1 KORḚNTƏ 2
2
Kɔjə najə̄ yā Kərist kə́ əndanən̄ kə máyá̰ tū kāgə̄ kə́ dēsə́ tə́
1Ngákó̰ó̰ḿ gə̄, dan ń mā i loosí ní, m-ɔ́jə́sí yá̰á̰ kə́ to loo mundə̄ tə́ yā Nə́ɓā i kə najə̄ kə́ loo ger̄ kumən ngan̄g ngá̰ý, aláa i kə kum kedēé alé. 2Tɔdɔ̄ m̄-sāā ger̄ yá̰á̰ kə́ rang dan ń m̄-ndiń sesí ní alé, ba i Jeju Kərist ngóy, nge ń əndanən̄ kə máyá̰ tū kāgə̄ kə́ dēsə́ tə́ ní. 3Adə̄ dan ń m̄-ra nosí tə́ ní, tɔ́gə́ḿ gətóo ō, m̄-ɓōĺ ō, m̄-ndebə ō. 4Yá̰á̰ ń m̄-ndóō de gə̄ ō, najə̄ ń m-ɔ́jə de gə̄ ō ní, i kə gō kum kedə̄ yā deé alé, banī i kə tɔ́gə yā Ndíĺ Nə́ɓā kə́ ɔjə kə̄ ndágá kadə̄ najə̄ yāḿ i najə̄ kə́ rɔ̄kum. 5Adə̄ taā kem yāsí ra i dɔ kum kedə̄ yā deē ndul gə̄ tə́ alé, banī i dɔ tɔ́gə yā Nə́ɓā tə́.
Kum kedə̄ yā Nə́ɓā
6Ɓá tā ba yá̰á̰ ń jə-ndóō de gə̄ yā Kərist kə́ kumdə́ ɔɔ̄ kɔ̄ɔ́ gə̄ ní, i kum kedə̄. Ba i kum kedə̄ kə́ dɔ nang tə́ laā aĺ ō, i kum kedə̄ yā ngār gə̄ kə́ dɔ nang tə́ laā gə̄ ń a gətóon̄ kɔ̄ɔ́ ní aĺ ō. 7I kum kedə̄ yā Nə́ɓā kə́ to loo mundə̄ tə́, kə́ ɓɔ̄ɔ̄n̄ dɔ kɔ̄ɔ́, ba Nə́ɓā əndā dɔ danaá tām̄ kɔsə gɔn yājí tə́ kété pá tá kadə̄ ni-əndā dɔ rā̰ ō dɔ nang ō ɓáý ní n jə-ndóō de gə̄ ní. 8Deē kógə̄ḿ kə́ dan ngār gə̄ kə́ dɔ nang tə́ laā kə́ ger̄ kum kedə̄ ngeé ń toō gətóo. Ré nin̄-gerə̄n̄ i mbée anī, Kɔ́ɔ̄ɓē ń kɔsə gɔn i yān ní, a əndanən̄ kə máyá̰ tū kāgə̄ kə́ dēsə́ tə́ alé. 9Banī tītə̄ ń makətūbə̄ yā Nə́ɓā ədań ní, ndangən̄ na:
I yá̰á̰ kə́ kum deē a̰ā̰ aĺ ō, mbī deē oō aĺ ō, deē gír̄ dɔ tə́ aĺ ō n
Nə́ɓā əndā dɔ danaá tām̄ yā ngé gə̄ ń tárnən̄ tə́ ní.
10Tá i jḭḭ̄ n Nə́ɓā teē kumjí dɔ tə́ kə ta kūl̄ Ndíĺ kə́ Táĺ ní. Tɔdɔ̄ Ndíĺ asə kəndā ma̰ȳ yá̰a̰ malang, ká i yá̰á̰ kə́ Nə́ɓā núm̄ kə́ to loo mundə̄ tə́ ɓáý gə̄gē, ni-asə kəndā ma̰ȳ. 11I náā kə́ dɔ dán de gə̄ tə́ n ger̄ yá̰á̰ kə́ kem deē tə́ ní? I ndíl deē ń i kemən tə́ ní ngóy aĺ a? I beé ō, deē kógə̄ḿ kə́ ger̄ yá̰á̰ kə́ kem Nə́ɓā tə́ gətóo, i Ndíĺ Nə́ɓā ngóy. 12Banī jḭḭ̄ j-əngeī i ndíĺ kə́ dɔ nang tə́ laā alé, ba i Ndíĺ kə́ ḭḭ rɔ̄ Nə́ɓā tə́, yā kadə̄ jə-gerīneé yá̰á̰ gə̄ ń Nə́ɓā adə̄jí kə gō kem ndaa yānneé ní. 13Ba j-ɔr̄ najə̄ yá̰a̰ gə̄ ní i kə najə̄ ń ngé kum kedə̄ gə̄ ndóōn̄jí ní alé, banī i kə najə̄ ń Ndíl Nə́ɓā ndóōjí ní. Adə̄ i tītə̄ ń noō n j-ɔjəń ngé kənge Ndíl ngeé ń toō gə̄ najə̄ kə́ rɔ̄kum gə̄ yā Ndíĺ ní#2.13 Ngé kənge Ndíl: Kum najə̄ ń toō ní ngé kə́rēý gə̄ tūrə̄n̄ yādə́ ədan̄ na: I kə najə̄ gə̄ ń Ndíl ngeé ń toō reēń dɔjí tə́ ní..
14Deē ń aw̄ kə Ndíl Nə́ɓāá aĺ ní, a asə ndigə najə̄ kə́ rɔ̄kum gə̄ kə́ ḭḭn̄ rɔ̄ Ndíĺ ní tə́ alé: Najə̄ gə̄ ní i najə̄ kə́ to mbóo ta kumən ni tə́. Ni-asə ger̄ kumdə́ alé, tɔdɔ̄ deē a asə kəda najə̄ dɔ yá̰á̰ tə́ i kə ta kūl̄ Ndíl. 15De kə́ nge Ndíl Nə́ɓā asə kəda najə̄ dɔ yá̰a̰ gə̄ tə́ malang, banī deē kógə̄ḿ kə́ a asə kəda najə̄ dɔn ni tə́ gətóo. 16Tām̄ i kə́ ndang kem makətūbə̄ yā Nə́ɓā tə́ na:
I náā n ger̄ gír̄ yā Kɔ́ɔ̄ɓē ní?
I náā n i nge kadə̄n kɔjə ní?
Banī jḭḭ̄ j-awī kə gír̄ yā Kərist kemjí tə́.
Currently Selected:
1 KORḚNTƏ 2: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.