Iwomo 12
12
Inyashi Iyi Wambwalu I Kyomo
1Akwu mu kwuye kwɔngu gba Ɔsu Ɛrɔdu e yi wa mbwalu Ɔzhizɔsi umbafo ma kaa le lo mbo inyashi. 2A ngbɛ Ozhemisi umanyi uwu Ɔzhɔnu ma mu okpandɛrɛ. 3Tabɔkɔ a ma te ɛlɛ i she la Azhu, akwɛyi a gya kpɔɔ e yi Opita ma tete. Ɛlɛ i wo kwuyengwu odumudumu uwu oburedi uwu bɔkɔ e yi otutu mo. 4Mizhikembo iyi bɔkɔ e yi Opita ma akwɛyi a ta wu mu ugu ugyi, a ra wu e lo la asozha wendo wendo izhi endo mɔwu kaa lo gbo wu mo utu la ɔnu. Ɛrɔdu ba a gyi te la wa wu kwudu mu ugu ugyi kaa lo zɔ wu ombu la eyi iyi enzu gedegede mizhikembo iyi odumudumu uwu ikalama. 5Tayi gba Opita o shi wu mu ugu ugyi le, enzu wa mbwalu ba o kpakpɛ mu Ukpo ilɛma kwuwo wu.
O Wala Opita Ma Mu Ugu ugyi
6Mu utu uwu bɔkɔ Ɛrɔdu a gyi te la wala Opita kwudu kaa lo zɔ ombu wu, Opita ba e yi mu ondo ikpolomo meka iyi asozha wepo, o lo wu ɛyɛ ekpepo, akwɛyi asozha wepo ba o yi mu igbomo mu kenzugu. 7Kporo ba ɔlɔgbulɔ uwu Ukpo a wɔ akwɛyi ugu ugyi awu akwu ɛbɛ gedegede. Akwɛyi a kpa Opita kwuwo mu kamba akwɛyi a nyiwu eyi mo. A za wu te, <<Yimo efyefya>> akwɛyi ɛyɛ iyi Opita i luma. 8Akwɛyi ɔlɔgbulɔ uwu Ukpo awu a za wu te, <<Lo ɛriga ŋa mbala ekpoyata ŋa.>> Akwɛyi Opita e wo tayi. Ɔlɔgbulɔ awu a za la Opita te, <<Kwu ekpayi ŋa ma kaa mbwalu mi.>> 9Akwɛyi Opita a mbwalu wu o wɔ kwudu mu ugu ugyi awu, ba Opita e yitu te ɔlɔgbulɔ uwu Ukpo mbala wu o yi mu iwɔ kwudu kego mo; a ma kyamate uwu e yi mu ɛbɛ imama bi. 10O pika enzu umba igbomo umba kwonze mbala umba opo mo, akwɛyi o bo mu kenzugu akwɛyi riku ingyi kwoso unga bɔkɔ o fye mu kwuse awu riku ri wuma lɛngyi akwɛyi o wɔma manga. Mizhikembo iyi o zɛma o pika ɔgwuzɛ ukpɛnyi ma, akwɛyi kporo ɔlɔgbulɔ uwu Ukpo awu a lu wu afyima.
11Akwɛyi Opita a zɔngɔma ma akwɛyi a zɔ te, <<Iyi kambwu mo, kekelele gba mi yitu te Ukpo a lɔ ɔlɔgbulɔ wu le kego kaa la wa mi ma mu ɔwu uwu Ɛrɔdu mbala kiya ingyinangyina ingyi enzu umba Azhu o fulo eyi te ki bi du mi.>> 12Kwuye ungwu Opita azɔgɔ Ukpo a wawuma akwɛyi a ka mogba uwu Omeri anyi wu Ɔzhɔnu, uwu o ya wu te Omaki, mbaa bɔkɔ enzu riba o kpala ɛlu mu Ukpo ilɛma. 13Opita a la kwuwo mu riku, akwɛyi umɛgba okokpayi uwu o ya wu te Oroda, a kaa te le yitu uwe bɔkɔ e yi mu kwuwo ilama mu riku. 14Tabɔkɔ a zɔngɔma opwu uwu Opita ma, ɔnyɛ a ga wu ma, a wu riku ma dɛ mo akwɛyi a gba renya a ka mɛmi akwɛyi a ta opwu kpaa te, <<Opita a ri mu kenzugwu le lo!>>
15O za wu te, <<Ŋɔ kpo rishi re?>> Uwu ba a kpakpɛ mu isomo te akwu Opita, akwɛyi umba ba o zɔ te, <<De ba akwu kwundu wu.>>
16Opita ba a kpakpɛ mu kwuwo ilama mu riku, akwɛyi o wu riku mo akwɛyi o ma Opita akwɛyi izele i zele mbo mo. 17Opita e wo mbo kwuwo te uwewe la kpala kenzu mo akwɛyi a bamba ɛza iyi Ukpo a wa wu kwudu mu ugu ugyi. A za mba te,<<la lu za la Ozhemisi mbala ɛmɛnɛ kiya ingyi ki wo le,>> akwɛyi e fulomo a ka mu riyi ngyewa
18Tabɔkɔ eyi i lama, ovyo uwakwu a ta la asozha kwuwongu o yi kiya ingyi ki du Opita mo. 19Mizhikembo iyi bɔkɔ Ɛrɔdu a za la asozha te lo gagyi Opita akwɛyi o kpɛvyɛ munamuna ba o ma wu mo, e yo asozha mbamba kwuyo akwɛyi a zɔ te lo ngbɛ mba ma.
Lukwu Undu Ɛrɔdu
Mizhikembo iyi ɛlɛ, Ɛrɔdu a lafya la Ozhudiya a ka ŋɔ mu Oseseriya kwuye bwɛɛ. 20Kwuye kwɔngu Ɛrɔdu e yi mu amba iwomo mbala enzu umba Otaya mbala Ɔsidɔ. Tabɔkɔ o kpa Obilasitu onzu u bɔ eyi mu udaba uwu ɔsu ɛshɛku akwɛyi a nya mba ma. O ka mba Ɛrɔdu kaa lo gagyi iŋɔma iyi oloto mbala esu, kwuwongu o fya ewiri mba mu ɛzhi iyi ɔsu ele.
21Akwɛyi ɔnuwu kwɔfyi ungwu o shi awu, Ɛrɔdu e kpo ɛriga iyi ɛsu wu akwɛyi a ŋɔma mu ukpa uwu ɛsu akwɛyi e so enzu iso umba bɔkɔ o kpala ɛlu mu idu awu. 22Akwɛyi enzu o le wu mu ɛnyi itomo te, <<Opu ɔlɛ akwu uwu ukpo uwu fo, mo akwu onzu mo.>> 23Mu kwotota kwɔngu, ɔlɔgbulɔ uwu Ukpo a fya Ɛrɔdu kiya akwɛyi apwu i ri wu mo akwɛyi e kpomo, kwuwongu a du Ukpo ma mo. 24Iso iyi Ukpo ba i le mu ikyomo akwɛyi i fula kizɛ ma. 25Kwuye ungwu bɔkɔ Obanaba mbala Ɔsɔlu o mbwa ɛduma mba ma, akwɛyi o gbama mu Ɔzhɛrusalɛ o ka mu Atiyɔki mbala Ɔzhɔnu uwu bɔkɔ o ya wu te Omaki awu.
Currently Selected:
Iwomo 12: ETP
Highlight
Copy
Compare
Share
Want to have your highlights saved across all your devices? Sign up or sign in
The Word for the World International and The Word for the World Nigeria
