2 YÁ̰A̰ GƏ̄ 35
35
Josias rāā nāā Pákə
(Á̰a̰ī 2 Mba 23.21-23)
1Josias rāā nāā Pákə kem ɓē kə́ Jerusalem tə́ rɔȳn̄ Kɔ́ɔ̄ɓē. Əjan̄ míndə dā̰ Pákə gə̄ ní i kə ndɔ̄ kə́ nge ko̰ kutə gidə i sɔ́ yā nāā kə́ ta kəga dɔ. 2Josias əla go̰ kem ngé tun̄ yá̰a̰ gə̄ tə́ adə̄ńdə́ tɔ́gə kadə̄ rāān̄neé kəla kújə yā Kɔ́ɔ̄ɓē. 3Ngán Lebi gə̄ ń əndān̄ kəla ndóō ngán Israel gə̄ yá̰a̰ dɔdə́ tə́ ō. Kɔ́ɔ̄ɓē ɔr̄də́ tayā kə rī kəla yānneé ō ní, ni-ɔr̄ najə̄ sedə́ əda na: Kújə yā Kɔ́ɔ̄ɓē ń Salomo̰ ngōn̄ Dabid mban̄g kə́ Israel tə́ rāā ní, ré ə̄ndāī sandúkə́ kə́ táĺ i kemeé anī ā ōtōniī dɔ bɔ̄gə̄sí tə́ to̰ alé. Ngɔlaā ní ī-rāāī kəla yā Kɔ́ɔ̄ɓē Nə́ɓā yāsí ō, yā deē yān gə̄ ń i Israel gə̄ ní ō. 4Ɔrī naā kə gō gír kojə yāsí gə̄ ō, kə dɔ kəla yāsí gə̄ ō, kə gō ń Dabid mban̄g kə́ Israel tə́ nin̄ kə ngōnən Salomo̰ ndangən̄neé ní. 5Sḭḭ̄ ngán Lebi gə̄ ī-raī kem loo kə́ táĺ tə́ kə gō ɓūtə̄ yāsí gə̄ kə́ gír kojə yāsí gə̄ tə́, tām̄ yā ngákó̰ó̰sí gə̄ ń i gotə de kə́ kem ɓēé gə̄ ní tə́. 6Ā ī-tɔ̄lī dā̰ Paákə adə̄ majə kadə̄ ī-tə́goī rɔ̄sí ba ī-dḭḭ̄ī ngákó̰ó̰sí gə̄ yā rāań yá̰á̰ ń Kɔ́ɔ̄ɓē əndā ta Moijə tə́ á əda ní. 7Josias adə̄ ngán Israel gə̄ ngán batə̄ gə̄ kə ngán bə̄yā̰ gə̄ ń a sāān̄ yā rāań nāā Pákə ní. Kutədə́ malang i dūbú kutə mətá ō, man̄g gə̄ i dūbú mətá ō, ɔr̄də́ i dan yá̰a̰ kul̄ yān gə̄ tə́. 8De kə́ bo yān gə̄ adə̄n̄ de kə́ kem ɓēé gə̄ ō, ngé tun̄ yá̰a̰ gə̄ ō, ngán Lebi gō ō, yá̰a̰ kul̄ yādə́ gə̄ ngá̰ý kə gō kem ndigə yādə́ nin̄ kɔ́ gɔ̄ɔ́. De kə́ dɔ kújə yā Kɔ́ɔ̄ɓē tə́ gə̄ ń i Hilkia ō, Jakari ō, Yehiel ō ní, adə̄n̄ ngé tun̄ yá̰a̰ gə̄ ngán batə̄ gə̄ kə ngán bə̄yā̰ gə̄ dūbú jōó kə ɓú mətá ō, man̄g gə̄ ɓú mətá ō, yā tun̄ ndɔ̄ Pákə tə́. 9Ngār gə̄ yā ngán Lebi gə̄ ń i Konania nin̄ kə ngákó̰o̰n gēé, adə̄ i Semaya ō, Netanel ō, Hasabia ō, Yeyel ō, Yojabad ō ní, adə̄n̄ ngán Lebi gə̄ ngán batə̄ gə̄ ō, ngán bə̄yā̰ gə̄ ō, dūbú mí ō, man̄g gə̄ ɓú mí ō. 10Nin̄ oōn̄ naā dɔ kəla gə̄ tə́ i beé: Ngé tun̄ yá̰a̰ gə̄ ran̄ loo kəla yādə́ gə̄ tə́ ō, ngán Lebi gə̄ ran̄ kə gō ɓūtə̄ yādə́ gēé ō, tītə̄ ń mban̄g ədań ní. 11De gə̄ tɔ̄lə̄n̄ dā̰ Pákə gə̄ ní, taān̄ mósə́də́ adə̄n̄ ngé tun̄ yá̰a̰ gə̄, anī ngé tun̄ yá̰a̰ gə̄ taā ɓōkə́n̄ dɔ loo tun̄ yá̰á̰ tə́. Kəla rāā ngán Lebi gə̄ i tóo dā̰. 12Dan ń a adə̄n̄ ngán Israel gə̄ dā̰ kə gō gír ɓūtə̄ yādə́ gə̄ ń əndān̄ kə dɔ gír kojə yādə́ gēé ní anī, ɔrə̄n̄ loon kə́ yā róō kə taā kadə̄ Kɔ́ɔ̄ɓē ənīn̄ tayā tītə̄ ń ndangən̄neé kem makətūbə̄ yā Moijə tə́ ní. Rāān̄ i tītə̄ ń noō kə man̄g gēé ō. 13Kə gō ń ɔjən̄neé kadə̄ yā rāań ní tə́ngān̄ ngán batə̄ Pákə gə̄ i kum hor tə́, banī ndīrə̄n̄ gotə yá̰a̰ kəsa kə́ yā ɓōĺ gidə kə́ rang gə̄ i kem jóó nánjə gə̄ tə́ ō, jóo gində̄ gə̄ tə́ ō, gájə gə̄ tə́ ō, ba aw̄n̄neé láẃ adə̄n̄ de gə̄ malang. 14Gō tə́ anī loo dā̰ kə́ yā tun̄ gə̄ ń téln̄neé adə̄n̄ ngé tun̄ yá̰a̰ gə̄ ō, ngán Lebi gə̄ ō ní, ngán Lebi gə̄ rāān̄ loon tām̄ yā ngé tun̄ yá̰a̰ gə̄ tə́ ō, tām̄ yādə́ nin̄ kɔ́ gə̄ tə́ ō. Tɔdɔ̄ ngé tun̄ yá̰a̰ gə̄ ń i ngán kaa Aaro̰ gə̄ ní rāān̄ i kəla róō dā̰ kə́ yā tun̄ kə taá gə̄ ō, kəla róō yibə̄ dā̰ gə̄ ō, bátə́ loo tíbə dɔdə́ tə́. I tām̄ najə̄ ń noō tə́ n ngán Lebi gə̄ rāān̄neé loo yá̰a̰ kəsa tām̄ yādə́ nin̄ kɔ́ gə̄ tə́ ō, tām̄ yā ngé tun̄ yá̰a̰ gə̄ tə́ ō ní. 15Gōsə̄ pā gə̄ ń i de kə́ gír kaa yā Asap tə́ gə̄ ní ran̄ loo kəla yādə́ gə̄ tə́, kə jī bēl̄ loo rāā yá̰a̰ gə̄ ń Dabid nin̄ kə Asap ō, Heman ō, Yedutun nge ka̰a̰ yá̰a̰ yā mban̄g ō, ɔjən̄neé ní. Ngé ngɔ̄m̄ ta róbə́ kújə gə̄ ran̄ kə ta róbə́ kújə gə̄ ō. Nin̄ əya̰n̄ ta kəla yādə́ gə̄ alé tɔdɔ̄ ngákó̰ó̰də́ kə́ ngán Lebi gə̄ rāān̄ loo yá̰a̰ kəsa tām̄ yādə́ tə́. 16Kəla malang yā Kɔ́ɔ̄ɓē kə́ ndɔ̄ ń noō tə́ ní i yā kɔsəń gɔn nāā Pákə ō, i yā tunə̄ń yá̰a̰ kə taá dɔ loo tun̄ yá̰a̰ yā Kɔ́ɔ̄ɓē tə́ ō, tītə̄ ń jī bēl̄ loo rāā yá̰a̰ gə̄ yā mban̄g Josias ədań ní. 17Adə̄ ngán Israel gə̄ ń nin̄ i noō ní rāān̄ nāā Pákə ndɔ̄ ń noō tə́ ō, gō tə́ anī rāān̄ nāā mápá kə́ kanjə̄ kaa dɔ ndɔ̄ sīrí ō. 18Əla gír ɓāl̄ yā Samuel nge koō ta tə́ ní, deē rāā nāā Pákə kə́ tītə̄ ń noō dɔ nang kə́ Israel tə́ aĺ ɓáý. Pákə ń Josias nin̄ kə ngé tun̄ yá̰a̰ gə̄ ō, ngán Lebi gə̄ ō, de kə́ Jerusalem gə̄ ō, Juda gə̄ ō, ngán Israel gə̄ ń nin̄ i kum tə́ ní ō rāān̄ ní, mban̄g kógə̄ḿ kə́ Israel tə́ kə́ rāā kə́ tītə̄ ń noō gətóo. 19Rāān̄ nāā Pákə ngeé ń toō i kem ɓāl̄ ko̰o̰ ɓē yā Josias kə́ nge ko̰ kutə gidə i sɔ́sɔ́ tə́.
Ta tɔ̄l ta ko̰o̰ ɓē yā Josias
(Á̰a̰ī 2 Mba 23.28-30)
20Gír yá̰a̰ gə̄ ń noō malang gān̄g ō, Josias rāā loo kə́ nujə gə̄ kə́ tū kújə yā Kɔ́ɔ̄ɓē tə́ oy ō. Banī ndɔ̄ kə́rēý tə́ Neko, mban̄g kə́ Ejiptə, a aw̄ kə̄ kənī ɓē kə́ Karkemis rɔ̄ɔ̄ tə́ dɔ gɔ́sə bā Opəratə tə́ anī, Josias aw̄ gān̄g tan. 21Banī Neko əla de gə̄ kadə̄ aw̄ ədanən̄ na: Mban̄g kə́ Juda, i rí n to dɔ dáńjí tə́ jḭḭ seí ní? Ɓōólaā m̄-reē i yā rɔ̄ɔ̄ī ḭ̄ alé, banī m̄-reē i yā rɔ̄ɔ̄ madə̄ ba̰ā̰ḿ ń a rɔ̄ɔ̄m̄ ngándáńg ní. Nə́ɓā ədam̄ na kə m-ɔ̄r̄ bā̰ā̰ alé. Adə̄ ī-lōō dēsə́ rɔ̄í no Nə́ɓā ń i seḿ tə́ ní, na sōgə́ a rāā kadə̄ óy. 22Banī Josias lōō gír rɔ̄ɔ̄ Neko tə́ alé, tɔdɔ̄ kété gə̄gē ní a sāā i ta róbə́ kə́ yā rɔ̄ɔ̄n̄neé. Adə̄ ni oō najə̄ ń Neko ɔr̄ seneé ní alé. Tá i Nə́ɓā nəkɔ́ n əndā najə̄ ní ta Neko tə́. Josias əla kūbə̄ kə́ kadə deē a̰a̰n a gerə̄n alé rɔ̄n tə́ ba aw̄ rɔ̄ɔ̄ tə́ wól loo kə́ Megido tə́. 23Ngé kur gərā gə̄ urnən̄ ur ɔdənən̄. Anī ni-əda ngé kəla yān gə̄ na: Únəmī āwī seḿ kɔ̄ɔ́, tɔdɔ̄ m-ə́nge do kə́ majaĺ ngá̰ý. 24Ngé kəla yān gə̄ unənən̄ kem púsə rɔ̄ɔ̄ tə́ kɔ̄ɔ́ ənīnən̄ kem púsə yān kə́ rang tə́, ba aw̄n̄ seneé Jerusalem. Adə̄ oy i noó ba dubə̄nən̄ i kem bāá ɓádə yā kaan gə̄ tə́. Juda gə̄ ō, de kə́ Jerusalem gə̄ ō malang nōōn̄ Josias.
25Jeremi nge koō ta rāā pā kógə̄ḿ nōoń Josias. Əla gír ndɔ̄ ń noō tə́ bátə́ ɓōólaā ní, gōsə̄ pā kə́ dəngam gə̄ ō, kə́ dəyá̰ gə̄ ō, malang a ɔrə̄n̄ i najə̄ yā Josias kem pā nōō rɔ̄ yādə́ gə̄ tə́, tɔdɔ̄ tél i jī bēl̄ loo rāā yá̰á̰ kə́ dɔ nang kə́ Israel tə́ kɔ̄ɔ́. Ndangən̄ pā gə̄ ní i kem makətūbə̄ pā nōō rɔ̄ gə̄ tə́.
26-27Ndangən̄ gotə najə̄ kə́ rang gə̄ yā Josias kem makətūbə̄ yā mban̄g gə̄ kə́ Israel tə́ ō, kə́ Juda tə́ ō. Əlan̄ gír i dɔ nge kə́ ta kəla gíŕ tə́ bátə́ ugə̄n̄neé dɔ nge kə́ ta tɔ̄l̄ ta tə́. Ɔjən̄ gotə háĺ kə́ gōtə́ yān kemeé, tɔdɔ̄ ni-rāā yá̰á̰ ń ndangən̄ kem ndū najə̄ yā Kɔ́ɔ̄ɓē tə́ ní.
Currently Selected:
2 YÁ̰A̰ GƏ̄ 35: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.