2 SAMUEL 15

Absalom sāā taā ngār jī bɔbə̄n Dabid tə́

1Gō tə́ anī Absalom sāā púsə́ kógə̄ḿ ō, sāā sə́nda gə̄ ō, ɔy de gə̄ kutə mí kadə̄ a̰ȳn̄ ngɔ̄də̄ kété non tə́ ō. 2Kə ndɔ̄í ɓatə anī ni a ra i kadə róbə́ kə́ yā kudəń kə̄ kem ɓēé tə́. De gə̄ malang ń a mānə̄n̄ kógə̄ḿ kógə̄ḿ a aw̄n̄ kə̄ ɓē mbangāá yā kadə̄ mban̄g gān̄g sarya yādə́ ní, ni-ɓāŕdə́ ba dəjedə́ na ké nin̄ i de kə́ rá gə̄ wa. Ɓá a de gə̄ ní tél ədanən̄ na nin̄ na i ngán Israel gə̄ kə́ dan gír ɓē kə́ beé tə́. 3Anī ni ədadə́ kógə̄ḿ kógə̄ḿ kə dɔdə́ gēé na: Majə, najə̄ yāí majə ō, i gōtə́ ō, banī de kə́ kadə̄ mban̄g əndān kadə̄ oō najə̄ yāí gətóo. 4Absalom əda ɓáý to̰ na: Ré i mā n i nge gān̄g sarya kə́ kem ɓē ń toō tə́ anī, de gə̄ malang a reēn̄ saryaá i rɔ̄ḿ mā tə́ ō, m-ā m̄-gān̄g sarya yādə́ i kə gōó yā kadə̄də́ ō. 5Ba ré de gə̄ ní a reēn̄ kə̄ rɔ̄n tə́ yā kɔsə nodə́ nang tə́ non tə́ anī, ni-əla jīn əhɔńdə́ ba ɓir̄də́ dagə kə̄ rɔ̄n tə́. 6Yá̰á̰ ń Absalom a rāā kə ngán Israel gə̄ malang ń a mān̄ a aw̄n̄ kə̄ ɓē mbangāá yā kadə̄ mban̄g gān̄g sarya yādə́ ní n noó. I kum kedə̄ ń noō n Absalom tūrəń ngán Israel gə̄ gidə yān tə́ adə̄ nin̄ gḛyn̄ najə̄ yān ní.

7Ta tɔ̄l̄ ta ɓāl̄ kə́ nge ko̰ sɔ́ tə́ anī, Absalom əda mban̄g na: Ādə̄m̄ ta róbə ādə̄ m-āw̄ Hebron rāā yá̰á̰ ń m-ə̄nī ndūḿ yā rāā tām̄ yā Kɔ́ɔ̄ɓē tə́ ní tə́. 8Tɔdɔ̄ dan ń m̄-ndi Gesur dɔ nang kə́ Aram tə́ ní, m-ə̄nī ndūḿ m-ādə̄ Kɔ́ɔ̄ɓē m-ə́da na ré Kɔ́ɔ̄ɓē tél reē seḿ gogə́ Jerusalem anī, m-ā m̄-tun̄ yá̰a̰ yā kadə̄n kem ɓē kə́ Hebron tə́. 9Mban̄g tél əda Absalom na: Āw̄ kə kem sɔlɔ́. Anī ni-aw̄ Hebron. 10Absalom əla deē yān gə̄ kadə̄ ədan̄ gír ɓē gə̄ yā Israel gə̄ malang na ré kə oōn̄ kōō tōw̄ anī, kə ədan̄ na: Absalom ndi mban̄g kem ɓē kə́ Hebron tə́.

11Absalom mēr̄ de kə́ Jerusalem gə̄ ɓú jōó adə̄ dānə̄nən̄. Ba de gə̄ ní tá ndin̄ i dāyāá gerən gō yá̰a̰ gə̄ ń a rāān̄ yá̰á̰ ní alé. 12Dan ń Absalom a tun̄ yá̰a̰ anī əla gō Ahitopel nge kadə̄ Dabid kɔjə̄ tə́ kem ɓē yān tə́ Gilo. Adə̄ kutə de gə̄ yā Absalom a reē i kə̄ dɔ madə̄ tə́ ō, koō naā ní tɔ́gən aw̄ i kum kə́ kété kété ō.

Dabid teē Jerusalem a̰ȳ

13De kógə̄ḿ reē əda Dabid na de kə́ dəngam gə̄ kə́ Israel tə́ na tetən̄ rɔ̄də́ malang gō Absalom tə́ kɔ̄ɔ́. 14Anī kə̄ ta jī tə́ noō Dabid əda ngé kəla yān gə̄ malang ń ndin̄ seneé Jerusalem ní na: J-a̰ȳī naā kɔ̄ɔ́ na Absalom a əya̰jí kadə̄ jə-ndiī kə kumjí alé. Ādə̄ j-a̰ȳī naā láẃ na a ɔr bā̰ā̰ loo reē yā rɔ̄jí tə́ alé. Ni a tɔ̄l̄ de kə́ kem ɓēé gə̄ malang yā rāań kadə̄ yá̰á̰ kə́ majaĺ taā loo kem ɓēé. 15Ngé kəla gə̄ yā mban̄g tél ədan̄ mban̄g na: Ká kɔ́ɔ̄jí mban̄g ndigəń i rāā rí gə̄gē, jḭḭ ngé kəla yān gə̄ jə-ndi dɔ rɔ̄jí tə́ kɔ̄ɔ́ yā rāā yá̰á̰ ní. 16Adə̄ mban̄g teē kə njaneé naā tə́ kə kojə yān gēé malang, ba i də̄yá̰ gidə ndogə̄ yān gə̄ n ni əya̰də́ kutə kógə̄ḿ kadə̄ a̰a̰n̄ gō kem kújə́ ní. 17Mban̄g nin̄ kə de kə́ gōn tə́ gēé teēn̄ kə njadə́ ba aw̄ dəban̄ kadə kújə́ kə́ ta ngóy ɓē tə́ tə́.

18Ngé kəla yān gə̄ malang mānə̄n̄ ta kumən tə́: Kereti gə̄ ō, Peleti gə̄ ō, Gat kə́ ɓú mehḛ́ gə̄ ń reēn̄ gōn tə́ ní ō. Nin̄ malang mānə̄n̄ ta kum mban̄g tə́. 19Mban̄g əda Itai ń i ngol ngé rɔ̄ɔ̄ gə̄ kə́ Gat ní na: Ḭ̄ ī-ndigə kaw̄ sejí ō, i tām̄ yā rí tə́? Ī-tél āw̄ ī-ndi kə mban̄g kə́ kijií. Tɔdɔ̄ ḭ̄ i tə̄rā ō, ásə́ tél kaw̄ gogə́ kem ɓē yāí tə́ to̰ aĺ ō. 20Ḭ̄ ī-reē gōḿ tə́ i kə̄ tagə́bēé laā anī ɓōólaā kə m-āw̄ seí loo ɓá a? Loo nəkɔ́ ń kadə̄ m-āw̄ tū tə́ ní gə̄gē m̄-ger̄ aĺ kə̄ laā anī, kə m-úniī kadə̄ āw̄ sejí a? I beé alé, ī-tél āw̄ gogə́ kem ɓēé kə ngákó̰ó̰í gēé, ba ādə̄ Kɔ́ɔ̄ɓē rāā kem majə seí ō, rāā yá̰á̰ kə́ gōtə́ seí ō. 21Banī Itai tél əda mban̄g na: Tītə̄ ń Kɔ́ɔ̄ɓē ndiń kə kumneé noō ō, ḭ̄ ī-ndiń kə kumií ō noó, loo ń ā ī-ndi tū tə́ ní m-ā m̄-ndi tū tə́ ō, yā kadə̄ ré ā ī-ndi loo ní tə́ i kə kumií a, m-ā m̄-ndi tū tə́ kə kumḿ ō, ā óy i loo ní tə́ a, m-ā m-óy tū tə́ ō. 22Dabid əda Itai na majə, kə mān̄. Anī Itai mān̄ naā tə́ kə ngé rɔ̄ɔ̄ yān gə̄ ō, kojə yā ngé rɔ̄ɔ̄ yān gə̄ ō.

23Dan ń de gə̄ a mānə̄n̄ anī, de kə́ kem ɓēé gə̄ malang unən̄ ndūdə́ kə̄ dɔɔ́ a nōōnneé. Mban̄g teē man̄ Sedəron kə̄ gidə kə́rēý tə́ ō, de gə̄ malang mānə̄n̄ kumdə́ sɔɔ̄ róbə́ ń to kə gō kadə dəla loo ní ō. 24Sadok nge tun̄ yá̰a̰ ō, ngán Lebi gə̄ ń nin̄ malang i ngé kətō sandúkə madə̄ naā yā Nə́ɓā ní ō, nin̄ i sedə́. Nin̄ əndān̄ sandúkə madə̄ naā yā Nə́ɓā nang tə́ ba Abiatar al̄ dɔɔ́#15.24 al̄: Kem makətūbə̄ kə́ kə ta Hebəroó ní ədan̄ yá̰á̰ ń al̄ dɔ tə́ ní alé. bátə́ adə̄ de kə́ kem ɓēé gə̄ ń a teēn̄ ní mānə̄n̄neé malang. 25Tā anī mban̄g əda Sadok na: Ī-tél kə sandúkə yā Nə́ɓāá āwń gogə́ kem ɓēé. Ré Kɔ́ɔ̄ɓē ndigə rāā majə seḿ anī a tél yā reē seḿ gogə́ kadə̄ m-á̰a̰ sandúkə yān ɓáý ō, kadə̄ m-á̰a̰ loo ndi yān ɓáý ō. 26Ba ré Kɔ́ɔ̄ɓē əda na n-gḛym̄ aĺ anī, ādə̄ rāā yá̰á̰ ń kemən ndigə ní seḿ. 27Mban̄g əda Sadok ɓáý to̰ na: Ḭ̄ ō, ngōnīí Ahimas ō, Abiatar nin̄ kə ngōnən Jonatan ō ní, ī-tél āwī gogə́ kem ɓēé kə kem sɔlɔ́. 28Mā m-ā m̄-nay kem dəla loo tə́ ngɔr kə̄ kadə loo ń a udən̄ man̄ Jurdḛ tū tə́ ní tə́, bátə́ kadə̄ ré m-ōō najə̄ kə́ ḭḭ rɔ̄sí tə́ pá tá. 29Adə̄ Sadok nin̄ kə Abiatar télən̄ kə sandúkə madə̄ naā yā Nə́ɓāá aw̄n̄neé gogə́ Jerusalem ō, nin̄ ndin̄ kə̄ noó ō.

Dabid əla Husai kadə̄ aw̄ um̄ Absalom

30Dabid un róbə́ kə́ əta tan ta kaw̄ kə̄ dɔ mbal̄ kāgə̄ olibə gə̄ tə́ i kə nōó kumən tə́. Ni do̰ō̰ kūbə̄ ta kumən tə́ ō, njə̄rā i njan karī#15.30 Njan karī: Nge ń noō ɔjə i kəhɔ ndoō ō, wur kɔl ō, rɔ̄sɔl̄ ō. ō. De gə̄ malang ń dānə̄nən̄ ní do̰ō̰n̄ kūbə̄ ta kumdə́ tə́ ō, njə̄rān̄ i kə nōó ō. 31Reē ədan̄ Dabid na Ahitopel i dan ngé koō naā gə̄ tə́, adə̄ ni na i gō Absalom tə́. Anī Dabid əda na: m̄-rāāī ɓɔ́ Kɔ́ɔ̄ɓē, ī-rāā ādə̄ kɔjə̄ yā Ahitopel tél kɔjə̄ kə́ to mbóo ro karī.

32Dan ń Dabid aw̄ ugə̄ dɔ mbal̄ tə́ dɔɔ́ loo ń a ɔsən̄ nodə́ nang tə́ tū tə́ ta kum Nə́ɓā tə́ ní anī, a̰a̰ Husai ń i Arki ní a tə́nī tan. Kūbə̄ ngāl̄ yān i kə́ rə̄yā̰ ō, bumbə́ru i dɔn tə́ ō,. 33Dabid ədan na: Ré āw̄ seḿ anī ā ɔ̄ȳm̄ ngá̰ý. 34Ba ré ī-tél āw̄ gogə́ kem ɓēé ba ə́da Absalom na: Kɔ́ɔ̄ ɓē gə̄, mā i nge kəla yāí. Kété m̄-rāā kəla m-ādə̄ bɔbí, banī ngɔlaā mā i nge kəla yāí. Anī ā ə́nge ta róbə bā ta kɔjə̄ gə̄ yā Ahitopel yā rāań seḿ. 35Tá ngé tun̄ yá̰a̰ gə̄ ń i Sadok nin̄ kə Abiatar ní nin̄ i seí nú aĺ a? Najə̄ malang ń ā ōō kem kújə yā mban̄g tə́ ní, ə́dádə́. 36Ngán Sadok nin̄ kə Abiatar ń i Ahimas ō, Jonatan ō ní, nin̄ i sedə́ noō. Adə̄ najə̄ malang ń ā ōōī ní ə́lá ə́damī kə kūl̄də́. 37Dan ń Absalom udə kə̄ kem ɓē kə́ Jerusalem tə́ anī, Husai madə̄ Dabid udə kem ɓēé ō.

Currently Selected:

2 SAMUEL 15: SARDC

Highlight

Copy

Compare