1 KORḚNTƏ 8
8
Najə̄ kə́ dɔ dā̰ gə̄ ń tɔ̄lə̄n̄ ba tun̄ adə̄n̄ ɓesə̄ gə̄ tə́ ní
1Ń toō ɓáa ādə̄ j-əndāī ma̰ȳ najə̄ yā dā̰ gə̄ ń tɔ̄lə̄n̄ ba tun̄ adə̄n̄ ɓesə̄ gə̄ ní.
Sḭḭ̄ ə́daī na jḭḭ̄ malang na i ngé ger̄ yá̰a̰ gə̄. Nge ń noō i najə̄ kə́ rɔ̄kum. Ba ger̄ yá̰a̰ i yá̰á̰ kə́ a rāā kadə̄ deē a ɔjə rɔ̄n, banī tár i yá̰á̰ kə́ a rāā kə deé kadə̄ aw̄ kum kə̄ kété. 2Ré de kə́rēý gír̄ kemən tə́ kadə̄ ni na i de kə́ ger̄ yá̰a̰ anī, ni-ger̄ yá̰a̰ tītə̄ ń sɔɔ̄ kadə̄ gerə̄ń ní aĺ ɓáý. 3Ba ré deē táŕ Nə́ɓā anī, Nə́ɓā ger̄ kɔ́ɔ̄.
4Najə̄ ń ī-dəjeī ní n toó, ī-dəjeī na ké ásiī kəsa dā̰ gə̄ ń tɔ̄lə̄n̄ ba tun̄ adə̄n̄ ɓesə̄ gə̄ ní wa. Jə-gerī kadə̄ ɓesə̄ i yá̰á̰ kə́ ɔsə kum gotə yá̰á̰ kə́ to rɔ̄kum dɔ nang tə́ laā aĺ ō, jə-gerī kadə̄ Nə́ɓā i kógə̄ḿ beē ngóy ō. 5Ká ré de gə̄ ədan̄ na nə́ɓā gə̄ na ndin̄ dɔ rā̰ tə́ noō, aláa na ndin̄ dɔ nang tə́ laā gə̄gē anī, nə́ɓā gə̄ i ngá̰ý rɔ̄kum ō, kɔ́ɔ̄ ɓē gə̄ i ngá̰ý rɔ̄kum ō. 6Banī tām̄ yājí tə́ ɓáa Nə́ɓā i kógə̄ḿ beē. Ni i Bɔbə̄jí ń yá̰a̰ malang teē i rɔ̄n tə́ ō, j-a j-awī i kə̄ rɔ̄n tə́ ō ní. Kɔ́ɔ̄ɓē i kógə̄ḿ beē ngóy, i Jeju Kərist ń yá̰a̰ gə̄ malang teēn̄ i kə kūl̄neé ō, jə-ndiī i kə kūl̄neé ō ní.
7Banī i de gə̄ malang n gerə̄n najə̄ kə́ rɔ̄kum ń toō ní alé. Ngé kə́rēý gə̄ ní ɓesə̄ ɔr̄ kemdə́ tə́ alé. Adə̄ ɓōólaā gə̄gē ní nin̄-əsan̄ dā̰ gə̄ ń de gə̄ tun̄ adə̄n̄ ɓesə̄ gə̄ ní i tītə̄ kə́ i nin̄ n tun̄ adə̄n̄ ɓesə̄ gə̄ ní beē. Yá̰á̰ ń kemdə́ ɔjədə́ ní kumən unjə̄ alé, adə̄ kemdə́ ní téĺ yá̰á̰ kə́ majaĺ tákə̄. 8I yá̰a̰ kəsa n a aw̄ sejí rɔ̄ Nə́ɓā tə́ ngɔr ní alé. Ré j-əsaī yá̰a̰ aĺ anī, j-a jə-tḭ̄ḭ̄ ta yá̰á̰ kógə̄ḿ aĺ ō, ré j-əsaī yá̰a̰ anī j-a j-əngeī yá̰á̰ kógə̄ḿ aĺ ō.
9Ɓá tā ba á̰a̰ī majə na sōgə́ rāā yá̰á̰ kə́ kɔ́ɔ̄ rɔ̄ tə́ yāsí tél bə̄dē kə́ kadə̄ əga nja ngé kə́ tɔ́gə́də́ gətóo gə̄ kadə̄ əsōn̄ kum majaĺ tə́. 10Tɔdɔ̄ ré de kə́ tɔ́gən gətóo a̰a̰ī ḭ̄ de kə́ ger̄ yá̰a̰ loo kəsa yá̰á̰ tə́ kem kújə ɓesə̄ tə́ anī, ni a ənge tɔ́gə kə ta kūlīí yā kəsań dā̰ kə́ tun̄ kadə̄ ɓesə̄ gə̄ aĺ a? 11Adə̄ nge tɔ́gə gətóó ń i ngōkó̰ó̰í kə́ Kərist oy tām̄ yān tə́ ní, a udə kɔ̄ɔ́ sɔɔ̄ń ger̄ yá̰a̰ yāí. 12Dan ń ā ī-rāāī majaĺ kə́ beē kə ngákó̰ó̰sí kə́ tɔ́gə́də́ gətóo gə̄ ō, ā ādīdə́ do ngarān̄g kemdə́ tə́ ō ní, i Kərist n ī-rāāī yá̰á̰ kə́ majaĺ seneé ní. 13I tām̄ najə̄ ń toō tə́ n ré yá̰a̰ kəsa i yá̰á̰ kə́ a rāā kadə̄ ngōkó̰ó̰ḿ əsō kum majaĺ tə́ anī, m-ā m-ə́sa dā̰ to̰ aĺ bátə́ kə̄ noḿ tə́ ní, na sōgə́ m̄-rāā adə̄ ngōkó̰ó̰ḿ əsō.
Currently Selected:
1 KORḚNTƏ 8: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.
