ESDRAS 7

Esdras nge tun̄ yá̰a̰

1Gō yá̰a̰ gə̄ ń noō tə́ anī ɓāl̄ ko̰o̰ ɓē yā Artajerses mban̄g kə́ Persə tə́ ní, Esdras ngōn̄ Seraya kə́ ngōn̄ Ajaria kə́ ngōn̄ Hilkia 2kə́ ngōn̄ Salum kə́ ngōn̄ Ahitub 3kə́ ngōn̄ Amaria kə́ ngōn̄ Ajaria kə́ ngōn̄ Merayot 4kə́ ngōn̄ Jeraya kə́ ngōn̄ Uji kə́ ngōn̄ Buki 5kə́ ngōn̄ Abisua kə́ ngōn̄ Pinas kə́ ngōn̄ Eleajar kə ngōn̄ Aaro̰ ń i ngol ngé tun̄ yá̰a̰ gə̄ ní, 6ḭḭ Babilon reē ugə̄. Ni i nge ndang makətūbə̄ kə́ ger̄ ndóō de gə̄ ndū najə̄ ń Kɔ́ɔ̄ɓē Nə́ɓā yā Israel adə̄ Moijə ní ngá̰ý. Jī Kɔ́ɔ̄ɓē Nə́ɓā yān i dɔn tə́ adə̄ mban̄g adə̄n yá̰a̰ malang ń ni-dəje ní. 7Ngán Israel gə̄ ō, ngé tun̄ yá̰a̰ gə̄ ō, ngán Lebi gə̄ ō, gōsə̄ pā gə̄ ō, ngé ngɔ̄m̄ ta róbə́ kújə gə̄ ō, ngé kəla gə̄ ō ní, kə́rēý gə̄ tél reēn̄ gogə́ Jerusalem ɓāl̄ ko̰o̰ ɓē yā Artajerses kə́ nge ko̰ sīrí tə́. 8Esdras reē sedə́ ō. Nin̄ reē ugə̄n̄ i kem nāā kə́ nge ko̰ mí tə́. 9Ni-əndā ndɔ̄ kɔŕdə́ dɔɔ́ Babilon i kə ndɔ̄ kə́ ta kəga dɔ yā nāā kə́ ta kəga dɔɔ́. Ba kə ndɔ̄ kə́ ta kəga dɔ yā nāā kə́ nge ko̰ mí anī ugə̄ Jerusalem. Tɔdɔ̄ Kɔ́ɔ̄ɓē Nə́ɓā yān ngɔ̄mən ta yá̰á̰ kə́ majaĺ gə̄ tə́. 10Tām̄ Esdras əndā rɔ̄n ta ndóō ndū najə̄ yā Kɔ́ɔ̄ɓē tə́ ō, yá̰á̰ ń ndū najə̄ əda ní ni-əndā rɔ̄n ta tə́ rāā ō, tá yá̰a̰ gə̄ ń ndū najə̄ əndā dɔ de gə̄ tə́ kadə̄ rāān̄ ní ō, jī bēl̄ loo rāā yá̰a̰ gə̄ ń ndū najə̄ ɔjə ō ní, ni-əndā rɔ̄n ta tə́ ndóō ngán Israel gə̄ ō.

Kəla gə̄ ń mban̄g Artajerses adə̄ Esdras ní

11Najə̄ ń mban̄g Artajerses ndang adə̄ Esdras nge tun̄ yá̰á̰ kə́ ngé ndóō de gə̄ ndū najə̄ ō, kə́ nge ndang yá̰a̰ gə̄ ń Kɔ́ɔ̄ɓē əda kadə̄ yā rāā ní ō, kə́ nge ndang ndū najə̄ gə̄ yā Kɔ́ɔ̄ɓē kə́ tām̄ yā Israel tə́ ō ní, n toó:

12m̄-rāāsí lápə́ya! I mā Artajerses, mban̄g kə́ dɔ mban̄g gə̄ tə́ n m̄-ndang makətūbə̄ ń toō m-ādə̄ Esdras nge tun̄ yá̰a̰, kə́ nge ndóō de gə̄ ndū najə̄ yā Nə́ɓā kə́ dɔ rā̰ tə́ ní. Ta gotə najə̄ kə́ rang gə̄ i ta tə́ noō ɓáý to̰.

13 Israel gə̄ malang kə́ gō nang yāḿ tə́ ń gḛyn̄ kaw̄ Jerusalem, adə̄ i de kə́ karī gə̄ ō, ngé tun̄ yá̰a̰ gə̄ ō, ngán Lebi gə̄ ō ní, m-ə́da kadə̄ əya̰n̄də́ kadə̄ aw̄n̄ seí. 14I mə̄kɔ́ ō, ngé kadə̄ kɔjə̄ yāḿ kə́ sīrí gə̄ ō n j-əlasí Jerusalem ō, gō nang kə́ Juda tə́ ō ní. I kadə̄ āw̄ ə̄ndā ma̰ȳ loo ɓōĺ ń de kə́ kemeé gə̄ a ɓōlə́n̄ ndū najə̄ yā Nə́ɓā yāí ń makətūbə̄n to jīí tə́ toō. 15Tá yá̰á̰ kə́ rang i kadə̄ j-əlaī kə gində̄ arjā̰a̰ ō, lɔ́r ō ń mā ō ngé kadə̄ kɔjə̄ yāḿ gə̄ ō jə-gḛy ndejə̄ Nə́ɓā kə́ Israel tə́ ń kújə yān i Jerusalem ní. 16Gində̄ arjā̰a̰ ō, lɔ́r malang ō ń ngán Israel madí gə̄, adə̄ i ngé tun̄ yá̰a̰ gə̄ aké i de kə́ karī gə̄ a adə̄n̄ kə gō kem ndigə yādə́ nin̄ kɔ́ gɔ̄ɔ́ tām̄ yā kújə yā Nə́ɓā yādə́ kə́ Jerusalem tə́ á ā ī-taā jīdə́ tə́ gō nang kə́ Babilon tə́ ní, ā ɔ́y malang yā kaw̄ń ō. 17Gində̄ arjā̰a̰ ngeé ń toō ní, ré ūgə̄ nú anī, ā ə̄ndā kumií gō tə́ majə yā mangəń man̄g kə́ bəra gə̄ ō, bal batə̄ gə̄ ō, ngán batə̄ gə̄ ō, yá̰a̰ malang kə́ tām̄ yā yá̰a̰ ndējə̄ kə́ rāā kə kōó tə́ kə́ yā ndējə̄ dɔdə́ gə̄ tə́ ō, kasə nduú kə́ yā tə́te dɔdə́ gə̄ tə́ ō, ba ā ī-ndējə̄ yá̰a̰ gə̄ ń noō malang dɔ loo tun̄ yá̰á̰ tə́, kem kújə yā Nə́ɓā yāsí tə́ Jerusalem. 18Gō tə́ anī gotə gində̄ arjā̰a̰ ō, gotə lɔ́r ō ń a teē ní, ḭ̄ ō madí gə̄ ō ɔ́yiī ī-rāāīneé yá̰á̰ ń á̰a̰ī ta kumsí tə́ kadə̄ i yá̰á̰ kə́ majə ní. Banī kadə̄ i kə gō ń kem Nə́ɓā yāsí ndigə ní tá. 19Ngáń gájə́ yá̰a̰ gə̄ ń adə̄nī yā rāań kəla kem kújə yā Nə́ɓā yāí tə́ ní, ī-tə́ndādə́ ta kum Nə́ɓā yāí tə́ Jerusalem. 20Ré i yā kadə̄ ī-rāā yá̰á̰ kə́ rang gə̄ tū kújə yā Nə́ɓā yāí tə́ ɓáý anī, ɔ́y nar kə́ kújə ngɔ̄m̄ nar yā mban̄g tə́ ī-rāań.

21Mā mban̄g Artajerses m-ə́da ngé ngɔ̄m̄ nar gə̄ malang kə́ gidə bā Opəratə kə́ dām̄ kə́ no ɓē tə́ kadə̄ rāān̄ yá̰a̰ malang ń Esdras nge tun̄ yá̰á̰ kə́ nge ndóō de gə̄ ndū najə̄ yā Nə́ɓā kə́ dɔ rā̰ tə́ a dəjedə́ ní kə gōó. 22Nin̄ a adə̄nən̄ gində̄ arjā̰a̰ bátə́ kadə̄ kɔȳn asə kəlōo 3 000 ō, kōō gémē bátə́ kadə̄ kɔȳn asə kəlōo 30 000 ō, kasə nduú bátə́ kadə̄ asə lítər 4 000 ō, yibə̄ bátə́ kadə̄ asə lítər 4 000 ō, a adə̄nən̄ katə̄ kanjə̄ tə́da kɔȳn ō. 23Yá̰a̰ malang ń Nə́ɓā kə́ dɔ rā̰ tə́ a əda tām̄ yā kújə yān tə́ ní, ādə̄ i kə́ rāā kə gōó, na sōgə́ wōn̄g rāān kə ɓē ko̰o̰ yā mbangāá ō, kə mbangāá ō, kə ngánən gēé ō. 24Tá j-əda ngé ngɔ̄m̄ nar gə̄ kadə̄ gerə̄n̄ ɓáý to̰ na deē a taā tīr̄ aké lambóo jī ngé tun̄ yá̰a̰ gə̄ tə́ aĺ ō, jī ngán Lebi gə̄ tə́ aĺ ō, jī gōsə̄ pā gə̄ tə́ aĺ ō, jī ngé ngɔ̄m̄ ta róbə́ kújə gə̄ tə́ aĺ ō, jī ngé kəla gə̄ tə́ aké de kə́ rang kə́ dan ngé rāā kəla gə̄ kə́ kem kújə́ ń toō tə́ aĺ ō, nin̄ a əgān̄ lambóo róbə aĺ ō.

25Ba ḭ̄ Esdras, ī-tə́ndā ngé sarya gə̄ ō, ngār sarya gə̄ ō, kə kum kedə̄ yā Nə́ɓā yāí ń makətūbə̄n to jīí tə́ ní, ādə̄ gāngə̄n̄ sarya yā de gə̄ malang kə́ gō nang kə́ gidə bā Opəratə kə́ dām̄ kə́ no ɓē tə́ ń gerə̄n̄ ndū najə̄ yā Nə́ɓā yāí ní. Ba de gə̄ ń gerə̄n̄ aĺ ní, ī-ndóōīdə́ ādə̄ gerə̄n̄. 26Deē ń a mbātə́ rāā yá̰á̰ ń ndū najə̄ yā Nə́ɓā yāí əda ní kə gōó ō, a mbātə́ rāā yá̰á̰ ń ndū najə̄ yā mban̄ g əda ní kə gōó ō anī, a gāngə̄n̄ dəngáy koy dɔn tə́, aláa a ɔgə̄nən̄ ndi kem ɓē yān tə́, aláa əndān̄ lamán dɔn tə́, aláa a ənīnən̄ dəngáyá.

Esdras tɔ̄ȳ Nə́ɓā

27Ādə̄ de gə̄ tɔ̄ȳn̄ Nə́ɓā yā kaají gə̄ ń rāā adə̄ mban̄g rɔȳ kújə yā Kɔ́ɔ̄ɓē kə́ kem ɓē kə́ Jerusalem tə́ beé ní! I ni n rāā adə̄ gír̄ ń noō reē kem mban̄g tə́ ní. 28Kɔ́ɔ̄ɓē ɔjə kem majə ń rāā seḿ ní kə̄ ndágá ta kum mban̄ g tə́ ō, ngé kadə̄ kɔjə̄ yān gə̄ tə́ ō, de kə́ bo yān gə̄ malang ń ndi gīrə̄n̄ gidən ní tə́ ō. Loo ń noō tə́ m-ə́nge tɔ́gə tɔdɔ̄ jī Kɔ́ɔ̄ɓē Nə́ɓā yāḿ i dɔḿ tə́, adə̄ m-ɔ́sə nja ngār kə́rēý gə̄ kə́ Israel tə́ kə naā tə́ kadə̄ aw̄n̄ seḿ.

Currently Selected:

ESDRAS 7: SARDC

Highlight

Copy

Compare