Oko-ki-igabo 9

Oshawulu Pya wi Inogboso Oyesu

1Ishini Oshawulu ya takirikwu ko ngma awogboso Adole ni. Ogebe ko oteyi kawosapa, 2ga doka kokpa koshu shini ona ga awekpa ipu ko ogya ko Odamasko, owoni opya awogboso owe ka Adole, ona ya yuwa kwu, kwa ango kwa anya, ona yuwa gbo kweyi byuwa kwikye go Ojerusele. 3Ni Oshawulu yo pee kpogya ko Odamasko ni, ola yu bwi iso wa shogba to. 4Ogbo okpagye kweyi opwo oko ya kela danu mo, <<Oshawulu, Oshawulu, ojiya ni oya dami egye?>>

5Oshawulu kamo, <<Adole owanoho?

Oko mani kadanu mo, <<Ami wo Oyesu ni oya dami egye ni.>> 6<<Nabani ke nyiso shini ogipu ko ogya kweyi aba ka dawo oza ni wotiri do koya ni.>>

7Awoya kiyawu ko Oshawulu hagye ebe ni kweyi gege ko kela lo, apwoko kela, ake mashishe lo. 8Oshawulu nyiso okpagye, ishini ogwiyi ni oke omo ojije lo. Apya abo gogya ko Odamasko. 9Ipu kishi oni, oyeno eta ya mebe lo, ya roza lo ke ya gwinyi lo.

10Ipu ko Odamasko agbo inogboso oye iyenu wo Ananiya. Adole sayi danu ki yogwu mo, <<Ananiya!>>

Okyogwu mo, <<Gya, Adole, nyyoma.>>

11Adole ka danu mo, <<Go ole ko Oyahuda ni yikweyi ko owe tiriri oni kweyi oga doka kongo ni bwo Otarsus ni iye nu wo Oshawulu. Oya tinarigwu ba, 12Owuso sayi ko ongo oye, niye nu wa Ananiya danu kweyi osaboneshi shini iyinu na mebe.>>

13Ananiya kyogwu mo, <<Adole, ase nwashika kela dami ikweyi ko ongo mani koza labi-labi ni oya kpa awase wo Ojerusele ni. 14Kweyi owo Odamasko kpo oshu ni awosapa nyakwu danu kowa kwa awase ni ba yogwu kiye wo ni.

15Adole kado Ananiya mo, <<Ga! Ongo mani nsho ko wiyo koko hin la, shini ona yawase ni wase ko Oyahuda lo kpa awose wa kpase ki Izrayila na gyun. 16Ami abiyun, nyya shiyanu owe ni oya wotiri danu ko mowe ikweyi kiye hin ni.>>

17Ebeni Ananiya gipu kole ni Oshawulu yanu ni, kweyi oya abonu so Oshawulu kweyi kamo, <<Oyene hin Oshawulu, Adole Oyesu abiyinu pini omo ikweyi ko owe ishini oya webe mani. Otumoleho mona wa shini oki mebe kweyi Omaku ko Owuso na yo kpawo.>> 18Ebebeni oje bya afu kebinyi bose bwiyi ko Oshawulu kweyi oki mebe. Onyiso kweyi ayo obatisma; 19ishini oroza gbayayi ni opyoshu ki ikpiye.

Oshawulu Tono ipu ko Odamasko

Oshawulu yagye kpa awogboso Oyesu kishi gbayayi Odamasko. 20Ebebeni okwotu ko koshu neshi ipu kawekpa mo Oyesu wo Oyi ko Owuso. 21Kpiri kawase ni pwela nu, igbashi yuwa kwu kweyi akamo, <<Ongo mani pini wase ni ya ngmase ikweyi kiye ko Oyesu ipu ko ogya ko Ojerusele lalo? Oki webe ni kowa kpuwa byase ni bo oruduru ni ga da awosapa nyakwu la?>> 22Onototu ko Oshawulu ke loshu kweyi ya ka dase ko Oyahuda ni bo Odamasko ni kweyi ya ka dawa mo Oyesu wo Omezaya.

23Itikpi ke eno nwashika ni shigbo ni, ase ko Oyahuda ga gbela koyo ngmo, 24Oshawulu ke kwobonu gyipya wa. Kotu ke eno aba gbeho nu ofunu-oba ko ogya koyo ngmo. 25Otu ke eno oye awogboso Oyesu yo Oshawulu yo tipu ko ogwugwu kweyi yo ngma, abyo bwo okpe gese.

Oshawulu Go Ojerusele

26Ishini Oshawulu wo Ojerusele ni, otakirikwu ko gipu kawogboso Oyesu, kpiri wa ke ba yoshi nu, akyogwu mo owinogboso lo. 27Obarnabas ke byo gebe ka ayikoko ko Oyesu. Oka dawa ishini Oshawulu yowe ni oma Adole ni Adole kela danu kweyi otono kiye ko Oyesu Odamasko gboshi lo ni. 28Ebeni Oshawulu yagye kpawa kweyi ya gyehe kpotu oye kponu Ojerusele, ya tono kpoko loshu ipu kiye ka Adole. 29Oya tono kweyi ya tawashu kpase ko Oyahuda ni ba ko ose ko Girik ni, awa ke ba tikpo ko yo ngmo. 30Ishini awokyogwu pwoza mani ni, abyo Oshawulu go Okesariya kweyi abyoshi go Otarsus.

31Ebeni kpiri kawase ni bagbabo ko Oyahudiya kpo Ogalili kpo Osamariya ni pyoyagye ko omene. Aloshu ipu ko Omaku ko Owuso, kweyi ewa wa manu, byoni abagye ipu koshi ka Adole ni.

Obitrus Go Olida kpo Ojopa

32Ni Obitrus ya gyehe okpagye kpiri ni, ogebe kawase neshi ko Owuso Olida. 33Ebeni omo ongo oye iyenu wi Iniyas, ni ngmonyodu kweyi ya gege ko nyiso ogwudu lo kishayi ahata ni. 34Obitrus kadanu mo, Iniyas, <<Oyesu Okristi na dawogege. Nyiso sho la aputu wo.>> Ebebeni Iniyas nyiso iso. 35Kpiri kase ni bo Olida kpa agye ko Osharon mo kweyi apya gboso Adole.

36Ipu ko Ojopa onya oye iyenu wo Otabita, owinogboso Oyesu. (Iyenu okwunu ko ose ko Ogirik wo Odokas). Ozishi nu kpiri ya yoza neshi kweyi ya tawoleha abo. 37Ishi oni ogbere kweyi ogekwu. Agwiye kweyi ayokwunu tagye oda ki iso. 38Olida lenu kpo Ojopa, ishini awogboso ni bo Ojopa pwo mo Obitrus yo Olida ni, atase epa oleho ga kadanu mo, <<Wa papa!>>

39Mani oni Obitrus nyiso kweyi ga kpawa. Ishini ofu ni, abyo goda ki iso ni ayo tagye ni, ebe ni kpiri ka anyokwu hagye beeyi ba kyegba kweyi aba shiyanu oshiye kpo obagidi ni Odokas tu dawa ishini oyiyi ni.

40Ebeni Obitrus yuwa kpiri nu sho oda kweyi okwagye ya tinarigwu. Opyiyi gebe ko okwu ko onya mani kweyi okamo, <<Otabita, nyiso.>> Ogwiyi kweyi omo Obitrus, onyiso yagye iso. 41Ebeni Obulus webe nu odanu abo kweyi yo nyiso. Ebeni oyawase ni kyogwu ni kpa anyokwu ogwu kweyi yo dawa kpolayi. 42Oshu kela mani ge ebebenya agye ko Ojopa, kweyi ase nwashika kyogwu kpa Adole. 43Obitrus yagye Ojopa ke eno nwashika ole kino yoko ko okpa iyenu wo Osimo.

Currently Selected:

Oko-ki-igabo 9: ALA

Highlight

Copy