Roomawa 9
9
Ɗalapa Au Shɔbiiyi
1Ruu tɔ̃vɨn gbete n sham, aru n pɛ Kirisi ɓɛɛ; n yeeɓa nyaɓa. N sisɨn tasin tɛttɔ a Ɗa Suru kabii, n yeeɓa nyaɓa 2n sisɨn hɨmtɛ fɛ̃ɛm, ang sisɨn kɔntɔ ko-piɗaviya 3Shɔ si tɔnɛ n ang yuu shɔ wirintɛ a Ɗalapa ɗekɨn, shɔu kɔn nɔkɨntɔ a Kirisi bi aru n shɔbiiyi raanɛ, kɛ n nyakooyi . 4Ikɔi ɔ̃rɛ shɔ Israilayi, vi ɓasiyi tɛttɔ a Ɗalapani, Ɗalapa tɛyi tɛttɔ pɛ ɓɛɛ jaayi, i kpaa Ɗalapa bassinɛ tɛttɔ; Ɗa maruu tɛttɔ ayini, ãyi nya-ãsinɛ tɛttɔ; i bassinɛ tɔ̃vɨn aɗɔn, i tɛ ruu gbete Ɗalapa ma tɛttɔ; 5ikɔma i shɛpɛ ji au ɓɛuru- ɓɛuru gbete shɔ zɛyi tɛttɔ tɛ̃ɛ̃tɛ̃ɛ̃kɔ; Kirisi u ɔ̃nɛ shɔzɛ shɛ ji Helena ladurukɔ. mɛnɛ Ɗalapa au roo kpati a koo piti bɛlinɛ u ɔ̃ u ɓɛɛkɔ dangdang! Nankɔ.
6Ama ɓanɛ n shanɛ nɛ Ɗanyaruubii yɛ pɛli dɔɔɓa ɓa, aruviya ɓa shɔ Israilayi kpai i shɔ gbeteyi ã sisɨn a Ɗa bi ɓa 7Sɔ̃n ɓanɛ Ibirayi ɓɛuruyi kpai i Ɗa jaayi ɓa. Ɗalapa geli Ibirayi nɛ, <<A Ishaku kɔ kabiikɔ a yɛ kpaa mɛuruyirɛ shɔ gbete n ma mɔkɔniyɛ.>> 8Vim tasitɛ nɛ, jaayi gbete shɔ yeerɛ a nyaba gbete shɔzɛ yeeyɛ i ɓa Ɗa jaayi ɓa; ama see jaayi gbete shɔ yee a nyaba Ɗalapa ruumanɛ, ikɔi ɔ̃rɛ jawuru tɔ̃vɨn. 9Ɗalapa ruumanɛ a Ibirayini ɔ̃rɛ nɛ, <<Saa wɔɔ ɗaa nankɔ n yɛn sɔɔtɔ, Saratu yɛ yee jaavɔshɔtɔ.>>
10Vi tasinɛ wɔsɔ̃n aɗɔn, Rabeka jaa zitiyi i ɓeye gbete, ukɔ ɔ̃rɛ u ɓɛuru Ishayaku. 11Ama Ɗalapa a naa kawɔ ji lɔ jaamiyi ɓa aru viwɔ ɓa, aru u yisinya vitɔ̃vɨng gbete shayɛ u ɔ̃ nizɛ, Ɗalapa geli Rabeka nɛ<<Shɔ pɛ̃niba yɛ ɔ̃ shɔ wujau u foo.>> 12Ɗalapa sha vim si shɔ ji yee ɓa. i ji pɛli viwɔɔ ɓa kɔ̃linɛ ko tɔ̃vɨn ɓa. 13Ji nagbete Ɗanyarubii shayɛ nɛ,<<N ɔri Yakubtɛ ama n bɛ̃ɛ̃ Isuwa tɔ.>>
14U yɛ shakɛnɛ Ɗalapa ji pɛli ɓa tɔ̃vɨn ɓaya? ko pɛ̃tɛ̃rɛ̃ ɓa nankɔ ɓa. 15Ɗalapa geli Musa nɛ,<<Shɔ gbete n kasiyɛ n ntau raatɔ kopiya; shɔgbete yasi shɔ ruuvinitɔ kopiya n yasiu ruuvini sɔ̃njo.>> 16Aru nankɔ ɓanɛ vi gbete shɔzɛ kasiyɛ Ɗalapa pɛli vi aru ukɔ ɓa, ama see nɔgbete Ɗalapa nta shɔ raa sheeli 17Ɗanyaruubii geli kpati Masar nɛ,<<N pɔ̃rɛ a ɔ̃ kpati aru n sho vishonɛ a mɔkɔni n tasin kaka a kootipi kpai, wɔsɔ̃n shɔu ɓan nii a kootipi kpai.>> 18Aru nankɔ Ɗalapa nta raa shɔ gbete lɔyi nɛn ntayi raayɛ, a shɔ gbete Ɗalapa kasiu sisɨn lakinɛ yɛ laki sisɨn ji ukɔ,
Ɗalapa Sisɨn Lɛsinɛ A Raa Ntanɛ
19Ama shɔzɛ gbete awɔ tete yɛ gelin nɛ,<<Vim kɛ ɔ̃nɛ nankɔ, Kɛ aruvi Ɗalapa doo a ɗɔɔ zɛnɛ nɛu shɔruuvini anɛ dɔdɔrim viya? Pi yɛ bɛ̃ɛ̃ vi gbete Ɗalapa kasiyɛ kɛpiya? 20Ama mɔkɔ ɔ̃rɛ piya shɔzɛ, gbete a yɛ masinya a Ɗalapani piya? Tɔ̃pɔ̃ ɓari maanɛ hɨ shɔ gbete maauyɛ viwɔɔ dɔɔɓa nɛ, a mang aru ivi nankɔ viya?>> 21Akɨntini kpai, shɔgbete maa ɓari tɔ̃pɔ̃ yɛ, u kaka aɗɔn u pɛli vi gbete kasi pɛlinɛ a tɔ̃pɔ̃ni, a yɛ zɛnɔɔtɔ a tuu mutinɛ tɔ̃pɔ̃ gbete a maa ɓari ziti awuni, gbete u ɔ̃ shɔ gbete shɔ pɛli vishonɛ awuni a lee pɛ̃niba, a wɔɔ gbete shɔ pɛli vishonɛ awuni a lee weze.
22Ɗalapa vishonɛ ji nankɔ. Ɗalapa kasiu sisɨn lɛsinɛ tasinɛtɔ, u tasiu nɔgbete u kaka ɔ̃yɛ shɔu zɛtɔ. Ama au ɓuzɨn u nyamɛrɛ masisɨntɔ fɛ̃ɛm a shɔ gbeteyi lɛsiu sisɨnni, shɔ gbete Ɗalapa lɔyi a ɓuzɨn lɛsinɛ. 23Ɗalapa kasinɛn ɓeli u bassinɛ pɛ̃niba gbete tasi shɔ gbete nta raayɛ, shɔ gbete si matɛttɔ a gaanɛ aru bassinɛ. 24Kɛ ukɔu ɔ̃rɛ shɔ gbete Ɗalapa ɓai nyayɛ, ɓa a ɓuzɨn Yahudawayi kɔ sheeli ɓa ama piti a shɔ gbeteyi ɓa Yahudawa ɓani kpai 25Shɔmpɛ vigbete sha a labeenɛ Hosiya nɛ:
<<Shɔ gbeteyi i ɓa nɓɛɛ ɓa
N yɛn ɓai nya<i ɔ̃ nɓɛɛ.>
Shɔ gbeteyi n ji ɔri ɓa
N yɛn ɓai nɛ, <N shɔ ɔrinɛ.>
26Toti, a ɗɔgbete shɔ geliyɛ nɛ<Ɔ ɓa nɓɛɛ shɔzɛ ɓa,>
A ɗɔukɔ shɔ yɛ ɓainɛ Ɗa gbete u a suruni jaayi.>>
27Shompɛ vigbete Ishaya sha a shɔ Isreilayi yuu yɛ nɛ:<<Ko shɔ Israila i ɔ̃ waanɛ naa seseli a nya wapo, a shɔmni kpai shɔ yɛ raa shɔzɛ fɛ̃ɛ̃ atete ni; 28Aru Uɓeyelapa yɛ pɛli vigbete tonɛn pɛliyɛtɔ a koo kpai tɛ̃ɛ̃ti.>> 29Ji na gbete Ishaya si yɛ nɛ,<< Uɓeyelapa shɔ gbete vitɛu kaka ɓa si ji yasiu laduru ɓa, u si riitɛ naa Sɔdom, u si riitɛ naa Gomora.>>
Israila a ruu tɔ̃vɨn
30Ji nankɔ u shanɛ shɔgbete i ɓa Yahudawa ɓa, ai ji kã ɔ̃nɛ tɔ̃vɨn ɓa a Ɗalapa ɗɔbiini ɓa, ama dɔdɔrim i kpaatɛ a nyaba sisɨn ãnɛ. 31Naa Ɗalapa shɔbiiyi, gbete i kã Musa nya ãsinɛ gbete yɛ pɔ̃i a Ɗalapa ɗekɨn, i ji kpaa ɓa. 32Ivi sɨnrɛ nankɔ viya? Aru i ji pɔ̃ sisɨn ɓa a sisɨn ãnɛni ɓa ama i pɔ̃ sisɨn a vigbeteyi i pɛliyɛ. Kɛɗɔn i kɔ dɔɔ rɛ a <<Tari dɔɔ kɔnɛni.>> 33Ji na gbete Ɗanyaruubii shayɛ nɛ:
<< Kɨnnɔɔ pɛ n a ɗɔ tari pɔ̃nɛ a Sihiyona
gbete yɛ pɔ̃rɛ shɔu kɔdɔɔ aɗɔn,
tari gbete yɛ pɔ̃yirɛ i nwesirɛ. Ama shɔ gbete kɛ ã sisɨn nɛ au bi yɛ nta yusẽ ɓa.>>
Currently Selected:
Roomawa 9: Laa
Highlight
Copy
Compare
Share
Want to have your highlights saved across all your devices? Sign up or sign in
The Word for the World International and The Word for the World Nigeria
