2 SAMUEL 5

Əndān̄ Dabid mban̄g dɔ Israel gə̄ tə́

(Á̰a̰ī 1 Yá̰a̰ 11.1-3)

1Gír ɓē yā Israel gə̄ malang reēn̄ rɔ̄ Dabid tə́ Hebron ba ədanən̄ na: Jḭḭ i kojə yāí, jḭḭ i mósí. 2Dan ń Saul o̰o̰ ɓē dɔjí tə́ kété ní, i īkɔ́ n i nge teē kə ngán Israel gēé kaw̄ sedə́ ta rɔ̄ɔ̄ tə́ ō, nge tél sedə́ ō ní. Tá Kɔ́ɔ̄ɓē ədaī na i ḭ̄ n ā ūl̄ Israel gə̄ ń i deē yān gə̄ ní ō, i ḭ̄ n ā ī-ndi ngār dɔdə́ tə́ ō ní.

3Kum kɔɔ̄ kə́ Israel tə́ gə̄ malang reēn̄ rɔ̄ mban̄g Dabid tə́ Hebron. Ni-əhɔ madə̄ naā sedə́ ta kum Kɔ́ɔ̄ɓē tə́ ō, urən̄ yibə̄ ngār dɔn tə́ əndānneé mban̄g kə́ Israel tə́ ō. 4Dan ń əndān̄ Dabid mban̄g ní ɓālə̄n i kutə mətá. Ni-o̰o̰ ɓē ɓāl̄ kutə sɔ́. 5O̰o̰ ɓē Hebron ɓāl̄ sīrí kə núsə dɔ gír ɓē yā Juda tə́. Gō tə́ anī o̰o̰ ɓē Jerusalem ɓāl̄ kutə mətá gidə i mətá dɔ Israel gə̄ tə́ malang ō, dɔ Juda gə̄ tə́ ō.

Dabid taā ɓē kə́ Jerusalem

(Á̰a̰ī 1 Yá̰a̰ 11.4-9; 14.1-2)

6Mban̄g Dabid nin̄ kə deē yān gēé aw̄n̄ kənī ɓē kə́ Jerusalem rɔ̄ɔ̄ tə́. Anī Yebus gə̄ ń ndin̄ gō nang ń noō tə́ ní ədan̄ Dabid na de gə̄ ń ni na a mbə́rēdə́ kə̄ gogə́ yā kudəń kem ɓē yādə́ nin̄ tə́ ní na i ngé kum tɔ̄ɔ̄ gə̄ ō, ngé nja motə gə̄ ō. Kumən na Dabid na a udə loodə́ alé. 7Ɓá tā ba Dabid taā ɓē kə́ Siyo̰ ń i ɓē kə́ ngan̄g ngá̰ý ní. Gō tə́ anī əndā rī ɓē ní na i ɓē yā Dabid. 8Ndɔ̄ ń noō tə́ ní Dabid əda na: Deē ń ndigə tetə Yebus gə̄ rɔ̄ɔ̄ anī ādə̄ kɔ́ɔ̄ udə kem bəlo ń mbutən̄ tū mbal̄ tə́ kadə̄ man̄ mānəń ní tə́ ba al̄ aw̄ gōdə́ tə́. Nelə̄m̄ mā Dabid kə ngé nja motə gēé aĺ ō, kə ngé kum tɔ̄ɔ̄ gēé aĺ ō. I tām̄ najə̄ ń noō tə́ n ədan̄ na ngé kum tɔ̄ɔ̄ gə̄ ō, ngé nja motə gə̄ ō, a udən̄ kem kújə yā Kɔ́ɔ̄ɓē tə́ aĺ ní. 9Dabid ndi kem ɓē kə́ ngan̄g ngá̰ý tə́ ba əndā rīn na i ɓē yā Dabid. Gō tə́ anī ni-rāā kújə gə̄ gidə ɓē yān ní tə́ dɔ dán Milo#5.9 Milo, kə ta Hebəro kumən na i nang kə́ kán̄ dɔ naā tə́. Á̰a̰ī 1 Mba 9.15 tə́ kə kújə́ ń ni-ndi tū tə́ ní. 10Dabid tél de kə́ bo kum kə̄ kété kété tɔdɔ̄ Kɔ́ɔ̄ɓē Nə́ɓā kə́ bo kə́ tɔ́gən i ngá̰ý i naā tə́ seneé.

11Mban̄g kə́ Tir ń rīn na i Hiram ní əla ngé kəla yān gə̄ rɔ̄ Dabid tə́ kə kāgə̄ sédər gēé ō, kə ngé njar kāgə̄ gēé ō, ngé tɔ́sə̄ ndogə̄ mbal̄ gēé ō, kadə̄ rāān̄ kújə adə̄nən̄. 12Loo ń noō tə́ Dabid ger̄ kadə̄ Kɔ́ɔ̄ɓē əndān mban̄g dɔ Israel gə̄ tə́ ō, ɔsə ko̰o̰ ɓē yān kə̄ dɔɔ́ sɔɔ̄ń ngán Israel gə̄ ń i gír deē yān gə̄ ní ō.

Ngán gə̄ ń Dabid ojədə́ Jerusalem ní

(Á̰a̰ī 1 Yá̰a̰ 3.5-9; 14.3-7)

13Dan ń Dabid əya̰ ɓē kə́ Hebron kɔ̄ɔ́ ba aw̄ ndi Jerusalem ní, ni-taā dəyá̰ kə́ rang gə̄ ɓáý to̰ ō, ɔy də̄yá̰ gidə ndogə̄ gə̄ ō. Dəyá̰ gə̄ ní ojən̄ ngán kə́ dəngam kə́ rang gə̄ ō, ngán kə́ dəyá̰ kə́ rang gə̄ ō adə̄nən̄. 14Ngán kə́ dəngam gə̄ ń Dabid ojədə́ Jerusalem ní rīdə́ n toó: Samua, Sobab, Natan, Salomo̰, 15Ibar, Elisua, Nepeg, Yapia, 16Elisama, Eliada, Elipelet.

Dabid tetə Pilistin gə̄ rɔ̄ɔ̄

(Á̰a̰ī 1 Yá̰a̰ 14.8-16)

17Dan ń Pilistin gə̄ oōn̄ na urən̄ yibə̄ ngār dɔ Dabid tə́ kadə̄ ndi mban̄g dɔ Israel gə̄ tə́ anī, unən róbə kə́ əta tan kə̄ dɔɔ́ yā kaw̄ kəhɔn. Ba dan ń Dabid oō najə̄ ń noō ní, un róbə kə́ risə kum kə̄ nang tə́ yā kaw̄ń loo ɓɔ̄ɔ̄ rɔ̄ yān tə́. 18Pilistin gə̄ reēn̄ ba tɔ̄ɔ̄n̄ naā kə̄ loo gə̄ tə́ kum wól loo yā Repay gə̄ tə́. 19Anī Dabid aw̄ koō najə̄ kə́ ta Kɔ́ɔ̄ɓē tə́. Ni-dəje Kɔ́ɔ̄ɓē na ké kə n-aw̄ kə n-rɔ̄ɔ̄ Pilistin gə̄ wa. Ké Kɔ́ɔ̄ɓē a əladə́ kem jīn tə́ wa. Anī Kɔ́ɔ̄ɓē tél əda Dabid na kə aw̄ kə rɔ̄də́ na n-a n-əladə́ kem jīn tə́ kə́ rɔ̄kum tə́. 20Anī Dabid aw̄ Baal Perasim. Ni-tetə Pilistin gə̄ rɔ̄ɔ̄ loo ń noō tə́. Ni-əda na: Kɔ́ɔ̄ɓē tetə madə̄ ba̰ā̰ḿ gə̄ rɔ̄ɔ̄ noḿ tə́ i tītə̄ loo tetə ń man̄ a tetəń babəra ní. I tām̄ najə̄ ń noō tə́ n əndān̄neé rī loo ní na i Baal Perasim ní. Kumə̄n na i mojə nge tə́ndā kum loo gán̄g. 21Pilistin gə̄ əya̰n̄ ɓesə̄ yādə́ gə̄ kɔ̄ɔ́ loo ní tə́, adə̄ Dabid nin̄ kə deē yān gēé ɔy aw̄n̄neé.

22Pilistin gə̄ tél aw̄n̄ gogə́ ənīn̄ rɔ̄ɔ̄ ɓáý to̰. Nin̄ tɔ̄ɔ̄n̄ naā kə̄ loo gə̄ tə́ kum wól loo yā Repay gə̄ tə́. 23Dabid tél aw̄ koō najə̄ kə́ ta Kɔ́ɔ̄ɓē tə́ ɓáý to̰. Anī Kɔ́ɔ̄ɓē ədan na: Ī-lōō kə tə́nī tadə́ yā rɔ̄ɔńdə́, ba ī-rə̄ngō rɔ̄í gidədə́ tə́, ī-teē dan ku kāgə̄ mikokuli gə̄ tə́ kum kə̄ rɔ̄də́ tə́. 24Ré ōō kōō yá̰a̰ ɓār̄ jam kāgə̄ gə̄ ní tə́ tītə̄ nja deē anī, ī-lōō kɔr bā̰ā̰ banī ī-nāgə́ láẃ, tɔdɔ̄ i kum mbang ń noō tə́ n m-ā m̄-mānəń kété noí tə́ yā rɔ̄ɔń ngé rɔ̄ɔ̄ gə̄ yā Pilistin gə̄ ní. 25Dabid rāā tītə̄ ń Kɔ́ɔ̄ɓē ədanəń ní, adə̄ ni-tetə Pilistin gə̄ rɔ̄ɔ̄ ba tə̄ɓādə́ Geba bátə́ ugə̄ sedə́ ngɔr kə̄ Gejer.

Currently Selected:

2 SAMUEL 5: SARDC

Highlight

Copy

Compare