Ɔzhɔnu 7
7
Ɔzhizɔsi Mbala Ɛmanyi wu
1Mizhikembo iyi ɛlɛ, Ɔzhizɔsi a fulama mu Ogalili, a gyi te la gɔ mu Ozhudiya mo kwuwongu wa to keyi umba Azhu umba mɔmɔ o gyi te lo ngbɛ wu ma. 2Kwuye ungwu bɔkɔ odumudumu uwu ɛnu uwu Azhu ba e bo kɛlɛɛ, 3akwɛyi ɛmanyi umba Ɔzhizɔsi o za wu tee, <Lafya la munɛ kaa so mu Ozhudiya, kaa wa mbwalu ŋɔ lo ma ɛduma iyi amɛ iyi ŋɔ yi mu womo le. 4Moo onzu uwunawuna uwu bɔkɔ a gyi te enzu lo yitu wu e wo kiya mu invyemo mo. Bɔkɔ ŋɔ yi mu ɛlɛ i womo le, zɔ ɛŋɔ ma la enzu umba kwudu kwɔlɛ lo ma ŋa!>> 5(Moo ɛmanyi wu lala o nyama la wu mo.)
6Ɔzhizɔsi a gba mba opwu tee, <<Kwuye mi kwu du bo mo; lunyi kwuye ngunanguna akwu kwuye yi. 7Enzu umba kwudu o wo anya yi mo, Imi ba o wo anya mi kwuwongu bɔkɔ mi so mbo tee ɛduma mba a kwuyira. 8Lunyi la lu sheyimo mbaa odumudumu. Imi mi re mbaa odumudumu awu mo, kwuwongu kwuye mi kwu du bo mo.>> 9Tabɔkɔ e so ɛlɛ akwɛyi a ŋɔ ya wu mu Ogalili.
Ɔzhizɔsi A Ka Mbaa Odumudumu Uwu Akapwu
10Ɔbulɛ, mizhikembo iyi bɔkɔ ɛmanyi wu o kama mbaa Odumudumu awu, uwu a kama tete, a zɛ gedegede mo, a zɛ wɛrɛrɛ. 11Mbaa Odumudumu mɔmɔ, wa to keyi umba Azhu o gagyi Ɔzhizɔsi o yo kwuyo tee, onzu awu e yi muna?>>
12Enzu o ga la iso wu gyɔɔ meka iyi enzu umba riba mɔmɔ, umbafo o zɔ tee, <<Akwu onzu uwoshoshi.>>
Umbafo ba o zɔ tee, <<Ayimo, e kyoro enzu mo.>> 13Onzu ukpɛnyɛnyi te ba e siso wu gedegede mo kwuwongu oo wiyi iyi Azhu. Ɛnu
14Kwuye ungwu bɔkɔ o wo odumudumu o ka mu andanda, Ɔzhizɔsi a ka mu Ɔtɛpu akwɛyi e le mbo mu kiya izɔma. 15Watokeyi umba Azhu o ya kenzu gyɔɔ o zɔ tee, <<I wote bɔkɔ onzu ele e yitu iyi kiya gyɔɔ te le ba a vɔngɔ ɛzu mo?>>
16Ɔzhizɔsi a gba opwu tee, <<Apula iyi bɔkɔ mi zɔ le akwu iya mi mo. I wɔ mbaa onzu uwu bɔkɔ a lɔ mi ma le. 17Onzu uwunawuna uwu bɔkɔ a gyi tee le wo kiya ingyi bɔkɔ Ukpo a gyi, a zɔngɔma yi ma nana kiya ingyi mi zɔ le ki ngyi mbaa Ukpo nana akwu iya mi. 18Onzu uwu bɔkɔ e siso iyi afyi wu e so kwuwongu kaa la fya inzumbɛku la ɛwu, onzu uwu bɔkɔ e wo ɛduma kwuwongu inzumbɛku iyi onzu uwu bɔkɔ a lɔ wu ma gba akwu onzu ongbulolo le; iso wu i yi imulo mo. 19Akwu Omosisi gba e shi iyi ɛrama le mo re? Onzu ukpɛnyɛnyi yi te lala a mbwalu wu mo. Kimbe ki wo bɔkɔ lu gyi te la lu ngbɛ mi ma le?>>
20Enzu umba riba mbamba o gba wu opwu tee, <<Ŋɔ yi eyombeyi, uwe bɔkɔ a gyi te la ngbɛ ŋɔ ma?>>
21Ɔzhizɔsi a za mba tee, <<Mi wo kiya ingyi amɛ kikpɛnyi akwɛyi lunyi lɛɛbi lu ya kenzu. 22Omosisi e shi kaza te la zɛ ɛmɛ yi anzɔnu ɛsɔ ma, (Ɛrama ɛnyi lala i ngyi mbaa Omosisi mo, i ngyi mbaa umbasɔku keyi), ba lu zɛ umɛ ɔnzɔnu ɛsɔ ma mu kwɔfi ungu ɛnwu igbomo ungwu Azhu. 23Akwiyi gba lu zɛ umɛ ɛsɔ ma mu kwɔfi ungwu ɛnwu igbomo kaa ɛrama iyi Omosisi li fomo mo, kimbe ki wo bɔkɔ luu wamba mbala mi kwuwongu bɔkɔ mi bo onzu ofya ma mu kwɔfyi ungwu ɛnwu igbomo? 24La lu ma kiya meyi kaa la lu zɔ ombu byi mo, la lu zɔ ombu mu ototo.>>
Ɔzhizɔsi Gba Akwu Omezaya Le?
25Akwɛyi enzu umba Ɔzhɛrusalɛ umbafo o yo kwuyo tee, <<Akwu onzu uwu bɔkɔ o gyi te lo ngbɛ wu ma le gba a ŋɔ le mo re? 26Yese, a ŋɔ mu iso isomo gedegede le, ba o so wu kinyinyi te mo. Nana enzu umbakɔ nzu o nyama tee uwu gba akwu Okrasi lee ŋa? 27Kinzu ba ki yitu mbaa bɔkɔ onzu ele a wɔ; kwuyengwu bɔkɔ Okrasi a ba nyɔ, ɔnzɛnzɛnyi te e yi mbaa bɔkɔ a wɔ mo.>> 28Tabɔkɔ Ɔzhizɔsi e degbo mu kiya izɔma mu Ɔtɛpu bɛnɛ, akwɛyi a ya opwu mo tee, <<Lunyi lu yitu mi, ba lu yi mbaa bɔkɔ mi wɔ? Imi mi bo lɛmi mo, onzu uwu bɔkɔ a lɔ mi ma le akwu onzu ongbulolo. Lunyi ba lu yitu wu mo, 29Imi ba mi yitu wu kwuwongu mi wɔ munyi wu uwu gba a lɔ mi ma le.>>
30Kwuwongwɔlɛ o gyi te lo yi wu mo, onzu ukpukpɛnyi te ba apwu wu afyi mo, kwuwongu bɔkɔ kwuye wu kwu du bo mo. 31Tetete, enzu gyɔɔ mu riba ingyi enzu mbamba o kwu idu lu fulo mu Ɔzhizɔsi. O zɔ tee, <<Gba Okrasi awu e bo ee wo lɔzɔ undu amɛ aa ka ele moo?>>
Wa To keyi Umba Azhu O Lɔ Asozha Ma Tee Lo Yi Ɔzhizɔsi Mo
32Afarisi o pwa tee enzu gyɔɔ o yi mu iso iyi Ɔzhizɔsi i somo kyokyo. Akwɛyi wa to keyi umba ebwoshi mbala Afarisi o lɔ wa gbo Ɔtɛpu mo tee lo so kaa lo yi wu mo.
33Akwɛyi Ɔzhizɔsi a zɔ tee, << Imi mii yi mbala yi kwuye bwɛ bi akwɛyi ba mii gbama mi re mbaa onzu uwu bɔkɔ a lɔ mi ma le. 34Luu kagyi mi, ba lu fya mi ma mo; mbaa bɔkɔ Imi mi yi, ba lu do te lu nyɔ mɔmɔ mo.>>
35Enzu umba Azhu o za la esu tee, <<Muna bɔkɔ onzu ele a gyi te le so bɔkɔ ki ma wu mo le? A gyi te le so mbaa enzu nzu umba bɔkɔ o kpashaa mekeka iyi Agiriki le kaa la zɔ Agiriki kiya re? 36A zɔ te ki kagyi wu ba ki ma wu mo, mbaa bɔkɔ e ri ele ba ki ba mɔmɔ mo. Iluma yi akwu mbɛ?>>
Embyi Umba O Shi Kwunyɔ
37Mu kwɔfyi ungwu imbwama ungwu bɔkɔ kwu kwuu ka le mu odumudumu awu, Ɔzhizɔsi yimo e siso mu opwu u wɔkwu tee, <<Onzu uwunawuna uwu bɔkɔ ugbembi u wo wu mo le bo munyi mi kaa le wo. 38Onzu uwunawuna uwu bɔkɔ e kwu idu lu fulo ma mi, mate kwokpo ungwu iso iyi Ukpo kwu so awu, embyi umba o shi kwunyɔ o tumo ma wu akwɛyi o rima.>>> 39Ɔzhizɔsi e so ɛlɛ mu reshi ngyi kwundu, Uwu bɔkɔ enzu wambalu o bo na awu. Kwuye kwɔngu o do shi kwudu o mo, kwuwongu Ukpo e de shi Ɔzhizɔsi inzumbɛku aa mo bɛnɛ, moo Kwundu Uwu Ukpo e bo mo.
Enzu O Ka Epo
40Tabɔkɔ o pwa iso iyi Ɔzhizɔsi ɛlɛ, umbafo mbo o zɔ tee, <<Onzu ele akwu Anukenzu kego.>>
41Umbafo ba o zɔ tee, <<Uwu gba akwu Okrasi le.>>
Umbafo tete o zɔ tee, <<I wo te bɔkɔ Okrasi aa wɔ mu Ogalili? 42Kwokpo ungwu Ukpo kwu so mo re te Okrasi aa wɔ mu ɛdɔ iyi Odevidi mu kwuse ungwu Ɔbɛtilɛhɛ mbaa bɔkɔ Odevidi a ŋɔ le mo re?>> 43Kwuwo ngwɔlɛ enzu mbamba o ka epo kwuwongu Ɔzhizɔsi. 44Umbafo o gyi te lo yi wu mo, ba ɔzɛnzɛnyi te a pwa wu afyi ego mo.
Wa To keyi Umba Azhu O Kwidufulo Mo
45Kwuye ungwu wa gbomo umba ɔtɛpu o gba o ka mbaa wa to keyi umba ebwoshi mbala Afarisi, o yo mbo tee, <<Kimbe ki wo bɔkɔ lu yi wu mo mo?>>
46Wa gbomo mbamba o gba opwu tee, << Ɔzɛnzɛnyi te e siso tayi dɛ mo,>>
47Afarisi o yo mbo tee, <<E kyoro yi moo tete re?.>> 48<< Luma utokeyi naa Afarisi ɛnyi tee e kwu idu fulo ma wu re? 49Riba ngyi enzu mbɔlɛ o yitu iyi ɛrama iyi Omosisi mo, kenzu itama ke yi mbo moo,>>
50Ɔnikɔdimɔ uwu bɔkɔ akwu onzu ɛnyi meka mba bɔkɔ a ka mbaa Ɔzhizɔsi dɛɛ awu, e yo kwuyo tee, 51<<Ɛrama nzu ii shi onzu ombu uwoyi dɛ gba o bo pwa iyi bɔkɔ e wo le re?>>
52O gba wu opwu tee, <<Uŋɔ ŋɔ wɔ mu Ogalili tete re? Yese kwokpo ungwu Ukpo, ba ŋɔ ma tee anukenzu ukpɛnyi te a da wɔ mu Ogalili dɛɛ mo.>>
Currently Selected:
Ɔzhɔnu 7: ETP
Highlight
Copy
Compare
Share
Want to have your highlights saved across all your devices? Sign up or sign in
The Word for the World International and The Word for the World Nigeria
