2 SAMUEL 3

1Deē yā Saul gə̄ ō, yā Dabid gə̄ ō, rɔ̄ɔ̄n̄ naā dan i ngá̰ý. Tɔ́gə Dabid aw̄ i kum kə̄ kété kété, banī tɔ́gə deē yā Saul gə̄ a tél i kum kə̄ gogə́ gogə́.

Ngán gə̄ ń Dabid ojədə́ Hebron ní

(Á̰a̰ī 1 Yá̰a̰ 3.1-4)

2Dabid ojə ngán gə̄ Hebron. Ngōn̄ hágən i Amnon, ojən i kə Ahinoam kə́ Jisreel. 3Ngōnən kə́ nge ko̰ jōó i Kilab, ojən i kə Abigail kə́ Karmel ń i nə̄yá̰ nge yo Nabal ní. Ngōnən kə́ dəngam kə́ nge ko̰ mətá i Absalom ojən i kə Maaka kə́ ngōn̄ Talmai ń i mban̄g kə́ Gesur ní. 4Ngōnən kə́ dəngam kə́ nge ko̰ sɔ́ i Adonia, ojən i kə Hagit. Ngōnən kə́ dəngam kə́ nge ko̰ mí i Sepatia, ojən i kə Abital. 5Ni kə́ nge ko̰ mehḛ́ i Itəream, ojən i kə nə̄yá̰n Egəla. Ngán kə́ dəngam gə̄ ń Dabid ojədə́ Hebron ní n noó.

Abner nin̄ kə Isəboset tə́lan̄ tadə́ naā tə́

6Dan ń deē yā Saul gə̄ a rɔ̄ɔ̄n̄ naā kə deē yā Dabid gēé ní, Abner əndā rɔ̄n ngan̄g ngá̰ý i dām̄ yā deē yā Saul gə̄ tə́. 7Kété Saul aw̄ kə də̄yá̰ gidə ndogə̄ kógə̄ḿ, kə́ rīn na i Risəpa, i ngōn̄ Aya. Ndɔ̄ kə́rēý tə́ anī Isəboset ɔr̄ najə̄ yā dəyá̰ ní kə Abner, əda na: Ī-ɓīī kə də̄yá̰ gidə ndogə̄ yā bɔbə́ḿ i tām̄ rí tə́? 8Dan ń Abner oō najə̄ ń noō ní, wōn̄g rāān ngá̰ý adə̄ əda Isəboset na: Mā i bísə kə́ Juda gə̄ mangən̄ kadə̄ rɔ̄ɔ̄ dɔdə́ tə́ a? Bátə́ ɓōólaā ní m̄-ra dɔ ndūḿ tə́ kə kojə yā bɔbí Saul ō, kə ngákó̰o̰n gə̄ ō, madə̄ tan gə̄ ō. M-ə́ya̰ī ādə̄ ə̄sō kem jī Dabid tə́ aĺ ō anī ɓōólaā ī-gɔrə́yɔ̄m̄ najə̄ dəyá̰ ń toō tə́ a? 9Yá̰á̰ ń Kɔ́ɔ̄ɓē túbə ənīń ndūn yā rāā tām̄ yā Dabid tə́ ní, ré m̄-rāā m-ādə̄n aĺ anī, ādə̄ Kɔ́ɔ̄ɓē rāām̄ yá̰á̰ kə́ tōr̄ ń toō ō, tél rāām̄ ngé kə́ tōr̄ ń toō ō. 10Kɔ́ɔ̄ɓē túbə əda na n-a n-taā ko̰o̰ ɓē jī de gə̄ kə́ gír kojə yā Saul tə́, na n-a n-rāā kadə̄ Dabid o̰o̰ ɓē dɔ Israel tə́ ō, dɔ Juda tə́ ō, a əla gír i Dan bátə́ Beer Seba. 11Isəboset asə tūr̄ Abner najə̄ tə́ alé tɔdɔ̄ ɓōlə́n.

Abner tetə rɔ̄n gō Dabid tə́

12Abner əla de gə̄ kadə̄ ədan̄ Dabid na ké ɓē i yā náā wa. Ré Dabid na əhɔ madə̄ naā seneé anī, n-a n-rāā seneé kadə̄ Israel gə̄ tél reēn̄ gōn tə́ malang. 13Dabid tél ədan na:

Majə, m̄-ndigə əhɔ madə̄ naā seí. Ba yá̰á̰ ń m̄-dəjeī ní i kógə̄ḿ beē: Nə̄yá̰ḿ Mikal kə́ ngōn̄ Saul ní, ré ə́la seneé ādə̄ ugə̄ rɔ̄ḿ tə́ kété noí tə́ aĺ anī, ī-lōō reē rɔ̄ḿ tə́. 14Gō tə́ anī Dabid əla de gə̄ rɔ̄ Isəboset ngōn̄ Saul tə́ kadə̄ ədanən̄ na kə adə̄n nə̄yá̰n Mikal ń n-taān kə ta mɔtə Pilistin gə̄ ɓú ní. 15Loo ń noō tə́ Isəboset əla gō Mikal tə́ ɓē ngaan Paltiel kə́ ngōn̄ Lais. 16Paltiel dān̄ Mikal bátə́ ugə̄ seneé Bahurim. Ni-njə̄rā gō Mikal tə́ i kə nōó. Loo ń noō tə́ Abner ədan na kə tél dɔ tə́ kə aw̄ gogə́ ɓēé, anī ni-tél dɔ tə́.

17Abner ɔr̄ najə̄ kə kum kɔɔ̄ yā ngán Israel gēé əda na:

Ī-sāāī kadə̄ Dabid i mban̄g yāsí i jóo. 18Ba kum mbang kə́ yā rāań yá̰a̰ n toó. Tām̄ najə̄ ń Kɔ́ɔ̄ɓē əda dɔ Dabid tə́ ní n toó: M-ā m̄-gān̄g dɔ gír deē yāḿ gə̄ ń i Israel gə̄ ní jī Pilistin gə̄ tə́ ō, jī madə̄ ba̰ā̰də́ kə́ rang gə̄ tə́ ō, i kə ta kūl̄ nge kəla yāḿ Dabid.

19Abner ənī najə̄ ní mbī Benjamḛ gə̄ tə́, ba gō tə́ anī aw̄ gō Dabid tə́ Hebron yā kədan yá̰a̰ malang ń Israel gə̄ ō, Benjamḛ gə̄ malang ō ndigən̄ ní. 20Ni-aw̄ ənge Dabid kem ɓē kə́ Hebron tə́. De gə̄ ń aw̄n̄ seneé ní i deē kutə jōó. Dabid rāā yá̰a̰ kəsa kə́ ngá̰ý adə̄də́. 21Abner əda Dabid na: M-ā m-ə́la dɔ Israel gə̄ malang gír tɔ́gə yā kɔ́ɔ̄ ɓē gə̄ ń i mban̄g yāḿ ní tə́. Nin̄ a rāān̄ madə̄ naā seí ō, loo malang ń kemií ndigə ko̰o̰ ɓē dɔ tə́ ní ā ó̰o̰ ɓē dɔ tə́ ō. Dabid əya̰ Abner adə̄ aw̄ kə lápə́yaá.

Joab tɔ̄l̄ Abner

22Gō tə́ sḛ́ý anī Joab nin̄ kə ngé rɔ̄ɔ̄ gə̄ yā Dabid télən̄ ta rɔ̄ɔ̄ tə́ kə yá̰a̰ kənge kə́ ngá̰ý gə̄ ń táān̄ jī madə̄ ba̰ā̰də́ gə̄ tə́ ní. Abner gətóo kɔ̄ɔ́ rɔ̄ Dabid tə́ Hebron, tɔdɔ̄ Dabid əya̰n adə̄ tél aw̄ gogə́ ɓēé kə lápə́yaá. 23Dan ń Joab nin̄ kə ngé rɔ̄ɔ̄ yān gēé malang reē ugə̄n̄ anī, deē kógə̄ḿ reē əda Joab na Abner kə́ ngōn̄ Ner na reē ɓē mbangāá, ba mban̄g na əya̰n adə̄ na tél aw̄ ɓēé kə lápə́yaá. 24Joab aw̄ ənge mban̄g ba əda na: Ī-rāā i rí kə́ beé? Abner reē ɓēé looí anī ə́ya̰n adə̄ tél aw̄ tītə̄ ń noō i tām̄ rí tə́? 25Īkɔ́ ī-ger̄ Abner kə́ ngōn̄ Ner majə. Ni-reē i gólī tə́ yā gerə̄ń loo kawí ō, loo télí ō, yā gerə̄ń yá̰a̰ malang ń ā ī-rāā ní ō.

26Joab teē ɓē Dabidí anī əla de gə̄ kadə̄ sōngə̄n̄ gō Abner. De gə̄ ní aw̄ əngenən̄ ta bəlo taā man̄ ndī kə́ Sira tə́ ba télən̄ seneé kanjə̄ kadə̄ Dabid ger̄ gōn. 27Dan ń Abner tél dɔ tə́ reē ugə̄ Hebron anī, Joab ɓārə́n kə̄ gogə́ aw̄ seneé ta róbə ndogə̄ tə́ kum kə̄ kemeé, tītə̄ kə́ yā kaw̄ kɔr̄ najə̄ kə́ loo mundə̄ tə́ seneé beē. Ni-ɔsə kem Abner kə kəyá tɔ̄lən loo ń noō tə́ kum gotə ngōkó̰o̰n Asael ń Abner tɔ̄lən ní. 28Dan ń Dabid oō anī əda na: Mósə Abner ngōn̄ Ner i dɔḿ tə́ aĺ ō, dɔ ko̰o̰ ɓē yāḿ tə́ aĺ ō, ta kum Kɔ́ɔ̄ɓē tə́. 29Ādə̄ mósən əsō dɔ Joab tə́ ō, dɔ ngéén gə̄ tə́ malang ō. Ādə̄ de kə́ bájal rāādə́ gə̄, aláa bānjə̄ gán̄gdə́ gə̄ ō, dəngam kə́ ngé rāā kəla rāā dəyá̰ gə̄ ō, dəngam gə̄ kə́ oyn̄ yo kaskar, aláa nalə̄n̄ yá̰a̰ kəsa ō, ton̄ gír kojə yā Joab tə́ ngándáńg! 30Joab nin̄ kə ngōkó̰o̰n Abisai tɔ̄lə̄n̄ Abner tɔdɔ̄ ni tɔ̄l̄ ngōkó̰ó̰də́ Asael ta rɔ̄ɔ̄ kə́ Gabaon tə́.

31Dabid əda Joab nin̄ kə de gə̄ malang ń i seneé ní na: Ī-*rə́yā̰ī kūbə̄ yāsí gə̄ ō, ō̰ō̰ī kūbə̄ kəhɔ ndoō ō, ə́wāīneé ndoō Abner. Mban̄g Dabid nəkɔ́ njə̄rā gō nīń Abner tə́. 32Dubə̄n̄ Abner i Hebron. Mban̄g mbutə kə̄ nōō tə́ nōō dɔ ɓádə Abner tə́, anī de gə̄ malang nōōn̄ ō. 33Gō tə́ anī mban̄g un pā yo nōoń Abner tītə̄ n toō:

Abner, óy yo kə́ tītə̄ yo de kə́ mbóo beé i tām̄ rí tə́?

34Tó̰ō̰n̄ jīí gə̄ kə kəlaá aĺ ō, ənīn̄ kángə́lá njaí tə́ aĺ ō,

banī ə̄sō óy tītə̄ ń deē a oyń

no de kə́ nge rāā yá̰a̰ majaĺ tə́ ní.

Loo ń noō tə́ de gə̄ malang nōōn̄ Abner ɓáý to̰. 35Gō tə́ anī reē mērə̄n̄ Dabid kəsa yá̰á̰ pá tá kadə̄ mbang udə ɓáý, banī ni-ənī míndən əda na: Ré m-ə́sá mápa aláa yá̰á̰ kə́rēý kə́ rang kété no mbang kudə tə́ anī, ādə̄ Kɔ́ɔ̄ɓē rāām̄ yá̰á̰ kə́ tōr̄ ń toō ō, tél rāām̄ nge ń toō ō, tām̄ majaĺ yāḿ tə́!

36De gə̄ malang oōn̄ najə̄ ní ō, a̰a̰n̄ kadə̄ i yá̰á̰ kə́ majə ō, adə̄ ndigən̄. Yá̰a̰ malang ń mban̄g rāā ní, de gə̄ malang a̰a̰n̄ kadə̄ i yá̰á̰ kə́ majə adə̄ ndigən̄ gōn tə́. 37Ndɔ̄ ń noō tə́ ní Juda gə̄ malang ō, Israel gə̄ malang ō, gerə̄n̄ kadə̄ i mban̄g n mēr̄ tɔ̄l̄ Abner kə́ ngōn̄ Ner alé ní. 38Mban̄g əda de kə́ bo yān gə̄ na: Ɓōólaā ní, i ngār kógə̄ḿ, i de kə́ bo kógə̄ḿ kə́ Israel tə́ n oy ní, ī-gerī aĺ a? 39Urən̄ yibə̄ ngār dɔḿ tə́ adə̄ mā i ngār ɓá tā, ba ɓōólaā ní tɔ́gə́ḿ gətóo adə̄ de gə̄ ń noō, ngán Seruya gə̄ ń noō, dɔ́nɔ yādə́ tɔȳ yāḿ mā. Banī ādə̄ Kɔ́ɔ̄ɓē əgā nge kem ndul sɔɔ̄ń kem ndul yān.

Currently Selected:

2 SAMUEL 3: SARDC

Highlight

Copy

Compare