2 SAMUEL 19

Wur Dabid ɔlən

1Loo ń noō tə́ mban̄g Dabid ndebə. Ni al̄ aw̄ kem kújə́ kə́ dɔɔ́ kə́ rāān̄ dɔ ta róbə ndogə̄ mbal̄ kə́ yā kudəń kə̄ kem ɓēé tə́ ba ndi kemeé a nōō. Ni-njə̄rā i kə najə̄ ń toō tan tə́: Ngōnə̄ḿ Absalom, ngōnə̄ḿ, ngōnə̄ḿ Absalom, mə̄kɔ́ m-óy kum gotií aĺ i tām̄ yā rí tə́? Absalom, ngōnə̄ḿ, ngōnə̄ḿ! 2Əla ədan̄ Joab na mban̄g na a nōō na i Absalom ō, nōō rɔ̄n na i kə najá tan tə́ ō. 3Ndɔ̄ ń noō tə́ ngé rɔ̄ɔ̄ gə̄ rāān̄ rɔ̄nel̄ tetə rɔ̄ɔ̄ yādə́ alé, banī əhɔn̄ i ndoō, tɔdɔ̄ nin̄ oōn̄ kadə̄ wur mban̄g ɔlən ngá̰ý najə̄ yo ngōnən tə́. 4Nin̄ udən̄ kem ɓēé i jəke tītə̄ ngé rɔ̄ɔ̄ gə̄ kə́ rɔ̄ɔ̄ tetədə́ adə̄ a̰ȳn̄ naā kə rɔ̄sɔlɔ̄ɔ́ beē. 5Mban̄g seĺ kūbə̄ ta kumən tə́ kɔ̄ɔ́. Ni un ndūn kə̄ dɔɔ́ nōoń kə najá tan tə́, əda na: Ngōnə̄ḿ Absalom, Absalom, ngōnə̄ḿ, ngōnə̄ḿ!

6Joab udə kújú gō mban̄g tə́ ba ədan na: Ngé kəla yāí gə̄ ń ajiīn̄ ɓōólaā ō, ajən̄ ngání kə́ dəngam gə̄ ō, kə́ dəyá̰ gə̄ ō, nə̄yá̰í gə̄ ō, də̄yá̰ gidə ndogə̄ yāí gə̄ ō ní, ḭ̄ ə́la rɔ̄sɔl̄ dɔdə́ tə́ ɓōólaā malang. 7De gə̄ ń imīn̄ ní, ī-táŕdə́, ba de gə̄ ń táriīn̄ ní ḭ̄ īm̄də́. Īkɔ́ ɔ́jə kə̄ ndágá ɓōólaā kadə̄ ngé rɔ̄ɔ̄ yāí gə̄ ō, ngoldə́ gə̄ ō, nin̄ i yá̰á̰ kógə̄ḿ ta kumií tə́ alé. M-á̰a̰ā̰ ní, ré i Absalom n ndi kə kumneé ba i jḭḭ n j-oy ɓōólaā malang anī ḭ̄ ā á̰a̰ā̰ kadə̄ i yá̰á̰ kə́ majə ngá̰ý. 8Ní ngɔlaā ḭ́ḭ dɔɔ́ ba ī-teē āw̄ ɔ̄r̄ najə̄ kə ngé rɔ̄ɔ̄ yāí gēé ādə̄ kemdə́ sɔl̄. Tɔdɔ̄ m-ə́daī kə rī Kɔ́ɔ̄ɓēé, ré ī-teē āw̄ aĺ anī, deē kógə̄ḿ kə́ yā ndi seí ndɔ̄ɔ́ ɓōólaā a gətóo. Nge ń noō a tél i yá̰á̰ kə́ to kum kaȳ aĺ kə́ reē dɔí tə́ kə́ tɔȳ gotə gə̄ malang ń rāāīn̄ dan balsááí tə́ bátə́ ngɔlaā ní. 9Tā anī mban̄g ḭḭ dɔɔ́ ba aw̄ ndi ta róbə ndogə̄ kə́ yā kudəń kə̄ kem ɓēé tə́. Ədan̄ ngé rɔ̄ɔ̄ gə̄ na mban̄g na ndi ta róbə ndogə̄ tə́ noō. Anī ngé rɔ̄ɔ̄ gə̄ malang kánə̄n̄ naā rɔ̄n tə́.

Mērə̄n̄ Dabid tél kaw̄ gogə́ Jerusalem

Ngé rɔ̄ɔ̄ yā Absalom gə̄ a̰ȳn̄ naā. Nin̄ télən̄ kógə̄ḿ kógə̄ḿ kə̄ kújə yādə́ gə̄ tə́. 10De gə̄ malang kə́ gír ɓē yā Israel tə́ gə̄ a kɔ̄lə̄n̄ i naā. Nin̄ ədan̄ na: Mban̄g Dabid ɔr̄jí kɔ̄ɔ́ jī madə̄ ba̰ā̰jí gə̄ tə́, ni-taājí jī Pilistin gə̄ tə́ əya̰jí dɔɔ́. Ngɔlaā ni teē kem ɓēé a̰ȳ i najə yā Absalom tə́. 11Ba Absalom ń j-uriī yibə̄ dɔn tə́ kadə̄ i ni n i mban̄g yājí ní, oy ta rɔ̄ɔ̄ tə́ kɔ̄ɔ́. Ní āw̄ ī-téliī kə mban̄g Dabid ī-reēī seneé gogə́ aĺ ba údə ī-ndi ā ī-ngóōī i rí?

12Kə́ dām̄ yā mban̄g Dabid tə́ ɓáa anī, ni-əla əda ngé tun̄ yá̰a̰ gə̄ ń i Sadok ō, Abiatar ō ní kadə̄ ɔrə̄n̄ najə̄ kə kum kɔɔ̄ yā de kə́ Juda tə́ gə̄, kə ədan̄də́ na najə̄ kɔr̄ Israel gə̄ malang na ugə̄ rɔ̄ mban̄g tə́ ba ké i ba̰ý á nin̄ i de kə́ gō gogə́ gə̄ loo tél reē kə mbangāá gogə́ ɓēé tə́ wa. 13Nin̄ na i kojə yān gə̄, ba ké i ba̰ý á nin̄ i de kə́ gō gogə́ gə̄ loo tél reē kə mbangāá gogə́ ɓēé tə́ wa. 14Ba gō tə́ anī kə dəjen̄ Amasa na ké ni i kojə yān aĺ wa. Ré ni Dabid n-əndān ngol áskar yān gə̄ tə́ kum gotə Joab aĺ anī, kadə̄ Kɔ́ɔ̄ɓē rāān yá̰á̰ kə́ tōr̄ ń toō ō, tél rāān nge kə́ tōr̄ ń toō ō. 15Dabid əhɔ de kə́ dəngam gə̄ malang kə́ Juda tə́ kə najá, adə̄ gír̄ yādə́ i gō naā tə́ malang. Nin̄ əlan̄ kəla gō mban̄g Dabid tə́, ədanən̄ na kə tél kə reē kə ngé kəla yān gēé malang. 16Tā anī mban̄g tél un róbə́ gír njan. Ni-reē bátə́ ugə̄ ta bā Jurdḛ tə́.

Dabid əya Simei adə̄ ndi kə kumneé

De kə́ Juda tə́ gə̄ reēn̄ tə́nī ta mban̄g Dabid tə́ Gilgal yā teē seneé bā Jurdḛ. 17Anī Simei ngōn̄ Gera kə́ Bahurim ń ni i de kə́ Benjamḛ ní, nāgə́ láẃ reē tə́nī ta mban̄g tə́. 18-19Benjamḛ gə̄ dūbú aw̄n̄ seneé. Siba ń i nge rāā kəla yā de kə́ gír kojə yā Saul tə́ gə̄ ní, aw̄ seneé kə ngánən kə́ kutə gidə i mí gēé ō, ngé kəla yān kə́ kutə jōó gēé ō. De gə̄ ngeé ń toō yá̰á̰ ń kadə̄ rāān̄ ní i kadə̄ dan ń a teēn̄ bā Jurdḛ kə de kə́ kem kújə yā mban̄g tə́ gə̄ kə toó anī, i kadə̄ nin̄ a̰ȳn̄ ngɔ̄də̄ reēn̄ ta bā tə́ tə́nī ta mban̄g tə́ ō, i kadə̄ rāān̄ yá̰á̰ ń mban̄g a ədadə́ kadə̄ rāān̄ ní ō.

Dan ń mban̄g teē bā Jurdḛ oy anī, Simei əsō kə̄ nang tə́ non tə́ 20ba ədan na: Kɔ́ɔ̄ ɓē gə̄, ī-lōō tə́da majaĺ yāḿ. Ādə̄ dɔí ndígə̄nal yá̰á̰ kə́ majaĺ ń m̄-rāā ndɔ̄ teēí kɔ̄ɔ́ kem ɓē kə́ Jerusalem tə́ ní. Ī-lōō kəhɔm̄ kemií tə́ najə̄n tə́. 21Kɔ́ɔ̄ ɓē gə̄, m̄-ger̄ majə kadə̄ m̄-rāā yá̰á̰ kə́ majaĺ. Ba ɓōólaā á̰a̰ā̰, i mā n m̄-reē tə́nī taí tə́ kété no de gə̄ kə́ gír kojə yā Jəjep tə́ ní. 22Abisai ngōn̄ Seruya un najə̄ ɔr̄, ni-əda mban̄g na: Nge ń noō i yá̰á̰ kə́ asə kadə deē əya̰ń Simei ń ndɔ̄ĺ mban̄g ń Kɔ́ɔ̄ɓē ur yibə̄ ngar dɔn tə́ gə̄rānneé ní a? 23Banī Dabid əda Abisai nin̄ kə ngōkó̰o̰n Joab na: Sḭḭ̄ ngán Seruya gə̄, ə́laī tasí danaá i tām̄ rí tə́? Yá̰a̰ gə̄ ń mā m̄-sāā rāā ní ɓáa sḭḭ̄ ī-mbātíī kum mbang ń toō tə́ i tām̄ rí tə́? m̄-ndigə kadə̄ deē tɔ̄l̄ de kə́ Israel tə́ kem ndɔ̄ kə́ ɓōólaā ń toō tə́ alé, tɔdɔ̄ i ndɔ̄ ń m̄-gerə̄ń mámák kadə̄ mā i mban̄g kə́ Israel tə́ ní. 24Gō tə́ anī mban̄g əda Simei na a oy alé, ba túbə adə̄n.

Dabid tél əndā najə̄ naā tə́ kə Mepiboset

25Mepiboset ń i ngōn̄ kaa Saul ní aw̄ tə́nī ta mban̄g tə́ ō. Əla gír ndɔ̄ ń mban̄g teēń kɔ̄ɔ́ kem ɓē kə́ Jerusalem tə́ bátə́ ugə̄ń ndɔ̄ ń mban̄g tél reē ugə̄ń gogə́ kem ɓē kə́ Jerusalem tə́ kə lápə́yaá ní, Mepiboset əja mbāý tan kə́ dɔɔ́ aĺ ō, tə́go njan aĺ ō, tə́go kūbə̄ yān aĺ ō. 26Dan ń ni-reē rɔ̄ mban̄g tə́ ní mban̄g dəjen na ké i tām̄ rí tə́ áké aw̄ seneé aĺ wa. 27Anī ni-tél əda mban̄g na: Kɔ́ɔ̄ ɓē gə̄, i nge kəla yāḿ n gólə̄m̄ ní. Tɔdɔ̄ m̄-gír̄ kənī yá̰a̰ gidə kó̰o̰ kərō yāḿ tə́ ba kal̄ ndi dɔ tə́ tá dānəń mban̄g tām̄ mā i de kə́ nge nja lígə̄rī. 28Anī ni-aw̄ tetə najə̄ dɔḿ tə́ rɔ̄í tə́. Banī Kɔ́ɔ̄ ɓē gə̄, ḭ̄ i de kə́ ī-to tītə̄ de kə́ dɔ rā̰ tə́ yā Nə́ɓā beé, adə̄ yá̰á̰ ń á̰a̰ā̰ ta kumií tə́ kadə̄ i yá̰á̰ kə́ majə ní ī-rāā. 29Tām̄ ta kumií tə́ ní de gə̄ kə́ gír kojə yā kaaḿ Saul tə́ i de gə̄ kə́ kadə̄ oyn̄ kɔ̄ɔ́ malang ɓá tā, ba ḭ̄ ə́hɔm̄ kə̄ rɔ̄í tə́ adə̄ mā i dan de gə̄ ń a əsan̄ yá̰a̰ ta tábəl yāí tə́ ní. Adə̄ i gōtə́ kadə̄ mā m̄-dəjeī yá̰á̰ kə́ rang to̰ alé. 30Mban̄g əda Mepiboset na: Kɔr̄ najə̄ kadə̄ danən ngāl̄ ɓáý i tām̄ rí tə́? Yá̰á̰ ń m-ā m̄-rāā ní n toó. Ā ī-kēgī naā dɔ nang yā Saul sḭḭ̄ kə Siba. 31Anī Mepiboset əda mban̄g na: Dan ń kɔ́ɔ̄ḿ mban̄g tél ugə̄ ɓēé kə lápə́ya ɓá ní, ādə̄ Siba taā dɔ nang ní malang kə́ yān tə́.

Dabid əndā nja Barjilai

32Barjilai ń i de kə́ gō nang kə́ Galaad tə́ ní, ḭḭ Rogelim reē ugə̄ bā Jurdḛ tə́ ō. Ni teē bā Jurdḛ kə̄ gidə kə́rēý tə́ kə mbangāá pá tá kadə̄ əya̰n ba téĺ ɓáý. 33Ni i de kə́ tɔgə ɓə́gá ngá̰ý kɔ̄ɔ́, ɓālə̄n i kutə sɔ́sɔ́. Dan ń mban̄g i Mahanaim ní, i ni n i nge ka̰a̰ gōn ní, tɔdɔ̄ ni i de kə́ nge kənge yá̰a̰. 34Mban̄g ədan na kə aw̄ kə ndi seneé Jerusalem kadə̄ n-a̰a̰ gōn. 35Anī ni-tél əda mban̄g na: Ɓālə̄ḿ kə́ yā kadə̄ m̄-ndiń dɔ nang tə́ nay i ngá̰ý alé. Asə kadə̄ m-āw̄ m̄-ndiń seí Jerusalem alé. 36Ɓālə̄ḿ i kutə sɔ́sɔ́ kɔ̄ɔ́, adə̄ m-ásə ger̄ kɔr̄ nin̄ yá̰á̰ kə́ majə naā tə́ kə yá̰á̰ kə́ majaĺ alé. M-ásə ger̄ nel̄ yá̰a̰ kəsaḿ aĺ ō, yá̰a̰ ka̰ȳḿ aĺ ō, m-ásə ger̄ ndū de kə́ dəngam aláa ndū de kə́ dəyá̰ loo kənī pā tə́ aĺ ō. Anī kə m̄-tél yá̰á̰ kə́ kɔȳ tām̄ yāí tə́ ɓáý to̰ i tām̄ rí tə́? 37m̄-sāā i teē seí bā Jurdḛ kə̄ gidə kə́rēý tə́ ngóy. Ə̄ndā njaḿ kə yá̰á̰ kə́ asə naā beé i tām̄ rí tə́? 38Ə́ya̰m̄ ādə̄ m̄-tél m-āw̄ gogə́ ɓēé m-āw̄ m-óy kem ɓē yāḿ tə́ kadə ɓádə bɔbə́ḿ nin̄ kə kó̰ó̰ḿ tə́. Banī ngōnə̄ḿ Kimham n toó, ādə̄ aw̄ kə kɔ́ɔ̄ḿ mban̄g. Yá̰á̰ ń á̰a̰ā̰ ta kumií tə́ kadə̄ i yá̰á̰ kə́ majə ní ī-rāā seneé. 39Mban̄g əda na: Majə, ādə̄ Kimham aw̄ seḿ. Yá̰á̰ ń nelī ní m-ā m̄-rāā tām̄ yān tə́ ō, yá̰a̰ malang ń ā ī-dəjem̄ ní, m-ā m̄-rāā tām̄ yāí tə́ ō. 40Mban̄g teē bā Jurdḛ, kósə de gə̄ malang teēn̄ ō. Dabid əhɔ Barjilai kə̄ rɔ̄n tə́ ɓirə̄n dagə ba tɔ́r̄ tan dɔn tə́. Gō tə́ anī Barjilai tél dɔ tə́ aw̄ gogə ɓēé, 41ba Kimham aw̄ kə mbangāá Gilgal.

Juda gə̄ ō, Israel gə̄ ō, kɔ̄lə̄n̄ naā

Juda gə̄ malang ō, núsə Israel gə̄ ō, teēn̄ bā Jurdḛ kə mbangāá. 42De kə́ dəngam kə́ Israel tə́ gə̄ aw̄ ugə̄n̄ rɔ̄ mban̄g tə́. Anī nin̄ ədan̄ mban̄g na: Deē yāí gə̄ malang nin̄ i seí ō, ba i tām̄ rí tə́ á de kə́ Juda tə́ gə̄ ń nin̄ i ngákó̰ó̰jí gə̄ ní taāīn̄ gidə yādə́ tə́ ba teēn̄ seí bā Jurdḛ naā tə́ kə kojə yāí gēé ní? 43Anī Juda gə̄ malang tél ədan̄ Israel gə̄ na: I tām̄ jḭḭ i ngéé mban̄g kə́ ngɔr ngá̰ý gə̄ tɔȳ yāsí. Ā ī-rāāī wōn̄g najə̄n tə́ i tām̄ rí tə́? I mban̄g n ul̄jí ní a? Mban̄g adə̄jí kadə̄ karī gə̄ a? 44Israel gə̄ tél ədan̄ Juda gə̄ na: Mban̄g i yājí tɔȳ yāsí nja kutə. Dabid nəkɔ́ gə̄gē ní i yājí jḭḭ̄ tɔȳ yāsí ba ī-kídījí beé i tām̄ rí tə́? I jḭḭ n j-əda rī tél reē kə mban̄g yājí gogə́ ɓēé kété nosí tə́ ní aĺ a? Banī Juda gə̄ ɔrə̄n̄ najə̄ kə ngangá ngá̰ý tɔȳ Israel gə̄.

Currently Selected:

2 SAMUEL 19: SARDC

Highlight

Copy

Compare