2 MAKABE GƏ̄ 2
2
Jeremi ɓɔ̄ɔ̄ yá̰a̰ rāā kəla gə̄ kə́ lo ndɔ̄ȳ Nə́ɓā tə́
1Najə̄ ń əngen̄ kem makətūbə̄ kə́ jóo gə̄ tə́ ní n toó: Ngé gə̄ ń ɔyn̄də́ yā kaw̄ sedə́ kə̄ dɔ ɓē kə́ rang tə́ ní, Jeremi ədadə́ na kə unən̄ hor kə́ dɔ lo tun̄ yá̰á̰ tə́ tītə̄ ń ədanəń kété laā ní. 2Tá ɓáý tṵ ní, nge koō taa adə̄də́ makətūbə̄ Ndū najə̄ ba ədadə́ na: ī-lōōī kadə̄ dɔsí ndígə̄nal yá̰a̰ gə̄ ń Kɔ́ɔ̄ɓē əda kadə̄ yā rāā ní. Ī-lōōī kadə̄ ɓesə̄ lɔ́r gə̄, aláa ɓesə̄ gində̄ arjā̰a̰ gə̄ ō, yá̰á̰ súū yá̰á̰ kə́ gātə̄də́ i ngá̰ý gə̄ ń tə́lan̄ rɔ̄də́ tə́ ní ō gólə̄n̄sí ní. 3Jeremi adə̄də́ kɔjə̄ kə́ rang gə̄ kə́ tītə̄ ń nuū gə̄. Kə́ bo ngá̰ý ɓáa, ni əla i go̰ kemdə́ tə́ kadə̄ dṵṵ̄n̄ rɔ̄də́ tū yā Ndū najə̄ tə́ kadə̄ ngan̄g, kə ngarā̰ kemdə́ gēé malang. 4Kem makətūbə̄ gə̄ ngeé ń nuū tə́ ní, ndangən̄ najə̄ ń toō kem nge kə́ kógə̄ḿ tə́ ɓáý tṵ ədan̄ na: Nə́ɓā adə̄ nge koō taa ndūn, adə̄ ɔy tandā rāā kújə kənge naā ō, sandúkə madə̄ naā ō aw̄ń. Gō tə́ anī, aw̄ dɔ mbal̄ ń kété Moyijə ra dɔ tə́ a̰a̰ń ɓē ń Nə́ɓā adə̄ gír deē yān gə̄ ní. 5Dan ń Jeremi ugə̄ lo ní tə́ anī, ənge bəlo mbal̄ kógə̄ḿ kə́ bo. Ni ɓōkə́ tandā ō, sandúkə madə̄ naā ō, kāgə̄ dabə róō ndujə̄ yá̰á̰ kə́ otə majə ō kem bəlo ní tə́, ba ūtə̄ ta kɔ̄ɔ́. 6Madə̄ Jeremi kə́rēý gə̄ gḛyn̄ tél dɔ tə́ reē gogə́ lo ní tə́, yā kəja yá̰a̰ nang tə́ kɔjəń róbə́ kə́ yā kaw̄ń kə̄ lo ní tə́, banī əngen̄ lo ní alé. 7Dan ń Jeremi oō najə̄ ń nuū anī, kɔ̄l̄ sedə́ əda na: Deē a ger̄ lo ń nuū aĺ bátə́, yā kadə̄ Nə́ɓā a̰a̰ń kum tō ndoō yā gír deē yān gə̄ ō, tél ɔsəń dɔdə́ naā tə́ gogə́ ō. 8Lo ń nuū tə́ Kɔ́ɔ̄ɓē a ɔjə yá̰a̰ gə̄ ń nuū gogə́ rang. Kɔsə go̰n yān a ɔjə rɔ̄n kə̄ ndágá kə kil̄ maná, tītə̄ ń ɔjəń rɔ̄n kə̄ ndágá ɓāl̄ yā Moyijə tə́ ō, gō tə́ anī, i dan ń Salomo̰ ndɔ̄yń yā kadə̄ ɔrə̄n̄ kam̄ kújə yā Kɔ́ɔ̄ɓē kadə̄ to rɔȳ ō ní. 9Ɔjən̄ gotə yá̰a̰ tun̄ yā mban̄g Salomo̰ ń kum kedə̄ yān i ngá̰ý ní ō. Salomo̰ tun̄ yá̰a̰ adə̄ Nə́ɓā. I yá̰a̰ tun̄ kə́ ɔjə kadə̄ rāān̄ kújə yā Kɔ́ɔ̄ɓē oy kɔ̄ɔ́ ō, ɔrə̄n̄ kamə̄n tayā ō. 10Kété ní Moyijə ndɔ̄ȳ Kɔ́ɔ̄ɓē, anī hor ḭḭ dɔ rā̰ tə́ əsō dɔ yá̰á̰ kə́ tun̄ tə́, ba ṵṵ yá̰á̰ ń tun̄ adə̄n̄ Nə́ɓā ní. Yā Salomo̰ i beé ō, ni ndɔ̄ȳ anī, hor ḭḭ dɔ rā̰ tə́ ṵṵ yá̰á̰ kə́ tun̄ ní malang kɔ̄ɔ́. 11Kété ní Moyijə əda na: Yá̰á̰ ń tun̄ adə̄n̄ Nə́ɓā tām̄ yā majaĺ tə́ ní, hor ṵṵ tɔdɔ̄ deē əsa alé. 12Salomo̰ rāā nāā ní ndɔ̄ sɔ́sɔ́ tītə̄ ń a rāānəń ní.
Makətūbə̄ kə́ jóó jóó gə̄ kə́ Judas ɔsə nja naā tə́
13Yá̰á̰ kə́ kógə̄ḿ beé gə̄ nəkɔ́ ń toō ń rāān̄ yá̰á̰ ní, ənīn̄ nja kem makətūbə̄ gə̄ ngeé ń toō tə́ ō, kem makətūbə̄ gə̄ ń əndān̄ rī dɔ tə́ na i makətūbə̄ gə̄ kə́ yā kadə̄ əgań kem Nehemi dɔ yá̰á̰ kə́ mān̄ kɔ̄ɔ́ gə̄ tə́ ní ō. Ɔjən̄ gotə lo kɔsə ń Nehemi ɔsə nja makətūbə̄ gə̄ kə̄ naā tə́ ní kem makətūbə̄ gə̄ ní tə́ ō. Makətūbə̄ gə̄ kə́ najə̄ yā mban̄g i kemeé ō, yā ngé koō taa gə̄ i kemeé ō, makətūbə̄ gə̄ ń Dabid ndang ní ō, ngé kə́ sɔɔ̄ dɔ yá̰a̰ ndējə̄ gə̄ ń mban̄g gə̄ ndangən̄ ō ní, ɔsə nja naā tə́ lo ń nuū tə́. 14Makətūbə̄ gə̄ malang ń ton̄ kə̄ lo gə̄ tə́ sɔɔ̄ń rɔ̄ɔ̄ ń rɔ̄ɔ̄n̄jí ní, Judas ɔsə nja naā tə́ i tītə̄ ń nuū ō. 15Makətūbə̄ gə̄ ngeé ń toō ní, ton̄ jījí tə́ laā. Ré ā ī-sāāī anī, ə́laī de gə̄ ādə̄ reē taā aw̄nəń adə̄n̄sí.
Mērə̄n̄ de gə̄ rāā nāā tə́go kem kújə yā Kɔ́ɔ̄ɓē
16Jə-ndi dɔ rɔ̄jí tə́ kɔ̄ɔ́ yā rāā nāā tə́go kem kújə yā Kɔ́ɔ̄ɓē kadə̄ unjə̄ njáý njáý. I yá̰á̰ ń toō n jə-ndang makətūbə̄ ń toō j-əlań j-adə̄sí kadə̄ ī-rāāī nāā ní ō ní 17Nə́ɓā ajə gír deē yān gə̄ malang. Nin̄ malang ní, ni adə̄də́ dɔ nang yādə́ ō, kṵ ɓē ō, kəla tun̄ yá̰a̰ ō, kɔr̄ kam̄ rɔ̄ tū yá̰á̰ kə́ yḛr tə́ ō, 18tītə̄ ń ni ənīń ndūn kə gō Ndū najá ní. I tām̄ najə̄ ń toō tə́ n j-əndā kemjí dɔ tə́ kadə̄ sḛ́ý gō tə́ anī, Nə́ɓā ngeé ń toō a a̰a̰ kum tō ndoō yājí ní. Gír deē yājí gə̄ ń nin̄ i kə̄ lo gə̄ tə́ dɔ nang tə́ laā ní, ni a ɔsə dɔdə́ kə̄ naā tə́ kem kújə́ kə́ táĺ tə́. Tām̄ ni ɔr̄jí kɔ̄ɔ́ kum yá̰á̰ kə́ tōr̄ ngá̰ý gə̄ tə́ ō, tə́go lo kə́ táĺ adə̄ unjə̄ njáý njáý ō.
Nge ndang makətūbə̄ əda najə̄ kə́ dɔ tə́
19Ɓāl̄ yā Judas Makabe nin̄ kə ngákṵ́ṵn gēé tə́ ní, yá̰á̰ kə́ bo bo gə̄ rāān̄ yá̰a̰. Nin̄ tə́gon̄ kem kújə́ kə́ bo yā Kɔ́ɔ̄ɓē adə̄ unjə̄ njáý njáý ō, tél rāān̄ nāā dabə tun̄ yá̰a̰ gogə́ rang ō. 20Nin̄ rɔ̄ɔ̄n̄ A̰tiyokus Epipan ō, rɔ̄ɔ̄n̄ ngōnən Opator ō. 21Ngé gə̄ ń əhɔn̄ rɔ̄də́ tɔgə rɔ̄ɔ̄n̄ dɔ taā kem yā Jipə gə̄ tə́ kə rɔ̄ tḭ̄ḭ́ ní, tɔ́gə́ kə́ dɔ rā̰ tə́ gə̄ rāān̄ yá̰a̰ tām̄ yādə́ tə́. I beé n taānəń ɓē malang ō, tə̄ɓānəń ngé rɔ̄ɔ̄ gə̄ yā madə̄ ba̰ā̰ kɔ̄ɔ́ kem ɓēé ō ní. Tá kutədə́ i sḛ́ý beē ngóy. 22Kújə yā Kɔ́ɔ̄ɓē ń rī ɓār̄ yān taā lo malang ní, tél taān̄ gogə́ ō, ɔrə̄n̄ ɓē kə́ Jerusalem ɓəloó ō. Ndū najə̄ gə̄ ń nay i sḛ́ý kadə̄ de gə̄ rāān̄ kadə̄ gətóo kɔ̄ɔ́ ní, tél əndān̄ ndū najə̄ gə̄ ní gogə́ ō. Yá̰a̰ malang ń nuū ní rāān̄ i kə ta kūl̄ kem ndaa ō, kem majə kə́ ngá̰ý ō yā Kɔ́ɔ̄ɓē. 23Jaso̰ kə́ Siren ń i nge ndang makətūbə̄ ní, ɔjə gotə yá̰a̰ gə̄ ń rāān̄ yá̰á̰ ní, i kem makətūbə̄ kə́ mí gə̄ tə́. M-ā m̄-nāā kɔsə nja yá̰a̰ gə̄ ní kə̄ naā tə́ kem makətūbə̄ kə́ kógə̄ḿ beé tə́. 24Gotə najə̄ ngeé ń toō ní, kutə yá̰á̰ kə́ tə́da gə̄ i ngá̰ý kemeé ō, yá̰á̰ kə́ rāā yá̰a̰ gə̄ i ngá̰ý ō. I yá̰á̰ ń toō n nge ndóō gotə najə̄ gə̄ ń toō malang kə ta njaá a a̰a̰ kadə̄ i gotə najə̄ gə̄ kə́ lo ndóōdə́ ngan̄g ní. 25Adə̄ m̄-sāā ndang yá̰á̰ kə́ nel̄ ta deē lo tə́dá tə́, tām̄ yā ngé gə̄ ń a sāān̄ i tə́dá yá̰á̰ ngóý ní tə́. M̄-ndigə kadə̄ gotə najə̄ gə̄ ní i gotə najə̄ gə̄ kə́ a udən̄ dɔ deē tə́ láẃ, tām̄ yā ngé gə̄ ń ndigəń kadə̄ əga kemdə́ dɔ tə́ ní tə́. Ndə̄ngā yāḿ i kadə̄ m̄-rāā kəla kə́ tītə̄ ń nuū m-ādə̄ ngé gə̄ malang ń a tə́dan̄ makətūbə̄ gə̄ ń toō ní: 26M-ə̄ndā rɔ̄ḿ ta kɔsə nja najə̄ ní tə́ kə̄ naā tə́ kadə̄ gīndə̄ dɔp, ba i ngōn̄ kəla alé. Tām̄ yāḿ mā tə́ ɓáa i kəla kə́ ngan̄g. Tɔdɔ̄ m-úy tətō loon tə́ ō, m-úń núsə kum mbang yāḿ kə́ ndɔ̄ɔ́ gə̄ m̄-ndiń ta tə́ ō. 27Deē ń rāā yá̰a̰ kəsa kə́ ngá̰ý ɓārə́nń de gə̄ ní, sāā i rāā yá̰á̰ kə́ kadə̄ nel̄ de gə̄ ń ni ɓāŕdə́ ní ō, i yá̰á̰ kə́ hɔliyɔ aĺ ō. Kəla ń mā m̄-rāā ní, i kəla kə́ ngan̄g tītə̄ yān. Ɓá tā ba m̄-ndi dɔ rɔ̄ḿ tə́ kɔ̄ɔ́ yā tə́gā taḿ tū kəla kə́ ngan̄g ní tə́ kə kem kə́ majaá, yā kadə̄ kəla ní rāā majə kə de gə̄ ngá̰ý. 28Yá̰a̰ gə̄ ń rāān̄ yá̰á̰ kógə̄ḿ kógə̄ḿ ní, m-ə́yá̰də́ jī nge ndang makətūbə̄ tə́ kadə̄ ɔjə loodə́ kə ta njaá ndet ndet. Yá̰á̰ ń mā m̄-sāā kɔjə ní, i kṵ́ṵ najə̄ kə́ bo bo gə̄ kə́ tū najə̄ kə́ kɔsə nja naā tə́ kadə̄ gīndə̄ dɔp tə́ ngóy. 29Ré deē a rāā kújə́ kə́ kijə anī, majə kadə̄ kɔdə̄ kújə a əndā kumən i gír kəla kújə́ ní tə́ kə taá malang. Ba nge ń kəla súū kújə́ ní ō, rāā hō̰rō̰ gidə tə́ ō i dɔn tə́ ní, yá̰á̰ ń majə kadə̄ ni sāā ní i yá̰á̰ súū kújə́ ní ngóy. Mā m̄-gír̄ kadə̄ yāḿ mā i tītə̄ ń nuū ō. 30Majə kadə̄ nge kənī gotə yá̰á̰ kə́ rāā yá̰a̰ gə̄ ndəle gíŕ yá̰a̰ gə̄ ní ngá̰ý pá tá. Majə kadə̄ ni əndā maȳ najə̄ kə́ dəje gə̄ malang ō, əndā kumən gíŕ ngáń yá̰á̰ kə́ dūú ngá̰ý gə̄ kə́ tū yá̰a̰ gə̄ ń rāān̄ yá̰á̰ tə́ ní malang ō. 31Ba deē ń gḛy kɔsə nja yá̰a̰ gə̄ ń rāān̄ yá̰á̰ ní kə̄ naā tə́ malang ní, adə̄ i nge gḛy ndangdə́ kadə̄ de gə̄ tə́dan̄ ní, majə kadə̄ lōō kaw̄ kɔr̄ gírí ndet ndet.
32M-ā m-ə́lá gíŕ kənī gotə najə̄ ní, kanjə̄ kənī yá̰á̰ kógə̄ḿ dɔ najə̄ ń i kə́ kəda laā tə́ ní. Tɔdɔ̄, ndang najə̄ kə́ dɔ makətūbə̄ tə́ kə́ dan ngāl̄ ō, ra dɔ tə́ kɔsə nja gotə najə̄ ní kə̄ naā tə́ kadə̄ gīndə̄ dɔp ō ní, i yá̰á̰ kə́ to mbóo.
Currently Selected:
2 MAKABE GƏ̄ 2: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.