1 TIMOTE 2

Najə̄ kə́ dɔ ndɔ̄ȳ tə́

1Adə̄ kété no yá̰á̰ gə̄ tə́ malang ní, ādə̄ de gə̄ dəjen̄ Nə́ɓā yá̰a̰ ō, ndɔ̄ȳnən̄ ō, rāānən̄ ɓɔ́ ō, ndadə̄ adə̄nən̄ ō, tām̄ yā de gə̄ tə́ malang. 2Tām̄ yā mban̄g gə̄ tə́ ō, ngé ko̰o̰ ɓē gə̄ tə́ malang ō. Tá kadə̄ jə-ndiīń jəke ō, kə kem kə́ sɔl̄ lɔmɔɔ́ ō, yā kadə̄ jə-rāāīneé yá̰a̰ malang kə gō ń Nə́ɓā ndigə ní ō, jə-rāāīneé yá̰á̰ kə́ ɔjə kadə̄ jə-ɓōlíī ndíĺ Nə́ɓā ō. 3I nge ń noō n i yá̰á̰ kə́ majə ō, i yá̰á̰ kə́ nel̄ Nə́ɓā nge kajəjí ō ní. 4Ni-gḛy kadə̄ de gə̄ malang ajən̄ ō, aw̄n̄ bátə́ kadə̄ gerə̄n̄ najə̄ kə́ rɔ̄kum ō. 5Tɔdɔ̄ Nə́ɓā i kal kógə̄ḿ beē ō, nge ra mbənā Nə́ɓā tə́ kə de gēé i kal kógə̄ḿ beē ō. Deē ní i Kərist Jeju. 6Ni-adə̄ rɔ̄n yā gāngəń dɔ de gə̄ malang. Dan ń kum mbang asə ní, ni-əda najə̄ kə́ kum tə́ yān i tītə̄ ń noō, kadə̄ rɔ̄kum Nə́ɓā gḛy kadə̄ de gə̄ malang ajən̄. 7Əndāmə̄n̄ kɔdə̄ mbēr̄ ō, ngōmbang kəla ō, i tām̄ yā najə̄ kə́ kum tə́ yān ngeé ń toō tə́. M-ə́da i najə̄ kə́ rɔ̄kum, ba m̄-sor̄ i mbée alé, mā i nge ndóō nápar de kə́ rang gə̄ yá̰á̰ ń majə kadə̄ deē taā kem ní ō, yá̰á̰ ń i yá̰á̰ kə́ rɔ̄kum ní ō.

8Adə̄ m̄-gḛy kadə̄ dəngam gə̄ ɔyn̄ jīdə́ kə̄ dɔɔ́ ndɔ̄ȳnəń Nə́ɓā kə̄ loo gə̄ tə́ malang. Majə kadə̄ nin̄-ndɔ̄ȳn̄ kə kem kə́ unjə̄ njáý njáý, kanjə̄ wōn̄g ō, kanjə̄ kɔ̄l̄ naā ō.

9Ba kə́ tām̄ yā dəyá̰ gə̄ tə́ ɓáa, ādə̄ o̰ō̰n̄ kūbə̄ kə́ kə gōó majə ō, súūn̄ rɔ̄də́ kə yá̰á̰ súū rɔ̄ kə́ to hɔ̄r̄mɔ̄ ō, kə́ to kɔjə rɔ̄ aĺ ō. Adə̄ nin̄-súūn̄ rɔ̄də́ kə dɔ kə́ kəhɔ kadə̄ mān̄ dɔ majən aĺ ō, kə nə̄ngá lɔ́r aĺ ō, kə məde kɔ̄l̄ aĺ ō, kə kūbə̄ kə́ gātə̄n i ngá̰ý aĺ ō. 10Banī majə kadə̄ yá̰á̰ súū rɔ̄ yādə́ i kəla rāādə́ kə́ majə gə̄, tītə̄ ń dəyá̰ kə́ ngé rāā yá̰a̰ kə gō ń Nə́ɓā ndigə ní gə̄ a rāān̄neé ní. 11Kum mbang ndóō yá̰á̰ tə́ anī, ādə̄ dəyá̰ gə̄ ndin̄ tadə́ mbóo ndóōn̄neé yá̰a̰, kə sɔl̄ dɔ kə́ mámák. 12M-ādə̄ de kə́ dəyá̰ ta róbə ndóō de gə̄ yá̰a̰ aĺ ō, ta róbə ko̰o̰ ɓē dɔ de kə́ dəngam tə́ aĺ ō. I beé ní ādə̄ ni-ndi tan mbóo. 13Tɔdɔ̄ i Adam n Nə́ɓā rāān kété tá kadə̄ rāā Ebə ɓáý ní. 14Tá i Adam n lī gólən ní alé, ba i dəyá̰ n lī gólən á mān̄ dɔ ndū najə̄ ní. 15Ɓá tā ba ni a ajə i kə ta kūl̄ kojə ń ojə ngōn̄ ní. Ba i loo ń ré ni-əhɔ rɔ̄n tɔgə dɔ róbə taā kem tə́ ō, táŕ tə́ ō, háĺ kə́ unjə̄ njáý njáý tə́ ō, kə kɔjə rɔ̄ɔ́ aĺ ō ní tá.

Currently Selected:

1 TIMOTE 2: SARDC

Highlight

Copy

Compare