KOLOSƏ 2
2
1Tɔdɔ̄ m̄-gḛy kadə̄ ī-gerī gō rɔ̄ɔ̄ kə́ ngan̄g ngá̰ý ń m̄-ra ta tə́ m-ā m̄-rɔ̄ɔ̄ tām̄ yāsí tə́ ō, tām̄ yā de kə́ rang gə̄ ń a̰a̰mə̄n̄ aĺ tə́ ō ní. 2I tītə̄ ń noō n m̄-sāań kadə̄ nin̄-əhɔn̄ rɔ̄də́ tɔgə ō, kadə̄ tár ɓoodə́ naā tə́ ō, kadə̄ ugə̄n̄ tū ger̄ yá̰á̰ kə́ rɔ̄kum ń i nge rāā tá kadə̄ kem deē a ger̄ yá̰á̰ mámák ní ō, ba kadə̄ gerə̄n̄ yá̰á̰ kə́ to loo mundə̄ tə́ yā Nə́ɓā ń i Kərist ní. 3Yá̰a̰ kal̄ loo yā kum kedə̄ ō, yā yá̰a̰ ger̄ ō, malang i kə́ ɓɔ̄ɔ̄ rɔ̄n kemən tə́. 4M-ə́dásí najə̄ ń toō i yā kadə̄ deē kógə̄ḿ gól̄sí kə najə̄ kə́ nel̄ gēé alé. 5Ká ré m̄-gətóo dansí tə́ kə dā̰ rɔ̄ḿ gə̄gē anī, ndílə́ḿ i sesí. Adə̄ rɔ̄ḿ nelə̄m̄ dan ń sḭḭ̄ ī-ndiī kə gōó ō, ī-raī dɔ Kərist ń ī-taāī kemən tə́ ní ādī ngan̄g ō ní.
Ndi kə kumuú kə́ rɔ̄kum kə́ kə ta kūl̄ taā kem Kərist
6Dan ń ī-ndigiī kadə̄ Kərist Jeju i Kɔ́ɔ̄ɓē yāsí ní, ī-njə̄rāī seneé. 7Ə́laī ngərasí kemən tə́ ō, ī-raī ngan̄g dɔn tə́ ō, dɔ taā kem tə́ tītə̄ ń ndóōn̄neésí ní ō, ī-ndadī Nə́ɓā ngá̰ý ō.
8Ə̄ndāī kum kedə̄ dɔ rɔ̄sí tə́, ba ī-lōōī kadə̄ deē gól̄sí kə najə̄ kə́ kanjə̄ kumən gə̄ ń de gə̄ a gól̄nəń madə̄də́ gə̄, kə ta kūl̄ kum kedə̄ yādə́ ní: Kum kedə̄ ní ra i dɔ yá̰a̰ kāgə̄ ɓē yā de gə̄ tə́, adə̄ i dɔ tɔ́gə́ kə́ dɔ nang tə́ gə̄ tə́, ba i dɔ Kərist tə́ alé. 9Tɔdɔ̄ Nə́ɓā ndi kem Kərist tə́ kə taá malang, ni-un rɔ̄ Kərist. 10Ba sḭḭ̄ ə́ngeī yá̰a̰ malang kə ta kūl̄ Kərist. Ni i dɔ ngé ko̰o̰ ɓē gə̄ tə́ malang ō, dɔ ngé tɔ́gə gə̄ tə́ malang ō.
11Ɓoo ń ī-ɓooī naā seneé ní, ɔjə kadə̄ sḭḭ̄ ə́jaī mɔtəsí kɔ̄ɔ́. I jī deē n əja alé, i kəja mɔtə yā Kərist. Ba kəja mɔtə yā Kərist ngeé ń toō i ngḭ̄ḭ̄ kə́ ngḭ̄ḭ̄n̄ dā̰ rɔ̄jí kə́ nge rāā yá̰a̰ majaĺ kɔ̄ɔ́ rɔ̄jí tə́. 12Tɔdɔ̄ dan ń rāān̄sí batém ní, dubə̄n̄sí naā tə́ kə Kərist ō, ī-ndólī naā tə́ seneé ō, tām̄ ī-taāī kem tɔ́gə yā Nə́ɓā ń ndólə̄n dan de kə́ koy gə̄ tə́ ní. 13Sḭḭ̄ ń kété óyiī kɔ̄ɔ sɔɔ̄ ń yá̰a̰ rāāsí kə́ gōtə́ aĺ gə̄ ō, sɔɔ̄ ń kəja kə́ sḭḭ̄ ə́jaī mɔtəsí aĺ ō ní, Nə́ɓā rāā adə̄ ī-tél ī-ndiī kə kumsí gogə́ naā tə́ kə Kərist: Ni-mā̰ȳ rɔ̄n dɔ yá̰a̰ rāājí kə́ gō tə́ aĺ gə̄ tə́ malang. 14Makətūbə̄ ń ndangən̄ dɔjí tə́ sɔɔ̄ń rāā kə́ jə-rāāī gō míndə gə̄ aĺ ní, ni-nujə makətūbə̄ ní kɔ̄ɔ́ tū kāgə̄ kə́ dēsə́ tə́. 15Nə́ɓā taā tɔ́gə kɔ̄ɔ́ jī ngé ko̰o̰ ɓē gə̄ tə́ ō, jī ngé tɔ́gə gə̄ tə́ ō, i tītə̄ ń noō. Ngōnən ń tetədə́ rɔ̄ɔ̄ ní, ni-aw̄ sedə́ adə̄ njə̄rān̄ gōn tə́ tītə̄ ɓəlo gə̄, adə̄ de gə̄ malang a̰a̰n̄də́.
16I beé ní, ādə̄ deē kógə̄ḿ gān̄g sarya dɔsí tə́ najə̄ yā yá̰a̰ kəsa tə́ aĺ ō, yá̰a̰ ka̰ȳ tə́ aĺ ō, najə̄ yā rāā nāā tə́ aĺ ō, ndɔ̄ teē nāā tə́ aĺ ō, ndɔ̄ sabat tə́ aĺ ō. 17Yá̰a̰ gə̄ ń noō malang i ndíĺ yá̰á̰ ń kadə̄ a reē ɓáý ní, ba ngarān̄g kum yá̰á̰ i Kərist. 18De gə̄ ń nel̄də́ tél kə rɔ̄də́ kə̄ nang tə́ ō, rāā kəla kadə̄ de kə́ dɔ rā̰ tə́ gə̄ ō, əhɔn̄ gō yá̰a̰ gə̄ ń nin̄ kɔ́ gə̄ a̰ā̰n̄ ō ní, ī-lōōī kadə̄ gólə̄n̄sí. De kə́ beé gə̄ ní, gír̄ najə̄ yādə́ kə́ gō yā deē ndul tə́ rāā adə̄ nin̄-ɔjən̄ rɔ̄də́ kanjə̄ kumən. 19Nin̄-əhɔn̄ gō Kərist ń i dɔm dɔ ní adə̄ ngan̄g alé. Tá rɔ̄ malang ń əhɔ naā majə kə ta kūl̄ ta rɔtən gə̄ ní, i Kərist n i nge kəhɔ dɔɔ́ ō, nge rāā kadə̄ rɔ̄ ní tɔgə kə gō ń Nə́ɓā ndigə ō ní.
Koy ō, ndi kə kumuú ō, naā tə́ kə Kərist
20Sḭḭ̄ i kə́ óyiī kɔ̄ɔ́ naā tə́ kə Kərist ō, gāngə̄n̄ dɔsí kɔ̄ɔ́ jī tɔ́gə́ kə́ dɔ nang tə́ gə̄ kə́ ngé ko̰ō̰ ɓē dɔ de gə̄ tə́ ō, anī i tām̄ rí tə́ á ī-rāāī tītə̄ kə́ sḭḭ̄ i de kə́ dɔ nang tə́ gə̄ ní? Tɔdɔ̄ ī-ndigiī kadə̄ əndān̄ najə̄ kə́ beē gə̄ dɔsí tə́: 21Ún alé, ī-nāā taí tə́ alé, ɔ́də rɔ̄ alé ní? 22Najə̄ gə̄ ń noō i najə̄ gə̄ kə́ deē rāań kəla anī, tadə́ a ɗogə́rō kɔ̄ɔ́ gə̄. I gō míndə gə̄ yā de gə̄ ō, i yá̰á̰ ndóō yā de gə̄ ō. 23Najə̄ gə̄ ní ton̄ tītə̄ kə́ kum kedə̄ i tū tə́ beē, tɔdɔ̄ ɔjən̄jí loo rɔȳ Nə́ɓā kə́ kə gō kem ndigə yājí jḭḭ̄ kɔ́gɔ̄ɔ́ ō, loo tél kə rɔ̄jí kə̄ nang tə́ ō, loo kəhɔ rɔ̄jí dɔ rāā yá̰a̰ gə̄ tə́ ō, ba a teēn̄ yá̰a̰ alé. Nin̄ a rāān̄ i yá̰á̰ kə́ nel̄ dā̰ rɔ̄jí ngóy.
Currently Selected:
KOLOSƏ 2: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.