Omatiyu 17
17
Ɔzhizɔsi A vindɔma
(Omaki 9.2-13; Oluku 9.28-36)
1Mizhikembo iyi afyi ɛrɛnyi akwɛyi Ɔzhizɔsi e to Opita, Ozhemisi mbala Ɔzhɔnu umanyiwu Ozhemisi, akwɛyi a ka mba mu kadu unga lowa o ka o ko ŋɔma mɔmɔ kɛɛkyi mba. 2Tabɔkɔ o yi mɔmɔ akwɛyi o ma Ɔzhizɔsi tee a vindɔma: ureyi wu u lemo kyamate ɔnu tayi, ekpayi iyi ɛnwu wu ba akwu iruwu puratata. 3Akwɛyi o ma Omosisi mbala Elazha o yi mu iso isomo mbala Ɔzhizɔsi. 4Opita a za la Ɔzhizɔsi tee, <<Ee Ɔkwu, ishoshi bɔkɔ ki yi munɛ le! Gba i she ŋɔ woshi, mi la ɛnu ɛla munɛ, kwukpɛnyi akwu ungwaŋa, ungufo akwu ungwu Omosis, ungufo ba akwu ungwu Elazha.>>
5Tabɔkɔ e degbo mu iso ɛnyi isomo bɛnɛ akwɛyi kwɔmu kwu lemo kwu kpo mamba akwɛyi opwu u wɔ mu kwɔmu tee, <<Ele akwu Umɛ mi, uwu mi pwu idɛnyi wu; uwu mi mu ɔnyɛ wu. La lu pwa iso wu!>>
6Kwuye ungwu Wavɔngɔkiya o pwa ɛlɛ, iyi i wo mbomo akwɛyi o kpo eyi mɛzhi. 7Akwɛyi Ɔzhizɔsi e bo a pwu mba afyi. A za mba tee, <<La lu yimo.>> <<La lu riyi mo!>> 8Kwuye ungwu o yi eyefaa, o ma onzu ukpukpɛnyi fo, Ɔzhizɔsi kɛɛkyi gba o ma le.
9Tabɔkɔ o yi mu ikalama mu lɔwa, Ɔzhizɔsi a za mba tee, << La lu so onzu ɛnyɛnyi kiya ingyi lu ma le mo, nzhii ba Umɛ uwu onzu o yi wu mo mu lukwu dɛ.>>
10Akwɛyi Wavɔngɔkiya wu o yo wu tee, <<I wo te ba wa zɔ ɛrama iyi Omosis o zɔ tee Elazha e to keyi la Okrasi mɛga?>>
11Ɔzhizɔsi a gba mba opwu tee, <<Ee, Elazha a nyɔ keyi laa Okrasi mega kaa la nɔngɔ kiya ingyinangyina ma dɛ. 12Imi ba mi za yi tee Elazha e bo-o enzu ba o zɔngɔ wu ma mo, o wo kiya ingyi bɔkɔ umba o gyi. Tatayi Umɛ uwu onzu a ma wɔnu mu ewo mbo tete.>>
13Akwɛyi Wavɔngɔkiya wu o zɔngɔma tee iso iyi e so ele akwu meka iyi Ɔzhɔnu u wo obatisima.
Ɔzhizɔsi E Bo Umɛshɛri Uwu E Yi Kwundu Ungwura Ofya Ma.
(Omaki 9.14-29; Oluku 9.37-43a)
14Kwuye ungwu o bo mbaa riba ingyi enzu, onzu uwufo e bo mbaa Ɔzhizɔsi e kwu mo mu idu wu, 15akwɛyi a zɔ tee, <<Ɔkwu, shɔɔkɔ ma eyembembyi iyi umɛ mi nɛ! Kwuwongwu e yi ofya umbu ookpo, e yi mu inyashi imama gyɔɔ, mbafo u to wu u ta mɔyi mbafo ba u to wu u ta mu embyi. 16Mi to wu mi kaa laa Wavɔngɔkiya ŋa, umba ba o do wu ofya ibomo mo.>>
17Ɔzhizɔsi a gba opwu a za mba tee, <<Lunyi enzu umba ɔyi uwura bɔkɔ o yi ikwu idu lu fulo mo mbɔlɛ! Mi ŋɔ mbala yi nzhii ba kwuyengwuna dɛ? Mi yi idu mbala yi nzhii ba kwuyengwuna dɛ? La lu ka mi laa umɛ awu munɛ!>> 18Akwɛyi Ɔzhizɔsi a kpa kwundu ungwura kwɔngu ɛyi akwɛyi kwu wɔma mu umɛ awu akwɛyi ofya wu u bomo mu kwotata kwɔngu.
19Wa vɔngɔ kiya o bo o du Ɔzhizɔsi mɛmba, akwɛyi o yo wu tee, <<I wo te bɔkɔ kinzu ki fa la kwundu ungwura kwɔngu irama?>>
20A gba mba opwu tee, <<Akwu kwuwongu lu yi ikwu idu fulo gyɔɔ mo le.>> <<Ongbulolo gba mi so yi le tee, gba lu yi ikwu idu fulo kɛkyi mate kwuyi ungwu omusita te lala, lu za la lɔwa ndɔlɛ tee, <Turumo munɛ kaa so tayi!> ba lu turumo. Kiya ingyinangyina ki ga yi iwomo mo!>> 21Ɛndu iyira ɛlɛ te i wɔ kwudu byi mo, ii kyo Ukpo ilɛma mbala kenyo dɛ.
Ɔzhizɔsi E Siso Iyi Lukwu Wu Kpɔ
(Omaki 9.30 - 32; Luke 9.43b - 45)
22Kwuye ungwu o kpala ɛlu mu Ogalili akwɛyi Ɔzhizɔsi a za laa Wavɔngɔkiya tee, <<O to Umɛ uwu Onzu o yama laa agewa wu.
23akwɛyi o ngbɛ wu ma; ɔnu uwu kwɔfyi ungwola ba o yi wu mo la kwunyɔ.>> Egbo iyi Wavɔngɔkiya i tutumo iiyɛkɔkɔ.
Oba Uwɛzhi Uwu Ɔtɛpu Ishimo
24kwuye ungwu Ɔzhizɔsi mbala Wavɔngɔkiya wu o fye mu Okapanawu, wa na oba uwɛzhi uwu ɔtɛpu o bo mbaa Opita akwɛyi o yo wu tee, <<U zɔ kiya yi e shi oba uwɛzhi uwu ɔtɛpu mo re?>>
25Opita a gba mba opwu tee,
<<Ee, e shi.>> Kwuye ungwu Opita e fye mogba, Ɔzhizɔsi gba e siso keyi le, e yo wu tee, <<Ɔsamɔni, ŋɔ ma te?>> Mbaa enzu umbana bɔkɔ asu umba kwudu kwɔlɛ o na eduwo iyi ifyemo mbala oba uwɛzhi? Mbaa ɛmɛ umba ɛzhi naa mbaa agboga ŋa?>>
26Opita a gba opwu tee,
<<Mbaa agboga.>> Akwɛyi Ɔzhizɔsi a gba opwu tee, <<de ba ɛlɛ i zɔ te ɛmɛ umbu ɛzhi o lu mba ma. 27Kwuwongwu kaa lo wo amba mbala nzu mo, so mu risu kaa ta ɛnyɔ ŋɔ. Umu uwu kwonze bɔkɔ ŋɔ yi, ya wu kenzu mo akwɛyi ŋɔ ma eduwo mɛmi, to yi mo kaa ka mba kaa lakwu oba uwɛzhi nzu.
Currently Selected:
Omatiyu 17: ETP
Highlight
Copy
Compare
Share
Want to have your highlights saved across all your devices? Sign up or sign in
The Word for the World International and The Word for the World Nigeria