2 SAMUEL 13

Amnon nin̄ kə Tamar

1Gō tə́ anī yá̰á̰ ń rāā yá̰á̰ ní n toó. Ngōn̄ Dabid ń rīn na i Absalom ní, ngōkó̰o̰n kə́ dəyá̰ kógə̄ḿ kə́ mandə̄ ngá̰ý i noó, rīn na i Tamar. Anī ngōn̄ Dabid kə́ rang ń rīn na i Amnon ní gḛy Tamar ní ngá̰ý. 2Gḛy ń Amnon gḛy ngōkó̰o̰n Tamar ngá̰ý ní rāā adə̄ Amnon əsō mo̰y, tām̄ ni ger̄ yá̰á̰ kə́ yā rāā tá kaw̄ń rɔ̄n tə́ alé#13.2 Kaw̄ń rɔ̄n tə́: Ngōn̄ kə́ mandə ń asə taā dəngam tá ənge dəngam aĺ ɓáý ní, a ndi naā tə́ kə dəngam gēé alé. A ndi kə ngákó̰o̰n kə́ dəngam gēé aĺ ō. A ndi i loo yā dəyá̰ gə̄ tə́. Ngōn̄ kə́ dəngam asə kaw̄ rɔ̄n tə́ aĺ ō., tɔdɔ̄ Tamar ger̄ dəngam aĺ ɓáý. 3Banī madə̄ Amnon kə́rēý kə́ kumən edə̄ ngá̰ý i noó, rīn na i Yonadab. Ni i ngōn̄ Sama kə́ ngōkó̰o̰ Dabid. 4Yonadab əda Amnon na: Ngōn̄ mban̄g i ba̰ý á kə dɔ ndɔ̄ gə̄ dəloí anī ā ī-njə̄rā i sɔ sɔ ní? Ī-ndigə kədam̄ yá̰á̰ ń rāā yá̰á̰ ní aĺ a? Anī Amnon tél əda Yonadab na: I ngōkó̰o̰ Absalom kə́ dəyá̰ ń rīn na i Tamar ní n m̄-gḛyn ngá̰ý ní. 5Anī Yonadab əda Amnon na: Ī-to kem tə̄ráá ba ī-rāā tītə̄ kə́ ḭ̄ i mo̰y beé. Ré bɔbí reē go̰ō̰í tə́ anī, ə́dan na kə adə̄ ngōkó̰ó̰í Tamar ta róbə kadə̄ reē kə rāā yá̰a̰ kəsa kə adī kadə̄ ə́sa. Kadə̄ rāā yá̰a̰ kəsa ní i ta kumií tə́ kadə̄ á̰a̰ā̰ ō, kadə̄ nəkɔ́ Tamar reēń adī ō.

6Loo ń noō tə́ Amnon to nang tə́ ba rāā tītə̄ kə́ ni i mo̰y beé. Dan ń mban̄g reē go̰ō̰n tə́ anī ədan na: Ādə̄ ngōkó̰ó̰ḿ Tamar ta róbə ādə̄ reē rāā mápa jōó kə yibīí ta kumḿ tə́ ō, ādə̄ nəkɔ́ reēń adə̄m̄ kadə̄ m-ə́sa ō. 7Dabid əla əda Tamar ɓēé looneé na kə aw̄ kə rāā yá̰a̰ kəsa kə adə̄ ngōkó̰o̰n Amnon. 8Tamar aw̄ anī ənge Amnon to kem tə̄ráá. Tamar ndégə̄ ndujə̄ ló̰ȳ ō, rāā yibə̄ tū tə́ ō, ba ɔr̄ mápá tə́ ta kum Amnon tə́. 9Gō tə́ anī Tamar un mápá ní kə gájə bong gēé ɓōkə́ malang kem yá̰á̰ ba əndā no Amnon tə́ kadə̄ əsa. Banī Amnon mbātə́ kəsa kɔ̄ɔ́. Ni-əda na: Ādə̄ de gə̄ malang teēn̄ ndágá! Anī de gə̄ malang ń ndin̄ rɔ̄n tə́ ní teēn̄ ndágá. 10Gō tə́ anī əda Tamar na kə reē kə mápá kə́ rāā kə yibīí ní ta tə̄rá tə́ kə adə̄n kadə̄ n-əsa. Tamar un mápá kə́ rāā kə yibīí ń ɔr̄ ní aw̄ń adə̄ Amnon ta tə̄rá yān tə́. 11Ni-əla adə̄n, anī Amnon əhɔn ba ədan na: Ngōkó̰ó̰ḿ, ī-reē ī-to seḿ! 12Tamar tél ədan na: Ngōkó̰ó̰ḿ, i beé alé! Ī-lōō sāām̄ dɔ gúú tə́, tɔdɔ̄ a rāān̄ yá̰á̰ kə́ beé dɔ nang kə́ Israel tə́ alé! Ī-lōō rāā yá̰á̰ kə́ to rɔ̄sɔl̄ beé. 13Loo ń kadə̄ m-āw̄ tū tə́ kə rɔ̄sɔl̄ yāḿ ní i rá? Ba ḭ̄, de gə̄ a rāāīn̄ i de kə́ nge kem ndul tə́ dɔ nang kə́ Israel tə́. I beé ɓáa āw̄ ɔ̄r̄ najə̄n kə mbangāá na ni a ɔgī taām̄ alé. 14Banī Amnon gḛy koō najə̄ yā Tamar alé. Ni-əsō seneé ba sāān dɔ gúú tə́. 15Gō tə́ anī Amnon əla gír kim̄ Tamar ngá̰ý. Ni-imə̄n ngá̰ý tɔȳ gḛy ń ni-gḛyn kété ní. Amnon əda Tamar na: Ḭ́ḭ dɔɔ́ ba āw̄ kɔ̄ɔ́! 16Tamar tél əda Amnon na: I beé alé, tɔdɔ̄ ré ī-tə̄ɓām̄ anī, ī-rāā i majaĺ kə́ ngá̰ý tɔȳ nge ń ī-rāā seḿ ngɔ̄r toó. Banī Amnon gḛy koō najə̄ yā Tamar alé. 17Ni ɓāŕ nge kəla yān kə́ balsáa ba ədan na: Ī-teē kə ngōn̄ kə́ dəyá̰ ń noō kɔ̄ɔ́ gōḿ tə́ ba ūtə̄ ta kújə ādə̄ ngan̄g ī-gāngəń gíren. 18Kūbə̄ ń Tamar əla rɔ̄n tə́ ní i kūbə̄ kə́ jīn ngāl̄, tɔdɔ̄ i kūbə̄ ko̰o̰ ngán mban̄g gə̄ kə́ dəyá̰ gə̄ dan ń nin̄ gerə̄n̄ dəngam aĺ ɓáý ní. Nge kəla yā Amnon teē kə Tamar ndágá ba utə̄ ta kújə gāngəń gírən kɔ̄ɔ́. 19Tamar ɔy bū hor rāā dɔn tə́ ō, kūbə̄ yān kə́ majə ngá̰ý ń rɔ̄n tə́ ní, əhɔ rə̄yā̰ ō. Ni ɓōkə́ jīn dɔn tə́ ba ɔtə aw̄ kə nōō gēé. 20Ngōkó̰o̰n Absalom dəjen na: Amnon ɓīī seí dɔ gū tə́ a? Ī-lōō kəda najə̄ ń noō kə̄ kété na ni i ngōkó̰ó̰í. Ī-lōō gír̄ najə̄. Adə̄ Tamar ndi i ɓē ngōkó̰o̰n Absalom tītə̄ dəyá̰ kə́ əyanən̄ kɔ̄ɔ́ beē. 21Mban̄g Dabid oō najə̄ ní malang adə̄ wōn̄g rāān ngá̰ý. 22Absalom əda ngōkó̰o̰n Amnon najə̄ to̰ alé. Ni-əhɔn kemən tə́ najə̄ ɓīī ń ɓīī kə ngōkó̰o̰n Tamar ní tə́.

Absalom mēr̄ tɔ̄l̄ Amnon ba a̰ȳ

23Ɓāl̄ jōó mān̄ gō yá̰a̰ gə̄ ń noō tə́. Ba ndɔ̄ kə́rēý tə́ anī kəja bḭḭ̄ batə̄ i ɓē Absalom loo ń a ɓārə́n̄ na i Baal Hasor ní tə́. I loo kə́ ngɔr kadə ɓē kə́ Epəraim tə́. Absalom ɓāŕ ngákó̰o̰n gə̄ ń i ngán mban̄g gə̄ ní malang kadə̄ aw̄n̄ loo kəja bḭḭ̄ batə̄ ní tə́. 24Ni-aw̄ rɔ̄ mban̄g tə́ ba ədan na: Kəja bḭḭ̄ batə̄ i ɓēé looḿ mā nge kəla yāí. Ní, m̄-rāāī ɓɔ́ ba ī-dān̄mī loo kəja bḭḭ̄ batə̄ ní tə́ kə ngé kəla yāí gēé. 25Mban̄g tél əda Absalom na: Ngōnə̄ḿ, i beé alé, ré j-aw̄ malang anī j-a j-ɔyī ngá̰ý. Absalom ra seneé gar gar ta kaw̄, banī mban̄g ɔdə alé. Ni tɔ́r̄ i tan dɔn tə́. 26Absalom əda ɓáý to̰ na: Ré ɔ́də kaw̄ sejí aĺ gə̄gē anī, ādə̄ ngōkó̰ó̰ḿ Amnon ta róbə ādə̄ aw̄ sejí. Mban̄g tél dəjen na ké kadə̄ Amnon dānə̄n i najə̄ rí tə́ wa. 27Absalom ɔsə kə mbangāá gagar, adə̄ mban̄g əya̰ Amnon adə̄ aw̄ seneé ō, adə̄ gotə ngánən kə rang gə̄ malang aw̄n̄ seneé ō.

28Absalom əda ngé kəla yān gə̄ na: Ə̄ndāī kumsí gír Amnon tə́ majə. Ré á̰a̰ī kadə̄ kasə rāān adə̄ rɔ̄n nelə̄n ngá̰ý ō, m-ə́dásí na: Ə́ndaī Amnon ō anī, ī-tɔ̄līin̄, ba ī-lōōī ɓōĺ. I mā n m̄-mēr̄sí tɔ̄lən ní aĺ a? I beé ní, ə́hɔī rɔ̄sí tɔgə ba ɔ́jiī kadə̄ sḭḭ̄ i de kə́ dəngam gə̄. 29Ngé kəla gə̄ rāān̄ yá̰á̰ ń Absalom ədadə́ ní, adə̄ nin̄ tɔ̄lə̄n̄ Amnon. Loo ń noō tə́ gotə ngán mban̄g gə̄ ḭḭn̄ dɔɔ́ malang. Nin̄ alə̄n̄ gidə kərō rapáy#13.29 Kərō rapáy, i kərō kə́ bɔbə̄n i kərō ba kó̰o̰n i sə́nda. yādə́ gə̄ tə́ ba a̰ȳn̄ naā.

30Nin̄ i róbó ɓáý anī najə̄ ní ugə̄ rɔ̄ Dabid tə́ kété kɔ̄ɔ́. Ədan̄ Dabid na Absalom na tɔ̄l̄ ngán mban̄g gə̄ malang kɔ̄ɔ́, ngōn̄ mban̄g kógə̄ḿ kə́ teē na gətóo. 31Adə̄ mban̄g ḭḭ dɔɔ́, əhɔ kūbə̄ gə̄ kə́ rɔ̄n tə́ rə́yā̰də́, ba to dɔ dā nang tə́. Ngé kəla yān gə̄ malang ń ran̄ rɔ̄n tə́ ní rə́yā̰n̄ kūbə̄ yādə́ gə̄ ō. 32Banī Yonadab ngōn̄ Sama kə́ ngōkó̰o̰ Dabid ɔr̄ najə̄ əda na: Kɔ́ɔ̄ ɓē gə̄, ī-lōō kɔjəń na tɔ̄lə̄n̄ ngání gə̄ malang. I Amnon ngóy n oy. I ndɔ̄ ń Amnon sāań ngōkó̰o̰n Tamar dɔ gúú tə́ ní n Absalom ənīń ndūn yā tɔ̄ləń Amnon ní. 33Adə̄ ī-lōō kɔjəń na i ngání gə̄ malang n oyn̄ ní. I beé alé, i Amnon ngóy n oy ní. 34Absalom a̰ȳ kɔ̄ɔ́.

Balsáá ń əndānən̄ kadə̄ ngɔ̄m̄ loo ní a̰a̰ ɓūtə̄ de kə́ ngá̰ý gə̄ a reēn̄. Nin̄ teēn̄ i gidən tə́ kadə mbal̄ tə́, kə róbə́ kə́ Horonaim n a risən̄ kum kə̄ rɔ̄n tə́ ní. Balsáá ní a̰ȳ reē əda mban̄g. 35Anī Yonadab əda mban̄g na: I ngání gə̄ ń a reēn̄ tītə̄ ń m-ə́daīneé ní. 36Yonadab ɔr̄ najə̄ ba ré ni-ənī tan kə̄ nang tə́ anī ngán mban̄g gə̄ ugə̄n̄ ō. Nin̄ mbutən̄ kə̄ nōō tə́. Mban̄g nin̄ kə ngé kəla yān gēé malang nōōn̄ ngá̰ý ō.

37-38Absalom a̰ȳ aw̄ ndi ɓē Talmai#13.37-38 Talmai, i kaa Absalom kə́ dəngam kə́ ta yā kó̰o̰n tə́. Á̰a̰ī 2 Sam 3.3 kə́ ngōn̄ Amihud ń i mban̄g kə́ Gesur ní tə́. Ni-rāā ɓāl̄ mətá rɔ̄n tə́. Kem ɓāl̄ kə́ mətá gə̄ ń noō tə́ ní, Dabid əhɔ i ndoō ngōnən Amnon. 39Ta tɔ̄l̄ ta anī, wōn̄g ń ni-aw̄ń kemən tə́ kə Absalom ní tetə, tɔdɔ̄ kemən tél sɔl̄ kɔ̄ɔ́ najə̄ yā Amnon tə́.

Currently Selected:

2 SAMUEL 13: SARDC

Highlight

Copy

Compare