1 TESALONIK 4
4
Háĺ kə́ nel̄ Nə́ɓā
1Yā tɔ̄ləń ta ní, ngákó̰ó̰jí gə̄, háĺ kə́ kadə̄ nel̄ Nə́ɓā ní, sḭḭ̄ ī-ndóōī rɔ̄jí tə́, adə̄ i ni n ī-rāāī ní. Ba ngɔlaā ń toō ní jə-dəjesí ō, jə-rāāsí ɓɔ́ kə rī Kɔ́ɔ̄ɓē Jeju ō, kadə̄ ī-rāāī kadə̄ majə tɔȳ kə́ kété. 2Tɔdɔ̄ ī-gerī yá̰á̰ ń Kɔ́ɔ̄ɓē Jeju ədají na kə j-ɔjəsí ní majə. 3Yá̰á̰ ń Nə́ɓā ndigə ní, i kadə̄ háĺsí i háĺ kə́ unjə̄ njáý njáý ō, i kadə̄ ī-lōōī sāā naā loo kaya tə́ ō. 4I kadə̄ deē kógə̄ḿ kógə̄ḿ dansí tə́ ndóō loo ndi kə nə̄yá̰neé ndi kə́ kadə̄ nel̄ Nə́ɓā, 5kanjə̄ kəya̰ ɓō yá̰á̰ kə́ kemən tə́ kadə̄ un dɔn tītə̄ ń de kə́ ndágá gə̄ a rāān̄neé ní. 6Tū najə̄ ń noō tə́ ní, ādə̄ deē kógə̄ḿ rāā ngōkó̰o̰n yá̰á̰ kə́ gō tə́ aĺ loon tə́ aĺ ō, əsa tətōn loon tə́ aĺ ō. Tɔdɔ̄ Kɔ́ɔ̄ɓē a rāā ba̰ā̰ yá̰a̰ gə̄ ń noō malang. J-ədasí najə̄ ń noō kété ō, j-ɔjəsí kadə̄ i rɔ̄kum ō. 7Tɔdɔ̄ Nə́ɓā ɓāŕjí i yā kadə̄ jḭḭ̄ i de kə́ majaĺ tákə̄də́ gə̄ alé, banī kadə̄ jḭḭ̄ i de kə́ háĺjí i háĺ kə́ unjə̄ njáý njáý gə̄. 8Adə̄ deē ń mbātə́ yá̰a̰ ń j-ɔjəsí toō ní, mbātə́ i deē ndul alé, banī mbātə́ i Nə́ɓā kə́ nge kadə̄sí Ndíĺ kə́ Táĺ yān.
9Najə̄ kə́ dɔ tár kə́ dɔ dáń ngákó̰o̰ naā gə̄ tə́ ní, majə kadə̄ deē ndang makətūbə̄ adə̄sí najə̄n tə́ alé, tɔdɔ̄ i Nə́ɓā n ɔjəsí sḭḭ̄ kɔ́ gə̄ loo tár naā ní. 10I tītə̄ ń noō n ī-táriīń ngákó̰ó̰sí gə̄ kə́ gō nang kə́ Masedəwan tə́ malang kə taá ní. Banī ngákó̰ó̰jí gə̄, jə-dəjesí kadə̄ ī-táriī kum kə̄ kété ɓáý. 11Ī-ndiī jəke kə naá ō, ə̄ndāī kumsí gír kəla yāsí sḭḭ̄ kɔ́ gə̄ tə́ ō. Ī-rāāī kəla kə jīsí tītə̄ ń j-ədańsí ní. 12Yā kadə̄ de kə́ ndágá gə̄ ɓōlə́n̄neé ndíĺsí ō, ɔ̄yīneé deē kógə̄ḿ aĺ ō.
Ndɔ̄ reē Kɔ́ɔ̄ɓē
13Ngákó̰ó̰jí gə̄, jə-gḛy kadə̄ ī-ndiī dāyāá najə̄ yā ngé gə̄ ń oyn̄ tə́ ní alé, na sōgə́ rɔ̄sí nel̄sí alé tītə̄ yā ngé gə̄ ń yá̰a̰ kə́ yā kadə̄ əndān̄ kemdə́ dɔ tə́ gətóó ní. 14Tɔdɔ̄ ré jə-taāī kem kadə̄ Jeju oy ba ndól̄ anī, ngé gə̄ ń oyn̄ ní, Nə́ɓā a ndól̄də́ kə ta kūl̄neé ō.
15Najə̄ ń j-a j-ɔjəsí kə gō najə̄ yā Kɔ́ɔ̄ɓēé ní n toó: Jḭḭ̄ ń j-a jə-ndiī kə kumjí ɓáý ndɔ̄ reē Kɔ́ɔ̄ɓē tə́ ní, j-a jə-mānī kété no ngé gə̄ ń oyn̄ tə́ ní alé. 16Tām̄ ngol de kə́ dɔ rā̰ tə́ gə̄ a adə̄ ndūn ō, bərúnjə yā Nə́ɓā a ɓār̄ ō, anī Kɔ́ɔ̄ɓē nəkɔ́ a teē dɔ rā̰ tə́ yā reē. Adə̄ de gə̄ ń ɓoon̄ naā kə Kərist tá oyn̄ ní, a ndólə̄n̄ kété. 17Gō tə́ anī, jḭḭ̄ ń jə-ndiī kə kumjí á jə-na̰yiī dɔ nang tə́ laā ɓáý ní, a aw̄n̄ sejí naā tə́ sedə́ malang dɔ kil̄ man̄ tə́, yā kadə̄ j-ɔjiī no Kɔ́ɔ̄ɓē ɓōdə̄ rā̰ tə́, adə̄ j-a jə-ndiī kə Kɔ́ɔ̄ɓēé ngándáńg. 18Ī-sɔlī kem naā kə najə̄ ń noō.
Currently Selected:
1 TESALONIK 4: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.
