2 MAKABE GƏ̄ 5
5
Yá̰a̰ gə̄ ń ɔjən̄ kadə̄ rɔ̄ɔ̄ a əsō ní
1Dan ngeé ń nuū tə́ ní, A̰tiyokus əndā dɔ rɔ̄n danaá yā kaw̄ kənī ɓē kə́ Ejiptə rɔ̄ɔ̄ nja kə́ nge kṵ jōó. 2Tá kem ɓē kə́ Jerusalem tə́ malang ní, yá̰a̰ gə̄ teēn̄ ɓōdə̄ rā̰ tə́ a̰ȳn̄ ngɔ̄də̄ adə̄ de gə̄ a̰a̰n̄də́ bátə́ asə ndɔ̄ kutə sɔ́ ngɔr. I ngé kal̄ sə́nda gə̄ kə́ kūbə̄ yādə́ kə́ dɔ madə̄ gə̄ tə́ i kə́ kɔsə desḛ̄ḛ tū tə́ lɔ́rɔ́ ō, i ɓūtə̄ áskar gə̄ kə́ kə yá̰a̰ rɔ̄ɔ̄ gēé jīdə́ tə́ ō, 3i ngé rɔ̄ɔ̄ kə sə́ndá gə̄ kə́ ran̄ kə ta naá kə njarɔ̄ɔ́ gə̄ ō, i ngé kənī naā rɔ̄ɔ̄ gə̄ ō, tə́nī yá̰a̰ rɔ̄ɔ̄ gə̄ dɔ naā tə́ kə̄ yóō kə̄ laā gə̄ ō, i der kə́ wél̄ gə̄ ō, dūbə̄ nənga gə̄ ō, kaskar kə́ kanjə̄ hɔ̄pən gə̄ ō, gərā kə́ túr̄ gə̄ ō, i kūbə̄ rɔ̄ɔ̄ kə́ rāā kə lɔ́rɔ́ kə́ ndə́lē gə̄ ō, i kūbə̄ gində̄ kə́ yā kəla ta nganjə tə́ kə́ gíŕdə́ i ngá̰ý gə̄ ō. 4Adə̄ ndɔ̄ȳ yā de kə́ kem ɓēé gə̄ malang i kadə̄ yá̰a̰ gə̄ ń teēn̄ ɓōdə̄ rā̰ tə́ ní, i yá̰a̰ gə̄ kə́ a reēn̄ kə yá̰á̰ kə́ majaá kem ɓēé.
Jaso̰ ənī ɓē kə́ Jerusalem rɔ̄ɔ̄
5De kə́rēý gə̄ ədan̄ na A̰tiyokus na oy kɔ̄ɔ́, adə̄ najə̄ ní ɓār̄ sow kem ɓēé. Anī Jaso̰ ɔy de gə̄ kə́ asən̄ dūbú kógə̄ḿ ń nuū, ba teē rétə́ gēé ənī ɓē kə́ Jerusalem rɔ̄ɔ̄. Dan ń ndogə̄ mbal̄ i kə́ tetə nang tə́ kɔ̄ɔ́ ō, ta tɔ̄l̄ ta anī ɓē i kə́ taā kɔ̄ɔ́ ō ní, Menelas a̰ȳ aw̄ ɓɔ̄ɔ̄ rɔ̄n géŕ ger yā de kə́ Siri gə̄ tə́. 6Jaso̰ tɔ̄l̄ ngáń ngé ɓē madə̄n gə̄ kanjə̄ kadə̄ kumən ṵṵn. Tetə de kə́ gír kojə yāí ḭ̄ deē tə́ gə̄ rɔ̄ɔ̄ i rɔ̄ɔ̄ kə́ rāā deē tɔȳ gotə rɔ̄ɔ̄ gə̄ malang ní, ni ger̄ nge ń nuū alé. Ni gír̄ kadə̄ na n-tetə na i madə̄ ba̰ā̰ gə̄ rɔ̄ɔ̄ ba na i de kə́ gír kojə yān tə́ gə̄ alé. 7Dām̄ kə́rēý tə́ anī ni taā ngār aĺ ō, dām̄ kə́ rang tə́ anī rɔ̄sɔl̄ əhɔn najə̄ ndaa kə́ nəkɔ́ ndaa rɔ̄n tə́ ō: adə̄ ni tél dɔ tə́ aw̄ gogə́ dɔ nang kə́ Amanitidə tə́ ń ni a̰ȳ tū tə́ kété ní tə́. 8Hál tɔ̄l̄ de gə̄ yān ní ta dəba, tām̄ Aretas mban̄g yā Arabə gə̄ əhɔ ūtə̄ tan ɓē yān tə́. Ni a̰ȳ kə gō ɓē gə̄ ō, de gə̄ malang ngɔ̄də̄nən̄ ō, gḛyn̄ najə̄ yān aĺ ō, tām̄ mbātə́ kə́ ni mbātə́ ndū najə̄ gə̄ tə́ ō, rāā kə́ ni rāā yá̰á̰ kə́ tōr̄ kə ngáń ngé ɓē madə̄n gēé ō, ta tɔ̄l̄ ta anī tə̄ɓānən̄ adə̄ aw̄ Ejiptə tə́. 9Deē ngeé ń toō ń tə̄ɓā de gə̄ ngá̰ý dɔ nang yādə́ tə́ kɔ̄ɔ́ ní, oy i dɔ nang yā tə̄rā gə̄ tə́. Tām̄ ni aw̄ Lasedemon tɔdɔ̄ ni ɔjəń na n-a n-ənge lo ɓɔ̄ɔ̄ rɔ̄n lo ń nuū tə́ ō, əda na nin̄ na i ngéen gə̄ ō. 10Jaso̰ ń əya̰ nīń de gə̄ nang tə́ ngá̰ý kanjə̄ dubə̄də́ ní, de kə́ nūū tām̄ yān tə́ gətóo ō, de kə́ rāā yon gətóo ō, ənge lo dubə̄n kadə kaan gə̄ tə́ aĺ ō.
A̰tiyokus ɔy yá̰á̰ kə́ kem kújə yā Kɔ́ɔ̄ɓē tə́ Jerusalem
11Dan ń mban̄g A̰tiyokus oō yá̰a̰ gə̄ ń rāān̄ yá̰á̰ ní anī, ɔjəń na i de kə́ Jude gə̄ malang n na mbātə́n̄ najə̄ gōn tə́ kɔ̄ɔ́ ní. Lo ń nuū tə́ wūn̄g rāan tītə̄ dā̰ kə́ bembeé beē, adə̄ ni əya̰ ɓē kə́ Ejiptə ba reē taā ɓē kə rɔ̄ɔ́. 12Gō tə́ anī, adə̄ áskar gə̄ ndūn kadə̄ kə tɔ̄lə̄n̄ de gə̄ malang ń əsōn̄ kem jīdə́ tə́ ní kanjə̄ kadə̄ kumdə́ ṵṵdə́ ō, kə tə́jān̄ míndə́ ngé gə̄ ń al̄ aw̄n̄ kem kújú ní ō. 13Nin̄ tɔ̄lə̄n̄ balsáá gə̄ malang ō, ɓə́ga gə̄ malang ō, dəyá̰ gə̄ kə ngán gə̄ malang ō, tə́njān̄ míndə̄ ngámandə gə̄ ō, ngán gə̄ ō. 14Kem ndɔ̄ kə́ mətá gə̄ ń nuū tə́ ní, de kə́ koy gə̄ asən̄ deē dūbú kutə sɔ́sɔ́: de gə̄ dūbú kutə sɔ́ oyn̄ ta rɔ̄ɔ̄ tə́ ō, de gə̄ ń gātə̄n̄ sedə́ kə́ ɓəlo gə̄ tə́ ní, kutədə́ dūú gō nge ń nuū tə́ aĺ ō.
15Nge ń nuū asən aĺ ɓáý, adə̄ nāā kudə kem lo kə́ táĺ kə́ tɔȳ gotə lo kə́ táĺ gə̄ kə́ dɔ nang tə́. Ba deē ń ɔr non aw̄ seneé ní i Menelas ń tél i nge mbātə́ ndū najə̄ gə̄ ō, nge kigə kə ɓē yāneé ō ní. 16Ni ɔy bay kə́ táĺ gə̄ kə jīn kə́ yḛr ō, yá̰a̰ ndējə̄ gə̄ ń mban̄g kə́ rang gə̄ tə́ndān̄ tām̄ yā kaw̄ kum kə̄ kété ō, kɔsə go̰n ō, ngáā ō, yā lo kə́ táĺ tə́ ní, ɔydə́ kə jīn kə́ majə aĺ. 17Gír̄ kə́ to kɔjə rɔ̄ kə́ kem A̰tiyokus tə́ ɔgə̄n ger̄ kadə̄ i majaĺ ń de kə́ kem ɓēé gə̄ rāān̄ ní n wūn̄g rāań Kɔ́ɔ̄ɓē kum mbang kə́ sḛ́ý beē tə́ ō, to tītə̄ kə́ Kɔ́ɔ̄ɓē un i kumən kɔ̄ɔ́ ta lo kə́ táĺ tə́ ō ní. 18Ré nin̄ udən̄ kem yá̰á̰ kə́ majaĺ kə́ ngá̰ý gə̄ tə́ aĺ anī, A̰tiyokus a ənge ndéy i kə̄ ndɔ̄ kugə̄n nəkɔ́ ń nuū tə́ ō, yá̰á̰ kə́ to mbóó ń ni reē yā rāā ní, a rāā aĺ ō. I tītə̄ yā Heliyodor ń mban̄g Selokus əlan tə́da kutə nar kə́ lo ngɔ̄m̄ nar kə́ kem kújə yā Kɔ́ɔ̄ɓē tə́ ní beē. 19Kɔ́ɔ̄ɓē gə̄rā gír deē yān gə̄ i tām̄ yā lo kə́ táĺ tə́ alé, banī ni gə̄rā lo kə́ táĺ i tām̄ yā gír deē yān gə̄ tə́. 20I tām̄ najə̄ ń toō tə́ n yá̰á̰ kə́ tōr̄ ń rāā ngán Israel gə̄ ní, ɔdə kújə yān nəkɔ́ ō, gō tə́ anī, majə ń rāān̄ sedə́ ní, rāān̄ kə kújə yāneé ō ní. Dan ń wūn̄g rāā Nə́ɓā kə́ tɔ́gən i ngá̰ý ní, əya̰ kújə yān kɔ̄ɔ́. Ba dan ń kɔ́ɔ̄ yá̰a̰ malang əsōn̄ naā nāā kə gír deē yān gēé anī, kújə yān tél majə gogə́ tītə̄ kə́ kété.
Tél tɔ̄lə̄n̄ de kə́ Jerusalem gə̄ ngá̰ý ɓáý
21Dan ń A̰tiyokus ɔy gində̄ arjā̰a̰ kə́ kem kújə yā Kɔ́ɔ̄ɓē tə́ kə́ kɔȳn asə kəlōo dūbú kutə sɔ́ gidə i sɔ́sɔ́ oy anī, tél dɔ tə́ láẃ aw̄ gogə́ A̰tiyos kə kɔjə rɔ̄ɔ́ ō, gír kemən tə́ kadə̄ n-asə rāā yá̰a̰ malang ō, na n-asə rāā kadə̄ to bo gə̄ njə̄rān̄ dɔ nán̄g tə́, aláa kadə̄ de gə̄ njə̄rān̄ dɔ man̄ tə́ karī. 22A̰tiyokus əya̰ de gə̄ gotən tə́ kadə̄ rāān̄ ngán Israel gə̄ yá̰á̰ kə́ tōr̄. Kem ɓē kə́ Jerusalem tə́ ɓáa əya̰ i Pilipə ń gír kaan i pəriji ní. I de kə́ hálən majə aĺ tɔȳ yā nge kəndān dɔ kəla yān tə́ ɓáý. 23Dɔ mbal̄ Garijim tə́ ɓáa əya̰ i A̰ndəronik. Tá Menelas i kə de kə́ jōó gə̄ ń nuū ō. Ni rāā gír deē yān gə̄ majə aĺ ngá̰ý tɔȳ yā de kə́ jōó gə̄ ń nuū ɓáý tṵ.
Nel̄ A̰tiyokus kə Jipə gēé aĺ ngá̰ý, 24adə̄ əla Apoloniyus ń i ngol áskar gə̄ kə́ Miji ní, kə ngé rɔ̄ɔ̄ gə̄ kə́ asən̄ deē dūbú kutə jōó gidə i jōó. Ni ədadə́ na kə tə́jān̄ míndə de kə́ tɔgə kɔ̄ɔ́ gə̄ malang ō, kə igən̄ kə dəyá̰ gə̄ ō, ngán gə̄ ō. 25Dan ń Apoloniyus ugə̄ Jerusalem anī, rāā tītə̄ kə́ ni i de kə́ nge reē kə lɔmɔɔ́ beē. Ngóō bátə́ adə̄ ndɔ̄ kə́ táĺ ń i ndɔ̄ kə́ nge kṵ sīrí ń Jipə gə̄ a rāān̄ kəla tū tə́ aĺ ní ugə̄, anī mēr̄ áskar yān gə̄ mbɔ̄jə́ garsis.#5.25 Mbɔ̄jə́ garsis: i áskar gə̄ kə́ njə̄rān̄ kə gō naá kə pāá tadə́ tə́. 26De gə̄ malang ń teē reēn̄ ka̰a̰də́ tə́ ní, ni adə̄ tɔ̄lə̄n̄də́ kɔ̄ɔ́ ō, udə kem ɓēé kə áskar yān gēé kə yá̰a̰ rɔ̄ɔ̄ gēé jīdə́ tə́ ba tɔ̄l̄ de gə̄ kə́ kutədə́ i ngá̰ý ō.
27Dan ngeé ń nuū tə́ ní, Judas ń a ɓāŕnən̄ na i Makabe ní, kə madə̄n gə̄ asən̄ deē kutə aw̄n̄ dəla lo tə́. Nin̄ ndin̄ kə̄ dɔ mbal̄ gə̄ tə́ tītə̄ dā̰ gə̄ beé ō, a əsan̄ i dɔ kámbə gə̄ ngóy na sōgə́ yḛrən̄ rɔ̄də́ kə dā̰ kə́ Ndū najə̄ ɔgə̄ ō.
Currently Selected:
2 MAKABE GƏ̄ 5: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.