2 MBAN̄G 11

Atali taā ɓē dɔ gū tə́ Jerusalem

(Á̰a̰ī 2 Yá̰a̰ 22.10-12)

1Dan ń Atali, kó̰o̰ Akajias, a̰ā̰ kadə̄ ngōnən oy kɔ̄ɔ́ anī, gḛy tɔ̄l̄ de gə̄ kə́ gír kojə yā mban̄g tə́ kɔ̄ɔ́ malang. 2Banī Yoseba ń i ngōn̄ kem mban̄g Joram kə́ dəyá̰ ō, i ngōkó̰o̰ Akajias ō ní, un Joas ngōn̄ Akajias dāyāá dan ngán mban̄g gə̄ ń a rāān̄ yā tɔ̄l̄də́ ní tə́, aw̄ ɓɔ̄ɔ̄n naā tə́ kə kó̰o̰ kətōné kem kújə́ kán̄ tə̄rá gə̄ tə́. Atali ger̄ gō alé, adə̄ ngōn̄ ní teē ta yo tə́. 3Ngōn̄ ndi kə kó̰o̰ kətōné ɓāl̄ mehḛ́ loo ɓɔ̄ɔ̄ rɔ̄ tə́ kem kújə yā Kɔ́ɔ̄ɓē tə́ dan ń Atali ndiń dɔ ɓē tə́ ní.

Əndān̄ Joas mban̄g

(Á̰a̰ī 2 Yá̰a̰ 23.1-21)

4Kem ɓāl̄ kə́ nge ko̰ sīrí tə́ anī, Yoyada nge tun̄ yá̰a̰ əla gō ngol áskar gə̄ yā Kari gə̄ tə́ ō#11.4 Kari gə̄, i tə̄rā gə̄ kə́ ngé ngɔ̄m̄ dɔ ngār gír naraá gə̄., ngol áskar kə́ ngé ngɔ̄m̄ loo gə̄ tə́ ō, adə̄ reēn̄ rɔ̄n tə́ kem kújə yā Kɔ́ɔ̄ɓē tə́. Ni-rāā kem kógə̄ḿ sedə́ ō, dəjedə́ kadə̄ ənīn̄ ndūdə́ adə̄nən̄ kem kújə yā Kɔ́ɔ̄ɓē tə́ ō. Gō tə́ anī ɔjədə́ kə ngōn̄ mbangāá, 5ba ədadə́ na:

Yá̰á̰ ń kadə̄ ī-rāāī ní n toó: Ɓūtə̄sí kə́ mətá gə̄ a rāān̄ kəla ndɔ̄ sabat tə́. Kə gō gēé ɓáa ɓūtə̄ kə́ ta kəga dɔ a ngɔ̄m̄ i kújə yā mban̄g ō, 6ɓūtə̄ kə́ nge ko̰ jōó a ngɔ̄m̄ i ta róbə́ kə́ Sur ō, ɓūtə̄ kə́ nge ko̰ mətá a ngɔ̄m̄ i ta róbə́ kə́ gidə ɓūtə̄ áskar gə̄ kə́ ngé ngɔ̄m̄ loo gə̄ tə́ ō. Ba kə́ ngɔr ń toō tə́ ɓá anī ɓūtə̄ kə́ gír mətá gə̄ ń noō a ngɔ̄mə̄n i kújə yā mban̄g, nin̄ a mbélə̄n̄ gír naā loon tə́. 7Gotə ɓūtə̄ yāsí kə́ rang kə́ jōó gə̄ ń kə gō gēé ɓáa a rāān̄ kəla ndɔ̄ sabat tə́ aĺ ní, a reēn̄ yā ngɔ̄m̄ kújə yā Kɔ́ɔ̄ɓē ń mban̄g kə́ dūú ɓáý i kemeé ní. 8Áskar gə̄ malang a ran̄ kə yá̰a̰ rɔ̄ɔ̄ gēé jīdə́ tə́. A gīrə̄n̄ gidə mban̄g ō, loo ń mban̄g aw̄ kə̄ tū tə́ ní, nin̄ a dānə̄nən̄ ō. Deē ń a sāā kənda dansí yā manəń kə gúú ní kɔ́ɔ̄ a oy.

9Ngol áskar gə̄ rāān̄ yá̰a̰ malang ń Yoyada nge tun̄ yá̰a̰ ədadə́ ní. Nin̄ kógə̄ḿ kógə̄ḿ aw̄n̄ rɔ̄ Yoyada nge tun̄ yá̰á̰ tə́ kə de gə̄ yādə́ gə̄ ń ɔtən̄ ta kəla ngɔ̄m̄ loo tə́ ní ō, kə ngé gə̄ ń kadə̄ unən̄ ta kəla ngɔ̄m̄ loo ndɔ̄ sabat tə́ ní ō. 10Nge tun̄ yá̰a̰ adə̄ ngol áskar gə̄ nənga gə̄ kə der gə̄ yā mban̄g Dabid ń ton̄ kem kújə yā Kɔ́ɔ̄ɓē tə́ ní. 11Ngé ngɔ̄m̄ loo gə̄ ran̄ kə ta naá kə yá̰a̰ rɔ̄ɔ̄ yādə́ gēé jīdə́ tə́, kíl bɔr kújə yā Kɔ́ɔ̄ɓē kə́ dām̄ kə́ ko̰ó̰ tə́ bátə́ ugə̄ń kílən kə́ dām̄ kə́ geleé tə́. Nin̄ ran̄ i ta kújə yā Kɔ́ɔ̄ɓē tə́, no loo tun̄ yá̰á̰ tə́, ran̄ dɔ rɔ̄də́ tə́ yā gīr̄ gidə mban̄g. 12Loo ń noō tə́ Yoyada teē kə ngōn̄ mbangāá ndágá. Əla yá̰á̰ súū rɔ̄ kə́ ɔjə kadə̄ ni i mban̄g dɔn tə́ ō, adə̄n makətūbə̄ Ndū najə̄ gə̄#11.12 Makətūbə̄ ndū najə̄ gə̄: Á̰a̰ī Ndū 17.14-20 kə́ kadə̄ o̰o̰ń ɓē ō. Gō tə́ anī urən̄ yibə̄ dɔn tə́ əndānə̄nəń mban̄g. Kə̄ ta jī tə́ noō de gə̄ malang ndigənən̄ adə̄ əndan̄ jīdə́ gírən tə́ ō, unən̄ ndūdə́ kə̄ dɔɔ́ ədan̄neé na: Ādə̄ mban̄g ndi kə kumneé ō.

13Dan ń Atali oō ká̰a̰ de gə̄ tītə̄ ń noō ní a, teē aw̄ gō de gə̄ tə́ kem kújə yā Kɔ́ɔ̄ɓē tə́. 14Dan ń ni-a̰a̰ mban̄g ra kə njan kə́ dɔɔ́ loo kə́ kḭḭ#11.14 Loo kə́ kḭḭ kə̄ dɔɔ́, i loo kə́ rāā tām̄ yā mban̄g tə́ kem kújə yā Kɔ́ɔ̄ɓē tə́. kə̄ dɔɔ́ tə́ kə gō yá̰a̰ kāgə̄ ɓēé ō, ngār gə̄ kə ngé kɔ̄ŕ bərúnjə gə̄ i rɔ̄ mban̄g tə́ ngɔr ō, de kə́ kem ɓēé gə̄ malang i kə rɔ̄nelēé ō, a kɔ̄rə́n̄ bərúnjə ō ní a, ni-*rə̄yā̰ kūbə̄ kə́ rɔ̄n tə́ kɔ̄ɔ́ ba əga kɔŕ əda na: Ənīmə̄n̄ kɔ̄ɔ́! Ənīmə̄n̄ kɔ̄ɔ́!

15Banī Yoyada nge tun̄ yá̰a̰ əda ngol áskar gə̄ na kə teēn̄ seneé dan de gə̄ tə́ kɔ̄ɔ́. Deē ń a aw̄ gōn tə́ ní kɔ́ɔ̄ a oy yo kaskar. Nge tun̄ yá̰a̰ əda na majə kadə̄ ni-oy kem kújə yā Kɔ́ɔ̄ɓē tə́ alé. 16Nin̄ əhɔn̄ Atali teē aw̄n̄ seneé kə ta róbə́ ń sə́nda gə̄ a udən̄neé ní ba a ugə̄n̄ kə̄ kújə yā mban̄g tə́ ngɔr anī tɔ̄l̄nən̄ loo ń noō tə́. 17Yoyada rāā adə̄ ndūdə́ Kɔ́ɔ̄ɓē ō, mban̄g ō, ngán Israel gə̄ ō, əhɔn̄ madə̄ naā yā kadə̄ ngán Israel gə̄ télən̄neé gír deē yā Kɔ́ɔ̄ɓē. Ni-rāā adə̄ kəhɔ madə̄ naā to dɔ dán mban̄g tə́ kə ngán Israel gēé ō. 18Gō tə́ anī de kə́ gō nang kə́ Juda tə́ gə̄ malang aw̄ tɔ̄ɔ̄n̄ kújə yā Baal kɔ̄ɔ́, tɔ̄ɔ̄n̄ loo tun̄ yá̰a̰ yān gə̄ kɔ̄ɔ́ ō, tétə̄n̄ yá̰á̰ kə́ tɔ́sə̄ ba kudə kum gotən gə̄ kɔ̄ɔ́ ō, ba tɔ̄lə̄n̄ Matan nge tun̄ yá̰a̰ yā Baal ta loo tun̄ yá̰a̰ gə̄ tə́. Gō tə́ anī Yoyada nge tun̄ yá̰a̰ əndā de gə̄ kadə̄ ngɔ̄mə̄n̄ kújə yā Kɔ́ɔ̄ɓē. 19Ni-ɔy ngol áskar gə̄ ō, Kari gə̄ ō, gotə áskar kə́ rang gə̄ kə́ ngé ngɔ̄m̄ loo gə̄ ō, naā tə́ kə de kə́ gō nang kə́ Juda tə́ gə̄ malang, dānəń mban̄g. Nin̄-ḭḭn̄ seneé kem kújə yā Kɔ́ɔ̄ɓē tə́, teēn̄ kə ta róbə yā ngé ngɔ̄m̄ loo gēé, ba aw̄n̄ kem kújə yā mban̄g tə́. Joas ndi dɔ kōr̄ kāgə̄ mbang tə́. 20Rɔ̄ de kə́ gō nang kə́ Juda tə́ gə̄ malang neldə́, banī de kə́ kem ɓēé gə̄ ndin̄ loo yādə́ jəke. Atali tā anī tɔ̄l̄nən̄ i kə kaskaraá kem kújə yā mban̄g tə́.

Currently Selected:

2 MBAN̄G 11: SARDC

Highlight

Copy

Compare