Mateyo 10

Abatumwa ikumi na babili

(Mako16.14-18; Luka6.12-16)

1Yesu ali kuutile abasambi ikumi limo na babili no kubapeela maka ya kuposha malwele no kukonswa konse. 2Aya e mashina ya basambi bonse ikumi limo na babili: Uwakwambilapo ni Simoni, uwali kwitikwa ati, Petelo na wabo Andeleya, Yakobo mwana Sebede na wabo Yowane, 3Filipo na Batolomeo, Toma na Mateyo kasonkesha, Yakobo mwana Alufeyo na Tandeo, 4Simoni uwali kuba mwi bumba lya Baseloti na Yuda Iskalioti uwamwalukiile.

Yesu atuma abasambi ikumi limo na babili

(Mako6.7-13; Luka9.1-6)

5Yesu alibatumine abasambi no kubebekesha ati, “Mwikaya munkende sha Benafyalo nangula ukwingila mu misumba ya bena Samalia. 6Lelo muye fye ku bena Islaeli, imbelele shakuluba. 7Ulo mukoya, mule kushimika ati, ‘Ubufumu bwa mwiulu buli palamine.’ 8Posheni abakolwala, busheni abakufwa, sangululeni abakuba ne fibashi, mule kutamfya ne fibanda. mwapokelela apafye peeleni apafye. 9Mwi kasendapo indalama nangu imo mu fikwama. 10Mwi kasendapo nangula kyola nangu malaya yabili, inkwabilo nangu fye ni nkonto. Pantu umubomfi alilingile ukupelwa ikyo akokabila.

11“Kabili mu musumba no mushi onse mukoyamo, fwayenimo umuntu uulingile epo muye kupulila no kwikalapo mpaka apo mukela. 12Landenimo umutende mung'anda mukoingila. 13Pali ilya ng'anda nga palilingile, lekeni umutende wenu ubepo, nga tefyo lekeni umutende umibwelele. 14Nga kwabako aba tanga misekelela nangula ukumfwa kuli mwebo, pa kufumapo kunteni ulukungu ku makasa yenu. 15Nkomyeba mukine ati, pa bushiku bwa bupingushi kikesa kubako mwakubela kuli Sodoma na Gomola ukukila pali ulya musumba.

Ukupakaswa ku koisa

(Mako6.7-13; Luka9.16)

16“Boneni, nkomituma nge mbelele pakati ka mimbulu, mule kukengela kubati ni nsoka, mule kufuuka kubati ni nkunda. 17Mule kuiteyanya, pantu bakamikata no kumitwala mufilye no ku mipumawila mu ma Sinagoge. 18Kabili bakamitwala ku balashi na kuli bashamfumu epakuba bakamboni bangi kuli bena elo na ku Benafyalo. 19Nomba nga bamitwala mu kilye, mwi kasakamikwa pafyo mukalanda, pantu pekapo mukebwa ifya kulanda. 20Temwebo mukalanda, ni Mupashi wakwa shinwe eukale kulanda ukupitila muli mwebo.

21“Wabo akepaisha wabo, wishi naye akepaisha umwana, abana bakemina abafyashi no kubepaisha. 22Abantu bonse bakamipatilapo pe shina lyangi, nomba uyo akashipikisha ukushinta ku mpelekesho eukesa kupusuka. 23Ulo mwa pakaswa ku bantu ba mu musumba umo, fulumukileni kuli umbi, nkomyeba ati, ulo mutalapitamo mu misumba yonse iya Islaeli, Umwana wa Muntu ninshi alifikile.

24“Takwabapo umusambi uwakukila kafundisha wakwe. Elo umusha naye tangakilapo shikulu wakwe. 25Umusambi kuti kyamulingila fye ukuba nga kafundisha wakwe elo umusha naye nga shikulu wakwe. Apo bali kukuuta umwine wa ng'anda ati ni Beelesebu, nomba pa ba mung'anda yakwe pena enkile.

Ni nani uwakutiina

(Luka12.2-7)

26“Mwile kubatiina. Tapalipo ikyakufisama iki takasokoloke nangula ikya kufisama iki takeshibwe. 27Ifyo nalanda kuli mwebo mu mfinshi mwebo muka filandila pa kampalabwa, Ikyo mukomfwa bakolandila mu kantepentepe, muka kipundile pa mitenge. 28Mwile kutiina abepaya fye umubili nomba teti bepayepo umweo. Mulekutiina fye uungonaula umubili no mweo no ku fipoosa mu ngehena. 29Bushe inseeba shibili tashishitishiwa fye pa ndalama iinini? Nomba pali utu tapalipo akaponena panshi ukwakubula ukwishibwa kuli ba wiso. 30Apo fye ne mishishi ya mu mitwi yenu yalipendwa. 31Ekyo mwilekuba no mwenso apo muli kindeme ukukila napa nseeba ishakuti ubwingi.

Ukushimbula no ku kaana Yesu

(Luka12.8-9)

32“Umuntu onse uutaba na mwenso pa kunshimbula pa bantu, nandibo nkesa kumushimbula pa kinso kyakwa Tata wa mwiulu. 33No ukankana pa kinso kya bantu nandibo nkesa kumukanina pa kinso kyakwa Tata wa mwiulu.

Temutende, lupanga

(Luka12.51-53; 14.26-27)

34“Mwile tontonkanya ati naisa mukuleta umutende pesonde, ayii. Naletapo fye ulupanga. 35Naisa mu kupusanya umwalalume na wishi, no mwana mwanakashi na nyina, umulokashi na nyinafyala. 36Mung'anda ya muntu emukasangwapo abalwani bakwe.

37“Uwatemwishapo wishi nangula nyina ukukilapo pali nebo, nangu umwalalume napamo umwanamwanakashi, talingile kuba umusambi wangi. 38No utasenda ulupanda lwakwe, talingile kuba umusambi wangi. 39Uyo onse afwaya ukubakilila umweo wakwe ali no kuulofya, nomba uukalofya umweo wakwe pali nebo, akausanga.

Ifilambu

(Mako9.41)

40“Uwasekelela mwebo, asekelela nebo, no wansekelela ninshi asekelela uwantumine. 41Uyo onse uwasekelela kasesema pantu fye ni kasesema akapokako ikilambu kyakwa kasesema no wasekelela umuntu wa bololoke pantu fye mololoke, akapokelapo ikilambu kya muntu wa bololoke. 42Mukine fye, uyo onse uwapeeelako ulukombo lwa menshi ya kutalala kuli aba abakukepesha pantu fye basambi bangi, takalufyepo ikilambu.”

Currently Selected:

Mateyo 10: ABT

Highlight

Copy