1 SAMUEL 29
29
Pilistin gə̄ tə̄ɓān̄ Dabid
1Pilistin gə̄ kánə̄n̄ ɓūtə̄ ngé rɔ̄ɔ̄ yādə́ gə̄ malang Apek, ba ngán Israel gə̄ ndin̄ i ta kəɓa man̄ ń ra ngɔr kə̄ Jisreel tə́ ní. 2Ngār kə́ bo gə̄ yā Pilistin gə̄ njə̄rān̄ kə gō naá kə deē yādə́ kə́ ɓú gə̄ ō kə́ dūbú gə̄ ō. Ba Dabid nin̄ kə deē yān gə̄ ń dānə̄n̄ mban̄g Akis ní njə̄rān̄ i ta ngóýdə́ tə́. 3Ngār yā Pilistin gə̄ dəjen̄ na ké Hebəro gə̄ ń toō i náā gə̄ wa. Anī Akis tél ədadə́ na: I Dabid kə́ nge kəla yā Saul mban̄g kə́ Israel tə́ ní ī-gern̄iī aĺ a? Ni-ndi seḿ asə ɓāl̄ kógə̄ḿ aláa jōó kɔ̄ɔ́ ɓá. Ba əla gír ndɔ̄ ń ni reēń rɔ̄ḿ tə́ bátə́ ɓōólaā ní m-ōō najə̄ kógə̄ḿ dɔn tə́ alé. 4Wōn̄g rāā ngār gə̄ yā Pilistin gə̄ kə Akis adə̄ ədanən̄ na: Ī-tə̄ɓā deē ń noō ādə̄ tél aw̄ gogə́ loo ń ɔ́jən kadə̄ ndi tū tə́ ní tə́. Ādə̄ aw̄ sejí ta rɔ̄ɔ̄ tə́ aĺ na sōgə́ tél tūr̄ rɔ̄n rɔ̄jí. Yá̰á̰ ń kadə̄ rāā tá kɔ́ɔ̄n a tél yā ndigənneé gogə́ ní i kəla de gə̄ yājí gə̄ ń toō jīn tə́ ngóy aĺ a? 5I Dabid ń noō n dəyá̰ gə̄ ənīn̄ pā ndām̄ kə rīneé ədan na Saul tɔ̄l̄ madə̄ ba̰ā̰n gə̄ i dūbú, ba Dabid tɔ̄l̄ i dūbú kutə ní aĺ a?
6Akis ɓāŕ Dabid ba ədan na: Tītə̄ ń Kɔ́ɔ̄ɓē ndiń kə kumneé noō, ḭ̄ i de kə́ sew, adə̄ nelə̄m̄ kadə̄ āw̄ seḿ rɔ̄ɔ̄ ń toō tə́. Tɔdɔ̄ əla gír ndɔ̄ ń ī-reēń rɔ̄ḿ tə́ bátə́ ɓōólaā ní, m-ōō najə̄ kógə̄ḿ kə́ majaĺ dɔí tə́ alé. Ba dan ń nel̄ ngār kə́ bo gə̄ seí aĺ ní, 7ī-tél āw̄ kə kem kə́ sɔl̄ lɔmɔɔ́. I beé n ā ī-rāań yá̰á̰ kə́ nel̄ ngār kə́ bo gə̄ yā Pilistin gə̄ aĺ alé ní. 8Dabid əda Akis na: Yá̰á̰ ń m̄-rāā ní i rí? Əla gír ndɔ̄ ń m-údəń kem kəla yāí tə́ bátə́ ɓōólaā i ní najə̄ rí kə́ majaĺ ń ōō dɔḿ tə́ á a ɔgə̄m̄ kaw̄ seí kaw̄ rɔ̄ɔ̄ madə̄ ba̰ā̰í gə̄ tə́ aĺ ní? 9Akis tél əda Dabid na: m̄-ger̄ kadə̄ najə̄ gətóo dɔí tə́. Rɔ̄kum, nelə̄m̄ seí tītə̄ kə́ ḭ̄ i de kə́ dɔ rā̰ tə́ yā Nə́ɓā beé. Banī ngār gə̄ yā Pilistin gə̄ ədamə̄n̄ na kə āw̄ sejí ta rɔ̄ɔ̄ tə́ alé. 10Adə̄ bírí ɓáa ḭ́ḭ dɔɔ́ kə gír looí ɓatə kə deē yā kɔ́ɔ̄í gə̄ ń reēn̄ seí ní. Ḭ́ḭī dɔɔ́ kə gír looí ɓatə, ba ré loo tīī unjə̄ anī āwī. 11Teē kə ndɔ̄ kə́ noō anī Dabid nin̄ kə deē yān gēé ḭḭn̄ dɔɔ́ kə gír looí ɓatə yā tél dɔ tə́ kaw̄ gogə́ dɔ nang yā Pilistin gə̄ tə́. Loo ń noō tə́ Pilistin gə̄ aw̄n̄ Jisreel.
Currently Selected:
1 SAMUEL 29: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.
