1 SAMUEL 3
3
1Ba Samuel ń i ngōn̄ ní, a rāā kəla yā Kɔ́ɔ̄ɓē i ta kum Eli tə́.
Nə́ɓā əndā Samuel nge koō ta yān tə́
Dan ngeé ń noō tə́ ní Kɔ́ɔ̄ɓē a ɔr̄ najə̄ kə deé i láẃ láẃ aĺ ō, a rāā kadə̄ deē a̰a̰ yá̰a̰ i láẃ láẃ aĺ ō.
2Ndɔ̄ kə́rēý tə́ ndɔ̄ɔ́ anī Eli ń kumən a̰a̰ loo ngá̰ý to̰ aĺ ní, to a ɓīī loo ń a to tū tə́ kété gə̄ tə́ ní. 3Samuel to kem kújə yā Kɔ́ɔ̄ɓē tə́ loo ń sandúkə yā Nə́ɓā i tū tə́ ní tə́ a ɓīī ō, hor yā Nə́ɓā#3.3 Hor yā Nə́ɓā: Á̰a̰ī Teē 27.20-21; Leb 24.2-4 i kə́ deē tɔ̄l̄ aĺ ɓáý ō. 4Kɔ́ɔ̄ɓē ɓāŕ Samuel anī Samuel ndigən na: Mā n toó. 5Samuel ḭḭ a̰ȳ ngɔ̄də̄ aw̄ rɔ̄ Eli tə́ ba ədan na: Ī-ɓārə́m̄ ní mā n toó. Anī Eli tél ədan na n-ɓārə́n alé ba kə tél aw̄ kə to nang tə́. Samuel tél aw̄ to nang tə́. 6Kɔ́ɔ̄ɓē ɓāŕ Samuel nja kə́ nge ko̰ jōó ɓáý to̰ na: Samuel. Anī Samuel ḭḭ aw̄ rɔ̄ Eli tə́ ba ədan na: Ī-ɓārə́m̄ ní mā n toó. Anī Eli tél ədan na: Ngōnə̄ḿ, m̄-ɓāríī alé, ba ī-tél āw̄ ī-to nang tə́. 7Dan ń noō tə́ ní Samuel ger̄ Kɔ́ɔ̄ɓē aĺ ɓáý, tɔdɔ̄ Kɔ́ɔ̄ɓē ɔr̄ najə̄ seneé nja kógə̄ḿ aĺ ɓáý.
8Kɔ́ɔ̄ɓē ɓāŕ Samuel nja kə́ nge ko̰ mətá anī Samuel ḭḭ aw̄ rɔ̄ Eli tə́ ba ədan na: Ī-ɓārə́m̄ ní mā n toó. Loo ń noō tə́ Eli ger̄ kadə̄ i Kɔ́ɔ̄ɓē n a ɓāŕ ngōn̄ ní. 9Adə̄ əda Samuel na: Ī-tél āw̄ ī-to nang tə́. Ba ré a ɓāríī ɓáý to̰ anī, ə́da na: Kɔ́ɔ̄ɓē, ɔ̄r̄ najə̄ na nge kəla yāí nēl̄ mbīn yā koōń. Samuel tél aw̄ to gotən tə́ gogə́. 10Kɔ́ɔ̄ɓē reē ra ba ɓārə́n tītə̄ kə́ kété gə̄ na: Samuel, Samuel. Anī Samuel tél ədan na: Ɔ̄r̄ najə̄ na nge kəla yāí nēl̄ mbīn yā koōń. 11Kɔ́ɔ̄ɓē əda Samuel na: M-ā m̄-rāā yá̰á̰ kógə̄ḿ dan Israel gə̄ tə́ kə́ kadə̄ náā nəkɔ́ ń a oō anī ndílən a a̰ȳ. 12Ndɔ̄ ń noō tə́ ní yá̰a̰ malang ń m-ə́da dɔ Eli tə́ ō, dɔ gír kojə yān tə́ ō ní m-ā m̄-rāā. M-ā m-ə́lá gír i ta kəla gíŕ tə́ bátə́ ta tɔ̄l̄ ta tə́ kanjə̄ kəya̰ yá̰á̰ kógə̄ḿ kɔ̄ɔ́. 13Ngɔlaā ní m̄-tāān adə̄ āw̄ ə́dan na m-ā m̄-gān̄g sarya kə́ ngándáńg dɔ de kə́ ta kújə yān tə́ gə̄ tə́, tām̄ yá̰á̰ kə́ majaĺ ń ni-rāā tə́ ní. Yá̰á̰ kə́ majaĺ ní i ngánən gə̄ ń a̰a̰mə̄n̄ adə̄ mā i yá̰a̰ aĺ ta kumdə́ tə́ ō, ni ger̄ ō, ba əya̰də́ dɔ háĺdə́ tə́ ní. 14I tām̄ najə̄ ń noō tə́ n m̄-túbə m-ādə̄ de kə́ gír kojə yān tə́ gə̄ m-ə́da na: Yá̰a̰ tun̄ gə̄, aláa yá̰a̰ ndējə̄ gə̄ a asən̄ kɔl̄ yá̰á̰ kə́ majaĺ ń de kə́ gír kojə yā Eli tə́ gə̄ rāān̄ ní aĺ bátə́ ní.
15Samuel to nang tə́ bátə́ loo tīī. Gō tə́ anī ḭḭ aw̄ teē ta kújə yā Kɔ́ɔ̄ɓē. Ni ɓōĺ kaw̄ kɔjə Eli gotə yá̰á̰ ń a̰ā̰ ní. 16Banī Eli ɓārə́n na: Ngōnə̄ḿ Samuel. Anī Samuel ndigən na: Mā n toó. 17Anī Eli dəjen najə̄ əda na: Ədaī na i rí? Ɓɔ́, najə̄ ń ədaī ní ī-lōō mundə̄m̄. Ré ī-mundə̄m̄ najə̄ kógə̄ḿ kə́ dan najə̄ gə̄ ń ɔr̄ seí tə́ ní anī, ādə̄ Nə́ɓā rāāī yá̰á̰ kə́ tōr̄ ń toō ō, nge kə́ tōr̄ ń toō ō. 18Loo ń noō tə́ Samuel ədan yá̰a̰ malang ń Kɔ́ɔ̄ɓē ɔr̄ seneé ní kanjə̄ mundə̄n yá̰á̰ kógə̄ḿ. Eli əda na: Ni i Kɔ́ɔ̄ɓē. Ādə̄ rāā yá̰á̰ ń ni-a̰a̰ kadə̄ i yá̰á̰ kə́ majə ní.
19Samuel tɔgə. Kɔ́ɔ̄ɓē i naā tə́ seneé ō, əya̰ najə̄ yān kógə̄ḿ adə̄ əsō nang tə́ aĺ ō. #3.19 Najə̄ yān əsō nang tə́ alé: Kumən na Kɔ́ɔ̄ɓē rāā yá̰a̰ malang ń ni-əda kə ta kūl̄ Samuel ní. 20I beé n de gə̄ malang kə́ dɔ nang kə́ Israel tə́ ń əla gír dɔ ɓē kə́ Dan tə́ bátə́ ugə̄ń Beer Seba ní gerə̄n̄neé kadə̄ Samuel i nge koō ta yā Kɔ́ɔ̄ɓē kə́ rɔ̄kum ní. 21Kɔ́ɔ̄ɓē na̰y kə̄ loo rāā tə́ kadə̄ Samuel a̰a̰n Silo. Tɔdɔ̄ Kɔ́ɔ̄ɓē ɔr̄ najə̄ seneé Silo, ba najə̄ ní rāā adə̄ kumən teē dɔ Kɔ́ɔ̄ɓē tə́.
Currently Selected:
1 SAMUEL 3: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.
