DANIEL 2
2
Nī kə́ ta kəga dɔ ń rāā Nabukodonosor ní
1Nī kógə̄ḿ rāā mban̄g Nabukodonosor kem ɓāl̄ ko̰o̰ ɓē yān kə́ nge ko̰ jōó tə́. Nī ní rāā adə̄ ɓōĺ rāān ō, ɓīī ra n to̰ aĺ ō. 2Anī mban̄g əda kadə̄ ɓārə́n̄ mbōlí gə̄ ō, ngé tə̄ɓā ndíĺ kə́ majaĺ gə̄ ō, ngé kəga gə̄ ō, kɔsə̄ sāā gə̄ ō, kadə̄ reē ɔjənən̄ kum nī ń rāān ní. Nin̄ reēn̄ ran̄ non tə́, 3anī ədadə́ na nī kógə̄ḿ na rāān kə ɓōló ngá̰ý, adə̄ na n-gḛy kadə̄ kə ədanən̄ nī ń rāān ní. 4Kɔdə̄ sāā gə̄ tūr̄ ədan̄ mban̄g kə ta Aram na:
Mban̄g, ādə̄ dɔí ngan̄g májə́ májə́! Ə́dájí nī ń rāāī ní, anī j-a j-ɔjiī kum. 5Mban̄g tél ədadə́ na yá̰á̰ ń na n-əda wáńg kə̄ ndágé ní n toó: Ré na ədanən̄ gotə nī aĺ ō, na ɔjənən̄ kum aĺ ō anī, na a gángə̄n̄də́ naā tə́ bét bét kɔ̄ɔ́ ō, na kújə yādə́ gə̄ na télən̄ loo ɓōkə́ yá̰á̰ kə́ yḛr gə̄ ō. 6Ba ré na ədanən̄ gotə nī ní ō, na ɔjənən̄ kum ō anī, na n-a n-adə̄də́ kadə̄ karī gə̄ ngá̰ý ō, na n-ā n-ɔr tadə́ ngá̰ý ō. Adə̄ kə ɔjənən̄ gotə nī ní ō, kə ɔjənən̄ kum ō!
7Ngé mbōlí gə̄ tél ədan̄ mban̄g nja kə́ nge ko̰ jōó na:
Mban̄g ɔjəjí gotə nī ń rāāī ní anī j-a j-ɔjiī kum. 8Mban̄g tūr̄ ədadə́ na kə́ rɔ̄kum tə́ na n-ger̄ kadə̄ sāān̄ i kənge kum mban̄g dɔ madə̄ tə́ tɔdɔ̄ na a̰a̰n̄ kadə̄ n-ənī ndūn kɔ̄ɔ́. 9ré na ɔjənən̄ kum nī ń na rāān ní adə̄ na n-ger̄ aĺ anī, sarya ń n-a n-gān̄g dɔdə́ tə́ ní na i sarya kə́ kógə̄ḿ beē malang. Nin̄ na oōn̄ naā kadə̄ ré reēn̄ ta kumən tə́ ɓáa kə ədan̄ na i najə̄ kə́ sor̄ gə̄ ō, kə gólə̄n̄ na i loo ō, bátə́ kadə̄ yá̰a̰ gə̄ kə tūrə̄n̄neé rɔ̄də́. Adə̄ kə ɔjənən̄ gotə nī ń na rāān ní, loo ń noō tə́ na n-a n-ger̄ kadə̄ na a ɔjənən̄ kum. 10Kɔdə̄ sāā gə̄ tūr̄ ədan̄ na yá̰á̰ ń mban̄g na dəje noó deē kógə̄ḿ kə́ dɔ nang tə́ kə́ asə rāā na gətóo. Tɔdɔ̄ nəkɔ́ ń jóo toó ní mban̄g, ká i mban̄g kə́ boń ngá̰ý aké ngangəń ngá̰ý gə̄gē, kə́ dəje mbōlí kógə̄ḿ aláa nge bógə̄rō rāā de gə̄ kógə̄ḿ aláa kɔdə̄ sāā kógə̄ḿ yá̰á̰ kə́ beé ní gətóó ɓáý.
11Yá̰á̰ ń mban̄g na dəje ní na i yá̰á̰ kə́ ngan̄g ngá̰ý, adə̄ de kə́ asə kɔjən na gətóo, ré na i nə́ɓā gə̄ ń loo ndidə́ i kə de ndul gēé aĺ ní ta na asən̄. 12Loo ń noō tə́ wōn̄g rāā mban̄g ngá̰ý, adə̄ əda kadə̄ tɔ̄lə̄n̄ ngé kum kedə̄ gə̄ malang kə́ Babilon kɔ̄ɔ́. 13Najə̄ ní teē adə̄ a rāān̄ i loo tɔ̄l̄ ngé kum kedə̄ gə̄ malang, adə̄ sāān̄ Daniel nin̄ kə madə̄n gēé yā tɔ̄l̄də́.
Nə́ɓā ɔjə Daniel nī yā mban̄g
14-15Daniel ɔr̄ najə̄ kə Ariok ngol ngé ngɔ̄m̄ mban̄g gə̄ ń teē a aw̄ kə̄ tɔ̄l̄ ngé kum kedə̄ gə̄ kə́ Babilon tə́ ní kə kum kedēé ō, kə miyḛ́ré ō, Ni dəjen na kə́ mban̄g gān̄g sarya kə́ ngan̄g ngá̰ý beē i tām̄ rí tə́ wa. Anī Ariok ɔjən gír najə̄ ní.
16Kə̄ ta jī tə́ noō Daniel udə gō mban̄g tə́ rāān ɓɔ́ kadə̄ əya̰ ndɔ̄ kə adə̄n kadə̄ n-ɔjənneé kum nī ń na rāān ní.
17Dan ń Daniel tél aw̄ ɓēé anī ɔjə madə̄n gə̄ ń i Hanania ō Misael ō Ajaria ō ní gotə najə̄ ní malang. 18Ni mēr̄də́ rāā Nə́ɓā kə́ dɔ rā̰ tə́ ɓɔ́ kadə̄ rāā kem majə sedə́ ba kə ɔjədə́ nī kə́ to loo mundə̄ tə́ ní tá kadə̄ t ɔ̄l̄ə̄n̄neédə́ naā tə́ kə ngé kum kedə̄ gə̄ kə́ Babilon alé. 19Anī Nə́ɓā ɔjə Daniel yá̰á̰ kə́ to loo mundə̄ tə́ ní ndɔ̄ɔ́ kə nīí. Loo ń noō tə́ Daniel tɔ̄ȳ Nə́ɓā kə́ dɔ rā̰ tə́, 20əda na:
Ādə̄ jə-rāāī Nə́ɓā kə́ra kə kum mbang gə̄ malang!
Tɔdɔ̄ kum kedə̄ ō tɔ́gə ō i yá̰a̰ yān gə̄.
21I ni n i nge tūr̄ dɔ kāgə̄ loo gə̄ ō, nge tūr̄ yá̰a̰ gə̄ ō ní.
I ni n i nge kɔr̄ mban̄g gə̄ kɔ̄ɔ́ ō nge kəndā mban̄g gə̄ ō ní.
I ni n i nge kadə̄ ngé kum kedə̄ gə̄ kum kedə̄ ō,
ngé ger̄ kəndā ma̰ȳ yá̰a̰ gə̄ yá̰a̰ ger̄ ō ní.
22I ni n i nge teē kə gíŕ yá̰a̰ kə́ lú ngá̰ý gēé dɔɔ́ ō,
yá̰á̰ kə́ to loo mundə̄ tə́ gə̄ ndágá ō ní.
Ni ger̄ yá̰á̰ kə́ kum til tə́ ō, loo kə́ unjə̄ kow ndi i rɔ̄n tə́ ō.
23Nə́ɓā yā kaaḿ gə̄, m̄-rāāī kə́ra ō,
m̄-ɓōkíī tɔ̄ȳ ō,
tām̄ ādə̄m̄ kum kedə̄ ō tɔ́gə ō.
Yá̰á̰ ń jə-dəjeī ní ḭ̄ ī-rāā ādə̄ m̄-ger̄,
tɔdɔ̄ ī-rāā ādə̄ jə-ger̄ yá̰á̰ ń tōr̄ rɔ̄ mban̄g ní.
24Gō tə́ anī Daniel aw̄ ɓē Ariok ń mban̄g ədan na kə tɔ̄l̄ ngé kum kedə̄ gə̄ kə́ Babilon tə́ ní. Ni-aw̄ ɔr̄ najə̄ seneé i beé, ədan na kə lōō tɔ̄l̄ ngé kum kedə̄ gə̄ kə́ Babilon tə́. Kə aw̄ seneé rɔ̄ mban̄g tə́ kadə̄ n-ɔjən kum nī yān. 25Ariok aw̄ kə Danieleé láẃ rɔ̄ mban̄g tə́ ba əda mban̄g na:
Kɔ́ɔ̄ ɓē gə̄, m-ə́nge de kə́ asə kɔjiī kum nī yāí dan Juda gə̄ ń əhɔn̄də́ reēn̄ sedə́ tə́ ní.
Yá̰á̰ kə́ rāān̄ adə̄ to tītə̄ deē ba njan ngan̄g alé
26Mban̄g un najə̄ ɔr̄ kə Daniel ń a ɓāŕnən̄ na i Beltasar ní. Dəjen na ké nī ń rāān ní ké asə kədan gotə ō, asə k ɔjən kum ō wa. 27Daniel tūr̄ əda na:
Yá̰á̰ kə́ to loo mundə̄ tə́ ń mban̄g sāā ger̄ ní, nge kum kedə̄, aláa nge bógə̄rō de gə̄ aláa nge mbōlí, aláa kɔdə sāā, kə́ asə kɔjə mban̄g kadə̄ ger̄ ní gətóo. 28Banī Nə́ɓā kógə̄ḿ kə́ nge teē kə gíŕ yá̰á̰ kə́ to loo mundə̄ tə́ gēé ndi dɔ rā̰ tə́ noō. I ni n ɔjə mban̄g Nabukodonosor yá̰á̰ kə́ ndɔ̄ń tə́ ń a rāā yā reē ní. Nī ń rāāī dan ń ī-to ā ī-ɓīī ní n toó: 29Kɔ́ɔ̄ ɓē gə̄, dan ń ī-to nang tə́ ní, ī-to ā ī-gír̄ najə̄ i dɔ yá̰á̰ kə́ ndɔ̄ń tə́ ń a rāā yā reē tə́ ní. I tām̄ najə̄ ń noō tə́ n nge teē kə gíŕ yá̰á̰ kə́ to loo mundə̄ tə́ gēé ɔjiīneé yá̰á̰ kə́ a rāā yā reē ndōń tə́ ní. 30Kə́ tām̄ yāḿ mā tə́ ní Nə́ɓā ɔjəm̄ yá̰á̰ kə́ to loo mundə̄ tə́ ń toō i tām̄ tɔȳ kə́ kum kedə̄ yāḿ tɔȳ yā de gə̄ malang alé, banī i yā kadə̄ ɔjiīn̄neé kum nī yāí kadə̄ ī-gerə̄ń gír̄ kə́ kemií tə́. 31Kɔ́ɔ̄ ɓē gə̄, yá̰á̰ ń á̰a̰ā̰ ní n toó, i yá̰á̰ kə́ tɔ́sə̄ adə̄ to tītə̄ deē, ba yá̰á̰ ní bo ngá̰ý ō ndə́lē to ɓōĺ ngá̰ý ō. Yá̰á̰ ní ra i noí tə́ ō, to ɓōĺ ngá̰ý ō.
32Rāān̄ dɔn i kə́ lɔ́ŕ kə́ unjə̄ njáý njáý, ba rāān̄ nganjən ō jīn gə̄ ō i kə gində̄ arjā̰a̰á̰. Rāān̄ kemən ō ɓúrən gə̄ ō i kə gində̄ nə̄ngá kasaá. 33Rāān̄ kāsə̄ njan gə̄ i kə gində̄ kə́ karīí, ba njan gə̄ tá rāān̄ núsən kə́rēý i kə gində̄ kə́ karīí ō núsən kə́rēý i kə nánjá ō. 34Ḭ̄ á̰á̰ yá̰á̰ kə́ tɔ́sə̄ adə̄ to tītə̄ deē ní beé, anī mbal̄ kógə̄ḿ rəte kanjə̄ kadə̄ jī deē ɔdən ba reē əsō dɔ njan kə́ rāā kə gindīí ō, kə nánjá ō ní tə́ adə̄ njan ní tɔ̄ɔ̄ yɔ́k yɔ́k kɔ̄ɔ́. 35Anī gində̄ ō nánjə ō gində̄ nə̄ngá kasə ō gində̄ arjā̰a̰ ō lɔ́r ō ní, tetən̄ ndujə̄ adə̄ nél ɔy aw̄ń tītə̄ təsá əwā kə́ ɓālāá kə́ kem gárāá ń nél ɔy aw̄ń kɔ̄ɔ́ adə̄ deē a̰a̰ gotə to̰ aĺ ní beē. Banī mbal̄ ń ənī nja yá̰á̰ ń tɔ́sə̄n̄ adə̄ to tītə̄ deē ní, tél mbal̄ bo kə́ bo ngá̰ý kə́ taā loo malang dɔ nang tə́.
36Kɔ́ɔ̄ ɓē gə̄, nī yāí ní n noó, banī kumən n toó: 37Ḭ̄ i mban̄g kə́ ī-bo ī-tɔȳ mban̄g gə̄ malang. Nə́ɓā kə́ dɔ rāā tə́ adī ko̰o̰ ɓē ō ngan̄g ō tɔ́gə ō kɔsə gɔn ō. 38Loo kə́ rá nəkɔ́ ń de gə̄ ō dā̰ gə̄ ō yel̄ gə̄ ō ndin̄ tū tə́ ní ni-əla dɔdə́ gír tɔ́gə yāí tə́. Nin̄ malang ní ni əndāī dɔdə́ tə́. Adə̄ dɔn kə́ rāā kə lɔ́rɔ́ ní i ḭ̄. 39Ko̰o̰ ɓē kə́ rang kə́ tɔ́gən asə kə yāí alé a to gotií tə́. Gō tə́ anī ko̰o̰ ɓē kə́ nge ko̰ mətá a to, i nge ń gində̄ nə̄ngá kasə ɔsə kum gotə ní ko̰o̰ ɓē ní a ndi dɔ de gə̄ malang kə́ dɔ nang tə́ tə́. 40Gō tə́ anī ko̰o̰ kə́ nge ko̰ sɔ́ a to, i ko̰o̰ ɓē kə́ ngan̄g tītə̄ gində̄. Tītə̄ ń gində̄ i yá̰á̰ kə́ a tɔ̄ɔ̄ yá̰á̰ kə́ rang gə̄ malang ō, a əsa gotə yá̰á̰ kə́ rang gə̄ malang ō ní, ko̰o̰ ɓē ngeé ń toō a nujə ko̰o̰ ɓē gə̄ malang kə́ kété non tə́ kɔ̄ɔ́ ō, a əsadə́ kɔ̄ɔ́ ō. 41Njan gə̄ ō ta ngán njan gə̄ ō ń á̰a̰ā̰ ní, rāān̄ núsən kə́rēý i kə nánjá ō, núsən kə́rēý i kə gindīí ō. Kumən na ko̰o̰ ɓē ní i ko̰o̰ ɓē kə́ a kēgə̄ naā ō, i ko̰o̰ ɓē kə́ a ngan̄g tītə̄ gində̄ ō, tītə̄ ń á̰a̰ kadə̄ əlan̄ gində̄ naā tə́ kə nánjá ní. 42Banī ta ngán njan gə̄ ń núsən kə́rēý i kə́ rāā kə gindīí ō núsən kə́rēý i kə́ rāā kə nánjá ō ní, ɔjə i kadə ko̰o̰ ɓē ní núsən kə́rēý a ngan̄g ō, kə́rēý a ngan̄ aĺ ō. 43Á̰a̰ā̰ kadə̄ ɓoon̄ gində̄ naā tə́ kə nánjá ní, kumən na mban̄g gə̄ a adə̄n̄ naā ngáńdə́ kə́ dəyá̰ gə̄ ngaaw tə́ yā kəhɔn̄ madə̄ naā. Banī madə̄ naā ní i madə̄ naā kə́ a əhɔ naā alé, tītə̄ ń gində̄ nin̄ kə nánjá əhɔn̄neé naā aĺ ní. 44Ɓāl̄ yā mban̄g gə̄ ngeé ń noō tə́ ní, Nə́ɓā kə́ dɔ rā̰ tə́ a əndā ɓē ko̰o̰ kógə̄ḿ kə́ deē a asə nujən aĺ ba tə́ ō, kə́ a əya̰n̄ kadə̄ gír de kə́ rang gə̄ ndin̄ dɔ tə́ aĺ ō. Ko̰o̰ ɓē ní a nujə ko̰o̰ ɓē gə̄ kə́ kété non tə́ kɔ̄ɔ́ malang ō, a rāā kadə̄ gətóon̄ kɔ̄ɔ́ malang ō. Ba gō tə́ anī, ko̰o̰ ɓē ní a to ngándáńg. 45Ngōn̄ mbal̄ ń rəte kanjə̄ kadə̄ jī deē ɔdən ba reē tɔ̄ɔ̄ gində̄ ō, gində̄ nə̄ngā kasə ō, nánjə ō, gində̄ arjā̰a̰ ō, lɔ́r ō, á á̰a̰ā̰ ní ɔjə i gō yá̰á̰ ń noō. Kɔ́ɔ̄ ɓē gə̄, Nə́ɓā kə́ bo ɔjiī i yá̰á̰ ń a rāā yā reē ní. Nī ní i nī kə́ rɔ̄kum ō, kumən ń m-ɔ́jiī ní asə kadə̄ deē taā kem ō.
46Loo ń noō tə́ mban̄g Nabukodonosor ɔsə non nang tə́, rɔȳ Daniel ō əda kadə̄ ndējə̄n̄ Daniel yá̰a̰ tun̄ gə̄ ō, ndujə̄ yá̰á̰ kə́ kotə majə gə̄ ō. 47Gō tə́ anī əda Daniel na:
Rɔ̄kum, Nə́ɓā yāsí i Nə́ɓā kə́ bo tɔȳ nə́ɓā gə̄ malang ō, ni i ngol mban̄g gə̄ ō. I ni ngóy n i nge kɔjə deē yá̰á̰ kə́ to loo mundə̄ tə́ kadə̄ ger̄ ní, tɔdɔ̄ ḭ̄ ɔ́jəm̄ yá̰á̰ kə́ loo mundə̄ tə́ ń toō. 48Gō tə́ anī mban̄g ɔsə Daniel kə̄ dɔɔ́ ō, adə̄n kadə̄ karī kə́ bo gə̄ ngá̰ý ō. Ni əndān dɔ gō nang kə́ Babilon tə́ ō, dɔ ngé kum kedə̄ gə̄ malang kə́ Babilon tə́ ō. 49Daniel dəje mban̄g, adə̄ mban̄g əndā Sadərak ō Mesak ō Abed Nego ō dɔ gō nang kə́ Babilon tə́ kadə̄ o̰o̰n̄ ɓē dɔ tə́. Banī Daniel tél i nge kadə̄ kɔjə̄ ndogó mbangāá.
Currently Selected:
DANIEL 2: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.