2 MAKABE GƏ̄ 7
7
Tɔ̄lə̄n̄ ngákṵ́ṵ naā gə̄ sīrí ō, kṵ́ṵ́də́ ō
1Ndɔ̄ kə́ rang tə́ anī, əhɔn̄ ngákṵ́ṵ naā gə̄ sīrí, naā tə́ kə kṵ́ṵ́də́. Anī mban̄g adə̄ əndan̄də́ kə ndéy məraw ō, habəlay ō, ba ɔsə sedə́ ta kəsa dā̰ bor̄ ń ndū najə̄ ɔgə̄ kəsa ní. 2Nge kógə̄ḿ kə́ dandə́ tə́ ń rāā rɔ̄n i de kə́ nge kɔr̄ najə̄ kum gotədə́ tə́ ní əda na: I rí n ā ī-dəjejí ō, ā ī-sāā ger̄ rɔ̄jí tə́ ō ní? Jḭḭ i ngɔr ngá̰ý yā koy tɔȳ kadə̄ jə-mān̄ dɔ ndū najə̄ yā kaají gə̄. 3Wūn̄g rāā mban̄g ngá̰ý adə̄ mēr̄ kəndā gájə bong gə̄ ō, jóo gə̄ ō horoó. 4Dan ń yá̰a̰ gə̄ ń nuū təngān̄ ngá̰ý anī, mban̄g adə̄ ndūn kadə̄ gāngə̄n̄ ndo̰ nge kɔr̄ najə̄ kum gotə madə̄n gə̄ ní ō, kadə̄ ngīīn̄ ndāŕ dɔn ɔrə̄n̄ ō, gángə̄n̄ jīn gə̄ kə njan gə̄, ta kum ngákṵ́ṵn gə̄ tə́ ō kṵ́ṵn tə́ ō. 5Dan ń gángə̄n̄ jīn gə̄ kə njan gə̄ oy anī, mban̄g əda kadə̄ aw̄n̄ seneé kadə yā̰l̄ hor kə́ ngá̰ý tə́ ba kə əndānən̄ kem gájə bongoó, dan ń a taā koō ɓáý ní. Dan ń a tə́ngānən̄ á sēen a otə ní anī, ngákṵ́ṵn gə̄ ō kṵ́ṵn ō, əlan̄ go̰ kem naā tə́ kadə̄ n-oyn̄ kə wurkilií. Nin̄ ədan̄ na: 6Kɔ́ɔ̄ɓē Nə́ɓā a̰ā̰: kə́ rɔ̄kum tə́ ní, kumən ṵṵn sejí tītə̄ ń Moyijə ədań kété kem pā tə́ wáńg na kumən na a ṵṵn kə ngé kəla yān gēé ní.#7.6 Á̰a̰ī: Ndū najə̄ kə́ nge kṵ jōó Ndū 32.36
7Dan ń nge kə́ ta kəga dɔ əhɔ tan kə̄ naā tə́ i tītə̄ ń nuū anī, aw̄n̄ kə nge kə́ kṵ jōó lo rāā de gə̄ yá̰á̰ kə́ tōr̄ tə́. Dan ń ngīīn̄ ndāŕ dɔn naā tə́ kə nənga dɔn gēé oy anī, dəjenən̄ na: I kəsaí dā̰ bor̄ n i sóótə́ aké i kadə̄ dā̰ rɔ̄í ənge yá̰á̰ kə́ tōr̄, kadə̄ gángə̄n̄ jīí gə̄ kə njaí gə̄ ḿ? 8Banī ni tél əda kə taa yā kaan gēé na: M-ɔ́də alé! I tām̄ najə̄ ń toō tə́ n ni əngeń yá̰á̰ kə́ tōr̄ gə̄ kə gō naá ō ní. 9Pá tá kadə̄ əhɔ tan kə̄ naā tə́ ní, əda na: ḭ̄ i nge tɔ̄l̄ deē ō, ɔ̄gə̄jí kəndi dɔ nang tə́ kə́ ngɔr ń toō tə́ ō. Banī mban̄g kə́ dɔ dúnya̰ tə́ a ndól̄jí kadə̄ jə-ndi kə kumjí ngándáńg, tɔdɔ̄ j-oy i tām̄ yā ndū najə̄ yān tə́.
10Gōn ni tə́ anī, rāān̄ ni kə́ nge kṵ mətá yá̰á̰ kə́ tōr̄. Dan ń ədanən̄ na kə əla ndo̰o̰n kə̄ ndágá anī, əla láẃ ngá̰ý ō, sə́re jīn adə̄də́ kanjə̄ ɓōĺ ō. 11Ni ɔr̄ najə̄ kə́ to wurkil ń toō əda na: I Nə́ɓā n adə̄m̄ jīḿ gə̄ kə njaḿ gə̄ ń toō ní. Ba m̄-kídə̄də́ najə̄ yā Ndū najə̄ yān gə̄ tə́ ō, m-ə̄ndā kemḿ dɔn tə́ kadə̄ a tél yā kadə̄m̄ sedə́ gogə́ ɓáý ō. 12Mban̄g nəkɔ́ gə̄gē, deē yān gə̄ ń ndi gīrə̄n̄ gidən ní gə̄gē, wurkil yā balsáá ń toō ɔr kumdə́. Tɔdɔ̄ tápə̄ ń ni ənge ní, i yá̰á̰ kə́ karī ta kumən tə́. 13Dan ń ni oy anī, rāān̄ yá̰á̰ kə́ tōr̄ kə́ kógə̄ḿ beē nəkɔ́ ń toō kə ni kə́ nge kṵ sɔ́. 14Dan ń ni a rāā yā kəhɔ tan kə̄ naā tə́ anī, əda mban̄g na: Kadə̄ de gə̄ tɔ̄līn̄ ba ī-ngóō kadə̄ Nə́ɓā ndólī sɔɔ̄ń míndən kə́ ənī i sóótə́. Banī ḭ̄ á óy ba ā ī-ndól̄ alé. 15Reēn̄ kə ni kə́ nge kṵ mí, ba rāānən̄ yá̰á̰ kə́ tōr̄. 16Anī ni əndā kumən ta yā mban̄g tə́ ba əda na: ḭ̄ i de kə́ tɔ́gí i ngá̰ý dan de gə̄ tə́ ɓá tā, ba ā ī-ndum. Ī-rāā yá̰á̰ ń kemií ndigə ní, ba ī-lōō kɔjəń na Nə́ɓā na əya̰ gír kaa yājí kɔ̄ɔ́. 17Tām̄ yāí ḭ̄ tə́ ɓáa ī-tə́gā taí na ā á̰á̰ tɔ́gən kə́ ngá̰ý, tɔdɔ̄ ni a rāāsí sḭḭ̄ kə de kə́ gír kojə yāí tə́ gə̄ yá̰á̰ kə́ tōr̄. 18Gō ni ń nuū tə́ ɓáa, reēn̄ kə ni kə́ nge kṵ mehḛ́. Dan ń a rāā yā kəhɔ tan kə̄ naā tə́ anī, əda mban̄g na: ī-lōō gól̄ rɔ̄í na yá̰á̰ kə́ tōr̄ gə̄ malang ń rāān̄jí ní, i najə̄ yā yá̰a̰ rāājí kə́ gōtə́ aĺ tə́. Tɔdɔ̄ jə-rāā yá̰á̰ kə́ majə aĺ kə Nə́ɓā yājí. I tām̄ najə̄ ń toō tə́ n yá̰á̰ kə́ jákə́ kə́ tōr̄ gə̄ ń toō reēn̄nəń dɔjí tə́ ní. 19Ba ḭ̄ ń ā ī-rɔ̄ɔ̄ i Nə́ɓā ní, ī-lōō kɔjəń na ā ə́ngé yá̰á̰ kə́ tōr̄ tām̄ majaĺ yāí tə́ alé.
20Kṵ́ṵ́də́ i dəyá̰ kə́ yā ka̰a̰n lo nja kə́ jōó tə́ ō, i dəyá̰ kə́ asə kadə̄ dɔ deē ndígə̄nalən aĺ ō. Tām̄ ni a̰a̰ ngánən gə̄ lo koy tə́ kem ndɔ̄ kə́ kógə̄ḿ beé tə́ ō, ənī rɔ̄n sɔl̄ lɔm tə́gań tan gírí ō. Tɔdɔ̄ əndā kemən i dɔ Kɔ́ɔ̄ɓē tə́. 21Ni mbūsə̄də́ kógə̄ḿ kógə̄ḿ kə taa yā kaadə́ gēé. Gír̄ kə́ majə gə̄ i kemən tə́, adə̄ ɔr̄ najə̄ kə́ de kə́ dəngam tə́, ədadə́ na: 22Mā m̄-ger̄ lo rāā ń rāān̄sí kemḿ tə́ ní aĺ ō, i mā n m-ə́la koō kemsí tə́ á ī-ndiīń kə kumsí ní aĺ ō, i mā n m̄-rāā ngán rɔ̄sí gə̄ ní aĺ ō. 23Nge rāā yá̰a̰ malang kə́ dɔ rā̰ tə́ ō, dɔ nang tə́ ō ní, i ni n i nge rāā ngōn̄ kem kṵ́ṵn tə́ ní. Ni a tél yā kəla koō kemsí tə́ gogə́ kadə̄ ā ī-ndiī kə kumsí. Tɔdɔ̄ kumən ṵṵn sesí. Tām̄ kə́ ngɔr ń toō tə́ ní, i sḭḭ̄ kɔ́ gə̄ n ə̄nī rɔ̄sí kɔ̄ɔ́ yā rań dɔ Ndū najə̄ yān gə̄ tə́ kə tárá ní.
24Mban̄g ɔjəń na dəyá̰ ní na kídə̄n na i mbée ō, najə̄ gə̄ ń ɔr̄ ní na tájə̄n na i mbée ō. Nge kə́ dūú tɔȳ madə̄n gə̄ ní, i kə kumneé ɓáý. Adə̄ mban̄g ɔjə̄n i mbéé ngóy alé, ba túbə ənīń ndūn adə̄n kadə̄ na n-rāā seneé kadə̄ na a tél de kə́ nge kənge yá̰á̰ ngá̰ý ō, nge rɔ̄nel̄ ō, lo ń na əya̰ yá̰a̰ kāgə̄ ɓē yā kaan gə̄ kɔ̄ɔ́ ní ō, na n-rāan madə̄ tan tə́ ō, na n-əndān dɔ lo kəla kə́ bo gə̄ tə́ ō. 25Ba dan ń usə balsáá ní dɔ najə̄ kɔr̄ mban̄g tə́ aĺ anī, mban̄g adə̄ reēn̄ kə kṵ́ṵneé rɔ̄n tə́ ō, ədan kadə̄ ɔjə̄ ngōnən ní kadə̄ ajəń rɔ̄n ō. 26Lo ń mban̄g adə̄ kṵ́ṵ ngōn̄ ní kɔjə̄ dan i ngá̰ý anī, kṵ́ṵ ngōn̄ ní gḛy kɔr̄ najə̄ kə ngōnneé kadə̄ ndigə. 27Ni nōr̄ kə̄ dɔ ngōnən tə́, ɔr̄ najə̄ seneé góləń de kə́ nge kəndā gúu dɔ de gə̄ tə́ kə́ kumən ṵṵn aĺ ní. Ba i kə taa yā kaadə́ gēé, ədan na: Ngōnə̄ḿ, á̰a̰ kum tō ndoō yāḿ, mā ń m-ə̄tōī kemḿ tə́ nāā i ndōhó ō, íl mbaaḿ ɓāl̄ i mətá ō, m-ūlī ō, m-ə̄tōī ō, bátə́ kadə̄ ɓālīí asəń naā beé ō, m-á̰a̰ gōí kə yá̰a̰ malang ō ní. 28M̄-rāāī ɓɔ́ ngōnə̄ḿ, á̰a̰ dɔ rā̰ ō, dɔ nang ō, ə̄ndā maȳ yá̰a̰ malang kə́ tū tə́ ō. Ba ī-ger̄ kadə̄ Nə́ɓā rāādə́ i kə yá̰á̰ kógə̄ḿ aĺ ō, rāā gír kaa de gə̄ i tītə̄ ń nuū ō. 29Ī-lōō ɓōĺ nge rāā de gə̄ yá̰á̰ kə́ tōr̄ ń toō, ba ɔ́jə kadə̄ wurií il tītə̄ yā ngákṵ́ṵ́í gə̄ ō, ī-ndigə koy ō. Na m-ā m-ə́ngeī kə ngákṵ́ṵ́í gēé, kum mbang ń Nə́ɓā a ɔjəń kem majə yān kə́ tām̄ yājí tə́ kə̄ ndágá ní.
30Dəyá̰ ní ɔr̄ najə̄ ənī tan kə̄ nang tə́ aĺ ɓáý anī, balsáá ní əda na: Ā ī-ngóō i rí ɓáý? M-ā m̄-rāā yá̰á̰ ń mban̄g əda ní alé, ba i yá̰a̰ gə̄ ń ndū najə̄ yā Moyijə əda ní. Tɔdɔ̄ i ni n adə̄ kaají gə̄ ní. 31Ba ḭ̄ mban̄g nge reē kə yá̰á̰ kə́ to kum kaȳ aĺ dɔ Hebəro gə̄ tə́ ní, ā ī-teē jī Nə́ɓā tə́ alé. 32Tɔdɔ̄ jḭḭ gotə gə̄ ń toō ré j-a̰a̰ tápə̄ anī, sɔɔ̄ń i majaĺ yājí jḭḭ kɔ́ gə̄. 33Ré Kɔ́ɔ̄ɓē yājí ń ndi kə kumneé ní wūn̄g rāan sejí kum mbang kə́ sḛ́ý beé tə́, adə̄ rāājí yá̰á̰ kə́ tōr̄ ō ɔjə̄jí ō anī, a tél yā kəndā najə̄ naā tə́ sejí jḭḭ ń i ngé kəla yān gə̄ ní. 34Ba ḭ̄ de kə́ nge taā kem Nə́ɓā aĺ kə́ ótə ī-tɔȳ de gə̄ malang ní, ī-lōō kɔsə rɔ̄í kə̄ dɔɔ́ ndāńg karī. Tām̄ ə́la rɔ̄í guĺ ɓetə̄ kə kəndā kem dɔ tə́ kə́ rɔ̄kum aĺ gēé ō, ún jīí kə̄ dɔɔ́ ə́ndań ngé kəla yā Nə́ɓā gə̄ ō. 35Tām̄ ī-teē ta sarya yā Nə́ɓā kə́ tɔ́gən i ngá̰ý tə́ ō, a̰a̰ yá̰a̰ malang tə́ ō aĺ ɓáý. 36Ngákṵ́ṵ́ḿ gə̄ a̰a̰n̄ tápə̄ kum mbang kə́ sḛ́ý beē tə́ najə̄ kəra kə́ nin̄ ran̄ dɔ madə̄ naā yā Nə́ɓā tə́ ō, kənge kə́ a əngen̄ kajə kə́ ngándáńg naā tə́ ō. Ba ḭ̄ tā a Nə́ɓā a rāā sarya seí ō, a rāāīn̄ yá̰á̰ kə́ tōr̄ kə́ asə kum gotə kɔjə rɔ̄ yāí ō. 37Kə́ tām̄ yāḿ mā tə́ tā anī m-ādə̄ rɔ̄ḿ ō, kəndi kə kumuú yāḿ ō, tām̄ yā ndū najə̄ yā kaaḿ gə̄ tə́ tītə̄ yā ngákṵ́ṵ́ḿ gə̄. M̄-dəje Nə́ɓā kə nja ngárāá kadə̄ sḛ́ý gō tə́ anī kə kumən kə ṵṵn kə nápar deē yājí gēé ō, rāāī kə yá̰a̰ nāā gə̄ ō yá̰á̰ kə́ tōr̄ gə̄ ō kadə̄ ḭ̄kɔ́ ī-ger̄ na i ni ngóy n i Nə́ɓā ní. 38Ta tɔ̄l̄ ta tə́ anī m̄-ndɔ̄ȳ kadə̄ wūn̄g kə́ gōtə́ yā Nə́ɓā kə́ tɔ́gən i ngá̰ý ń bə̄gā dɔ gír kaa yājí tə́ ní, dəba dɔḿ mā tə́ ō dɔ ngákṵ́ṵ́ḿ gə̄ tə́ ō.
39Wūn̄g rāā mban̄g ngá̰ý al̄naā, adə̄ rāā ngōn̄ kə́ ta tɔ̄l̄ ta tə́ ní majə aĺ tɔȳ yā ngákṵ́ṵn gə̄. Tɔdɔ̄ ni mbóo seneé ngá̰ý adə̄ wurən atə̄n. 40Lo ń nuū tə́ balsáá ní oy i kanjə̄ yḛr rɔ̄n ō, taā kem Kɔ́ɔ̄ɓē mák mák ō. 41Ta tɔ̄l̄ ta anī kṵ́ṵ́ ngán gə̄ ní oy gō ngánən gə̄ tə́ ō. 42Najə̄ kə́ ɔjə dɔ yá̰a̰ kəsa kə́ ndɔ̄ yá̰a̰ kūjə́ tə́ ō, rāā naā ndoō tə́ kə́ majə aĺ ngá̰ý al̄naā ō ní, j-a jə-dəbaī dɔ tə́ i lo ń toō tə́.
Currently Selected:
2 MAKABE GƏ̄ 7: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.
2 MAKABE GƏ̄ 7
7
Tɔ̄lə̄n̄ ngákṵ́ṵ naā gə̄ sīrí ō, kṵ́ṵ́də́ ō
1Ndɔ̄ kə́ rang tə́ anī, əhɔn̄ ngákṵ́ṵ naā gə̄ sīrí, naā tə́ kə kṵ́ṵ́də́. Anī mban̄g adə̄ əndan̄də́ kə ndéy məraw ō, habəlay ō, ba ɔsə sedə́ ta kəsa dā̰ bor̄ ń ndū najə̄ ɔgə̄ kəsa ní. 2Nge kógə̄ḿ kə́ dandə́ tə́ ń rāā rɔ̄n i de kə́ nge kɔr̄ najə̄ kum gotədə́ tə́ ní əda na: I rí n ā ī-dəjejí ō, ā ī-sāā ger̄ rɔ̄jí tə́ ō ní? Jḭḭ i ngɔr ngá̰ý yā koy tɔȳ kadə̄ jə-mān̄ dɔ ndū najə̄ yā kaají gə̄. 3Wūn̄g rāā mban̄g ngá̰ý adə̄ mēr̄ kəndā gájə bong gə̄ ō, jóo gə̄ ō horoó. 4Dan ń yá̰a̰ gə̄ ń nuū təngān̄ ngá̰ý anī, mban̄g adə̄ ndūn kadə̄ gāngə̄n̄ ndo̰ nge kɔr̄ najə̄ kum gotə madə̄n gə̄ ní ō, kadə̄ ngīīn̄ ndāŕ dɔn ɔrə̄n̄ ō, gángə̄n̄ jīn gə̄ kə njan gə̄, ta kum ngákṵ́ṵn gə̄ tə́ ō kṵ́ṵn tə́ ō. 5Dan ń gángə̄n̄ jīn gə̄ kə njan gə̄ oy anī, mban̄g əda kadə̄ aw̄n̄ seneé kadə yā̰l̄ hor kə́ ngá̰ý tə́ ba kə əndānən̄ kem gájə bongoó, dan ń a taā koō ɓáý ní. Dan ń a tə́ngānən̄ á sēen a otə ní anī, ngákṵ́ṵn gə̄ ō kṵ́ṵn ō, əlan̄ go̰ kem naā tə́ kadə̄ n-oyn̄ kə wurkilií. Nin̄ ədan̄ na: 6Kɔ́ɔ̄ɓē Nə́ɓā a̰ā̰: kə́ rɔ̄kum tə́ ní, kumən ṵṵn sejí tītə̄ ń Moyijə ədań kété kem pā tə́ wáńg na kumən na a ṵṵn kə ngé kəla yān gēé ní.#7.6 Á̰a̰ī: Ndū najə̄ kə́ nge kṵ jōó Ndū 32.36
7Dan ń nge kə́ ta kəga dɔ əhɔ tan kə̄ naā tə́ i tītə̄ ń nuū anī, aw̄n̄ kə nge kə́ kṵ jōó lo rāā de gə̄ yá̰á̰ kə́ tōr̄ tə́. Dan ń ngīīn̄ ndāŕ dɔn naā tə́ kə nənga dɔn gēé oy anī, dəjenən̄ na: I kəsaí dā̰ bor̄ n i sóótə́ aké i kadə̄ dā̰ rɔ̄í ənge yá̰á̰ kə́ tōr̄, kadə̄ gángə̄n̄ jīí gə̄ kə njaí gə̄ ḿ? 8Banī ni tél əda kə taa yā kaan gēé na: M-ɔ́də alé! I tām̄ najə̄ ń toō tə́ n ni əngeń yá̰á̰ kə́ tōr̄ gə̄ kə gō naá ō ní. 9Pá tá kadə̄ əhɔ tan kə̄ naā tə́ ní, əda na: ḭ̄ i nge tɔ̄l̄ deē ō, ɔ̄gə̄jí kəndi dɔ nang tə́ kə́ ngɔr ń toō tə́ ō. Banī mban̄g kə́ dɔ dúnya̰ tə́ a ndól̄jí kadə̄ jə-ndi kə kumjí ngándáńg, tɔdɔ̄ j-oy i tām̄ yā ndū najə̄ yān tə́.
10Gōn ni tə́ anī, rāān̄ ni kə́ nge kṵ mətá yá̰á̰ kə́ tōr̄. Dan ń ədanən̄ na kə əla ndo̰o̰n kə̄ ndágá anī, əla láẃ ngá̰ý ō, sə́re jīn adə̄də́ kanjə̄ ɓōĺ ō. 11Ni ɔr̄ najə̄ kə́ to wurkil ń toō əda na: I Nə́ɓā n adə̄m̄ jīḿ gə̄ kə njaḿ gə̄ ń toō ní. Ba m̄-kídə̄də́ najə̄ yā Ndū najə̄ yān gə̄ tə́ ō, m-ə̄ndā kemḿ dɔn tə́ kadə̄ a tél yā kadə̄m̄ sedə́ gogə́ ɓáý ō. 12Mban̄g nəkɔ́ gə̄gē, deē yān gə̄ ń ndi gīrə̄n̄ gidən ní gə̄gē, wurkil yā balsáá ń toō ɔr kumdə́. Tɔdɔ̄ tápə̄ ń ni ənge ní, i yá̰á̰ kə́ karī ta kumən tə́. 13Dan ń ni oy anī, rāān̄ yá̰á̰ kə́ tōr̄ kə́ kógə̄ḿ beē nəkɔ́ ń toō kə ni kə́ nge kṵ sɔ́. 14Dan ń ni a rāā yā kəhɔ tan kə̄ naā tə́ anī, əda mban̄g na: Kadə̄ de gə̄ tɔ̄līn̄ ba ī-ngóō kadə̄ Nə́ɓā ndólī sɔɔ̄ń míndən kə́ ənī i sóótə́. Banī ḭ̄ á óy ba ā ī-ndól̄ alé. 15Reēn̄ kə ni kə́ nge kṵ mí, ba rāānən̄ yá̰á̰ kə́ tōr̄. 16Anī ni əndā kumən ta yā mban̄g tə́ ba əda na: ḭ̄ i de kə́ tɔ́gí i ngá̰ý dan de gə̄ tə́ ɓá tā, ba ā ī-ndum. Ī-rāā yá̰á̰ ń kemií ndigə ní, ba ī-lōō kɔjəń na Nə́ɓā na əya̰ gír kaa yājí kɔ̄ɔ́. 17Tām̄ yāí ḭ̄ tə́ ɓáa ī-tə́gā taí na ā á̰á̰ tɔ́gən kə́ ngá̰ý, tɔdɔ̄ ni a rāāsí sḭḭ̄ kə de kə́ gír kojə yāí tə́ gə̄ yá̰á̰ kə́ tōr̄. 18Gō ni ń nuū tə́ ɓáa, reēn̄ kə ni kə́ nge kṵ mehḛ́. Dan ń a rāā yā kəhɔ tan kə̄ naā tə́ anī, əda mban̄g na: ī-lōō gól̄ rɔ̄í na yá̰á̰ kə́ tōr̄ gə̄ malang ń rāān̄jí ní, i najə̄ yā yá̰a̰ rāājí kə́ gōtə́ aĺ tə́. Tɔdɔ̄ jə-rāā yá̰á̰ kə́ majə aĺ kə Nə́ɓā yājí. I tām̄ najə̄ ń toō tə́ n yá̰á̰ kə́ jákə́ kə́ tōr̄ gə̄ ń toō reēn̄nəń dɔjí tə́ ní. 19Ba ḭ̄ ń ā ī-rɔ̄ɔ̄ i Nə́ɓā ní, ī-lōō kɔjəń na ā ə́ngé yá̰á̰ kə́ tōr̄ tām̄ majaĺ yāí tə́ alé.
20Kṵ́ṵ́də́ i dəyá̰ kə́ yā ka̰a̰n lo nja kə́ jōó tə́ ō, i dəyá̰ kə́ asə kadə̄ dɔ deē ndígə̄nalən aĺ ō. Tām̄ ni a̰a̰ ngánən gə̄ lo koy tə́ kem ndɔ̄ kə́ kógə̄ḿ beé tə́ ō, ənī rɔ̄n sɔl̄ lɔm tə́gań tan gírí ō. Tɔdɔ̄ əndā kemən i dɔ Kɔ́ɔ̄ɓē tə́. 21Ni mbūsə̄də́ kógə̄ḿ kógə̄ḿ kə taa yā kaadə́ gēé. Gír̄ kə́ majə gə̄ i kemən tə́, adə̄ ɔr̄ najə̄ kə́ de kə́ dəngam tə́, ədadə́ na: 22Mā m̄-ger̄ lo rāā ń rāān̄sí kemḿ tə́ ní aĺ ō, i mā n m-ə́la koō kemsí tə́ á ī-ndiīń kə kumsí ní aĺ ō, i mā n m̄-rāā ngán rɔ̄sí gə̄ ní aĺ ō. 23Nge rāā yá̰a̰ malang kə́ dɔ rā̰ tə́ ō, dɔ nang tə́ ō ní, i ni n i nge rāā ngōn̄ kem kṵ́ṵn tə́ ní. Ni a tél yā kəla koō kemsí tə́ gogə́ kadə̄ ā ī-ndiī kə kumsí. Tɔdɔ̄ kumən ṵṵn sesí. Tām̄ kə́ ngɔr ń toō tə́ ní, i sḭḭ̄ kɔ́ gə̄ n ə̄nī rɔ̄sí kɔ̄ɔ́ yā rań dɔ Ndū najə̄ yān gə̄ tə́ kə tárá ní.
24Mban̄g ɔjəń na dəyá̰ ní na kídə̄n na i mbée ō, najə̄ gə̄ ń ɔr̄ ní na tájə̄n na i mbée ō. Nge kə́ dūú tɔȳ madə̄n gə̄ ní, i kə kumneé ɓáý. Adə̄ mban̄g ɔjə̄n i mbéé ngóy alé, ba túbə ənīń ndūn adə̄n kadə̄ na n-rāā seneé kadə̄ na a tél de kə́ nge kənge yá̰á̰ ngá̰ý ō, nge rɔ̄nel̄ ō, lo ń na əya̰ yá̰a̰ kāgə̄ ɓē yā kaan gə̄ kɔ̄ɔ́ ní ō, na n-rāan madə̄ tan tə́ ō, na n-əndān dɔ lo kəla kə́ bo gə̄ tə́ ō. 25Ba dan ń usə balsáá ní dɔ najə̄ kɔr̄ mban̄g tə́ aĺ anī, mban̄g adə̄ reēn̄ kə kṵ́ṵneé rɔ̄n tə́ ō, ədan kadə̄ ɔjə̄ ngōnən ní kadə̄ ajəń rɔ̄n ō. 26Lo ń mban̄g adə̄ kṵ́ṵ ngōn̄ ní kɔjə̄ dan i ngá̰ý anī, kṵ́ṵ ngōn̄ ní gḛy kɔr̄ najə̄ kə ngōnneé kadə̄ ndigə. 27Ni nōr̄ kə̄ dɔ ngōnən tə́, ɔr̄ najə̄ seneé góləń de kə́ nge kəndā gúu dɔ de gə̄ tə́ kə́ kumən ṵṵn aĺ ní. Ba i kə taa yā kaadə́ gēé, ədan na: Ngōnə̄ḿ, á̰a̰ kum tō ndoō yāḿ, mā ń m-ə̄tōī kemḿ tə́ nāā i ndōhó ō, íl mbaaḿ ɓāl̄ i mətá ō, m-ūlī ō, m-ə̄tōī ō, bátə́ kadə̄ ɓālīí asəń naā beé ō, m-á̰a̰ gōí kə yá̰a̰ malang ō ní. 28M̄-rāāī ɓɔ́ ngōnə̄ḿ, á̰a̰ dɔ rā̰ ō, dɔ nang ō, ə̄ndā maȳ yá̰a̰ malang kə́ tū tə́ ō. Ba ī-ger̄ kadə̄ Nə́ɓā rāādə́ i kə yá̰á̰ kógə̄ḿ aĺ ō, rāā gír kaa de gə̄ i tītə̄ ń nuū ō. 29Ī-lōō ɓōĺ nge rāā de gə̄ yá̰á̰ kə́ tōr̄ ń toō, ba ɔ́jə kadə̄ wurií il tītə̄ yā ngákṵ́ṵ́í gə̄ ō, ī-ndigə koy ō. Na m-ā m-ə́ngeī kə ngákṵ́ṵ́í gēé, kum mbang ń Nə́ɓā a ɔjəń kem majə yān kə́ tām̄ yājí tə́ kə̄ ndágá ní.
30Dəyá̰ ní ɔr̄ najə̄ ənī tan kə̄ nang tə́ aĺ ɓáý anī, balsáá ní əda na: Ā ī-ngóō i rí ɓáý? M-ā m̄-rāā yá̰á̰ ń mban̄g əda ní alé, ba i yá̰a̰ gə̄ ń ndū najə̄ yā Moyijə əda ní. Tɔdɔ̄ i ni n adə̄ kaají gə̄ ní. 31Ba ḭ̄ mban̄g nge reē kə yá̰á̰ kə́ to kum kaȳ aĺ dɔ Hebəro gə̄ tə́ ní, ā ī-teē jī Nə́ɓā tə́ alé. 32Tɔdɔ̄ jḭḭ gotə gə̄ ń toō ré j-a̰a̰ tápə̄ anī, sɔɔ̄ń i majaĺ yājí jḭḭ kɔ́ gə̄. 33Ré Kɔ́ɔ̄ɓē yājí ń ndi kə kumneé ní wūn̄g rāan sejí kum mbang kə́ sḛ́ý beé tə́, adə̄ rāājí yá̰á̰ kə́ tōr̄ ō ɔjə̄jí ō anī, a tél yā kəndā najə̄ naā tə́ sejí jḭḭ ń i ngé kəla yān gə̄ ní. 34Ba ḭ̄ de kə́ nge taā kem Nə́ɓā aĺ kə́ ótə ī-tɔȳ de gə̄ malang ní, ī-lōō kɔsə rɔ̄í kə̄ dɔɔ́ ndāńg karī. Tām̄ ə́la rɔ̄í guĺ ɓetə̄ kə kəndā kem dɔ tə́ kə́ rɔ̄kum aĺ gēé ō, ún jīí kə̄ dɔɔ́ ə́ndań ngé kəla yā Nə́ɓā gə̄ ō. 35Tām̄ ī-teē ta sarya yā Nə́ɓā kə́ tɔ́gən i ngá̰ý tə́ ō, a̰a̰ yá̰a̰ malang tə́ ō aĺ ɓáý. 36Ngákṵ́ṵ́ḿ gə̄ a̰a̰n̄ tápə̄ kum mbang kə́ sḛ́ý beē tə́ najə̄ kəra kə́ nin̄ ran̄ dɔ madə̄ naā yā Nə́ɓā tə́ ō, kənge kə́ a əngen̄ kajə kə́ ngándáńg naā tə́ ō. Ba ḭ̄ tā a Nə́ɓā a rāā sarya seí ō, a rāāīn̄ yá̰á̰ kə́ tōr̄ kə́ asə kum gotə kɔjə rɔ̄ yāí ō. 37Kə́ tām̄ yāḿ mā tə́ tā anī m-ādə̄ rɔ̄ḿ ō, kəndi kə kumuú yāḿ ō, tām̄ yā ndū najə̄ yā kaaḿ gə̄ tə́ tītə̄ yā ngákṵ́ṵ́ḿ gə̄. M̄-dəje Nə́ɓā kə nja ngárāá kadə̄ sḛ́ý gō tə́ anī kə kumən kə ṵṵn kə nápar deē yājí gēé ō, rāāī kə yá̰a̰ nāā gə̄ ō yá̰á̰ kə́ tōr̄ gə̄ ō kadə̄ ḭ̄kɔ́ ī-ger̄ na i ni ngóy n i Nə́ɓā ní. 38Ta tɔ̄l̄ ta tə́ anī m̄-ndɔ̄ȳ kadə̄ wūn̄g kə́ gōtə́ yā Nə́ɓā kə́ tɔ́gən i ngá̰ý ń bə̄gā dɔ gír kaa yājí tə́ ní, dəba dɔḿ mā tə́ ō dɔ ngákṵ́ṵ́ḿ gə̄ tə́ ō.
39Wūn̄g rāā mban̄g ngá̰ý al̄naā, adə̄ rāā ngōn̄ kə́ ta tɔ̄l̄ ta tə́ ní majə aĺ tɔȳ yā ngákṵ́ṵn gə̄. Tɔdɔ̄ ni mbóo seneé ngá̰ý adə̄ wurən atə̄n. 40Lo ń nuū tə́ balsáá ní oy i kanjə̄ yḛr rɔ̄n ō, taā kem Kɔ́ɔ̄ɓē mák mák ō. 41Ta tɔ̄l̄ ta anī kṵ́ṵ́ ngán gə̄ ní oy gō ngánən gə̄ tə́ ō. 42Najə̄ kə́ ɔjə dɔ yá̰a̰ kəsa kə́ ndɔ̄ yá̰a̰ kūjə́ tə́ ō, rāā naā ndoō tə́ kə́ majə aĺ ngá̰ý al̄naā ō ní, j-a jə-dəbaī dɔ tə́ i lo ń toō tə́.
Bibəl ta Sar̄ © L'Alliance Biblique du Tchad, 2006, 2010.