1 SAMUEL 15
15
Nə́ɓā mbātə́ Saul
1Samuel əda Saul na: I mā n Kɔ́ɔ̄ɓē əlam̄ adə̄ m-úr yibə̄ dɔí tə́ m-ə̄ndāīneé mban̄g dɔ gír deē yān gə̄ ń i Israel gə̄ ní tə́. Adə̄ ōō najə̄ ń Kɔ́ɔ̄ɓē əlam̄ kədaí tə́ ní. 2Najə̄ ń Kɔ́ɔ̄ɓē kə́ bo kə́ tɔ́gən i ngá̰ý ɔr̄ ní n toó: Yá̰á̰ ń Amalek rāā kə Israel gēé dan ń teēn̄neé kɔ̄ɔ́ kem ɓē kə́ Ejiptə tə́ ní, m-ā m̄-dəjen gír. Ni-ɔgə̄ Israel gə̄ mān̄. 3Ngɔlaā ní āw̄ ī-rɔ̄ɔ̄n. Ī-nujə yá̰a̰ yān gə̄ sák sák kɔ̄ɔ́ malang kanjə̄ kəya̰ yá̰á̰ kógə̄ḿ. Ī-tɔ̄l̄ yá̰a̰ malang ń ndi kə kumuú ní kɔ̄ɔ́, ī-tɔ̄l̄ dəngam gə̄ ō, dəyá̰ gə̄ ō, ngán gə̄ ō, ngán kə́ ta mba tə́ gə̄ ō, man̄g gə̄ ō, batə̄ gə̄ ō, jámbal gə̄ ō, kərō gə̄ ō. 4Saul ɓāŕ ngé rɔ̄ɔ̄ yān gə̄ ɔsə dɔdə́ naā tə́, ba tə́da kutədə́ kem ɓē kə́ Telaim tə́. Ngé njə̄rā kə njadə́ gə̄ i dūbú ɓú jōó ō, deē yā Juda gə̄ i dūbú kutə ō. 5Saul aw̄ ugə̄ kadə ɓē yā Amalek gə̄ tə́ anī ndi kem gúŕ kə́rēý tə́ a umə̄ń loo. 6Ni-əda Keni gə̄ na: Ī-teēī kɔ̄ɔ́ dan Amalek gə̄ tə́ na sōgə́ jīsí a ɓoo naā, tɔdɔ̄ sḭḭ̄ ī-rāāī kem majə kə ngán Israel gēé dan ń teēnneé kɔ̄ɔ́ kem ɓē kə́ Ejiptə tə́ ní. Adə̄ Keni gə̄ ɔrə̄n̄ rɔ̄də́ kɔ̄ɔ́ dan Amalek gə̄ tə́. 7Saul rɔ̄ɔ̄ Amalek gə̄ Habila bátə́ aw̄ ugə̄ sedə́ ta ɓē kə́ Sur ń ra sɔɔ̄ ta Ejiptə ní tə́. 8Ni-tɔ̄l̄ Amalek gə̄ malang kɔ̄ɔ́ kə kəyā kaskaraá, ba i mban̄g yādə́ Agag ngóy n əhɔn kə kumneé ní. 9Saul nin̄ kə ngán Israel gēé əya̰n̄ Agag ō, yá̰a̰ kul̄ kə́ majə majə gə̄ ō. Nin̄ əya̰n̄ man̄g gə̄ ō, batə̄ gə̄ ō, bə̄yā̰ gə̄ ō, yá̰a̰ kul̄ kə́ bo majə gə̄ ō, ngán batə̄ gə̄ ō. I yá̰a̰ kul̄ kə́ majə ngá̰ý gə̄ n nin̄ əya̰n̄də́ kə kumuú ní. Ba i ngé kə́ to yá̰a̰ aĺ gə̄ ō, majən̄ aĺ ō n tɔ̄lə̄n̄də́ kɔ̄ɔ́ malang tām̄ yā Kɔ́ɔ̄ɓē tə́ ní. 10Tā anī Kɔ́ɔ̄ɓē əda Samuel na: 11m̄-ndə̄ngā rɔ̄ḿ tām̄ kəndā ń m-ə̄ndā Saul mban̄g tə́ ní. Tɔdɔ̄ ni tūr̄ gidən kɔ̄ɔ́ taḿ tə́ ō, rāā yá̰a̰ gə̄ ń m-ə́dan ní aĺ ō. Najə̄ ń noō tōr̄ kem Samuel ngá̰ý, adə̄ ni nōō kə̄ dɔ Kɔ́ɔ̄ɓē tə́ ndɔ̄ɔ́ bátə́ loo tīī dɔn tə́. 12Ni-teē kə gír looí ɓatə aw̄ kənge Saul tə́, anī de gə̄ ədanən̄ na Saul na aw̄ Karmel kudə mbal̄ kə́ kadə̄ əgań kem de gə̄ dɔn tə́ tə́, ba na tél dɔ tə́ na aw̄ Gilgal kɔ̄ɔ́. 13Dan ń Samuel aw̄ ugə̄ rɔ̄ Saul tə́ anī Saul ədan na: Ādə̄ Kɔ́ɔ̄ɓē rāā majə seí. Yá̰á̰ ń Kɔ́ɔ̄ɓē ədam̄ ní m̄-rāā. 14Samuel dəje Saul na: I rí gə̄ n a nōōn̄ ta mbīḿ tə́ tītə̄ batə̄ gə̄ ō, mang gə̄ ō noó? Saul əda na: 15Ngé rɔ̄ gə̄ əya̰n̄ yá̰a̰ kul̄ kə́ majə majə gə̄ yā Amalek gə̄ kə kumuú ba reēn̄neé laā i yā tun̄ kadə̄ Kɔ́ɔ̄ɓē Nə́ɓā yāí. Ba gotə gə̄ tá jə-tɔ̄l̄də́ kɔ̄ɔ́ malang. 16Samuel əda Saul na: Asiī najə̄. Ādə̄ m-ə́daī yá̰á̰ ń Kɔ́ɔ̄ɓē ədam̄ ndɔ̄ɔ́ laā ní. Saul əda na: Ə́da tā. 17Anī Samuel əda na: Ḭ̄ á̰a̰ rōí i yá̰a̰ aĺ ta kumií īkɔ́ tə́ ɓá tā, ba i ḭ̄ n i dɔ gír ɓē gə̄ yā ngán Israel gə̄ tə́ ní aĺ a? Kɔ́ɔ̄ɓē ur yibə̄ dɔí tə́ kadə̄ ḭ̄ i mban̄g yā ngán Israel gə̄. 18Kɔ́ɔ̄ɓē əlaī, ədaī na kə āw̄ kə ī-rɔ̄ɔ̄ Amalek gə̄ ń i ngé rāā majaĺ gə̄ ní, kə ī-tɔ̄l̄də́ kɔ̄ɔ́ malang. 19Ba i tām̄ rí tə́ á ḭ̄ ī-rāā yá̰á̰ ń ni ədaī ní aĺ ní? Údə dɔ yá̰a̰ kənge kə́ kəhɔ ta rɔ̄ɔ̄ tə́ ɔ́y, adə̄ ī-tél nge rāā majaĺ ta kum Kɔ́ɔ̄ɓē tə́ i tām̄ rí tə́? 20Saul əda Samuel na: Mā m̄-rāā yá̰á̰ ń Kɔ́ɔ̄ɓē ədam̄ ní tām̄ m-āw̄ rɔ̄ɔ̄ tə́ loo ń Kɔ́ɔ̄ɓē əlam̄ tū tə́ ní ō, m-āw̄ m̄-reē kə Agag mban̄g yā Amalek gə̄ ō, m̄-tɔ̄l̄ Amalek gə̄ kɔ̄ɔ́ malang ō. 21Ba yá̰a̰ kul̄ gə̄ ń i kə́ yā tɔ̄l̄də́ kɔ̄ɔ́ ní, ré ngé rɔ̄ɔ̄ yāḿ gə̄ gə̄rān̄ kə́ majə gə̄ anī i yā tɔ̄l̄də́ Gilgal laā ba tun̄ kadə̄ Kɔ́ɔ̄ɓē yāí.
22Banī Samuel əda na: Dā̰ gə̄ kə́ róō horoó ō, yá̰á̰ kə́ tun̄ gə̄ ō ní, nel̄ Kɔ́ɔ̄ɓē tītə̄ ń koō tan nelə̄nneé ní a? Yḛtə alé. Koō ta Kɔ́ɔ̄ɓē majə tɔȳ yá̰á̰ kə́ tun̄ kadən̄ ō, sɔl̄ dɔ majə tɔȳ yibə̄ bal batə̄ gə̄ ō. 23Tɔdɔ̄ mbātə́ ndū Kɔ́ɔ̄ɓē i yá̰á̰ kə́ majaĺ ngá̰ý tītə̄ rāā kɔdə̄ sāā ō, rāā dɔ ngan̄g i yá̰á̰ kə́ majaĺ ngá̰ý tītə̄ rāā ɓesə̄ ō. Adə̄ dan ń ḭ̄ ī-mbātə́ najə̄ ta Kɔ́ɔ̄ɓē tə́ ɓá ní Kɔ́ɔ̄ɓē mbātíī kɔ̄ɔ́ ō. Adə̄ ḭ̄ i mban̄g to̰ alé. 24Saul əda Samuel na: m̄-rāā majaĺ, tām̄ m̄-rāā yá̰á̰ ń Kɔ́ɔ̄ɓē ədam̄ ní aĺ ō, m̄-mbātə́ najə̄ gə̄ ń ḭ̄ ɔ̄r̄ seḿ ní ō. Tɔdɔ̄ m̄-ɓōĺ i de gə̄, adə̄ m̄-rāā i yá̰á̰ ń kemdə́ ndigə ní. 25Ń-toō ní m̄-rāāī ɓɔ́, ə́ya̰ gō majaĺ yāḿ ń noō kɔ̄ɔ́, ba ī-tél seḿ ādə̄ m-āw̄ m-ɔ́sə noḿ nang tə́ no Kɔ́ɔ̄ɓē tə́. 26Banī Samuel ədan na: M-ā m̄-tél yā kaw̄ seí alé, tɔdɔ̄ ḭ̄ ī-mbātə́ rāā yá̰á̰ ń Kɔ́ɔ̄ɓē ɔjiī ní, Kɔ́ɔ̄ɓē mbātíī kɔ̄ɔ́, adə̄ ḭ̄ i mban̄g yā ngán Israel gə̄ to̰ alé.
27Ba dan ń Samuel tūr̄ rɔ̄n yā kaw̄ anī, Saul əhɔ ta kūbə̄ kə́ rɔ̄n tə́ adə̄ ta kūbə̄ ní gān̄g kə̄ jīn tə́. 28Anī Samuel əda Saul na: Ɓōólaā Kɔ́ɔ̄ɓē rāā adə̄ gír ndií mban̄g dɔ ngán Israel gə̄ tə́ gān̄g kɔ̄ɔ́, ba téləń adə̄ madí kə́ rang kə́ majə tɔyī. 29Kɔ́ɔ̄ɓē ń i tɔ́gə yā ngán Israel gə̄ ní, a sor̄ aĺ ō, a tūr̄ ndūn aĺ ō, tɔdɔ̄ ni i deē á a tūr̄ ndūn alé. 30Saul tél əda ɓáý to̰ na: m̄-rāā majaĺ rɔ̄kum. Ba ń-toō ní m̄-rāāī ɓɔ́, ī-rɔȳm̄ ta kum kum kɔɔ̄ gə̄ yā deē yāḿ gə̄ tə́ ō, ta kum ngán Israel gə̄ tə́ ō. Ī-tél seḿ ādə̄ m-āw̄ m-ɔ́sə noḿ kə̄ nang tə́ no Kɔ́ɔ̄ɓē yāí tə́. 31Samuel tél kə̄ gō Saul tə́, adə̄ Saul aw̄ ɔsə non nang tə́ no Kɔ́ɔ̄ɓē tə́. 32Gō tə́ anī Samuel əda na: Ī-reēī kə Agag ń i mban̄g yā Amalek gə̄ ní ādə̄mī. Agag aw̄ rɔ̄ Samuel tə́ kə rɔ̄nelēé. Ɔjəń na n-ā n-oy to̰ alé. 33Banī Samuel əda Agag na: Kaskar yāí rāā adə̄ dəyá̰ gə̄ nalən̄ ngáńdə́ gə̄ ní, kó̰ó̰í a nal̄ ngōnən dan dəyá̰ madə̄n gə̄ tə́ ō. Loo ń noō tə́ Samuel tɔ̄l̄ Agag ta kum Kɔ́ɔ̄ɓē tə́ Gilgal. 34Samuel tél aw̄ Rama, ba Saul tél aw̄ gogə́ ɓēé looneé kem ɓē kə́ Gibea yā Saul tə́. 35Samuel aw̄ ka̰a̰ Saul tə́ to̰ aĺ bátə́ oyń. Ni a nōō i Saul, tɔdɔ̄ Kɔ́ɔ̄ɓē ndə̄ngā rɔ̄n najə̄ kəndā ń n-əndā Saul mban̄g dɔ ngán Israel gə̄ tə́ ní.
Currently Selected:
1 SAMUEL 15: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.
