2 YÁ̰A̰ GƏ̄ 16
16
Asa rɔ̄ɔ̄ Basa mban̄g kə́ Israel
(Á̰a̰ī 1 Mba 15.16-22)
1Kem ɓāl̄ ko̰o̰ ɓē kə́ nge ko̰ kutə mətá gidə i mehḛ́ yā Asa tə́ anī, Basa mban̄g kə́ Israel reē ənī ɓē kə́ Juda rɔ̄ɔ̄ ō. Ənī rɔ̄n rāā ɓē kə́ Rama kadə̄ ngan̄g yā kɔgə̄ń Asa mban̄g kə́ Juda mān̄ ō. 2Asa ɔy gində̄ arjā̰a̰ ō, lɔ́r ō, kə́ loo ngɔ̄m̄ yá̰a̰ kənge kə́ kem kújə yā Kɔ́ɔ̄ɓē tə́ ō, kə́ loo ngɔ̄m̄ yá̰a̰ kənge kə́ kem kújə yā mban̄g tə́ ō, ba əlań adə̄ Ben Hadad mban̄g kə́ Aram ń ndi Damas ní tə́. Ni ədan na: 3Ādə̄ j-əhɔ madə̄ naā tītə̄ ń bɔbə̄jí gə̄ əhɔn̄neé madə̄ naā kété ní. Á̰a̰ā̰, m-ə́la kə gində̄ arjā̰a̰ ō, lɔ́r ō m-ādī. Adə̄ ī-gān̄g madə̄ naā ń ə́hɔ kə Basa mban̄g kə́ Israel ní kɔ̄ɔ́ ādə̄ reē rɔ̄ɔ̄m̄ to̰ alé. 4Ben Hadad oō najə̄ yā mban̄g Asa, adə̄ əla ngol áskar yān gə̄ adə̄ aw̄ rɔ̄ɔ̄n̄ ɓē gə̄ kə́ Israel tə́. Nin̄ taān̄ ɓē kə́ Iyon ō, Dan ō, Abel-Maim ō, ɓē gə̄ yā Nepətali ń kújə́ kán̄ yá̰a̰ gə̄ i kemdə́ gə̄ tə́ ní malang ō. 5Dan ń Basa oō najə̄ ń noō anī lōō gír rāā ɓē kə́ Rama tə́ kadə̄ ngan̄g ō, əya̰ ta kəla yān gə̄ ō. 6Mban̄g Asa aw̄ kə Juda gə̄ malang adə̄ ɔyn̄ mbal̄ gə̄ kə kāgə̄ gə̄ ń Basa a rāań ɓē kə́ Rama kadə̄ ngan̄g ní. Ni ɔydə́ rāań ɓē kə́ Geba ō, Misəpa ō, adə̄ télən̄ ɓē kə́ ngan̄g gə̄.
Asa əla Hanani dəngáyá
7Dan ngé ń noō tə́ ní Hanani nge ka̰a̰ yá̰a̰ reē ənge Asa mban̄g kə́ Juda ba ədan na: Dan ń ə̄ndā tɔ́gí i dɔ mban̄g kə́ Aram tə́ ba i dɔ Kɔ́ɔ̄ɓē Nə́ɓā yāí tə́ aĺ ɓá ní, ādə̄ i ngé rɔ̄ɔ̄ gə̄ yā mban̄g kə́ Aram ta róbə teē kɔ̄ɔ́ gíŕ tɔ́gə yāí tə́. 8Kété ní Nubi gə̄ ō, Libi gə̄ ō, ɓoon̄ naā adə̄ nin̄ i ngé rɔ̄ɔ̄ kə́ kósə́ ngá̰ý gə̄ kə́ aw̄n̄ kə púsə rɔ̄ɔ̄ gə̄ ō, ngé kal̄ sə́nda gə̄ ō aĺ a? Ba Kɔ́ɔ̄ɓē əladə́ gíŕ tɔ́gə yāí tə́, tām̄ dan ń noō tə́ ní ə̄ndā tɔ́gí i dɔn tə́. 9Tām̄ kum Kɔ́ɔ̄ɓē a̰a̰ loo dɔ nang tə́ malang i yā kɔsəń kíĺ ngé gə̄ ń kemdə́ i yān kə taá malang ní kə̄ dɔɔ́. I beé n a ī-rāā yá̰a̰ i tītə̄ de kə́ kur̄ dɔn gətóo ní. Adə̄ əla gír ɓōólaā bátə́ kə̄ no tə́ ní ā ī-ra i dan rɔ̄ɔ́.
10Wōn̄g rāā Asa kə nge ka̰a̰ yá̰á̰ adə̄ əhɔ ənīn dəngáyá. Tɔdɔ̄ najə gə̄ ń ɔr̄ ní adə̄n wōn̄g ngá̰ý. Dan ngeé ń noō tə́ ní Asa rāā kum ngán Israel kə́rēý gə̄ ndoō tə́.
Gír ko̰o̰ ɓē yā Asa gān̄g
(Á̰a̰ī 1 Mba 15.23-24)
11Ndangən̄ gotə najə̄ yā Asa kə́ ta kəla gír tə́ bátə́ ta tɔ̄l̄ ta tə́ kem makətūbə̄ yā mban̄g gə̄ kə́ Juda tə́ ō, kə́ Israel tə́ ō.
12Asa əsō mo̰y ɓāl̄ ko̰o̰ ɓē yān kə́ nge ko̰ kutə mətá gidə i ndōhó tə́. I mo̰y kə́ nja tə́ kə́ ngan̄g ngá̰ý n rāān ní. Nəkɔ́ ń i mo̰y rāānneé noō gə̄gē ní Asa sāā nja Kɔ́ɔ̄ɓē alé, banī sāā i nja doktór gə̄ tá kadə̄ tɔlən̄ mo̰y dɔn tə́. 13Asa oy aw̄ gō kaan gə̄ tə́. Ni oy i kem ɓāl̄ ko̰o̰ ɓē yān kə́ nge ko̰ kutə sɔ́ gidə i kógə̄ḿ tə́. 14Dubə̄nən̄ i kem bəlo ɓádə́ ń adə̄ ndērə̄n̄ tām̄ yān tə́ kem ɓē yā Dabid tə́ ní. Ənīnən̄ i dɔ tə̄rá kə́ yá̰á̰ kə́ kotə majə gə̄ ō, kə́ gír yibə̄ ndum kə́ tayā tayā gə̄ ō, i tū tə́ tə́ ō, rāān̄ hor kə́ bo ngá̰ý tām̄ yān tə́ ō.
Currently Selected:
2 YÁ̰A̰ GƏ̄ 16: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.
