1 SAMUEL 24

Dabid mbātə́ tɔ̄l̄ Saul

1Dabid ndɔ́tə̄ loo ń noō tə́ kɔ̄ɔ́ ba aw̄ ndi mbo̰ō̰ mbal̄ gə̄ kə́ En Gedi tə́, loo kə́ loo kaw̄ tū tə́ tōr̄ ngá̰ý tə́. 2Dan ń Saul tél tə̄ɓā Pilistin gə̄ tə́ ní a, ədanən̄ na Dabid i dəla loo kə́ En Gedi tə́. 3Anī Saul gə̄rā go̰ rɔ̄ɔ̄ gə̄ dūbú mətá dan ngán Israel gə̄ tə́ malang, ba aw̄ sedə́ ndəle Dabid nin̄ kə deē yān gēé tə́, loo ń ra sɔɔ̄n̄ ta naā kə mbal̄ ń bə̄yā̰ kɔ̄r̄ gə̄ ran̄ tū tə́ ní tə́. 4Nin̄ ugə̄n̄ loo ń gong batə̄ gə̄ i tū tə́ kə gō kadə róbó ní tə́, anī Saul aw̄ ta wa tə́ kem bəlo mbal̄ kógə̄ḿ kə́ ra loo ní tə́ tə́. Ba Dabid nin̄ kə deē yān gēé ndin̄ gə́le bəlo mbal̄ ní tə́. 5Deē yā Dabid gə̄ ədanən̄ na: Ndɔ̄ ń Kɔ́ɔ̄ɓē ədaī najə̄n ní n toó. Ni-ədaī kété na ndɔ̄ kə́rēý tə́ anī n-a n-əla madə̄ ba̰ā̰í jīí tə́ kadə̄ ī-rāā yá̰á̰ ń kemií ndigə ní seneé. Anī Dabid ḭḭ dɔɔ́ ba gān̄g ta kūbə̄ yā Saul jəke. 6Dan ń Dabid rāā yá̰á̰ ń noō oy anī kemən əgan biting tām̄ kūbə̄ yā Saul ń ni-əja ta ní tə́. 7Ni-əda deē yān gə̄ na: Ré m̄-rāā yá̰á̰ kə́ tītə̄ ń noō kə kɔ́ɔ̄ḿ ń Kɔ́ɔ̄ɓē ur yibə̄ ngār dɔn tə́ ní anī, ādə̄ mā i yá̰á̰ kə́ to yḛr kum tām̄ yā Kɔ́ɔ̄ɓē tə́. M-ā m-ə́la jīḿ yā kɔdənneé alé, tɔdɔ̄ ni i deē ń Kɔ́ɔ̄ɓē ur yibə̄ ngār dɔn tə́ ní. 8Dabid ɔgə̄ deē yān gə̄ rɔ̄ Saul i kə najə̄ gə̄ ń noō. Saul ḭḭ dɔɔ́, ni teē kɔ̄ɔ́ kem bəlo mbalá ba un ta róbə yān.

9Gō tə́ anī Dabid ḭḭ dɔɔ́, teē bəlo mbalá kə̄ ndágá ba ɓāŕ gō Saul, əda na: Kɔ́ɔ̄ḿ, mban̄g. Anī Saul mbel a̰a̰ loo kumən kə̄ gogə́. Dabid tétə̄ kəjən nang tə́ ba ɔsə non nang tə́ no mban̄g tə́. 10Gō tə́ anī ni-əda Saul na: I tām̄ rí tə́ á ōō najə̄ kɔr̄ de gə̄ ń a ədan̄ na Dabid na sāā kadə̄ yá̰á̰ kə́ to kum kaȳ aĺ əsō dɔí tə́ ní? 11Ḭ̄kɔ́ á̰a̰ā̰ kə kumií ɓōólaā kadə̄ Kɔ́ɔ̄ɓē əlaī jīḿ tə́ kem bəlo mbal̄ ń toō tə́. Deē yāḿ gə̄ mēr̄mə̄n̄ tɔ̄lī, banī kumḿ o̰o̰m̄ tām̄ yāí tə́ adə̄ m-ə́da na: M-ā m-ə́la jīḿ yā kɔdəń rɔ̄ kɔ́ɔ̄ḿ alé, tɔdɔ̄ ni i deē ń Kɔ́ɔ̄ɓē ur yibə̄ ngār dɔn tə́ ní. 12Bɔbə́ḿ, á̰a̰ā̰, ta kūbə̄ yāí n to jīḿ tə́ toō. Dan ń m̄-gān̄g ta kūbə̄ yāí ba m̄-tɔ̄lī aĺ ní, asə kadə̄ ī-ger̄ na m-ə́hɔī kemḿ tə́ aĺ ō, m̄-gír̄ kənī wúȳ jīí tə́ aĺ ō, m̄-rāā majaĺ seí aĺ ō. Ba i ḭ̄ n ā ī-ndəlem̄ patə patə yā tɔ̄lə̄m̄ ní. 13Ādə̄ Kɔ́ɔ̄ɓē gān̄g sarya kə́ dɔ dáńjí tə́ seí. Ādə̄ Kɔ́ɔ̄ɓē dal ba̰ā̰ḿ dɔí tə́. Ba mā m-ā m-ə́la jīḿ yā kɔdiīneé alé. 14Tītə̄ ń kāgə̄ najə̄ kə́ jóo ədań na kem ndul əhɔ i ngé kem ndul gə̄ ní, m-ā m-ə́la jīḿ yā kɔdiīneé alé. 15Mban̄g kə́ Israel tə́ ā ī-rɔ̄ɔ̄ i náā? Ā ī-ngɔ̄də̄ i náā? Ā ī-ngɔ̄də̄ i bísə́ kə́ nger əsan a? Ā ī-ndəle i ngáɓer kə̄njá a? 16Kɔ́ɔ̄ɓē a tél nge gān̄g sarya. Ādə̄ ni-gān̄g sarya kə́ dɔjí jḭḭ seí jōó tə́. Ādə̄ əndā ma̰ȳ najə̄ yāḿ ō ī-rɔ̄ɔ̄ dɔḿ tə́ ō ba ɔrə̄m̄ kɔ̄ɔ́ jīí tə́.

17Dan ń Dabid ɔr̄ najə̄ oy anī, Saul dəjen na: Ngōnə̄ḿ Dabid, i īkɔ́ n ɔ̄r̄ najə̄ seḿ toō a? Gō tə́ anī Saul mbutə kə̄ nōō tə́, 18ba əda Dabid na: Ḭ̄ i de kə́ súmūú tɔȳm̄ mā, tām̄ ī-rāā majə seḿ ba mā m̄-rāāī majaĺ. 19Ɓōólaā ɔ́jəḿ kem majə yāí kə̄ ndágá, tɔdɔ̄ Kɔ́ɔ̄ɓē əlam̄ jīí tə́ ba ī-mbātə́ tɔ̄lə̄m̄. 20Ré deē ənge madə̄ ba̰ā̰n róbó anī a əya̰n kadə̄ aw̄ loo yān karī a? Yá̰á̰ ń ī-rāā seḿ ɓōólaā toó, adə̄ Kɔ́ɔ̄ɓē əndā njaí tāmən tə́. 21Ngɔlaā ní m̄-ger̄ tā: I ḭ̄ n ā ī-ndi mban̄g ō ā ó̰o̰ ɓē dɔ nang kə́ Israel tə́ ō ní. De kə́ rang a taā ko̰o̰ ɓē ní jīí tə́ alé. 22Adə̄ ī-túbə ādə̄m̄ kə rī Kɔ́ɔ̄ɓēé kadə̄ ā ī-tɔ̄l̄ gír kaaḿ kɔ̄ɔ́ gotəḿ tə́ aĺ ō ā ī-tɔ̄l̄ rīḿ kɔ̄ɔ́ dan rī de kə́ kem ndogə̄ yā bɔbə́ḿ tə́ gə̄ aĺ ō. 23Dabid túbə adə̄ Saul. Gō tə́ anī Saul tél dɔ tə́ aw̄ ɓēé, ba Dabid nin̄ kə deē yān gēé tél aw̄n̄ gogə́ loo ɓɔ́ rɔ̄ yādə́ tə́.

Currently Selected:

1 SAMUEL 24: SARDC

Highlight

Copy

Compare