Oroma 7
7
Ɛzɔ Iyi Iŋɔma Iyi Oko Mbala Ɔnu Akwu Kyamate Iŋɔma nzu Mbala Okrasi Tayi
1Ɛmɛnɛ mi, lu yitu tee, iso iyi mi so le mi so mbala enzu umba bɔkɔ o yitu iyi ɛrama. Ɛrama i yi ekpasu mu reshi ingyi enzu umba bɔkɔ o yi kwunyɔ le kɛɛkyi. 2Izɔma yi i yi tee, ɛrama ikyo oko mbala ɔnu mesu tabɔkɔ ɔnuwu e ye la reyi; ba akwiyi gba ɔnu wu e kpomo, oko awu a wɔma mu ɛrama ɛnyi. 3Akwiyi gba oko a ya ɔnu awa gba ɔnu wu e yi la reyi bɛnɛ, o ya wu tee u to kaya, gba ɔnu wu e kpomo-o, a wɔma mu ɛrama ɛnyi-a, gba a ya ɔnu awa lala ba akwu u to kaya fo. 4Te gba i yi le ɛmɛnɛ mi, lunyi tete lu kpomo mu ɛrama-a, kwuwongu lu kyo mu ɛnwu iyi Okrasi; kekelele lu kwu umba wu uwu bɔkɔ o yi wu mo mu lukwu awu kwuwongu kaa la lu wo ɛduma iyeshi iyi Ukpo. 5Moo kwuyengwu bɔkɔ ki zɛma mu ingbomo iyi ɛnwu awu, ekweyi iyi ingbomo iyi bɔkɔ ɛrama i zɔ yi nzu awu i yi mu ɛduma iwomo mu ɛnwu nzu bɛnɛ, akwɛyi ki wa la imwuma iyi i ka nzu la lukwu. 6Kekelele Ukpo a wanzu ma mu ɛrama a, kwuwongu ki kpomo mu kiya ingyi bɔkɔ ki ma nzu ma dɛɛ awu; kaa la ki wo ɛduma mu ɔgwuzɛ uwepo ele mu imbwama iyi kwundu, moo lakwu mu ɛrama iyi bɔkɔ o ka yi ma awu fo.
Ɛrama Iyi Omosisi Mbala Ekpasu Iyi Ingbomo
7Akwu tee ki so kekelele tee ɛrama akwu ingbomo ŋa mo? Akwu tayi mo! Ɛrama gba i zɔ mi ingbomo le, moo ɛrama gba li zɔ tee, <<Ki wo ekweyi iyi kiya ingyi onzu awa mo,>> Mi bi yitu iyi ɛnyi mu egbo mi mo. 8Ba i se mu ɔkpa gba ingbomo i fya kapa ma gba i yela ekweyi iyi ɛnwu ma mami le. Gba ɛrama li yi mo ingbomo li bi kpomo. 9Kwuye ungwu bɔkɔ ɛrama i yi mo awu mi ye lakwunyɔ; ɛrama bɔkɔ i bo ŋa le, akwɛyi ingbomo i fya ekpasu ma, 10ba imi mi kpomo. Akwɛyi ɛrama iyi bɔkɔ ifate li bo la kwunyɔ le i bo la lukwu. 11Ingbomo i fya kapa ma i se mu ɛrama, i kyoro mi mo akwɛyi i ngbɛ mi ma. 12Kwuwo ngwɔlɛ ɛrama mafyi yi i yi sɛsɛ, ɛrama i yi ngbulolo ba i shoshi. 13Akwu te ingyi bɔkɔ ki shoshi le ki ka mi la lukwu ŋa mo? Ayimo! Akwu kwuwongu kaa lo zɔngɔma ingbomo ma le gba kiya ingyi ki shoshi awu ki bo la lukwu le, akwu mu ɛrama gba ingbomo i zɔ ɛnwu yi ma tee akwu ingbomo shɛ le.
Ovyo Uwu E Yi Mɛmi Iyi Egbo Iyi Onzu
14Ki yitu tee Ɛrama akwu kiya ingyi kwundu; Imi ba mi kwu onzu uwu inyi igyi, unye uwu ingbomo. 15Mi zɔngɔma iyi mi yi mu iwomo le ma mo, Moo akwiyi mi gyi le gba mi yi mu iwomo le mo, iyi mi gyi mo le gba mii wo le. 16Akwiyi gba mii wo iyi bɔkɔ mi gyi mo, de ba mi nyama tee ɛrama akwu ongbulolo. 17Te gba i yi le, akwu Imi gba mi yi mu apula ɛnyi i womo le mo, akwu ingbomo iyi bɔkɔ i yi ma mi le gba iyi mu iwomo le. 18Mi yitu tee kiya ingyi ki shoshi kikpikpɛnyi te ki yi mami mo, kwuwongu mi kwu onzu uwu ingbomo. Moo Imi mi gyi te la mi wo kiya ngyeshi, ba mi do ngyi iwomo mo. 19Akwu esheshi iyi bɔkɔ mi gyi te kaa mi wo le gba mi wo le mo; ɔbulɛ, iyira iyi bɔkɔ mi gyi te kaa mi wo yi mo le gba mi wo le. 20Kekelele akwiyi gba mii wo kiya ingyi mi gyi mo, akwu imi gba mi wo ngyi awu mo; akwu ingbomo iyi bɔkɔ iyi mami le gba i wo ngyi awu.
21Akwɛyi mi ma yi mu ɛrama tee: kwuyengwu mi gyi la mi wo esheshi, mi ma ɛnwu mi te mi wo ira. 22Moo mu egbo mi mɛmi mɛmi, mi mwɔnyɛ mu ɛrama iyi Ukpo. 23Imi ba mi ma ɛrama iyifo i yi mu ɛduma iwomo mu ɛnwu mi, i kiri ewa la ɛrama iyi bɔkɔ mi gyi le, i ra mi iwo unye uwu ingbomo iyi bɔkɔ iyi mu ɛduma iwomo mu ɛnwu mi le. 24Mi kpɛdɔ-ɔ! Uwe bɔkɔ a na mi ma mu ɛnwu iyi bɔkɔ i sheye mi mu lukwu le? 25Ɛnyi la kwiyi Ukpo, uwu bɔkɔ e wo yi mo mu Ɔzhizɔsi Okrasi Ɔkwu nzu!
Mu egbo mi: imi mi kwu unye uwu ɛrama iyi Ukpo, ɛnwu mi ba ii wo ɛduma la ɛrama iyi ingbomo.
Currently Selected:
Oroma 7: ETP
Highlight
Copy
Compare
Share
Want to have your highlights saved across all your devices? Sign up or sign in
The Word for the World International and The Word for the World Nigeria
