HEBƏRO 10
10
1 Ndū najə̄ yā Moijə ɔjə kɔ̄r̄ kum yá̰a̰ kə gōgēé alé. Ni i ndíĺ yá̰á̰ kə́ majə gə̄ ń ndɔ̄ń tə́ a adə̄n̄ ní. Ni-dəje kadə̄ adə̄n̄ yá̰a̰ tun̄ kə́ kógə̄ḿ beē kə̄ nja naā tə́ kə dɔ ɓāl̄ gə̄ kanjə̄ dəba. I yá̰á̰ ń noō n ngé gə̄ ń ndɔ́tə̄n̄ kə̄ rɔ̄ Nə́ɓā tə́ ní, ni asə rāādə́ kadə̄ majə ɔtə̄n̄ kə taá alé ní. 2Ré i beé aĺ anī, ngé rāā kəla kadə̄ Nə́ɓā tītə̄ ń noō gə̄ ní, a tə́gon̄ majaĺ yādə́ nja kógə̄ḿ kadə̄ gír gāngəń. Nin̄ a gerə̄n̄ gō majaĺ kə́ nin̄-rāān̄ to̰ aĺ ō, deē a ndējə̄ yá̰á̰ kə́ tun̄ to̰ aĺ ō. 3Banī yá̰á̰ kə́ tun̄ gə̄ ngeé ń toō ní, a ter̄ i kem de gə̄ dɔ majaĺ yādə́ gə̄ tə́ kə dɔ ɓāl̄ gə̄ kanjə̄ dəba. 4Tɔdɔ̄ mósə man̄g kə́ bəra gə̄ ō, bal bə̄yā̰ gə̄ ō, asə kun majaĺ kɔ̄ɔ́ alé.
5Adə̄ dan ń Kərist a rāā yā reē dɔ nang tə́ ní, ni-əda Nə́ɓā na:
Ḭ̄ ī-gḛy yá̰á̰ kə́ tun̄ aĺ ō, yá̰á̰ kə́ ndējə̄ aĺ ō,
banī ḭ̄ ī-rāā dā̰ rɔ̄ḿ ādə̄m̄.
6Dā̰ kə́ tɔ̄l̄ ba róō horoó ní ō,
yá̰á̰ kə́ tun̄ tām̄ majaĺ tə́ ō ní, nelī alé.
7Loo ń noō tə́ ní m-ə́da na: Nə́ɓā mā n toó,
m̄-reē yā rāā yá̰á̰ ń kemií ndigə ndigə tə́ ní,
kə gō ń ndangən̄ ɔjənə̄ń dɔḿ kem ndāŕ ndang najə̄ kə́ ɓír̄ gidə naā tə́ ní.
8Najə̄ ń ni-əda kété ní n toó: Ḭ̄ ī-ndigə yá̰á̰ kə́ tun̄ aĺ ō, yá̰á̰ kə́ ndējə̄ aĺ ō, yá̰á̰ tun̄ kə́ róō horoó aĺ ō, yá̰á̰ kə́ tun̄ tām̄ yā majaĺ tə́ aĺ ō, yá̰a̰ gə̄ ń noō nelī alé. Tá i ndū najə̄ n mēr̄ ndējə̄ yá̰á̰ kə́ tun̄ gə̄ ń noō malang ní. 9Gō tə́ anī ni-əda na: Mā n toó, m̄-reē yā rāā yá̰á̰ ń kemií ndigə ní tə́. Adə̄ ni nujə yá̰a̰ tun̄ kə́ jóo gə̄ kɔ̄ɔ́ ba əndāń yān gotoó. 10Kərist rāā yá̰á̰ ń Nə́ɓā ndigə ní. Ni-adə̄ rɔ̄n yá̰a̰ tun̄ tə́ nja kógə̄ḿ kadə̄ gír gāngəń. Loo ń noō tə́ majaĺ yājí i kə kun kɔ̄ɔ́ dɔjí tə́ adə̄ jə-téliī de kə́ kɔr̄ kam̄ tām̄ yā Nə́ɓā gə̄ tə́.
11 Ngé tun̄ yá̰a̰ gə̄ kógə̄ḿ kógə̄ḿ a ran̄ kə njdadə́ kə́ dɔɔ́ kə ndɔ̄ gə̄ ndɔ̄ gə̄ yā rāań kəla yā Nə́ɓā. I yá̰a̰ tun̄ kə́ kógə̄ḿ beē nəkɔ́ ń noō n nin̄ a ndējə̄n̄ ngándáńg ní, banī yá̰a̰ tun̄ ní asə kun majaĺ kɔ̄ɔ́ alé. 12Ba Kərist ni ndējə̄ yá̰a̰ tun̄ kə́ tām̄ yā majaĺ tə́ i nja kógə̄ḿ beē. Gō tə́ anī ni-ndi dɔ jī ko̰ Nə́ɓā tə́ ngándáńg. 13Ngɔlaā ní ndi a ngóō i kadə̄ Nə́ɓā əla madə̄ ba̰ā̰n gə̄ gír njan tə́ tītə̄ kōr̄ kāgə̄ taā gír nja beé#10.13 K. 12-13: Á̰a̰ī Pā 110.1. 14Tɔdɔ̄ i kə ta kūl̄ yá̰a̰ tun̄ kə́ kal kógə̄ḿ beē, ni rāań kadə̄ ngé gə̄ ń ni-ɔr̄ kam̄də́ tayā télən̄ de kə́ majə ɔtə̄n̄ kə taá kə́ njɔ́ḿ gə̄ tə́ ní.
15 Ndíĺ kə́ Táĺ ɔjəjí kə́ rɔ̄kum tə́ ō. Tɔdɔ̄ najə̄ ń ni-əda ta kəga dɔ ni n toó:
16Kɔ́ɔ̄ɓē əda na: Gō ndɔ̄ gə̄ ngeé ń noō tə́ ní,
madə̄ naā ń m-ā m-ə́hɔ sedə́ ní n toō,
m-ā m̄-tə́ndā ndū najə̄ yāḿ gə̄ ngarān̄g kemdə́ tə́ ō,
m-ā m̄-ndangdə́ tū kur̄ dɔdə́ tə́ ō.
17Gō tə́ anī ni-əda na: A əga kemḿ dɔ majaĺ yādə́ gə̄ to̰ aĺ ō, dɔ yá̰á̰ rāādə́ kə́ gō tə́ aĺ gə̄ tə́ to̰ aĺ ō. 18Dan ń mā̰ȳn̄ rɔ̄də́ dɔ majaĺ gə̄ tə́ kɔ̄ɔ́ ní, deē a ndējə̄ yá̰a̰ tām̄ yā majaĺ tə́ to̰ alé.
Ādə̄ jə-ndɔ́tī ngɔr kə̄ rɔ̄ Nə́ɓā tə́
19I beé ní, ngákó̰ó̰ḿ gə̄, j-asiī kudə kem loo kə́ táĺ ngá̰ý tə́ kanjə̄ ɓōĺ yá̰á̰ kógə̄ḿ kə ta kūl̄ mósə Jeju. 20Ni-teē ta róbə́ kə́ kijə ō, kə́ kə kumuú ō, tū kūbə̄ gān̄g kum kújə́ tə́ adə̄jí, kumən na teē i tū dā̰ rɔ̄n nəkɔ́ tə́. 21J-awī kə ngol ngé tun̄ yá̰a̰ gə̄ kə́ əndānən̄ dɔ kújə yā Nə́ɓā tə́. 22I beé ní, ādə̄ jə-ndɔ́tī ngɔr kə̄ rɔ̄ Nə́ɓā tə́, kə kemjí kə́ rɔ̄kum ō, kə taā kem kə́ mámák ō. Tām̄ tə́gon̄ yá̰á̰ kə́ gōtə́ aĺ gə̄ ń rāān̄ adə̄ kemjí əhɔjí kə najá ní kɔ̄ɔ́ ō, tə́gon̄ rɔ̄jí kə man̄ kə́ unjə̄ njáý njáý ō. 23Jə-ngɔ̄mī yá̰á̰ ń j-əndāī kemjí dɔ tə́ á j-ədaī najə̄n ní. Tɔdɔ̄ Nə́ɓā ń ənī míndən adə̄jí ní i nge ra dɔ ndūn tə́. 24J-a̰ā̰ī gō naā kadə̄ j-ɔsiī kíl naā kə̄ dɔɔ́ loo tár naā tə́ ō, loo rāā kəla yá̰á̰ kə́ majə tə́ ō. 25Jə-lōōī kəya̰ loo kán̄ naā yājí kɔ̄ɔ́ tītə̄ ń i jī bēl̄ loo rāān yā de kə́rēý gə̄ ní. Banī j-adī naā tɔ́gə, tɔdɔ̄ á̰a̰ī kadə̄ dɔ ndɔ̄ yā Kɔ́ɔ̄ɓē i ngɔr.
26Tɔdɔ̄ ré jə-gerī najə̄ kə́ rɔ̄kum pá tá jə-na̰yiī kə̄ loo rāā yá̰á̰ kə́ majaĺ tə́ kə gō kem ndigə yājí anī, gotə yá̰a̰ tun̄ kə́ tām̄ majaĺ tə́ gətóo. 27Yājí i yā kadə̄ ɓōĺ kə́ ngá̰ý rāājí tá jə-ngóōī i sarya ō, hor kə́ təngā ngá̰ý kə́ a o̰o̰ ngé ba̰ā̰ Nə́ɓā gə̄ ní ō#10.27 K. 27 Á̰a̰ī Ij 26.11. 28Deē ń mān̄ dɔ ndū najə̄ yā Moijə ní, a tɔ̄l̄nən̄ i kanjə̄ kadə̄ kumdə́ o̰o̰də́ tām̄ yān tə́ ba a oy kə gō najə̄ kɔr̄ de kə́ kum tə́ gə̄ jōó aláa mətá#10.28 K. 28: Á̰a̰ī Ndū 19.15. 29Deē ń a tə́ɓā Ngōn̄ Nə́ɓā njan tə́ ō, rāā mósə́ ń Nə́ɓā əhɔń madə̄ naā kə de gēé ní yá̰á̰ kə́ karī tə́ ō, mósə́ ń unnəń majaĺ yān gə̄ kɔ̄ɔ́ dɔn tə́ adə̄ ni tél de kə́ kɔr̄ kam̄ tayā ō, tájə̄ Ndíĺ ń kem majə yā Nə́ɓā adə̄jí ní ō anī, ī-gírī kadə̄ yá̰á̰ kə́ tōr̄ ń majə kadə̄ rāān̄ seneé tām̄ majaĺ yān tə́ ní, i yá̰á̰ kə́ tōr̄ kə́ tɔȳ nge ń noō aĺ a? 30Tɔdɔ̄ jə-gerī nge ń əda na: I mā n i nge dal ba̰ā̰ ní, i mā n i nge kəndā nja de gə̄ tām̄ kəla rāādə́ gə̄ tə́ ní. Ni-əda ɓáý to̰ na: Kɔ́ɔ̄ɓē a gān̄g sarya dɔ deē yān gə̄ tə́. 31Kəsō jī Nə́ɓā kə́ ndi kə kumneé tə́ i yá̰á̰ kə́ to ɓōĺ ngá̰ý.
32Ādə̄ əga kemsí dɔ yá̰á̰ ń rāāsí kété tə́ ní. Kem ndɔ̄ gə̄ ngeé ń noō tə́ ní dan ń sḭḭ̄ ə́ngeī loo kə́ unjə̄ kow yā Nə́ɓā ní, á̰a̰ī tápə̄ ngá̰ý gō tə́, banī sḭḭ̄ ī-raī ngan̄g ta rɔ̄ɔ̄ ní tə́. 33Kə́rēý gə̄ ɓáa tájə̄n̄sí ō, rāān̄sí yá̰á̰ kə́ tōr̄ ta kum de gə̄ tə́ malang ō. Kə́rēý gə̄ anī sḭḭ̄ ī-rāāī kə ngé gə̄ ń a rāān̄də́ yá̰á̰ kə́ beé gə̄ ní ō. 34Tɔdɔ̄ sḭḭ̄ á̰a̰ī tápə̄ naā tə́ kə ngé gə̄ n əhɔn̄də́ dəngáyá ní. Ba dan ń táān̄ yá̰a̰ kənge yāsí gə̄ jīsí tə́ kɔ̄ɔ́ ní, rɔ̄sí nel̄sí, tām̄ ī-gerī kadə̄ yá̰á̰ ń sḭḭ̄ ə́ngeī ní, i yá̰á̰ kə́ majə tɔȳ kə́ a to ngándáńg. 35I beé ní, ī-lōōī tḭ̄ḭ̄ ta kəndā kem dɔ tə́ yāsí kɔ̄ɔ́, tɔdɔ̄ a adə̄sí yá̰a̰ kəndā nja yāsí kə́ bo ngá̰ý. 36Majə kadə̄ ī-tə́gāī tasí ī-rāāīneé yá̰á̰ ń Nə́ɓā ndigə ní, yā kəngeń yá̰á̰ ń ni-ənī míndə dɔ tə́ yā kadə̄sí ní ō. 37Tɔdɔ̄ makətūbə̄ yā Nə́ɓā əda na:
Na̰y kum mbang sḛ́ý ɓáý, na̰y sḛ́ý beē ngóy,
anī nge ń sɔɔ̄ kadə̄ reē ní a reē.
Na a ɔr bā̰ā̰ alé.
38Deē ń i de kə́ gōtə́ yāḿ ní a ndi kə kumneé i kə ta kūl̄ taā kem#10.38 K. 38a: Á̰a̰ī Hab 2.4; Rom 1.17; Gal 3.11.
Banī ré ni-ɔr̄ rɔ̄n kə́ gogə́ anī, a nelə̄m̄ seneé alé.
39Jḭḭ̄ i de gə̄ kə́ yā kɔr̄ rɔ̄jí kə̄ gogə́ yā kudə kɔ̄ɔ́ alé. Jḭḭ̄ i de kə́ ngé taā kem gə̄ ō, jə-ra i dɔ róbə kajə tə́ ō.
Currently Selected:
HEBƏRO 10: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.
