Yɔhana 20
20
Yesɔ Yunɛ Sàà
1A gadii zɨɨnkɔ si ɗɔ doo zɨnzɨna a lee gbete gaa yɛ, Mariyamu su Magadala yɛ yusàà a zɛrɛ shɔ dɔ̃ tari tɛ a nya sààuni. 2Kɛɗɔn su yudɛinɛ yɛnɛ Siman Bituru a Yesɔ jaɗɔɔ gbete ɔriuyɛ ɗɔbii a geliyi nɛ, <<Shɔ tuu Uɓeyelapa tɛttɔ sààni, u ji zɛ ɗɔgbete shɔ pɔ̃u a ɗɔnni ɓaǃ>>
3Kɛɗɔn Bituru a Yesɔ jaɗɔɔ wɔɔ i yɛ yusààurɛ. 4I ziti piti i si ɗɔ yuunɛ, ama Yesɔ jaɗɔɔ wɔɔ yuurɛ a tɛɛ Bituru rɛ, ukɔ gaa yusààu tonɛrɛ. 5A ɓakirɛ a zɛ fãrã vɔrɔ gbãnɛkɔ sheeli, ama ji to ɓuzɨn sàà wu ɓa. 6Au knti si kɛ Siman Bituru, u ɓɛɛ anɛ see tonɛ sàà. A zɛ fãrã vɔrɔ gbãnɛ shɔ yɔtɛ a ɗɔuni. 7A zɛ fãrã gbete si shɔ masi Yesɔ aɗɔ yuu yɛ shɔ yɔtɛ ka gbete, ɓa fãrã vɔrɔ gbãnɛni a nyazɔ ɓa, ama fãrãu shɔ litɛ shɔ pɔ̃utɛ kagbete. 8Kɛɗɔn Yesɔ jaɗɔɔ gbete gaa yusààu tonɛ, ukɔma to ɓuzɨn rɛ; a zɛrɛ a ã sisɨnrɛ. 9A shɔmni kpai i ji zɛ vigbete Ɗanyaruubii shayɛ nɛ, ɔ̃tɛ kaka jazɨng akɔrɔ Yesɔ u yulapa tɔ a suruni a sàà ni. 10Kɛɗɔn Yesɔ jaɗɔɔu sɔɔ wɛrɛ rɛ.
Yesɔ Shɛ a Mariyamu su Magadala Bi
11Mariyamu shirɛ a nya sàà a ɓili u ɗɔɔ sɨnɛ, a ɗagbete siu doo ɗɔɔ sɨnɛ, sɔ̃sirɛ a kɨnnɔɔ ɓuzɨn sààuni 12A zɛ Ɗajashonɛlapayi ziti a fãrã puruni a bi, i ɗɔɔ ɔ̃nɛ ɗɔgbete shɔ pɔ̃ Yesɔ bi ɗɔnyɛ, gbete shi au yuu wɔɔ shi au ɗɔ dɔɔ. 13Ɗajashonɛlapa i hɨ suu nɛ,<< Sum a sɨn aru iviya?>>
Suu kasinya nɛ, <<Shɔ tuun Uɓeyelapatɛ, n ji zɛ ɗɔgbete shɔ pɔ̃u yɛ ɓaǃ >>
14Kɛɗɔn suu kɨnnɔɔ a zɛ Yesɔ aɗɔ shinɛ; Ama ji zɛ ɓa nɛ Yesɔ kɔɓa. 15Yesɔ hɨunɛ, << Sum a sɨn aru iviya? Shɔu piya gbete a kãyɛ?>>
Suu tɔnɛ mɛnɛ u pɛ shɔ gbete pɛli vishonɛ a jaa, kɛɗɔn suu geliunɛ,<< Shɔwɛrɛ naa mokaa kɛ tuunɛrɛ, a gelin ɗɔgbete a pɔ̃u aɗɔnyɛ ni, n yɛrɛ n tuupɛ.>>
16Yesɔ geli suu nɛ, <<Mariyamu,>>
Suu kɨnnɔɔ a Yesɔ bi a nwanya a nya Hibiru nɛ, <<Rabboniǃ>>(Ukɔ ɔ̃rɛ <<Shɔmala.>>)
17Yesɔ geli suu nɛ, <<Mokɔ sã naa nɛ ang biini, aru n ji sɔɔ Maye ɗɔbii pɛ ɓa. Ama yɛnɛ a mashɔzɛyi ɗɔbii a geliyi nɛ, n sɔkɛ u ɗɔbii ukɔ ɔ̃rɛ Maye ai ɓeye, n Ɗalapa ai Ɗalapa.>>
18Kɛɗɔn Mariyamu suu magadala yɛrɛ geli Yesɔ jaɗɔɔyi nɛn zɛ Uɓeyetɛ kɛɗɔn a geli vigbete Yesɔ geliuyɛ piti kpai.
Yesɔ shɛ au jaɗɔɔyi bi
19Si darɛ pɛli tɛttɔ a dii gbete lee gaa yɛ, si Yesɔ jaɗɔɔyi i toli zɔtɛ a jaa ɗɔgbete shɔ kuu nyatɔ, aru seti yupɛ̃ni yahudawayi. Kɛɗɔn Yesɔ arɛ a shi ai tete a shanɛ, binyatɔ̃nɛ u ɔ̃ a ɔkɔɔni. 20Akɨnti gbete Yesɔ sha vim yɛ, a tasiyi u naa au kagɨn ni. Yesɔ jaɗɔɔyi i nta yɛti purutɔ waanɛ a Yesɔ zɛnɛni. 21Yesɔ geli sɔ̃n nɛ, <<Binyatɔ̃nɛ u ɔ̃ a ɔkɔɔni. Nɔgbete Maye shongyɛ, n kɔma n showɔ sɔ̃njo nankɔ.>> 22Kɛɗɔn Yesɔ shɛshiyi ɔ̃kinɛrɛ a geliyi nɛ, <<Ɔ tɛ Ɗa Suru nɛ. 23Ɔkɛ yaasi shɔ ruuvini nɛ, Ɗalapa yaasiu ruuvini tɛ gboti; Ama ɔ ji yaasiyi ɓa, Ɗalapa ji yaasiyi ruuvini ɓa,>>
Yesɔ a Tooma
24Shɔzɛ gbete atette Yesɔ jadɔɔyi kopi tu ziti, Tooma (Shɔ ɓaunɛ jabɔ̃) u si ɓa ai tete niɓa aɗagbete Yesɔ arɛ. 25Kɛɗɔn gãsi jaɗɔɔwiyi i geliunɛ, <<U zɛ Uɓeyelapa tɛǃ>>
Tooma geliyi nɛ, <<N ji zɛ too shɔlaa dɔsinɛ ɓatɔ au naa, n tosi naa aɗɔn, n tosin naa sɔ̃n au kagɨn ɓa, n yɛn ã sisɨn ɓa.>>
26Toti akɨnti lee maantaa si Yesɔ jaɗɔɔyi i a ɗɔzɔɔ a ɓuzɨn jaa ɗɔ gbete, a Tooma u si jo a ɗɔzɔɔ a yini, ama si shɔ Kuki nyejaa tɛttɔ, a Yesɔ torɛ a shi ai tete, a gelinɛ, <<binyatɔ̃nɛ u ɔ̃ a ɔkɔɔni>> 27Kɛɗɔn Yesɔ geli Tooma nɛ, <<pɔ̃ a janaa nɛ aɗɔm, zɛn naa pɛ; gɨnn naa nɛ a pɔ̃ ang kagɨn. Yaa nya masinɛ nɛ, a ã sisɨnrɛ.>>
28Tooma kasinya nɛ, <<Uɓeyelapa a n Ɗalapa!>>
29Yesɔ geliu nɛ,<<A ã sisɨn aru gbete a zɛn pɛtɛya? Ɗalapa u tasi shɔ gbeteyi i ji zɛn ɓa ama i ã sisɨn tɛ vɔ susãri abi!>>
Laabeenɛm u dɔɔ tanɛ
30A Yesɔ ɔ̃nɛ a koo, pɛli vibii zaanɛ waanɛ au jaɗɔɔyi nɔɔ gbete shɔ ji bee ɓa laabeenɛ mini ɓayɛ. 31Shɔ bee shom aru n ɗa ɔ ãsisɨn a ɗɔnni, nɛ Yesɔ ukɔ ɔ̃rɛ shɔshɔranɛ, Ɗalapa jaa, aru ɔ sisɨn ãnɛkɔ au bi ɔ yɛ ɔ̃ a suruni.
Currently Selected:
Yɔhana 20: Laa
Highlight
Copy
Compare
Share
Want to have your highlights saved across all your devices? Sign up or sign in
The Word for the World International and The Word for the World Nigeria
