Ɔzhɔnu 2
2
Odumudumu Uwu Oko Itomo Mu Ogalili
1Ɔnuwu kwɔfyi ungwɔla, o wo odumudumu uwu oko itomo mu kwuse ungwu Okena mu ɛzhi iyi Ogalili. Anyi wu Ɔzhizɔsi e yi mɔmɔ, 2Ɔzhizɔsi mbala Wavɔngɔkiya wu, ɔ lɔ la mba tete mbaa odumudumu awu. 3Kwuye ungwu bɔkɔ embyi umba iwomo umba agboga o bomo, anyi wu Ɔzhizɔsi a za wu te, <<Embyi umba iwomo mbo o bo-o.>>
4Akwɛyi Ɔzhizɔsi a za wu te, <<Ɛnɛ, akwu ŋɔ gba ŋɔ so mi kiya ingyi mii wo le mo>> <<Kwuye mi kwu du bo mo.>>
5Akwɛyi anyi wu Ɔzhizɔsi a za la enzu umba ɛduma te, <<Kiya ingyinangyina ingyi bɔkɔ A za yi te la lu wo, ba la lu wo.>>
6Ariba iyi embyi ɛrɛnyi iyi bɔkɔ o wo mu ekyi i yi mɔmɔ. Kworiba kwukpɛnyi kwu ri ɛgalɔ i pika uwo ekpepo ma. Ariba ɛlɛ o shi yi kwuwongu alɛ igbɔma iyi bɔkɔ ukwu uwu Azhu u zɔ te lo wo.
7Akwɛyi Ɔzhizɔsi a za la enzu umba ɛduma mbamba te, <<la lu nyɔlɔ ariba a ɛlɛ ma mu embyi>>; akwɛyi o nyɔlɔ yi ma duduu!
8Akwɛyi a za mba te, <<la lu gyi ŋa nɛ kaa la lu ka la u to keyi uwu odumudumu.>>
Akwɛyi o gyi o ka wu, 9akwɛyi a pwa embyi mbɔlɛ ma umba bɔkɔ o vindɔ embyi umba inyima le. Uwu ba e yitu muna bɔkɔ embyi umba inyima mbɔlɛ o ngyi mo, enzu umba ɛduma mbamba gba o yitu le. Akwɛyi a ya ɔnu uwu okopo ma mɛmba 10akwɛyi a za wu te, << Uwewe a da la embyi umba bɔkɔ o shoshi o ka le gba ee shi le. Mizhikembo iyi agboga o wo o do mbo mo-o gba aa wa la umba bɔkɔ o shoshi o ba mo le. Uŋɔ ba ŋɔ nvye umba bɔkɔ o shoshi o ka le mo nzhii ba kwuye ngwɔlɛ gba ŋɔ wa mba kwudu le?>>
11Ɛlɛ gba akwu kɛzɔ unga amɛ unga kwonze bɔkɔ Ɔzhizɔsi e wo mu kwuse ungwu Okena mu ɛzhi iyi Ogalili le. Iwomo ɛlɛ i wa laa inzumbɛku iyi Ɔzhizɔsi kwudu, akwɛyi Wavɔngɔkiya wu o kwu idu o fulo mawu.
Ɔzhizɔsi A Ka Mu Ɔtɛpu
(Omatiyu 21.12,13; Omaki 11.15-17; Oluku 19.45,46)
12Mizhikembo iyi ɛlɛ, Ɔzhizɔsi mbala anyi wu mbala ɛmanyi wu mbala Wavɔngɔkiya wu o yi o ka mu Ɔkapanawu akwɛyi ɔ ŋɔ mɔmɔ afyi bwɛ.
Ɔzhizɔsi A Ka Mu Ɔtɛpu
(Omatiyu 21.12,13; Omaki 11.15-17; Oluku 19.45,46)
13Tabɔkɔ kwuyengwu odumudumu uwu ikalama uwu Azhu kwu ndafo, akwɛyi Ɔzhizɔsi a ka mu Ɔzhɛrusalɛ. 14Mu okpulo uwu Ɔtɛpu mɔmɔ e du enzu mu endo iyama mbala ilɔ mbala atatabiri, mbafo ba ɔ ŋɔma o yi mu eduwo ingangama la enzu mu eteburu. 15Kwuwo kwɔlɛ, Ɔzhizɔsi e wo kwukpa mu ekyikyi akwɛyi a ra mbama lɛɛbi ɔ wɔ kwudu mu ɔtɛpu mbala ilɔ mbala endo mbo; eduwo iyi wa nganga eduwo a kpa yashaa akwɛyi apula iyi iŋɔma mba e kpo ye mbwe mbwe. 16Akwɛyi a kpa wa ya atatabiri ma ɛyi, a za mba te, <<la lu wa mba kwudu munɛ! Uwe a za yi te kwogba ungwu Adami akwu mbaa rishi iyama!>>
17Akwɛyi Wavɔngɔkiya wu o lolo iyi bɔkɔ ɔ ka mu kwokpo ungwu Ukpo te, <<Idɛnyi iyi kwogba ŋa i pwu mi kyamate ɔyi tayi.>>
18Akwɛyi wa to keyi umba Azhu o ko yo wu te, <<Kɛzɔ unga amɛ unga na bɔkɔ ŋɔ zɔ nzu kaa li zɔ te ŋɔ yi idu mo iyi ɛlɛ lɛɛbi iwomo.>>
19Akwɛyi Ɔzhizɔsi a gba mba opwu a za mba te, <<la lu shiri ɔtɛpu ele mo nɛ, Imi ba mi gba wala imbomo mu afyi ɛla.>>
20Akwɛyi Azhu o yo wu te, <<Lɔri uwekpendo la lɔrɛnyi gba o to gba o mbo ɔtɛpu ele le, uŋɔ ba ŋɔ zɔ te ŋɔ gbawa la imbomo mu afyi ɛla bi?>> 21Ɔtɛpu uwu bɔkɔ Ɔzhizɔsi e so le ba akwu ɛnwu wu gba e so le. 22Mizhikembo iyi o yi Ɔzhizɔsi mo mu kwuvɔ akwɛyi Wavɔngɔkiya wu o lolo iyi e so, akwɛyi ɔ nyama la iso iyi bɔkɔ ɔ ka mu kwokpo ungwu Ukpo mbala iso iyi bɔkɔ Ɔzhizɔsi e so.
Ɔzhizɔsi E Yitu Iyi Egbo Iyi Onzu
23kwuyengwu bɔkɔ Ɔzhizɔsi e yi mu Ɔzhɛrusalɛ mbaa Odumudumu uwu ikalama, enzu gyɔɔ ɔ ma lɔzɔ undu amɛ undu e yi mu iwomo akwɛyi o nyama la wu. 24Ɔzhizɔsi ba a nyama la mba mo, moo e yitu mbo lɛɛbi. 25Ugɔ a kpa wu kaa lo so wu iso iyi onzu mo, moo e yitu iyi egbo iyi enzu lɛɛbi.
Currently Selected:
Ɔzhɔnu 2: ETP
Highlight
Copy
Compare
Share
Want to have your highlights saved across all your devices? Sign up or sign in
The Word for the World International and The Word for the World Nigeria
