2 YÁ̰A̰ GƏ̄ 22
22
Akajias o̰o̰ ɓē
(Á̰a̰ī 2 Mba 8.25-29; 9.27-29)
1De kə́ Jerusalem gə̄ əndān̄ Akajias ń i ngōn̄ Joram kə́ dūú ní mban̄g adə̄ o̰o̰ ɓē gotən tə́, tɔdɔ̄ de gə̄ ń udən̄ kem gérgereé naā tə́ kə Arabə gēé ní tɔ̄lə̄n̄ ngákó̰o̰n gə̄ kə́ tɔgə gə̄ kɔ̄ɔ́ malang. I tītə̄ ń noō n Akajias ngōn̄ Joram ndiń mban̄g dɔ nang kə́ Juda tə́, 2dan ń ɓālə̄n i kutə jōó ní. Ni o̰o̰ ɓē Jerusalem ɓāl̄ kógə̄ḿ. Rī kó̰o̰n na i Atali. I de kə́ gír kojə yā Omri tə́. 3Akajias rāā yá̰a̰ majə alé tītə̄ yā de gə̄ kə́ gír kojə yā Akab tə́ ō, tɔdɔ̄ kó̰o̰n i nge kadə̄n kɔjə̄ kə́ majaĺ gə̄. 4Ni rāā yá̰á̰ kə́ nel̄ Kɔ́ɔ̄ɓē alé tītə̄ yā de kə́ gír kojə yā Akab tə́ gə̄. Tām̄ dan ń bɔbə̄n oy kɔ̄ɔ́ ní, nin̄ télən̄ ngé kadə̄n kɔjə̄ kə́ yā nujə seneé gə̄. 5Ni oō i kɔjə̄ yādə́ n aw̄ń kə Joram ngōn̄ Akab mban̄g kə́ Israel yā rɔ̄ɔ̄ Hajael mban̄g kə́ Aram kem ɓē kə́ Ramot kə́ Galaad tə́ ní. Aram gə̄ adə̄n̄ Joram do ta rɔ̄ɔ̄ tə́, 6adə̄ ni tél reē gogə́ Jisreel kadə̄ do̰ō̰n̄ don. I loo ń noō tə́ n Akajias aw̄ go̰ō̰n tə́ dɔ mo̰y tə́ Jisreel ní.
7I Nə́ɓā n ndigə kadə̄ Akajias ənge yo oy kə ta kūl̄ kaw̄n go̰ō̰ Joram tə́ ní. Tām̄ dan ń Akajias reē ugə̄ ní, ni teē aw̄ tə́nī ta Yehu ngōn̄ Nimsi tə́ kə Joram. Tá Yehu i deē ń Kɔ́ɔ̄ɓē ur yibə̄ mban̄g dɔn tə́ kadə̄ tɔ̄l̄ de kə́ gír kojə yā Akab tə́ gə̄ malang kɔ̄ɔ́ ní. 8Yehu gān̄g sarya yā Nə́ɓā dɔ de kə́ gír kojə yā Akab tə́ gə̄. Dan ń ni-ənge ngār gə̄ kə́ Juda ō, ngáń ngákó̰o̰ Akajias gə̄ ō ń nin̄ malang i ngé rāā kəla gə̄ yā mban̄g ní anī tɔ̄l̄də́ kɔ̄ɔ́ malang. 9Gō tə́ anī adə̄ sāān̄ Akajias, əhɔnən̄ kem ɓē kə́ Samari tə́ loo ń ni ɓɔ̄ɔ̄ rɔ̄n tū tə́ ní tə́ reēn̄ seneé adə̄n̄ Yehu, ba tɔ̄lnən̄. Banī dubə̄nən̄ tām̄ ədan̄ na ni i de kə́ gír kojə yā Josapat ń sāā Kɔ́ɔ̄ɓē kə ngarā̰ kemənneé mámák ní. De kə́ gír kojə yā Akajias kə́ asə ko̰o̰ ɓē gətóo.
Atali o̰o̰ ɓē dɔ gúú tə́
(Á̰a̰ī 2 Mba 11.1-3)
10Dan ń Atali kó̰o̰ Akajias a̰a̰ kadə̄ ngōnən oy kɔ̄ɔ́ anī, gḛy tɔ̄l̄ de kə́ gír kojə yā mban̄g kə́ Juda tə́ gə̄ kɔ̄ɔ́ malang. 11Banī Yoseba ngōn̄ mban̄g kə́ dəyá̰ un Joas ngōn̄ Akajias dan ngán mban̄g gə̄ ń a rāān̄ yā tɔ̄l̄ə̄n̄də́ tə́ ní, aw̄ ɓɔ̄ɔ̄n naā tə́ kə nge ngɔ̄mən kə́ dəyá̰ kem kújə kəndā tə̄rá gə̄ tə́, adə̄ Atali tɔ̄lən alé. Yoseba nə̄yá̰ Yoyada nge tun̄ yá̰a̰ i ngōn̄ mban̄g Joram kə́ Juda, adə̄ ni i ngōkó̰o̰ Akajias kə́ dəyá̰. 12Joas ndi sedə́ loo ɓɔ̄ɔ̄ rɔ̄ tə́ kem kújə yā Nə́ɓā tə́ ɓāl̄ mehḛ́. Dan ń noō tə́ ní i Atali n ndi dɔ ɓē tə́ ní.
Currently Selected:
2 YÁ̰A̰ GƏ̄ 22: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.
