2 SAMUEL 8

Dabid tetə madə̄ ba̰ā̰n gə̄ rɔ̄ɔ̄

(Á̰a̰ī 1 Yá̰a̰ 18.1-13)

1Gō tə́ anī Dabid tetə Pilistin gə̄ rɔ̄ɔ̄. Ni-taā ko̰o̰ ɓē jīdə́ tə́ kɔ̄ɔ́ əlań rɔ̄sɔl̄ dɔdə́ tə́. 2Ni-tetə Moab gə̄ rɔ̄ɔ̄ ō, laadə́ nang tə́ ba tɔ̄l̄ kə́rēý gə̄ ō, əya̰ kə́rēý gə̄ ō. Ré nin̄ i mətá anī tɔ̄l̄ kə́ jōó gə̄ ba əya̰ kógə̄ḿ. Loo ń noō tə́ Moab gə̄ télən̄ ɓəlo yā Dabid gə̄ ō, nin̄ a tīrə̄n̄ dɔ yá̰a̰ gə̄ a adə̄nən̄ ō. 3Dabid tetə Hadadejer ngōn̄ Rehob rɔ̄ɔ̄. Hadadejer i mban̄g kə́ Soba. Dabid tetən rɔ̄ɔ̄ i dan ń a sāań taā bā Opəratə gogə́ ní. 4Dabid əhɔ ngé kal̄ sə́nda yā Hadadejer gə̄ dūbú kə ɓú sīrí ō, ngé rɔ̄ɔ̄ yān gə̄ kə́ ngé njə̄rā kə njadə́ gə̄ dūbú kutə jōó ō. Ni-gán̄g ngəra nja sə́nda gə̄ ń a ndɔ́rə̄n̄ púsə rɔ̄ɔ̄ gə̄ ní kɔ̄ɔ́ malang, ba ngɔ̄m̄ sə́nda gə̄ kə púsə rɔ̄ɔ̄ gə̄ ɓú kógə̄ḿ tām̄ yān tə́. 5Loo ń noō tə́ Aram gə̄ kə́ Damas reē dḭḭ̄n̄ Hadadejer mban̄g kə́ Soba. Banī Dabid tɔ̄l̄ de gə̄ dūbú kutə jōó gidə i jōó dandə́ tə́, 6ba tə́ndā ngé ko̰o̰ ɓē gə̄ dɔ nang kə́ Aram tə́ ń ɓē bo yān i Damas ní. Loo ń noō tə́ Aram gə̄ télən̄ ɓəlo gə̄ yā Dabid ō, a tīrə̄n̄ dɔ yá̰a̰ gə̄ a adə̄nən̄ ō. Adə̄ Kɔ́ɔ̄ɓē rāā adə̄ Dabid tetə rɔ̄ɔ̄ loo malang ń ni-aw̄ rɔ̄ɔ̄ tə́ tū tə́ ní. 7Dabid taā der lɔ́r gə̄ ń ngé kəla yā Hadadejer gə̄ a ətōn̄ ní, ba ɔy aw̄ń Jerusalem. 8Mban̄g Dabid taā gində̄ nə̄ngá kasə kə́ ngá̰ý kem ɓē gə̄ yā Hadadejer tə́. Rī ɓē gə̄ ní na i Beta ō, Berotai ō.

9Mban̄g kə́ Hamat ń rīn na i Toi ní, oō kadə̄ ngé rɔ̄ɔ̄ gə̄ malang yā Hadadejer i kə́ Dabid tetədə́ rɔ̄ɔ̄ kɔ̄ɔ́. 10Anī əla ngōnən Yoram rāā Dabid lápə́ya tə́ ō, kadə̄ a̰a̰ yá̰a̰ ta kumən tə́ najə̄ rɔ̄ɔ̄ ń rɔ̄ɔ̄ Hadadejer ba tetən rɔ̄ɔ̄ tə́ ní ō. Tɔdɔ̄ Hadadejer i madə̄ ba̰ā̰ Toi. Yá̰á̰ ń Yoram aw̄ń kadə̄ Dabid tə́ ní i yá̰á̰ kə́ rāā kə gində̄ arjā̰a̰á̰ ō, kə gində̄ lɔ́rɔ́ ō, kə gində̄ nə̄ngá kasaá ō. 11Mban̄g Dabid ɔr̄ kam̄ yá̰á̰ ní tayā tām̄ yā Kɔ́ɔ̄ɓē tə́ tītə̄ ń ɔrə̄ń kam̄ gində̄ arjā̰a̰ ō, lɔ́r ō ń ni-taā jī nápar de gə̄ ń əla dɔdə́ gír tɔ́gə yān tə́ ní. 12Nápar de gə̄ ní i Aram gə̄ ō, Moab gə̄ ō, Amon gə̄ ō, Pilistin gə̄ ō, Amalek gə̄ ō. Yá̰a̰ kənge gə̄ ń Dabid taā jī mban̄g kə́ Soba tə́ ń i Hadadejer ngōn̄ Rehob ní, ni-ɔr̄ kam̄də́ tayā tām̄ yā Kɔ́ɔ̄ɓē tə́ ō. 13I beé n rī Dabid ɓārəń ngá̰ý ní.

Dan ń Dabid tetə Aram gə̄ rɔ̄ɔ̄ oy anī, tél dɔ tə́ reē ənī Edom gə̄ rɔ̄ɔ̄ kum wól loo katə̄ tə́ ba tetədə́ rɔ̄ɔ̄. Ni-tɔ̄l̄də́ dūbú kutə gidə i sɔ́sɔ́. 14Dabid tə́ndā ngé ko̰o̰ ɓē gə̄ dɔ nang kə́ Edom tə́ kə taá malang, adə̄ Edom gə̄ télən̄ ɓəlo gə̄ yā Dabid. Kɔ́ɔ̄ɓē rāā adə̄ Dabid tetə rɔ̄ɔ̄ loo malang ń ni-aw̄ rɔ̄ɔ̄ tə́ tū tə́ ní.

Rī de kə́ bo gə̄ yā Dabid

(Á̰a̰ī 1 Yá̰a̰ 18.14-17)

15Dabid o̰o̰ ɓē dɔ ngán Israel gə̄ tə́ malang. Ni-gān̄g sarya yā de gə̄ malang i kə gōó. 16Ngol ngé rɔ̄ɔ̄ gə̄ i Joab ngōn̄ Seruya. Kɔdə̄ mbēr̄ yā mban̄g i Yosapat ngōn̄ Ahilud. 17Ngé tun̄ yá̰a̰ gə̄ i Sadok ngōn̄ Ahitub nin̄ kə Ahimelek ngōn̄ Abiatar. Nge ndang makətūbə̄ i Seraya. 18Ngol ngé ngɔ̄m̄ dɔ ngār gə̄ ń i Kereti gə̄ kə Peleti gə̄ ní i Benaya ngōn̄ Yoyada. Ngán Dabid gə̄ nin̄ i ngé tun̄ yá̰a̰ gə̄ ō.

Currently Selected:

2 SAMUEL 8: SARDC

Highlight

Copy

Compare