1 KORḚNTƏ 10

Najə̄ kə́ dɔ ɓesə̄ gə̄ tə́

1Ngákó̰ó̰ḿ gə̄, m̄-gḛy kadə̄ ī-ndiī kanjə̄ ger̄ yá̰á̰ ń rāā kaají gə̄ kété ní alé. Nin̄ malang ní ndin̄ gír kil̄ man̄ tə́ ō, gāngə̄n̄ bā bo ō. 2Adə̄ rāān̄də́ batém malang kum kil̄ man̄ tə́ ō, kum bā bo tə́ ō, dan ń nin̄-ɓoon̄ naā kə Moijə ní. 3Nin̄ malang ní əsan̄ yá̰a̰ yā Nə́ɓā kə́ kógə̄ḿ beē ō, 4a̰ȳn̄ man̄ yā Nə́ɓā kə́ kógə̄ḿ beē ō. Tɔdɔ̄ mbal̄ yā Nə́ɓā ń un gōdə́ ní nin̄-a̰ȳn̄ man̄ kə́ teē tū tə́, ba mbal̄ ní i Kərist. 5Ɓá tā ba ngá̰ý gə̄ dandə́ tə́ ní nel̄ Nə́ɓā sedə́ alé. I tām̄ najə̄ ń noō tə́ n nīńdə́ to kem dəla loo tə́ ní.

6Yá̰a̰ gə̄ ń noō ń rāān̄ yá̰á̰ ní, i yā kadə̄ ré jḭḭ̄ j-a̰a̰ī ɓáa kadə̄ ngur yá̰á̰ kə́ majaĺ rāājí tītə̄ yādə́ alé. 7Ī-lōōī rāā ɓesə̄ tītə̄ ń ngé kə́rēý gə̄ dáńdə́ tə́ rāān̄neé ní. Tɔdɔ̄ ndangən̄ kem makətūbə̄ yā Nə́ɓā tə́ na:

Ngán Israel gə̄ na ndin̄ nang tə́ əsan̄ yá̰a̰ ō, a̰ȳn̄ ō, ba gō tə́ ɓáa na ḭḭn̄ dɔɔ́ na ndāmə̄n̄ naā#10.7 Ndāmə̄n̄ naā: I ndām̄ kə́ tām̄ yā ɓesə̄ tə́, á̰a̰ī Teē 32.6.

8Jə-lōōī sāā naā loo kaya tə́ tītə̄ ń ngé kə́rēý gə̄ dáńdə́ tə́ rāān̄neé, adə̄ de gə̄ dūbú kutə jōó gidə i mətá oyn̄neé ndɔ̄ kógə̄ḿ beē ní. 9Jə-lōōī nāā Kɔ́ɔ̄ɓē, tītə̄ ń ngé kə́rēý gə̄ dáńdə́ tə́ rāān̄neé, adə̄ lī gə̄ tṵ́ṵ̄n̄də́ adə̄ oyn̄ ní. 10Ī-lōōī yṵ́r̄ najə̄, tītə̄ ń ngé kə́rēý gə̄ dandə́ tə́ yṵ́rə̄n̄neé, adə̄ nin̄-udən̄ kɔ̄ɔ́ jī nge kəla yā Nə́ɓā kə́ nge tɔ̄l̄ yo tə́ ní.

11Yá̰a̰ gə̄ ń noō malang teēn̄ dɔdə́ nin̄ tə́ i yā kɔjəń de kə́ rang gə̄ yá̰a̰ kadə̄ gerə̄n̄. Ba ndangən̄də́ kem makətūbūú i yā tāańjí jḭḭ̄ ń j-ugī ta ngóy ndɔ̄ gə̄ tə́ ní.

12I beé ní, deē ń gír̄ kadə̄ ni i de kə́ ra dɔɔ́ anī, ādə̄ a̰a̰ rɔ̄n majə na sōgə́ əsō. 13Yá̰a̰ nāā gə̄ malang ń nāān̄neésí ní, i yá̰a̰ nāā gə̄ kə́ asən̄ gō tɔ́gə deē tə́. Nə́ɓā i de kə́ nge ra dɔ ndūn tə́, adə̄ ni a əya̰ kadə̄ nāā tɔȳ tɔ́gə́sí alé. Ni a adə̄sí tɔ́gə́ kə́ kadə̄ ī-tə́gāīneé tasí ta yá̰a̰ nāā tə́ ō, a rāā ta róbə kə́ kadə̄ ī-teēīneé kɔ̄ɔ́ ta tə́ ō.

14Adə̄ kó tár yāḿ gə̄, ī-lōōī rāā ɓesə̄. 15M-ɔ̄r̄ najə̄ sesí i tītə̄ kə́ m-ɔ̄r̄ i kə de kə́ ger̄ yá̰a̰ gēé beē. Yá̰á̰ ń m-ə́dá ní sḭḭ̄ kɔ́ gə̄ ə̄ndāī ma̰ȳ. 16Ī-gírī dɔ kópə tɔ́r̄ ta ń jə-ndadə̄ j-adī Nə́ɓā tāmən tə́ ní tə́: Dan ń j-a̰yī yá̰á̰ kə́ kemeé ní, ɓoojí naā tə́ kə mósə Kərist aĺ a? Tá mápá ń jə-gángī naā tə́ ní: Dan ń j-əsaī ní ɓoojí naā tə́ kə rɔ̄ Kərist aĺ a? 17Tītə̄ ń mápa i kógə̄ḿ beē ní, jḭḭ̄ ń i ngá̰ý ní, jḭḭ̄ i rɔ̄ kə́ kógə̄ḿ beē ō, tām̄ jḭḭ̄ malang j-əsaī i mápá kə́ kógə̄ḿ beē.

18Á̰a̰ī ngán Israel gə̄: Ngé gə̄ ń əsan̄ dā̰ gə̄ ń tɔ̄lə̄n̄ ba tunə̄n̄ ní, Nə́ɓā ń ɔrə̄n̄ kam̄ loo tun̄ yá̰a̰ kə rīneé ní, nin̄-ɓoon̄ naā seneé. 19Kum yá̰á̰ ń m̄-sāā kəda ní na i rí? m̄-sāā i kəda na dā̰ ń tɔ̄l̄ adə̄n̄ ɓesə̄ ní i yá̰á̰ kə́rēý a? Aké m̄-sāā i kəda na ɓesə̄ i yá̰á̰ kə́rēý a? 20Yá̰á̰ ń m̄-sāā kəda ní n noō alé! M-ə́da na yá̰á̰ ń de kə́ ndágá gə̄ tunə̄n̄ ní, tun̄ adə̄n̄ i ndíĺ kə́ majaĺ gə̄ ba i Nə́ɓā alé. m̄-gḛy kadə̄ ī-ɓooī naā kə ndíĺ kə́ majaĺ gə̄ alé. 21Sḭḭ̄ ásiī ka̰ȳ yá̰á̰ kə́ kem kópə yā Kɔ́ɔ̄ɓē tə́ ō, yá̰á̰ kə́ kem kópə yā ndíĺ kə́ majaĺ gə̄ tə́ ō dɔ naā tə́ alé. Sḭḭ̄ ásiī kəsa yá̰a̰ ta kār̄ yā Kɔ́ɔ̄ɓē tə́ ō, ta kār̄ yā ndíĺ kə́ majaĺ gə̄ tə́ ō dɔ naā tə́ alé. 22Aké jə-gḛyī i kadə̄ wōn̄g rāā Kɔ́ɔ̄ɓē a? Jḭḭ̄ jə-ngangī ngá̰ý jə-tɔȳniī a?

Ī-rāāī yá̰a̰ malang tām̄ yā kɔsəń gɔn Nə́ɓā

23Ngé kə́rēý gə̄ ədan̄ na Nə́ɓā na adə̄jí ta róbə rāā yá̰a̰ malang. Rɔ̄kum, Nə́ɓā adə̄jí ta róbə rāā yá̰a̰ malang ɓá tā, ba i yá̰a̰ malang n i yá̰á̰ kə́ majə ní alé. Nə́ɓā adə̄jí ta róbə rāā yá̰a̰ malang ɓá tā, ba i yá̰a̰ malang n a rāā kə deé kadə̄ tɔgəń kum kə̄ kété ní alé. 24Ādə̄ deē sāā yá̰á̰ kə́ tām̄ yā majə yān nəkɔ́ tə́ alé, banī i yá̰á̰ kə́ tām̄ yā majə yā madə̄n gə̄ tə́ tá.

25Əsaī yá̰a̰ malang ń a igən̄neé loo gātə̄ dā̰ gə̄ tə́ ní, kanjə̄ dəje gír, na sōgə́ kemsí rāāsí. 26Tɔdɔ̄ ndangən̄ kem makətūbə̄ yā Nə́ɓā tə́ na:

Dɔ nang ō, yá̰a̰ malang kə́ tū tə́ ō, i yā Kɔ́ɔ̄ɓē#10.26 K. 26: Á̰a̰ī Pā 24.1.

27Adə̄ ré de kə́ nge taā kem aĺ kógə̄ḿ mēr̄sí kəsa yá̰a̰ ba ī-ndigiī kaw̄ anī, ə́saī yá̰a̰ malang ń a adə̄n̄sí ní, kanjə̄ dəje gír, na sōgə́ kemsí rāāsí. 28Ba ré de kə́rēý ədasí na dā̰ ń toō i dā̰ kə́ tun̄ adə̄n̄ ɓesə̄ gə̄ anī, ə́saī alé tām̄ yā deē ń ədasí najə̄ tə́ ní ō, najə̄ yā kem rāā tə́ ō. 29M-ɔ̄r̄ i najə̄ kem rāā yāsí sḭḭ̄ kɔ́ gə̄ alé, ba i najə̄ kem rāā yā deē ní. Banī de kə́rēý a dəje najə̄ a əda na:

Mā ń i kɔ́ɔ̄ rɔ̄ḿ ní ké kem rāā yā de kə́ rang a ɔgə̄m̄ rāā yá̰a̰ i tām̄ yā rí tə́ wa. 30Ré m̄-ndadə̄ m-ādə̄ Nə́ɓā tá m-ə́sá yá̰a̰ anī, i tām̄ rí tə́ á a ədan̄ najə̄ kə́ majaĺ dɔḿ tə́ tām̄ yā yá̰á̰ ń m̄-ndadə̄ Nə́ɓā dɔ tə́ ní wa?

31I beé ní, ká ré ə́saīneé i yá̰a̰, aké ā̰yīneé i yá̰a̰, aké ī-rāāīneé i rí gə̄gē anī, ī-rāāī yá̰a̰ malang yā kadə̄ ɔ́siīneé gɔn Nə́ɓā. 32Ī-lōōī rāā yá̰á̰ kógə̄ḿ kə́ kadə̄ Jipə gə̄, aláa Gərek gə̄, aláa Egəlijə yā Nə́ɓā a̰a̰n̄ anī əsōn̄. 33I beé n mə̄kɔ́ m-ə́hɔ rɔ̄ḿ tɔgə m̄-rāań yá̰a̰ malang kadə̄ nel̄ de gə̄ malang ní. Tɔdɔ̄ m̄-sāā yá̰á̰ kə́ tām̄ yā majə yā de kə́ ngá̰ý gə̄ tə́, kadə̄ nin̄-ajən̄neé.

Currently Selected:

1 KORḚNTƏ 10: SARDC

Highlight

Copy

Compare