Roomawa 1
1
1Nkɔ Bituru n bee labeenɛrɛ. Yesɔ Kirisi jawɛrɛ u jashonɛ gbete Ɗalapa lɔɔyɛ a ɓau nya nɛ u nwari shɔ ruutɔ̃vɨng a koo piti kpai. 2Ruutɔ̃vɨng gbete Ɗalapa masi tẽe-tẽe au jashonɛyi, nagbete shɔ bee a labeenɛ Ɗa nyaruubii Wɔsɔ-wɔsɔyi. 3Ruutɔ̃vɨng nwanya aru ɓɛjaa, Uɓeyelapa Yesɔ Kirisi: au ruubii, shɔ yeeu a Dauda laduru; 4ama au ruu Suru Wɔsɔ-wɔsɔ naa Ɗalapa, Ɗalapa tasiu kakani ukɔ Ɗalapa jagbete yulapa a yuu saa yɛ. 5Au kaa bikɔ Ɗalapa ang nyaba kɛkn nɛn ɔ̃ jashonɛ aru Kirisi, a ruu gbetekɔ n ɔ̃ shɔ-shɔ ɗekɨn tɛɛsinɛ a laduru piti kpai nɗayi ɔ̃ shɔ sisɨn ãnɛ a shɔ nya gɨnnɛ ni. 6Vim ɓasɔɔ yuujo nankɔ ɔ shɔ ɔ̃nɛ Roomani piti kpai, shɔgbete a Ɗalapa ɓawɔɔ nya nɛ ɔ ɔ̃ shɔ Yesɔ Kirisi gɨnnɛ.
7Aru gbetekɔ n beerɔɔ kɛkn piti kpai, shɔ Roomayi gbete Ɗalapa ɔrɔyɛ a ɓawɔɔ nya nɛ ɔ ɔ̃ u ɓɛshɔzɛ wɔsɔ-wɔsɔyi.
Mɛnɛ Ɗalapa au Uɓeyelapa Yesɔ Kirisi u ã wɔɔ sisɨn vitɔ̃vɨng pɛlinɛ a ɔ̃nɛ nyazɔni.
Gakinɛ Ɗa dɔ̃rinɛ
8N gaa pɛ a Ɗa dɔ̃rinɛ a Yesɔ Kirisi ni awɔ yuu piti kpai, aru gbete ko-piya u ɗɔgbete nta ɔ ruu sisɨn pɔ̃nɛ a tipim piti kpai. 9Ɗa kɔ ɔ̃rɛ n shɔ shirinɛ aru vigbete n shayɛ pɛ tɛpɛ-tɛpɛ Ɗa gbete ang shoshiu vishonɛ a sisɨn gbete a nyaba ruutɔ̃vɨng nwanɛ a ruu ɓɛjaani. Ɗalapa zɛtɛttɔ nɛn kpaa sisɨntɛ awɔ yuuni lee-lee 10aɗagbete n gaki Ɗayɛ, n gaki Ɗa au tete vitɔ̃vɨng pɛlinɛ u yasin nyaba n awɔ ɗɔɔbiitɔ dɔdɔrim. 11Arumkɔ n kasauwɔɔ zɛnɛtɛ waanɛ, nɗa ɔ kpaa Suru gbete sɔ̃nyaɓayɛ u vɔɔ susãri u lakɔɔ bitɔ. 12Vigbete n shami u kpaa naa pɔ̃sinɛ a nyazɔ a ɔkɔni, ɔ lakin bi sɔ̃njo nagbete n lakɔɔ ɓɛ yɛ awɔ tete sisɨn ãnɛni.
13Ɔ kpaa sisɨntɔ masayi, n maatɛ ang sisɨn lee-lee n tɔ n kasɔɔ zɛnɛ, ama viwɔɔ zãrin pɛlinɛtɔ. N kasi shɔwɔyi kpaanɛ awɔ teteni, naa n kpaa atete shɔ gbete ayi ɓa Yahudawa ɓayɛ. 14N vishonɛ aɗɔn n geli shɔ ruutɔ̃vɨng piti kpai yunɛ shɔ Helenayi bi yɛnɛ shɔ gbeteyi ɓa Helenayi ɓayɛ a shɔgbete i zɛ vitettɔ a shɔgbete i ji zɛ viɓayɛni. 15Aru gbetenkɔ n kasitɔ waanɛ n nwarɔɔ Ɗa nya ruubii sɔ̃njo, shɔgbete ɔ a tipi Rooma yɛ.
Ɗanyaruubii Kaka Ɗɔn
16N ji nta yuusẽ ɓa aɗɔ shɔ Ɗanyaruubii nwarinɛni ɓa; pɛ Ɗalapa au raashɔ sisɨn ãnɛirɛ, gaanɛ a shɔ Yahudawayi bi yɛnɛ a shɔgbeteyi ɓa Yahudawaɓa. 17Ji nagbete Ɗanyaruubii ɓeli shɔ nɔgbete a Ɗalapa pɔ̃ shɔ a nyaba tɔ̃vɨn nɛ shɔ sɔ ɗɔbii: nɔgbete iyɛ ɔ̃ awuni aitette sisɨn ãnɛ yunɛ au gaanɛ yɛnɛ au yisinɛ. Nagebete Ɗa labeenɛ shayɛ nɛ,<<Shɔgbete ai kɛ pɛli vigbete Ɗalapa kasiyɛ nɛ atette sisɨn ãnɛ iyɛ ɔ̃tɔ.>>
Ɗalapa Sisɨn gɨnvɔ̃ a Shɔruuvini
18Ɗalapa tasiu sisɨn gɨnvɔ̃ a kolapa ayuu ruuvini a vikɔ̃linɛ gbete shɔ pɛliyɛ au zãri shɔ tɔ̃vɨn zɛnɛ yɛ. 19Ɗalapa yeeruu ayi yuu, aruviya vigbete au tasi shɔ Ɗalapa ruu biiyɛ jo ayi nɔɔ deredere weze, Ɗalapa au yuu ma tasi tɛttɔ. 20Yunɛ aɗagbete Ɗalapa shɛshi kotipi yɛ, u vipɛlinɛ gbete shɔ zɛ ɓa piti au kaka gbete sɔ̃nyaɓa au ɔ̃nɛ Ɗalapa ni, shɔ zɛtɛtɔ wasa-wasa; shɔ ntau sẽẽ tɛtɔ a tete vigbete Ɗalapa pɛliyɛni. Aru gbetekɔ shɔzɛ nyanwanɛ wɔɔɓa gbete pɔ̃urɛ i ɔ̃ atette ruuvini ni ɓaǃ 21I zɛ Ɗalapa tɛttɔ, ama iji ãu bassinɛ ɓa ko nɛyi dɔ̃riu pɛ ɓa. I sisɨn vipɛlinɛ ɔ̃tɛ wati weze, i lerinɛ sisɨn rãn ɔ̃tɛ ɓiti-ɓiti gbete pɔ̃irɛ i zɛ ɓa yɛ. 22I tɔnɛ i zɛ vitettɔ ama iji rãan weze; 23Naa i bassi Ɗalapayɛ, i bassi sɔ̃n laasupaa gbete shɔzɛ kɔri yɛ naa shɔzɛ ko janɔɔ ko vivaa ko vigbete ayi gɔ̃ a buru a tipi yɛ. 24Arumkɔ Ɗalapa ã shɔwi nyaba nɛi pɛli vikɔ̃linɛ gbete ayi sisɨn kasiyɛ, ai pɛli kpanta viyusẽe a zɔni. 25I kɔsi Ɗalapa ruu nizɛ a nya nyazɔ̃; i bassi vigbete Ɗalapa kɔriyɛ i ya Ɗalapa biba sɔ̃n tipi, shɔgbete shɔ bɛliuyɛ dangdang! Nankɔ. 26Aru gbete i pɛli vim, Ɗalapa ãi kɛ sisɨn kɔ̃linɛ. Ko soro kɛ jo nɔɔ sɔrɔ vigbete Ɗalapa zãri shɔ pɛlinɛ yɛ. 27Ji nankɔ a vɔshɔyini i yaa roonɛtɛ a soroni gbete Ɗalapa pɔ̃yɛ, i ɓasi kɛ ji ainɔɔ vɔshɔ. Vɔshɔyi pɛli viyusɛ̃ɛ̃tɛ a zɔɔni, aru nankɔ i n ti ruuyeenɛtɛ ai yuu aru vikɔ̃linɛ gbete i pɛliyɛni. 28Aru gbete shɔwi bẽẽ vitɔ̃vɨng pɔ̃tɔ ai sisɨn ni aru Ɗalapa ruubiini, a yasiyikɛ sisɨn kɔ̃linɛ, nɛ n ɗayi pɛlikɛ vigbete shɔ tɔnɛyi pɛli ɓayɛ. 29I yalitɛ vitɛ ai sisɨn nɔ̃shɛ-nɔ̃shɛ, naa sisɨn lanɛ, vikɔ̃linɛ, vi ãanɛ, shɔ sãnɛ sisɨn, a nɔɔ taanɛ a shɔ vi, i sisɨn jo gɨn kaanɛ kpai, vɔrɔ nyɔnɛ, nya masinɛ, shɔ ɗakinɛ a shɔ zɔnɛni. 30a vikɔ̃linɛ shanɛ a zɔyuu; i bẽẽ Ɗalapa tɔ, i zɛ shɔɓa a shɛntiyuuniɓa, i tuu yuu bang, i basi bang; i kãli nyaba vikɔ̃linɛ pɛlinɛ bang; i weshoɓa a ɓeyeyi nyani ɓa; 31I lerinɛ ɓa tɔ̃vɨn ɓa; i sã vigbete ayi maa a shɔni ɓa, i ɔri shɔ ruubii ɓa, gɨn kɔyiɓa a shɔni ɓa ko a shɔ raa ntanɛni ɓa. 32I zɛ tɛttɔ nɛ Ɗalapa nya ãsinɛ shanɛ shɔgbeteyi pɛlivim nɛi nto vɔnɛ. Ɓanɛ vim pɛlinɛ kɔshɛɓa, nɛ shɔu kɛ pɔ̃ naa nɛ nɛ shɔu pɛlitɔyɛ piti.
Currently Selected:
Roomawa 1: Laa
Highlight
Copy
Compare
Share
Want to have your highlights saved across all your devices? Sign up or sign in
The Word for the World International and The Word for the World Nigeria
