Ɔzhɔnu 5
5
Ɔzhizɔsi E Bo Ukpokapiya Ofya Ma Mu Kenzu Unga Kwubwu
1Mizhikembo iyi Ɛlɛ, Ɔzhizɔsi a ka mu Ɔzhɛrusalɛ mbaa odumudumu uwu Azhu. 2Kwubu kwu yi mɔmɔ mu Ɔzhɛrusalɛ kɛlɛ mbala Kenzugu unga Ilɔ, ungwu o ya ngwu mu kenzu unga Iburu te Ɔbɛtisada ungwu bɔkɔ ekepe ɛlɔ i fula ngwu ma awu. 3Munɛ gba enzu umba efya gyɔɔ kyamate, epeyi, mbala enzu umba kinyɛ mbala wa kpokapiya, o koko o nɔ, o rigbo te kwubu kwɔngu lakwu wo akpa. 4Mu kwuye, ɔlɔgbulɔ uwu Ukpo ee bo akwɛyi e fo kwubu kwɔngu ma. Onzu uwu ofya uwu bɔkɔ e tekeyi la ifyemo kwuyengwu embyi umba kwubu kwɔngu o wo akpa, ofya umbunambuna umbwu e yi mbwu u bo mo. 5Onzu uwufo e yi mɔmɔ uwu bɔkɔ ofya wu u to lɔri uwekpela la lɔranda-a. 6Tabɔkɔ Ɔzhizɔsi a ma wu te a nɔma mɔmɔ akwɛyi e yitu te ofya umbu onzu ele, u to kwuye gyɔ-ɔ, akwɛyi e yo wu te, <<Ŋɔ gyi te ofya ŋa lu bomo?>>
7Onzu uwu ofya awu a gba wu opwu tee, <<Ada,>> <<Mi yi onzu munɛ uwu bɔkɔ aa mbwami ma kaa le to mi le lo mu kwubu kwuyengwu embyi o wo akpa mo. Kwuye ngwu mi yi mu ikyikyimo kaa la mi fyemo, akwɛyi onzu uwufo e to keyi la mi e fyemo.>>
8Akwɛyi Ɔzhizɔsi a za wu te, <<Yimo! To ɔkyɔ ŋɔ ma ka zɛma.>> 9Mɔmɔ ofya umbwu onzu awu u bomo; e to ɔkyɔ wu akwɛyi e le mu luzɛ.
Kwɔfyi ungwu bɔkɔ kiya ngyɛlɛ ki wo le akwu kwɔfyi ungwu ɛnwu igbomo ungwu Azhu, 10kwuwo ngwɔlɛ watekeyi umba Azhu o za la onzu uwu o bo wu ofya ma awu te, <<Ɔnɛ akwu kwɔfyi ungwu ɛnwu igbomo; ɛrama i nyama te to ɔkyɔ ŋɔ ma mo.>>
11U wu ba a gba opwu te, <<Onzu uwu bɔkɔ e bo mi ofya ma le a za mi te,<To ɔkyɔ ŋɔ ma kaa zɛma.> >>
12Akwɛyi o yo wu te, <<Onzu uwu bɔkɔ a za ŋa te wo ɛlɛ awu akwu uwe?>>
13Onzu uwu o bo wu ofya ma le ba e yitu uwe bɔkɔ akwu Ɔzhizɔsi mo, moo Ɔzhizɔsi a zɛ mekeka iyi riba ingyi enzu umba bɔkɔ o yi mɔmɔ akwɛyi a wirima a kama iyawu .
14Mizhikembo iyi ɛlɛ, Ɔzhizɔsi e du wu mu ɔtɛpu akwɛyi a za wu te, <<Yese, kekelele ŋɔ gba la okpara uwu ɛnwu ŋɔ ma-a, lafya la ingbomo moo kiya ingyi ki ka ngyɛlɛ ma ki bi du ŋɔ mo.>> 15Akwɛyi onzu awu a ka ma akwɛyi a ka za la watekeyi umba Azhu te akwu Ɔzhizɔsi gba e bo wu ofya ma le.
16Kwuwo kwɔlɛ, wa to keyi umba Azhu o le mu Ɔzhizɔsi inyashi ilomo kwuwongu e yi mu apula ɛlɛ iwomo mu kwɔfyi ungwu ɛnwu igbomo. 17Ɔzhizɔsi a za mba te, <<Adami e yi mu ɛduma iwomo nzhii ba kwɔfyi ungwu ɔnɛ, Imi tete, mi wo ɛduma mɛga.>> 18Kwuwo kwɔlɛ wa to keyi umba Azhu o yirimo mu ɔgwuzɛ igagyima kaa lɔ ngbɛ wu ma; akwu kwuwongu bɔkɔ e fo ɛrama iyi Kwɔfyi ungwu ɛnwu igbomo mo kɛɛkyi le mo, ikyo a zɔ te Ukpo akwu Ete wu, iyi bɔkɔ i zɔ te e fulo ɛnwu wu kyakya mbala Ukpo.
Idomo Iyi Ɔzhizɔsi, Umɛ Uwu Ukpo
19Ɔzhizɔsi a gba mba opwu te, <<Mi so yi ongbulolo mɛɛ, Umɛ e do kiya kinyinyi iwomo mafyi wu mo; iyi bɔkɔ a ma Ete wu te e yi mu iwomo, gba u wu ba e wo le. Kiya ingyi bɔkɔ Ada ee wo, Umɛ ee wo tete. 20Moo Ada e pwu idɛnyi iyi Umɛ gba a zɔ wu iyinayina bɔkɔ e yi mu iwomo le. Ee, u wu lala a gba a zɔ wu apula iwomo iyi bɔkɔ i ka ɛlɛ ma akwɛyi i shi yi lɛɛbi kenzu iyama. 21Kyamate bɔkɔ Ada ee yi enzu umba o kpomo mu kwuvɔ akwɛyi ee shi mbo kwunyɔ awu, tatayi gba Umɛ ee shi onzu uwu bɔkɔ uwu a gyi, kwunyɔ le. 22Ada ee to onzu ukpukpɛnyi te ombu mafyi wu mo. E shi Umɛ wu ekpasu lɛɛbi kaa le to ombu, 23kaa uwewe le lo Umɛ ma kyamate o lo Ada ma tayi. Onzu uwu bɔkɔ e lo Umɛ ma mo, e lo Ada uwu bɔkɔ a lɔ wu ma mo.
24<<Ongbulolo gba mi so yi le tee, onzu uwunawuna uwu bɔkɔ a pwa iso mi akwɛyi e kwu idu lu fulo mu onzu uwu bɔkɔ a lɔ mi, e yi kwunyɔ ungwɔkpɔ akwɛyi o ngbɛ wu ombu uwoyi fo; a sa lukwu ma e yi kwunyɔ ɔ. 25Mi so yi ongbulolo mɛɛ, kwuye kwu yi mu inyɔma, ungwu lakwu bo-o, bɔkɔ ɛkpɛzhi umba enzu ɔɔ pwa opwu uwu Umɛ uwu Ukpo akwɛyi umba bɔkɔ o pwa wu o gba lakwunyɔ. 26Moo kyamate bɔkɔ Ada mafyi wu gba akwu undu uwu kwunyɔ le awu, tatayi e shi Umɛ kaa lakwu undu uwu kwunyɔ. 27Akwɛyi e shi Umɛ ekpasu kaa le to ombu kwuwongu u wu akwu Umɛ uwu Onzu.
28<<Ɛlɛ li shi yi kenzu iyama mo, moo kwuye kwu yi mu inyɔma bɔkɔ umba bɔkɔ o yi mu kwuvɔ o pwa opwu wu 29akwɛyi ɔ wɔ kwudu mu agariwu mba: umba bɔkɔ o wo iyeshi oo yimo oo yi kwunyɔ, akwɛyi umba bɔkɔ o wo iyira ba oo yimo akwɛyi o ngbɛ mba ombu uwoyi.
Azɔgɔ Umba Ɔzhizɔsi
30Imi mi do te mi wo kiya kinyinyi mu ekpasu mi mo; ewo iyi bɔkɔ Ukpo e so mi gba mi to ombu le, kwuwo ngwɔlɛ ombu itomo mi akwu ongbulolo kwuwongu akwu kiya ingyi mi gyi gba mi yi mu iwomo le mo, ingyi onzu uwu bɔkɔ a lɔ mi ma a gyi gba mii wo le.
31Gba mi zɔ izɔgɔ iyi ɛmi, izɔgɔ mi ɛnyi akwu ongbulolo mo. 32Onzu uwufo ba e yi uwu bɔkɔ aa zɔ izɔgɔ iyami, Imi mi yitu te izɔgɔ wu mu reshi mi akwu ongbulolo.
33<<Lunyi lu lɔ alɔgbulɔ mbaa Ɔzhɔnu akwɛyi uwu ba e so ongbulolo. 34Akwu te mii na izɔgɔ iyi onzu uwu inyi igyi le mo; Imi ba mi so ɛlɛ te ka la lu fya isama le. 35Ɔzhɔnu e yi kyamate ututula tayi, e shi ɛbɛ akwɛyi lu nyama lu mwɔnyɛ iyi ɛbɛ wu kwuye bwɛ.
36<<Imi mi yi izɔgɔ iyami mu reshi mi iyi bɔkɔ i ka iyi Ɔzhɔnu a zɔ mu reshi mi ma. Ɛduma iyi bɔkɔ Ada e shi mi te la mi wo, iyi bɔkɔ mi yi mu iwomo, i zɔ tee Ada gba a lɔ mi ma le. 37Ada uwu bɔkɔ a lɔmi ma le uwu mafyi wu a zɔ izɔgɔ mu reshi mi tete. Lu du pwa opwu wu dɛ mo ba lu du ma ureyi wu dɛ mo, 38iso wu ba i yi mu egbo yi mo, moo lu kwu idu fulo mu onzu uwu bɔkɔ a lɔ awu mo. 39Lu shi egbo yi mu iso iyi Ukpo iwama marimari kwuwongu lu mamate tee ma yi gba lu fya kwunyɔ ungwu ɔkpɔ le. Iso iyi Ukpo ɛlɛ gba ba i siso mu reshi mi le, 40tetete lunyi lu towo i bo munyi mi kaa la lu fya kwunyɔ.
41<<Imi mi yi mu kwupwɔ igagyima mbaa enzu mo. 42Imi mi yitu yi, mi yitu tee lunyi lu yi idɛnyi iyi Ukpo mu egbo yi mo. 43Imi mi bo mu idomo iyi Ada mi, lunyi ba lu na mi mo; gba onzu uwufo ba e bo mu idomo iyawu, lu na wu. 44Lu wo la ba lu nyama la mi, moo lu gyi ipwɔma iyi esu ba lu wo ekpasu kaa la lu yi ipwɔma iyi bɔkɔ ii wɔ mbaa onzu uwu bɔkɔ u wu kɛɛkyi gba akwu Ukpo le mo awu?
45<<Lunyi ba la lu mate mi lo ewa yi mbaa Ada mo. Onzu uwu e lo ewa yi gba akwu Omosisi le, uwu bɔkɔ lu fulo eyi ma wu awu. 46Gba la lu nyama la Omosisi ngboro, ba la lu bu nyama la mi, moo a ka ɛzu mu reshi mi. 47Ɔbulɛ lunyi ba lu nyama la apula iyi bɔkɔ a ka mo le, lu wo la bɔkɔ lu nyama la apula iyi bɔkɔ mi so?>>
Currently Selected:
Ɔzhɔnu 5: ETP
Highlight
Copy
Compare
Share
Want to have your highlights saved across all your devices? Sign up or sign in
The Word for the World International and The Word for the World Nigeria
