Ɔzhɔnu 19
19
1Akwɛyi Opayileti e to Ɔzhizɔsi mo akwɛyi e shi wu te lo fya wu izele. 2Asozha o ndo kese unga awula akwɛyi o lo wu yi mu reshi. O kpo wu ɛkiri mɛnwu 3akwɛyi o bo munyi wu, <<O to wu ɛnyi o za wu tee, ɔsu uwu umba Azhu!>> Akwɛyi o kpa wu afyi meyi.
4Opayileti a wɔ kwudu kpɔ akwɛyi a za la Azhu te, <<La lu yese, mi wa wu kwudu kaa mi shi wu yi moo mi ma ingbomo ikpɛnyi te mɔgɔ wu mo.>> 5Kwuye ungwu bɔkɔ Ɔzhizɔsi a wɔ kwudu la kese unga awula mbala ɛkiri, Opayileti a za mba te, <<La lu yese onzu awu a ŋɔ le!>>
6Mu kwotota ungwu bɔkɔ obwoshi uwakɔ mbala wa to keyi o ma wu akwɛyi o wo ovyo iyɛkɔkɔ tee, <<Kpa wu mu kwuwɛyi! Kpa wu mu kwuwɛyi!>>
Opayileti ba a gba opwu tee, <<La lu to wu kaa la lu kpa wu mu kwuwɛyi. Moo lakwu iya mi, mi ma kwuyi kwukpukpɛnyi te ungwu mi ngbɛ wu ombu uwoyi mo.>>
7Enzu umba Azhu ba o bɔ kpɔɔ te, <<Ki yi ɛrama nzu, akwiyi gba ki mbwalu ɛrama nzu ifate ka le kpomo, kwuwongu a zɔ te uwu akwu Umɛ uwu Ukpo.>>
8Kwuye ungwu bɔkɔ Opayileti a pwa ɛlɛ, iyi i wo wu mo gyɔɔ, 9a gbama a ka mu udaba. Akwɛyi e yo Ɔzhizɔsi kwuyo te, <<Ŋɔ wɔ muna?>> Ɔzhizɔsi ba a gba wu opwu mo. 10Opayileti a zɔ te, <<Ŋɔ so mi iso moo?>> <<Ŋɔ yitu tee mi yi ekpasu iyi bɔkɔ mi lu ŋɔ afyima naa mi kpa ŋa mu kwuwɛyi mo re?>>
11Ɔzhizɔsi a gba opwu tee, <<Ŋɔ yi ekpasu munyi mi mo akwiyi gba o to o shi ŋɔ wɔ moshi mo. Kwuwo kwɔlɛ onzu uwu bɔkɔ e to mi e shi ŋɔ le e yi ingbomo gyɔɔ ka ŋa ma.>>
12Tabɔkɔ Opayileti a pwa ɛlɛ e wo ka la lafya la Ɔzhizɔsi le, Azhu ba o kpa kpɛɛ mu ovyo iwomo te, << Akwiyi gba ŋɔ lafya la onzu ele gba a kama, ŋɔ kwu umɛza uwu Osiza mo. Onzu uwunawuna uwu bɔkɔ akwu ɛnwu tee uwu akwu ɔsu akwu ogewa uwu Osiza.>>
13Tabɔkɔ Opayileti a pwa iso ɛlɛ, akwɛyi a wa la Ɔzhizɔsi kwudu akwɛyi a ka ŋɔma mu ukpa uwɛsu mu kizɛ ingyi bɔkɔ o yitu ngyi te akwu kwoki ungwɔkwu (Mu kenzu unga Iburu o ya ngwu tee Ogabata). 14Akwu kwɔfyi ungwu ɛnwuyimo iyi odumudumu uwu ikalama, i yi mate awa ɛrɛnyi te. Akwɛyi Opayileti a za la Azhu te, <<Ɔsu yi a ŋɔ le.>>
15Umba ba o wo ovyo te. <<Lo ngbɛ wu ma! Lo ngbɛ wu ma! Kpa wu mu kwuwɛyi!>>
Opayileti e yo kwuyo te, <<La mi kpa ɔsu yi mu kwuwɛyi?>> Eboshi umbakɔ o gba opwu tee, <<Ki yi ɔsu awa mo, Osiza kɛɛkyi.>>
16Mu imbwama yi Opayileti e shi wu mbo ka lo kpa wu mu kwuwɛyi.
O Bɔ Ɔzhizɔsi Iba Mu Kwuwɛyi
(Omatiyu 27.32-44; Omaki 15.21-32; Oluku 23.26-43)
Kwuwo kwɔlɛ asozha o to Ɔzhizɔsi o kawu ma.
17E shi kwuwɛyi ungwu lukwu wu, a ka mu kizɛ ingyi akɔgɔ iyi reshi (iyi bɔkɔ o ya yi mu kenzu unga Iburu te <<Ɔgɔlugɔta.>>) 18Mɔmɔ gba o kpa wu mu kwuwɛyi le, mbala anzɔnu wepo umbafo, uwufo e yi mu kwuwo ungwɔzu uwufo ba e yi mu kwuwo ungwungyi wu akwɛyi Ɔzhizɔsi ba e yi mekeka. 19Opayileti a ka ɛzu a kpa yi mu kwuwɛyi ungwu lukwu. A ka te: ƆZHIZƆSI UWU A WƆ MU ƆNAZARƐTI, ƆSU UWU AZHU. 20Azhu gyɔɔ o wa ɛzu ɛlɛ, moo kizɛ ingyi bɔkɔ o kpa Ɔzhizɔsi mu kwuwɛyi awu ki yi kɛlɛ mbala kwuse. Kɛzɔ kanga ba o ka nga mu Iburu, Olati mbala Ogiriki. 21Eboshi umbakɔ umba Azhu o wo ovyo o ka mbaa Opayileti akwɛyi o za wu te, <<Ki ka te, <Ɔsu uwu Azhu mo> ka te, <<Onzu ele a zɔ te uwu akwu ɔsu uwu Azhu.> >>
22Opayileti a gba mba opwu a zɔ te, <<Iyi mi ka, mi ka-a.>>
23Kwuye ungwu asozha ba o kpa Ɔzhizɔsi mu kwuwɛyi awu, o lu wu ɛriga ma, o ka yi ma yɛyɛ ikpendo, onzonzu mbo e to kwuko kwukpɛnyi. O to ɔmu wu ma tete, ekpayi ɛlɛ o gbɔ yi ma mo, o yi kwuko kwukpɛnyi ma wɔ mu kadu nzhii ba mɛzhi.
24O so mbala esu te, <<La ki tara yi ma mo>> <<La ki fu ovotu kaa la ki ma onzu uwu bɔkɔ a fya kaa lakwu iyawu.>>
Ɛlɛ i wo te kaa iso iyi Ukpo li nyɔlɔma iyi bi zɔ te,
<<O ka ekpayi mi ma laa esu
akwɛyi o wo ovotu iyi ekpayi mi.>>
Ɛlɛ gba akwu kiya ingyi asozha o wo le.
25Anyi uwu Ɔzhizɔsi a rima kɛlɛ mba kwuwɛyi ungwu lukwu, mbala ɔtumanyi uwu Ɔzhizɔsi, Omeri oko uwu Okilopasi mbala Omeri Omagadali. 26Kwuye ungwu bɔkɔ Ɔzhizɔsi a ma anyi wu mɔmɔ mbala u vɔngɔ kiya wu uwu bɔkɔ e pwu idɛnyi wu awu a rima kɛlɛ mɔmɔ, akwɛyi a za la anyi wu te, <<Okokpayi, yese, umɛ ŋɔ a ŋɔ le>> 27akwɛyi a za la u vɔngɔ kiya awu te, <<Ɛnɛ ŋɔ a ŋɔ le.>> I na mu kwuye kwɔngu ishekeyi, u vɔngɔ kiya awu e to wu mo a ka wa mogba wu.
Lukwu Undu Ɔzhizɔsi
(Omatiyu 27.45-56; Omaki 15.33-41; Oluku 23.44-49)
28Ɔzhizɔsi e yitu te a mbwa apula lɛɛbi ma-a, akwɛyi kwuwongu kaa iso iyi Ukpo li nyɔlɔma, Ɔzhizɔsi a zɔ te, <<Ugbembi u wo mi mo.>> 29Ogya uwu embyi umba iwuma ba e shi kɛlɛ mɔmɔ, akwɛyi o lo amegbere mɛmi mba, o lo ngwu mu kwuwɛyi ungwu amegbere, akwɛyi o yi ngwu mo o ka ngwa kɛlɛ mbaa kenzu unga Ɔzhizɔsi. 30Kwuye ngwu bɔkɔ a na embyi mbamba ma, akwɛyi Ɔzhizɔsi a zɔ te, <<I bo mo-o.>> Tabɔkɔ e so tayi, akwɛyi e le reshi mo akwɛyi a ta kwunyɔ ma.
O La Ɔzhizɔsi Kwɔku Mu Kamba
31Akwɛyi wa to keyi umba Azhu o nda Opayileti kwoya kaa lo shi mbo kapa kaa lo mu enzu umba bɔkɔ o kpa mba mu kwuwɛyi awu alɛ ma, kaa lo kala ɛnwu mba ma mu kwuwɛyi ungwu lukwu. O nda kwoya kwɔlɛ kwuwongu akwu ɔnu uwu ɛnwu iyi mo, umba ba o gyi te lo lu mba afyima mɔmɔ gbola kwɔfyi ungwu ɛnwu igbomo mo, moo kwɔfyi ungwu ɛnwu igbomo kwɔngu akwu kwu kɛrikɛri. 32Akwɛyi asozha o ka o mu alɛ iyi onzu uwu kwonze uwu bɔkɔ o kpawu mu kwuwɛyi mbala Ɔzhizɔsi, mbala uwufo uwu bɔkɔ e shimo awu. 33Kwuye ungwu bɔkɔ o bo mbaa Ɔzhizɔsi ba o du te e kpomo-o. Akwɛyi o mu wu alɛ ma fo. 34Osozha uwufo ba a la Ɔzhizɔsi kwɔku mu kamba, akwɛyi ɛnzhi mbala embyi o wɔ kwudu. 35(Onzu uwu bɔkɔ a ma ɛlɛ awu a na izɔgɔ, izɔgɔ wu akwu ongbulolo. Iso iyi e so le akwu ongbulolo, akwɛyi e so ɛlɛ kaa uŋɔ tete ka kwu idu fulo.) 36Apula ɛlɛ lɛɛbi i wo te kaa iyi bɔkɔ o ka mu kwokpo ungwu Ukpo lɛɛbi li nyɔlɔma: <<Kwuku wu kwukpukpɛnyi te kwu muma mo,>> 37tabɔkɔ kwokpo ungwu Ukpo ungufo kwu so tee, <<Enzu O yese onzu uwu bɔkɔ o la wu kwɔku.>>
O Pwu Ɔzhizɔsi Mo
(Omatiyu 27.57-61; Omaki 15.42-47; Oluku 23.50-56)
38Mizhikembo iyi ɛlɛ, Ɔzhɔsɛfu uwu Arimatiya a nda Opayileti ukpɛzhi uwu Ɔzhizɔsi. Ɔzhɔsɛfu akwu u vɔngɔ kiya uwu Ɔzhizɔsi, wɛrɛrɛ moo a wiyi iyi umba Azhu. Mu inyama iyi Opayileti, e bo akwɛyi e to ukpɛzhi ma. 39Ɔnikɔdimɔ onzu uwu bɔkɔ a ka mba Ɔzhizɔsi mutu awu a zɛ mbala Ɔzhɔsɛfu. Ɔnikɔdimɔ a za la anyi umba bɔkɔ o wo mbo mu omari mbala aloyi, iyi bɔkɔ ɔlu yi i yi kyamate ekilo uwekpela tayi. 40Anzɔnu wepo mbɔlɛ o to ukpɛzhi uwu Ɔzhizɔsi ma, akwɛyi o tɛ wu okpayi mɛnwu mbala otulare, mu okpayi uwu ɔlinɛ. O wo kyamate bɔkɔ ukwu uwɛdɔ uwu Azhu bɔkɔ o pwu ukpɛzhi. 41Mɔgɔ uwu o kpa Ɔzhizɔsi mu kwuwɛyi awu, utu uwufo u yi mɔmɔ. Mu utu ɔnwu ogariwu uwopo e yi mɔmɔ, uwu bɔkɔ o ta onzu mɔmɔ dɛ mo. 42Kwuwongwu akwu kwɔfyi ungwu ɛnwuyimo iyi Azhu, ogariwu kwɔngu ba kwu yi kɛlɛ mɔmɔ, O ta Ɔzhizɔsi mɔmɔ.
Currently Selected:
Ɔzhɔnu 19: ETP
Highlight
Copy
Compare
Share
Want to have your highlights saved across all your devices? Sign up or sign in
The Word for the World International and The Word for the World Nigeria
