HEBƏRO 8

Jeju i ngol ngé tun̄ yá̰a̰ gə̄ yājí

1Najə̄ kə́ bo ngá̰ý dɔ yá̰á̰ ń j-əda tə́ ní n toó: J-awī kə ngol ngé tun̄ yá̰a̰ gə̄ kə́ tītə̄ ń noō, tɔdɔ̄ ni-ndi dɔ jī ko̰ Nə́ɓā tə́ dɔ rā̰ tə́, nge ń ndi dɔ kōr̄ kāgə̄ mbang yān tə́ ní. Nə́ɓā i tɔ́gə́ kə́ dɔ tɔ́gə gə̄ tə́ malang. 2Ni-rāā kəla kem kújə yā Kɔ́ɔ̄ɓē tə́, kumən na i kem kújə tandā kə́ rɔ̄kum ń i Kɔ́ɔ̄ɓē n i nge kudən ba i deē ndul alé ní tə́.

3Ngol ngé tun̄ yá̰a̰ gə̄ ní, əndān̄də́ i kadə̄ nin̄-adə̄n̄ Nə́ɓā yá̰a̰ ndējə̄ gə̄ ō, dā̰ kə́ tɔ̄l̄ ba tun̄ gə̄ ō. Loo ń noō tə́ ní i gáŕ kadə̄ Jeju ənge yá̰á̰ kə́ yā ndējə̄ ō. 4Nə́ngētə́ gēé Kərist i dɔ nang tə́ laā anī, ni a tél nge tun̄ yá̰a̰ alé. Tɔdɔ̄ ngé tun̄ yá̰á̰ kə́ ngé kadə̄ Nə́ɓā yá̰a̰ ndējə̄ kə gō ndū najə̄ gə̄ ndin̄ laā kɔ̄ɔ́ ɓá. 5Kəla ń ngé tun̄ yá̰a̰ gə̄ ngeé ń toō a rāān̄ ní, i ndíĺ yá̰a̰ karī. Nin̄-ndájə̄n̄ i yá̰á̰ kə́ dɔ rā̰ tə́. Tɔdɔ̄ dan ń Moijə a rāā yā rāā kújə tandā ní, Nə́ɓā ədan na: Ā ī-rāā yá̰a̰ malang kadə̄ a to i tītə̄ nge ń m-ɔ́jiī dɔ mbalá ní#8.5 Ɔjənən̄ dɔ mbalá ní: Á̰a̰ī Teē 25.40. 6Ba kəla yā Jeju i kəla kə́ bo tɔȳ yā gotə ngé tun̄ yá̰a̰ gə̄. Tɔdɔ̄ ni i nge ra mbənā Nə́ɓā tə́ kə de gēé tām̄ yā madə̄ naā kə́ majə ngá̰ý tɔȳ tə́ ō, madə̄ naā ní i madə̄ naā kə́ ndi i dɔ míndə́ kə́ kənī kə́ majə ngá̰ý tɔȳ tə́ ō.

7Ré madə̄ naā kə́ kété i madə̄ naā kə́ kanjə̄ najə̄ dɔ tə́ anī, a tūrə̄n̄ gír kɔ̄ɔ́ kə madə̄ naā kə́ nge ko̰ jōó alé. 8Ba yá̰á̰ kə́ gō tə́ aĺ gə̄ kə́ Nə́ɓā gɔŕyɔ̄ deē yān gə̄ najə̄n tə́ to noó, ni-əda na:

Kɔ́ɔ̄ɓē əda na: Ndɔ̄ gə̄ a reēn̄ noó,

na n-rāā kadə̄ m-ā m-ə́hɔ madə̄ naā kə́ kijə kə ngán Israel gēé ō,

kə ngán Juda gēé ō.

9Madə̄ naā ní a to i tītə̄ madə̄ naā ń m-ə́hɔ kə kaadə́ gēé,

ndɔ̄ ń m-ə́hɔń ta jīdə́

m̄-teēń sedə́ kɔ̄ɔ́ kem ɓē kə́ Ejiptə tə́ ní alé.

Kɔ́ɔ̄ɓē əda ɓáý to̰:

Nin̄-ran̄ dɔ madə̄ naā yāḿ tə́ alé,

adə̄ mā m-ə́yá̰də́ kɔ̄ɔ́.

10Ni-əda ɓáý to̰ na:

Gō ndɔ̄ gə̄ ngeé ń noō tə́ ní, madə̄ naā ń m-ā m̄-ə́hɔ kə ngán Israel gēé ní toó:

M-ā m-ə̄ndā ndū najə̄ yāḿ gə̄ i tū kur̄ dɔdə́ tə́ ō,

m-ā m̄-ndang ndū najə̄ yāḿ gə̄ i ngarān̄g kemdə́ tə́ ō.

Mā i Nə́ɓā yādə́ ō,

nin̄ i deē yāḿ gə̄ ō.

11Deē kógə̄ḿ dandə́ tə́ kə́ yā ndóō de kə́ ɓē yān tə́, aláa ngōkó̰o̰n kəda na:

Ī-ger̄ Kɔ́ɔ̄ɓē ní, a gətóo.

Tɔdɔ̄ nin̄ malang ger̄mə̄n̄, ngán gə̄gē ngatɔ́gə́ gə̄gē.

12Tɔdɔ̄ yá̰á̰ kə́ gōtə́ aĺ gə̄ ń nin̄-rāān̄ ní, m-ā mā̰ȳ rɔ̄ḿ dɔ tə́ ō,

a əga kemḿ dɔ majaĺ yādə́ gə̄ tə́ to̰ aĺ ō#8.12 K. 12: Á̰a̰ī Jer 31.31-34.

13Dan ń Nə́ɓā ɔr̄ najə̄ yā madə̄ naā kə́ kijə ní, ni-əhɔ madə̄ naā kə́ ta kəga dɔ i madə̄ naā kə́ jóó tə́. Ba yá̰á̰ kə́ jóo i yá̰á̰ kə́ a tɔgə ɓə́gá ō i yá̰á̰ kə́ a gətóo kɔ̄ɔ́ ngɔr ō.

Currently Selected:

HEBƏRO 8: SARDC

Highlight

Copy

Compare