Roomawa 11
11
Ɗalapa Nta Shɔ Israila I Raa
1N hɨ pɛ, Ɗalapa ɓɛ̃ɛ̃ u shɔbiiyi tɛttɔ ya? Ji ɓɛ̃ɛ̃yi ɓa! N ang yuu n pɛ shɔ Israila, a Ibirayi laduru, toti n a Benjame ni u nyakoo gbete. 2Ɗalapa ji ɓɛ̃ɛ̃ u shɔbiiyi ɓa, shɔ gbete lɔyirɛ a gaanɛ, A ji zɛ gbete Ɗanyaruubii shaliyɛ ɓaya aru Iliya, nɔgbete Iliya sɨnri Ɗalapa nyavɔ aru Israila nɛ: 3<<Uɓeyelapa i nyɔki a jashonɛtɛ, a i zɨnli a lazããtɛ a tipi; yaatɛ nkɔng sheeli, toti i ɗɔgbete i kã n ɗɔ nyɔnɛrɛ.>> 4Ama Ɗalapa kasiunya kɛnɛ iviya? kasiunɛ<<N pɔ̃ vɔshɔyi tɛttɔ laa ziti atu kopi ɓa maanzii. (7,000.) shɔgbete i ji ɓassi ɗalapa Baal ɓa yɛ.>> 5Dɔdɔrim ɔ̃tɛ ji nankɔ: yaatɛ shɔzɛ fɛ̃ɛ̃ gbete Ɗalapa lɔyirɛ aru u ɔ̃nɛ tɔ̃vɨn. 6Ɗalapa lɔyirɛ pɛ aru u ɔ̃nɛ tɔ̃vɨn, ɓanɛ aru i vishonɛ ɓa. Si tɔnɛn ɔ̃ aru shɔzɛ vishonɛ, kɛɗɔn u ɔ̃nɛ tɔ̃vɨn si ji ɔ̃ ɓa ɔ̃nɛ tɔ̃vɨn nizɛ ɓa.
7Aru nankɔ shɔ Israilayi i ji kpaa vigbete i ɗɔ kãnɛ ɓa. Ama shɔzɛ fɛ̃ɛ̃ gbete Ɗalapa lɔyirɛ ikɔyi kpaarɛ; gãsiyi i ɔ̃kɛ yuukasi. 8Ji nagbete Ɗanyaruubii shalinɛ, <<Ɗalapa pɔ̃yi sisɨnrɛ nɛu ɔ̃ nɔti; Anɛ dɔdɔrim Ɗalapa pɔ̃rɛ i nɔɔ zɛ ɓa ko i ntarɛ ɓa.>> 9A Dauda shanɛ,
<<Mɛnɛ i yumusinɛ u ɔ̃riyikɔɔ tari ɗanɛ, vigbete yɛ n-tiyi vɔrɔ;
mɛnɛ i nwesikɔɔtɔ, u ɔ̃rikɛ viruuyeenɛ ayi yuuǃ
10Mɛnɛ i nɔɔ u ɓarikɔɔtɔ nɔgbete i zɛɗɔɓa;
mɛnɛ i raɓoonɛ u pɔ̃rɛ ɗarɛ kopiɗaviya.>>
11Toti n hɨ pɛ, Naa shɔ Yahudawayi i kɛ nwesinɛ, i nwesitɛ i yɛ yuu toti ɓaya? ɓa nankɔ ɓa! Ji aru i ruuvinikɔ Ɗalapa raa shɔ gbete i ɓa Yahudawayi ɓa rɛ, aru pɔ̃ Yahudawayi i kaagɨnrɛ. 12Ama Yahudawayi i ruuvini n ti Ɗa vɔɔ susãri tasinɛ waanɛ a bi a kootipi, a i nwesinɛ suru n ti shɔ gbeteyi i ɓa Yahudawa ɓa Ɗa vɔɔ susãri tasinɛ a bi, Naa Yahudawayi i kɛ ɔ̃nɛ kpai Ɗa vɔɔ susãri tasinɛyi yɛ ɔ̃ kɛpi koviya?
Shɔgbeteyi ɓa Yahudawa ɓa i raanɛ
13Dɔdɔrim n nwanya a ɔkɔɔ shɔgbeteyi ɓa Yahudawa ɓaː nagbete nyɛ yɛ ang ɔ̃nɛni n ɔ̃ shɔgbeteyi ɓa Yahudawa ɓa jashonɛ, n yɛn ɓasipɛrɛtɔ ang vishonɛni. 14Wɔɔɓa n yɛn pɔ̃rɛ n shɔbii shɔ Israila sisɨn u kɔitɔ, nɔgbete n yɛn zɛnɔɔ n raa gãsiyirɛ. 15Aru naa shɔ kɛ bɛ̃ɛ̃ Yahudawayi nɛ, kɛɗɔn shɔ gãsiyi kɔsirɛ atette Ɗalapa shɔnɔpɔ̃yi anɛ u ɓɛsayi, ivi yɛ pɛli viya naa i kɛ tɛ ruu tɔ̃vɨn nɛ yɛ?, Ɗalapa yɛ ãyi suru gbete sɔ̃nyaɓayɛ aru nɔgbeteyi si vɔyɛǃ
16Shɔu tɔpɛnɛ shɔ wɔɔ ã Ɗalapa visha au ɓuzɨn visha gbete gaa yeenɛyɛ, kɛɗɔn visha gãsiyi kpai au yeeyɛ ɔ̃ sɔ̃n Ɗalapa ɓɛɛ, naa shɔ Kɛ ã Ɗalapa gɨnri laanɛ, lawu piti kpai ãkɛ Ɗalapa ɓɛɛ. 17gãsi nalaayi zeetung gbete shɔ latɔ shɔ kolirɛ, a shɔ tuu nalaa zeetung shɔ ɓili shɔ dɔsirɛ aɗɔn. Ɔ shɔ gbete ɔ ɓa Yahudawa ɓam, ɔ pɛ naa laa zeetung shɔ ɓili, <<ama dɔdɔrim shɔgbete ɔ ɓa yɛ Yahudawa yɛ kpaa ɔ̃nɛ vɔ susãri tasinɛ jo awɔ kabiikɔ.>> 18Ɔkɔɔ waanaanɛ a nɔsisɨn nɛi tɛɛ nalaayi gbete shɔ kolirɛwatɛ, ɔ bassi yuu kɛpi koviya? Ɔ ɓɛɛjo nalaa weze sheeli; ɓa ɔkɔɔ pɔ̃si gɨnri laayi naarɛ ɓa ama gɨnri laayikɔ i pɔ̃sɔɔ naarɛ.
19Ama ɔ yɛ shanɛ, <<Nn, shɔ koli nalaayi aru shɔu dɔsin wɔyi aɗɔn.>> 20Shompɛ nizɛ. I sisɨn ãnɛ ɓa Yesɔ biini ɓa aruukɔ Ɗalapa koliyirɛ, ama aru ɔ sisɨn ãnɛ aɗɔn ɔ kpaa ɔ̃nɛrɛ a ɗɔuni. Ama ɔkɔɔ waanaanɛ a sisɨnni; nɔgbete ɔ si pɛli nankɔ, a nta seeti 21Ɗalapa ji yaa Yahudawayi ɓa gbeteyi naa gɨn-gɨn nalaayi i yɛ weze, aa zɛnɛ yai nɛ ya weze ya? 22Yɛm u zɛ Ɗalapa vitɔ̃vɨng shonɛtɛ a lewɔɔ sɔ̃n nta shɔ raa ɓa. Shɔgbeteyi nwesitɛ tasiyi raa ntanɛ ɓa, ama tasaa vitɔ̃vɨng shonɛtɔ naa akɛ yɛ ɗeknnɛ a vitɔvɨng shonɛni. Ama a ji yɛ ɗekɨn ɓa a nankɔ ni ɓa, mɔkɔ shɔ yɛ ko atɔ a gɨnrini. 23Ama naa Yahudawayi i ji ɔ̃ ɓa a ɓuzɨn yaanɛ sisɨn ãnɛ Ɗa biini ɓa, Ɗalapa yɛ sɔritɔ au ɗɔbiini; aru Ɗalapa u kaka pɛlinɛ aɗɔn. 24Ɔ shɔ gbeteyi ɓa Yahudawa ɓa ɔ naa naarɛ laa zeetung shɔ ɓili gbete shɔ kotɔyɛ, gbete ɓa dɔkɔ ɓa yɛ, kɛɗɔn a shɔ dɔsirɛ a laa zeetung gbete shɔ layɛ. Yahudawayi i naa laa gbete shɔ latɔnkɔ; yɛ ɔ pɛlaa weze Ɗalapau dɔsi nalaa kolinɛyirɛ a laa gbete i si ɗɔnyɛni.
Ɗalapa shɔ raanɛ a koo piti kpai
25Ruuɓusinɛ aɗɔn, n masayi, gbete n kasirɛ ɔ zɛtɔ, aru yɛ pɔ̃sɔɔnaatɔ ɔ pɔ̃ ɓa sisɨnni nɛi ɔ shɔ sẽrẽe ɓa. Israilayi i yulakinɛ ɓa dangdang ɓa, ama yɛ ɔ̃ri seetɛ shɔ gbeteyi ɓa Yahudawayi ɓa i a Ɗalapa ɗɔbiitɛ kpai. 26A nyabangkɔ Israila i kpai ranaarɛ. Naa Ɗa nyaruubii shayɛ nɛ,
<<Shɔshɔraanɛ a a Sihiyona.
yɛ pɔ̃ Yakub laduruyi kpai i yaa vigbete bassi Ɗalapa ɓa pɛlinɛ.
27N yɛn maruumkɔ ayini
naa n kɛ tuuyi ruuvininɛyɛ.>>
28Aru i ɓɛ̃ɛ̃ ruu tɔ̃vɨntɛ, Yahudawayi ɔ̃tɛ Ɗalapa shɔnɔpɔ̃yi, vim ɔ̃tɛ tɔ̃vɨn awɔ ruubii shɔgbete i ɓ yahudawa ɓa miyi. Ama aru Ɗalapa lɔɔyirɛ, i pɛ shɔzɛ gbete Ɗalapa ɔriyɛ aru ɓɛuru ɓɛuruyi. 29Ɗalapa ji kɔsiu sisɨn ɓa ayuu shɔgbete lɔɔyirɛ au tasiyi vɔɔ susari abiini ɓa. 30A knti ɔ shɔ gbeteyi ɓa Yahudawa ɓa ɔ si gɨn Ɗalapa nya ɓa; ama dɔdɔrim ɔ kpaa raa ntanɛtɛ aru Yahudawayi i gɨn Ɗalapa nyaɓayɛ. 31Ji nankɔ, aru raantanɛ gbete ɔ kpaayɛ, Yahudawayi i ɔ̃tɛ shɔ gbeteyi gɨn Ɗalapa nyaɓayɛ dɔdɔrim, shom aru raa ntanɛ gbete shɔ tasɔɔ ikɔma i kpaa Ɗalapa raa ntanɛjo. 32Aru Ɗalapa pɔ̃ kopiyatɛ a jaahm shɔgbeteyi gɨu nya ɓa, aru u ntayiraa piti kpai.
Bɛlinɛ a Ɗalapa Bi
33Ɗalapa vitɔ̃vɨng pɛ̃niba pikoviya! U vizɛnɛ a sẽrẽe pikoya! piyɛ tadɔɔ nɔgbete maruuwu yɛ piya? Piyɛ zɛu nyaba ruuwu piya? 34Nagbete Ɗanyaruubii shayɛnɛ,
<<Pi zɛ Uɓeyelapa sisɨn piya?
Pi zɛnɔɔ Ɗalapa ruu gelinɛ piya?
35Pi ã Ɗalapa vi pi legbete piya
a shɔ tɔnɛ Ɗalapa yɛ sɔɔriu yɛ piya?>>
36Aru vi kpai ukɔ shɛshirɛ, toti vi kpai i ɔ̃ ji au kabiikɔ u ɓɛɛkɔ. Bassinɛ u ɔ̃ pɛ Ɗalapa bi dangdangǃ Nankɔ.
Currently Selected:
Roomawa 11: Laa
Highlight
Copy
Compare
Share
Want to have your highlights saved across all your devices? Sign up or sign in
The Word for the World International and The Word for the World Nigeria
