1 TESALONIK 2
2
Pol ɔjə Najə̄ kə́ Majə yā Nə́ɓā Tesalonik tə́
1Ngákó̰ó̰jí gə̄, sḭḭ̄ kɔ́ gə̄ ī-gerī kadə̄ ə́hɔījí kə̄ rɔ̄sí tə́ i ndāńg karī alé. 2Tītə̄ ń ī-gerīneé ní, kété tá kadə̄ j-ugə̄ loosí ní, rāān̄jí yá̰á̰ kə́ tōr̄ gə̄ ō, tájə̄n̄jí ō, kem ɓē kə́ Pilipə tə́. Ba Nə́ɓā yājí adə̄jí tɔ́gə, adə̄ j-ɔjəńsí Najə̄ kə́ Majə yān kanjə̄ ɓōĺ, dan rɔ̄ɔ̄ kə́ ngá̰ý tə́. 3Najə̄ kə́ Majə ń j-ɔjə ní teē i tū gír̄ kə́ gō tə́ aĺ tə́ aĺ ō, kə́ yḛr tə́ aĺ ō, kə́ kə ngamaá tə́ aĺ ō, 4banī Nə́ɓā nāājí pá tá adə̄jí kəla kɔjə Najə̄ kə́ Majə ní. Adə̄ j-ɔjə najə̄ i kadə̄ nel̄ de gə̄ alé, ba i kadə̄ nel̄ Nə́ɓā ń nāā ngarān̄g kemjí ní. 5Tītə̄ ń ī-gerīiń ní, jə-gól̄ kum deē tū najə̄ kɔr̄jí tə́ aĺ ō, najə̄ kɔr̄jí ɔjə kadə̄ jə-sāā yá̰a̰ kənge tām̄ yājí tə́ aĺ ō, Nə́ɓā i de kə́ kum tə́ yājí. 6Jə-sāā kadə̄ deē ɔsə gɔnjí alé, sḭḭ̄ aĺ ō, de kə́ rang gə̄ aĺ ō. 7Mandang ɓáa j-asə kɔȳsí kə́ loo ngámbang kəla yā Kərist gə̄ tə́ tā, banī dan ń jə-ndi sesí ní, háĺjí sɔl̄ lɔm tītə̄ kó̰ó̰ ngán gə̄ kə́ a̰a̰ gō ngánən gə̄ majə beé. 8O̰o̰jí tɔdɔ̄sí ngá̰ý, adə̄ jə-ndigə i kɔjəsí Najə̄ kə́ Majə yā Nə́ɓā ngóy alé, banī i kadə̄ rɔ̄jí tām̄ yāsí tə́ ō, tɔdɔ̄ sḭḭ̄ ī-téliī i kó tár yājí gə̄. 9Ngákó̰ó̰jí gə̄, ādə̄ əga kemsí dɔ kəla ń jə-rāā tə́ ní ō, dɔ kɔr ń j-ɔr sesí tām̄ táŕ kə́ kemjí tə́ ní ō. Dan ń j-ɔjəsí Najə̄ kə́ Majə yā Nə́ɓā ní, jə-rāā kəla ndɔ̄ɔ́ ō, kadaá ō, kadə̄ j-ɔȳń deē kógə̄ḿ dáńsí tə́ alé.
10Sḭḭ̄ ō, Nə́ɓā ō ní, sḭḭ̄ i de kə́ kum tə́ yājí gə̄ kadə̄ háĺjí ń jə-ndiń dansí sḭḭ̄ ngé taā kem gə̄ tə́ ní, i háĺ kə́ unjə̄ njáý njáý ō, kə́ kanjə̄ najə̄ dɔ tə́ ō. 11Tītə̄ ń ī-gerīneé ní, yá̰á̰ ń jə-rāā sesí ní, i tītə̄ yá̰á̰ ń bɔbə̄ ngán gə̄ a rāā kə ngánən gēé ní. 12J-ɔjə̄sí ō, jə-sɔl̄ kemsí ō, jə-rāāsí ɓɔ́ kadə̄ háĺsí ndetə naā kə ɓāŕ ń Nə́ɓā ɓāŕsí kadə̄ údiī kem Ɓē ko̰o̰ yān tə́ ō, kɔsə gɔn yān tə́ ō ní.
13Najə̄ ń jə-ndadə̄ń Nə́ɓā tām̄ yāsí tə́ ngándáńg ní n toó: Dan ń j-ɔjəsí najə̄ yā Nə́ɓā ādə̄ ōōī ō, ī-taāī ō ní, ī-taāī i tītə̄ najə̄ yā de gə̄ alé, ba i kə́ najə̄ yā Nə́ɓā nəkɔ́ tə́. 14Ngákó̰ó̰ḿ gə̄, de gə̄ kə́ kem Egəlijə gə̄ yā Nə́ɓā tə́ ń taān̄ kem Jeju Kərist tə́ á ndin̄ dɔ nang kə́ Jude tə́ ní, yá̰á̰ ń rāādə́ ní, rāāsí sḭḭ̄ ō. Tɔdɔ̄ i yá̰á̰ kə́ tōr̄ gə̄ ń ngé taā kem kə́ Jude tə́ gə̄ əngen̄ jī Jipə gə̄ tə́ ní n sḭḭ̄ ə́ngeī jī de kə́ kem ɓē yāsí tə́ gə̄ ō ní. 15Jipə gə̄ ń tɔ̄lə̄n̄ Kɔ́ɔ̄ɓē Jeju ō, ngé koō ta gə̄ ō ní, rāān̄jí ndoō tə́ ō. Nel̄ Nə́ɓā sedə́ alé, tá nin̄ i madə̄ ba̰ā̰ de gə̄ malang ō. 16Nin̄-ɔgə̄n̄jí kɔjə nápar de kə́ rang gə̄ Najə̄ kə́ Majə kadə̄ ajən̄neé ō, a tɔ̄lə̄n̄ ta yá̰a̰ rāādə́ kə́ majaĺ i tītə̄ ń noō dejə ō. Banī Nə́ɓā gān̄g sarya dɔdə́ tə́ ta tɔ̄l̄ ta tə́.
Pol ndigə tél kaw̄ ka̰a̰ Tesalonik gə̄
17Ngákó̰ó̰jí gə̄, j-a̰a̰ī naā alé dan asə tām̄ sḛ́ý, adə̄ ndoōsí rāājí. J-a̰a̰ī naā kə kumjí alé, ba kemjí i ngɔr rɔ̄ naā tə́. Ngur ka̰a̰sí rāājí ngá̰ý, adə̄ jə-sāā ta róbə kaw̄ ka̰a̰sí tə́. 18Jə-sāā tél kaw̄ loosí. Mā Pol m̄-sāā kaw̄ loosí i nja kógə̄ḿ beē ngóy alé, banī Sətan ɔgə̄jí kɔ̄ɔ́. 19Tɔdɔ̄ ndɔ̄ reē Kɔ́ɔ̄ɓē yājí Jeju tə́ ní, yá̰a̰ kəndā kem dɔ tə́ yājí, aláa rɔ̄nel̄ yājí, aláa jākā mbang yājí ní, i náā gə̄? I sḭḭ̄ aĺ a? 20Rɔ̄kum, i sḭḭ̄ n i kɔsə gɔn yājí ō, rɔ̄nel̄ yājí ō ní.
Currently Selected:
1 TESALONIK 2: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.
