o̰n ədan na: Ngōnə̄ḿ, ādə̄ Kɔ́ɔ̄ɓē rāā majə seí. 3Mika tél kə sə́lē kə́ dūbú kə ɓú kógə̄ḿ ní adə̄ kó̰o̰n gogə́. Banī kó̰o̰n ədan na: Ngōnə̄ḿ, mā m-ɔ̄r̄ kam̄ nar ní m-ādə̄ Kɔ́ɔ̄ɓē i tām̄ yāí ḭ̄ tə́. Ba nar ní i yā rāań ɓesə̄ arjā̰a̰ kə́ nō horoó, adə̄ ngɔlaā m̄-tél kə nar ní m-ādī. 4Adə̄ dan ń Mika tél kə njáŕ sə́lē ní adə̄ kó̰o̰n gogə́ anī, kó̰o̰n ɔr̄ ɓú jōó danaá adə̄ kɔdə̄ nge nō yá̰a̰ horoó. Kɔdə̄ no njáŕ sə́lē ní horoó rāā ɓesə̄ tə́ ba aw̄ əndān̄ kem kújə yā Mika tə́. 5Tá Mika ngeé ń toō i de kə́ udə mbal̄ kə nja dɔɔ́ ɓēé looneé kété adə̄ Nə́ɓā. Loo ń noō tə́ Mika mēr̄ rāā ɓesə̄ Epod kógə̄ḿ ō, ɓesə̄ Terapim gə̄ ō, ba ɔr̄ ngōnən kógə̄ḿ əndān nge tun̄ yá̰a̰ yān tə́. 6Dan ń ngeé ń noō tə́ ní mban̄g gətóo dɔ nang kə́ Israel tə́, adə̄ náā nəkɔ́ a rāā i yá̰á̰ ń kemən gḛy ní.
7Balsáá kógə̄ḿ ndi Betlehem kə́ Juda tə́, ni i ngōn̄ Lebi ba nam̄ i kə ɓē kə́ Betlehem ń i ɓē yā gír kaa kógə̄ḿ kə́ Juda ní. 8Ni-əya̰ ɓē kə́ Betlehem kə́ Juda ba aw̄ a sāā loo kə́ rang yā namə̄ń. Ni-aw̄ bátə́ teē ɓē yā Mika tə́, gō nang kə́ mbalá yā Epəraim tə́. 9Mika dəjen na ké ḭḭ i rá wa? Anī tél ədan na ni na i ngōn̄ Lebi kə́ Betlehem kə́ Juda tə́, ba na n-sāā na i loo kə́ yā namə̄ń. 10Anī Mika ədan na kə ndi looneé ba kə tél bɔbə̄n ō, nge tun̄ yá̰a̰ yān ō. Ba n-a n-adə̄n njáŕ sə́lē arjā̰a̰ kutə kə dɔ ɓāl̄ gə̄ ō, n-a n-adə̄n kūbə̄ gə̄ ō, yá̰a̰ kəsa ō. 11Ngōn̄ Lebi ní ndigə, adə̄ ndi kə Mika. Mika rāān i ngōn̄ kemən tə́. 12Ni-əndān kem kəla tun̄ yá̰á̰ tə́ adə̄ tél nge tun̄ yá̰a̰ yān ō, adə̄n loo ɓēé looneé adə̄ ndiń ō. 13Mika əda na ngɔlaā ní nan-ger̄ kadə̄ Kɔ́ɔ̄ɓē a rāā majə seneé tɔdɔ̄ ngōn̄ Lebi ń toō na tél nge tun̄ yá̰a̰ yān.
Currently Selected:
NGÉ SARYA 17: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.
