2 TIMOTE 1
1
Pol rāā Timote lápə́ya
1I mā Pol ń i ngōmbang kəla yā Kərist Jeju kə́ kə gō kem ndigə yā Nə́ɓāá ní. Əndān̄ kəla kɔjə najə̄ kə́ dɔ ndi kə kumuú ń Nə́ɓā ənī míndən yā kadə̄jí ní dɔḿ tə́. J-əngeī ndi kə kumuú ngeé ń toō i kə ta kūl̄ ɓoojí naā kə Kərist Jeju. 2Timote, ngōn̄ kó tár yāḿ, i ḭ̄ n m̄-ndang makətūbə̄ ń toō m-ādī ní.
Ādə̄ Bɔbə̄jí Nə́ɓā nin̄ kə Kɔ́ɔ̄ɓē yājí Jeju Kərist rāān̄ kem majə seí ō, a̰a̰n̄ kum to ndoō yāí ō, sɔlə̄n̄ kemií ō.
Pol ndadə̄ Nə́ɓā
3Ndɔ̄ɔ́ ō kadaá ō, dan ń m-ā m̄-ndɔ̄ȳ anī, m̄-gír̄ dɔí tə́. Adə̄ m̄-ndadə̄ Nə́ɓā ń m̄-rāā kəla yān tītə̄ yā kaaḿ gə̄, kanjə̄ kadə̄ kemḿ ɔjəm̄ yá̰á̰ kógə̄ḿ kə́ majaĺ ní. 4Dan ń əga kemḿ dɔ man̄ kumií tə́ ní, ngur ka̰a̰í rāām̄ ngá̰ý. Ré m-á̰a̰ī anī, rɔ̄ḿ a nelə̄m̄ ngá̰ý. 5Əga kemḿ dɔ taā ń ī-taā kem Nə́ɓā kə́ rɔ̄kum tə́ ní. Kaaí Lois ō, kó̰ó̰í Enis ō, taān̄ kem kə́ rɔ̄kum tə́ kété noí tə́, ba m̄-ger̄ majə kadə̄ ḭ̄ ī-taā kem i tītə̄ yādə́ ō. 6Yá̰á̰ ń Nə́ɓā adī karī dan ń m-ə̄ndań jīḿ dɔí tə́ ní, to i tītə̄ hor beé kemií tə́, adə̄ ī-tóon ādə̄ o̰o̰. 7Tɔdɔ̄ Nə́ɓā adə̄jí i ndíĺ kə́ yā kadə̄ jə-ɓōlíīneé kum deē alé, ba i kadə̄ j-awīneé kə tɔ́gɔ́ ō, jə-táriīneé de gə̄ ō, jə-gerīneé kəhɔ rɔ̄jí dɔ yá̰á̰ tə́ ō.
8Adə̄ ī-lōō kadə̄ rɔ̄í sɔlī loo kəda yá̰a̰ gə̄ kə́ dɔ Kɔ́ɔ̄ɓē yājí tə́ ń ī-ger̄ ní. Mā ń m̄-to dəngáyá najə̄ yān tə́ ní, ī-lōō kadə̄ rɔ̄í sɔlī najə̄ yāḿ tə́ ō. Ə̄ndā kemií dɔ tɔ́gə yā Nə́ɓā tə́, ba á̰á̰ tápə̄ tītə̄ yāḿ loo kɔjə Najə̄ kə́ Majə tə́. 9I Nə́ɓā n ajəjí ō, ɓāŕjí kadə̄ jə-téliī deē yān gə̄ ō ní. I kə gō kəla rāājí jḭḭ̄ kɔ́ gɔ̄ɔ́ alé, banī i tām̄ gír̄ ń nəkɔ́ gír̄ kemən tə́ kadə̄ n-rāā beé ní ō, tām̄ kem majə yān tə́ ō. Ni-rāā kem majə ní sejí i kə ta kūl̄ ɓoo kə́ jə-ɓooī naā kə Jeju Kərist, i kété pá tá kadə̄ ni-rāā yá̰a̰ malang ɓáý. 10Ba ngɔlaā ń toō teēn̄ kumjí dɔ tə́ i kə ta kūl̄ nge kajəjí Kərist Jeju ń reē ní. Ni-nujə yo kɔ̄ɔ́ ba rāā adə̄ de kə́ ndi kə kumneé a oy alé i kə ta kūl̄ Najə̄ kə́ Majə.
11Nə́ɓā əndā kəla kɔjə Najə̄ kə́ Majə ngeé ń toō dɔḿ tə́, adə̄ mā i ngōmbang kəla ō, nge ndóō de gə̄ yá̰a̰ ō. 12I tām̄ najə̄ ń noō tə́ n yá̰á̰ kə́ tōr̄ gə̄ ń toō a rāāmə̄n̄neé ní, Banī rɔ̄ḿ sɔlə̄m̄ najə̄n tə́ alé. Tɔdɔ̄ m̄-ger̄ deē ń m̄-taā kemən ní ō, m̄-ger̄ majə kadə̄ ni-asə ngɔ̄m̄ yá̰á̰ ń ɓɔ̄ɔ̄mə̄n̄ ní bátə́ ndɔ̄ ngeé ń noō tə́ ō.
13Ī-ndájə̄ najə̄ kə́ rɔ̄kum gə̄ ń m-ɔ̄r̄ seí ní ō, ī-ra ngan̄g dɔ taā kem tə́ ō, dɔ táŕ ń j-awīneé kə gō ɓoo kə́ jə-ɓooī naā kə Jeju Kərist ní ō. 14Ī-ngɔ̄m̄ yá̰á̰ ndóō kə́ majə gə̄ ń ɔjiīn̄ ní kə ta kūl̄ Ndíĺ kə́ Táĺ ń ndi kemjí tə́ ní.
15Ī-ger̄ majə kadə̄ de kə́ Aji tə́ gə̄ malang əya̰mə̄n̄ kɔ̄ɔ́. Pijel nin̄ kə Hermojen i sedə́ ō. 16Ādə̄ Kɔ́ɔ̄ɓē a̰a̰ kum tō ndoō yā de gə̄ kə́ kem kojə yā Onejipor tə́, tɔdɔ̄ ni-sɔl̄ kemḿ kə̄ nja naā tə́. Rɔ̄n sɔlə̄n najə̄ yā súĺ yāḿ gə̄ tə́ alé. 17Adə̄ dan ń ni-reē ugə̄ kem ɓē kə́ Rom tə́ ní, ni sāā njaḿ pak pak adə̄ əngem̄. 18Ādə̄ Kɔ́ɔ̄ɓē rāā seneé, ba a̰a̰ kum tō ndoō yān ndɔ̄ sarya tə́. Yá̰a̰ malang ń ni-rāā adə̄m̄ kem ɓē kə́ Epejə tə́ ní, ḭ̄ ī-ger̄ majə tɔȳ de kə́ rang gə̄.
Currently Selected:
2 TIMOTE 1: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.