1 SAMUEL 31

Saul oy

1Pilistin gə̄ rɔ̄ɔ̄n̄ Israel gə̄, ba Israel gə̄ a̰ȳn̄ naā nodə́ tə́. Ngá̰ý gə̄ oyn̄ adə̄ nīńdə́ to mbal̄ kə́ Gilboa tə́. 2Nja Pilistin gə̄ ra gō Saul nin̄ kə ngánən gēé tə́. Nin̄ tɔ̄lə̄n̄ ngánən gə̄ ń i Jonatan ō Abinadab ō Malkisua ō ní, 3ba tél tūrə̄n̄ rɔ̄də́ i kə̄ dɔn nəkɔ́ tə́, adə̄ rɔ̄ɔ̄ tél bo i kum kə̄ dɔ Saul tə́. Dan ń ngé kur gərā gə̄ teēn̄ dɔn tə́ á ni a̰a̰də́ ní kemən gān̄g man̄, 4adə̄ ni-əda nge kətō yá̰a̰ rɔ̄ɔ̄ yān na kə ɔr̄ kaskar yān kə ɔsənneé na sōgə́ de kə́ ngé kəja mɔtədə́ aĺ gə̄ ń noō reē ɔsənən̄ ba mbóon̄neé seneé. Banī nge kətō yá̰a̰ rɔ̄ɔ̄ yān ɔdə alé, tɔdɔ̄ ɓōĺ asən nák. Anī Saul un kaskar yān nəkɔ́ ba əsō ta tə́. 5Dan ń nge kətō yá̰a̰ rɔ̄ɔ̄ yā Saul a̰a̰ kadə̄ Saul oy kɔ̄ɔ́ anī, əsō ta kaskar yān tə́ ō ba oy seneé. 6I beé n Saul ō ngánən kə́ dəngam kə́ mətá gə̄ ō nge kətō yá̰a̰ rɔ̄ɔ̄ yān ō deē yān gə̄ ō oyn̄neé malang ndɔ̄ ń noō tə́ ní.

7Dan ń ngán Israel gə̄ ń ndin̄ gidə wól loo kə́ dām̄ kə́ nú tə́ ō ngé gə̄ ń ndin̄ gidə bā Jurdḛ kə́ dām̄ kə́ nú tə́ ō a̰a̰n̄ kadə̄ ngé rɔ̄ɔ̄ gə̄ yā Israel gə̄ a̰ȳn̄ naā kɔ̄ɔ́ ō Saul nin̄ kə ngánən kə́ dəngam gēé oyn̄ kɔ̄ɔ́ ō anī, əya̰n̄ ɓē yādə́ gə̄ kɔ̄ɔ́ ba a̰ȳn̄ naā, adə̄ Pilistin gə̄ reē ndin̄ gotədə́ tə́.

8Teē kə ndɔ̄ kə́ noō anī Pilistin gə̄ ń reēn̄ ró̰ȳ yá̰á̰ kə́ rɔ̄ɔ̄ nīń gə̄ tə́ ní əngen̄ nīń Saul ō ngánən kə́ mətá gə̄ ō dɔ mbal̄ kə́ Gilboa tə́. 9Nin̄ gāngə̄n̄ dɔ Saul ō ró̰ȳn̄ yá̰a̰ yān gə̄ kə́ rɔ̄n tə́ ō ba əlan̄ de gə̄ adə̄ ədan̄ najə̄ yon dɔ nang yā Pilistin gə̄ tə́. Ədan̄ kem kújə ɓesə̄ yādə́ gə̄ tə́ ō ədan̄ de gə̄ ō. 10Gō tə́ anī ɓōkə́n̄ yá̰a̰ rɔ̄ yān gə̄ kem kújə ɓesə̄ Astarte tə́, ba do̰ō̰n̄ nīnə́n kadə ndogə̄ mbal̄ kə́ Bet Sean tə́.

11De kə́ Yabes kə́ Galaad tə́ gə̄ oōn̄ yá̰á̰ ń Pilistin gə̄ rāān̄ kə Saulú ní. 12Anī ngé gə̄ ń wurdə́ il ngá̰ý tɔȳ yā madə̄də́ gə̄ ní əsōn̄ róbó ba njə̄rān̄ ndɔ̄ɔ́ bátə́ ugə̄n̄ Bet Sean. Nin̄ ɔrə̄n̄ nīń Saul ō nīń ngánən kə́ dəngam gə̄ ō kadə̄ ndogə̄ mbal̄ tə́ kɔ̄ɔ́, ba tél aw̄n̄neé gogə́ ɓēé Yabes aw̄ əlan̄ hor dɔ tə́. 13Gō tə́ anī ɔyn̄ kə̄ngādə́ gə̄ dubə̄n̄ gír kāgə̄ masə̄ kə́ Yabes tə́, ba əsan̄ yá̰a̰ aĺ ndɔ̄ sīrí.

Currently Selected:

1 SAMUEL 31: SARDC

Highlight

Copy

Compare