Ɔkɔrɔti uwu kwonze 16
16
Imbwama Laa Enzu Umba Ukpo Umba Bɔkɔ O Yi Igɔ
1Mɛka iyi iso iyi i mbwama laa enzu umba Ukpo mu Ozhudiya: Lunyi tete la lu wo kyamate bɔkɔ mi so ɛshɔshi iyi Ogalatiya tayi. 2Kwɔfyi ungwu aladi umbanambana, onzonzu le to meka iyi kiya ingyi bɔkɔ e yi ngyi kaa le shi mɛzhi kaa le be shi, kaakwuyengwu mi bo kaa lo na eduwo ikpikpɛnyi te fo. 3Mizhikembo iyi mi bo, mi kwupwu ungwu i zɔ ɛmi ma laa enzu umba bɔkɔ lu nyama la mba akwɛyi mi lɔ mba kaa lo to rɛshi yi lo so ngye mu Ɔzhɛrusalɛ. 4Gba akwu mega tee la mi so tete, ba o fye mi mo.
Ɔpɔlu E Yi Ɛnwu Ma Iyi Luzɛ
5Mizhikembo iyi mi fula ɛzhi iyi Omasedoniya ma, mi nyɔ munyi yi, moo mega mi mi zɛ mu Omasedoniya. 6Igboshimo mi wo afyi epo mo mbala yi, nzhii ba ɔnɛka u wɔ ma dɛ kaa lu mbwami ma kaa mi shekeyi la luzɛ mi munamuna bɔkɔ mi sheyimo. 7Mi gyi tee la mi ma yi kwuye bwɛɛ bi akwɛyi mi pika yi ma mo; moo i yi egbo mi tee mi gyi mi wo afyi gyɔɔ mbala yi, gba Ɔkwu a nyama.
8Imi ba mi ŋɔ mu Ɛfɛsɔ nzhii ba ɔnu uwu odumudumu uwu Ɔpɛtakɔ. 9Moo ɔgwuzɛ uwu ɛduma iyeshi u wuma munɛ, enzu umbeyi ba o yi riba.
10Gba Otimoti e bo munyi yi, la lu na wu mu egbo ikpɛnyi, moo e yi mu ɛduma iwomo laa Ɔkwu kyamate Imi bɔkɔ mi yi mu iwomo tayi. 11Onzu ukpukpɛnyi te la zhi wu ma mo, lunyi ba la lu mbwa wu ma kaa la zɛ luzɛ wu moloto, kaa la gbama le be du mi; moo mi yi mu eyi wu ishimo te a gbama mbala ɛmɛnɛ.
12Meka iyi umanyinzu Apɔlɔsi, mi kpawu ɛshɛku iyinayina tee la zɛ mbala ɛmɛnɛ umbafo kaa le so munyi yi, uwu ba a gyi tee le so kekelele mo. Gba a fya kwuye mo, e ri.
Iso Imbwambwaa
13La lu rima mu igbomo, la lu rima ngiri mu ikwu idu fulo yi, la lu wiyi mo, la lu rima laa ɛkpasu. 14Iyinayina iyi bɔkɔ luu wo la lu wo yi mu idɛnyi.
15Ɛmɛnɛ mi, lunyi lu yitu iyi Ositifana mbala agba wu; umba gba akwu wa mbwalu umba kwonze le mu Akaya, akwɛyi umba o to ɛnwu mba o shi te o wo ɛduma laa enzu umba Ukpo. Mi kpayi ɛshɛku, ɛmɛnɛ mi, 16tee la lu lomo laa enzu mbɔlɛ te, mbala onzu uwunawuna uwu bɔkɔ e wo ɛduma mbala mba.
17Mi mwɔnyɛ iyi ibomo iyi Ositifana, mbala Ofotunatu mbala Akayikusu; kwuwongu ibomo mbo i yi kyamate akwu lunyi gba lu bo le tayi 18i shi egbo mi i wuluma puratata, kyamate bɔkɔ umba ɔ wuluyi egbo mo puratata tete awu. Enzu mbɔlɛ te ishoshi tee lo yitu mbo.
19Ɛshɔshi iyi i yi mu ɛzhi iyi Eshiya o lɔma tee, lɔ gbɛlɛ yi ɛnyi mamari; Akwila mbala Opirisila mbala ɔshɔshi uwu bɔkɔ a kpala ɛlu mogba mba awu, o lɔma tee lɔ gbɛlɛ yi ɛnyi marimari mu ɛnyi iyi Ɔkwu nzu. 20Ɛmɛnɛ lɛɛbi munɛ o lɔma tee, lɔ gbɛlɛ yi ɛnyi.
La lu gbɛlɛ esu ɛnyi, la lu kpaa esu idu iyi oloto.
21Imi, Ɔpɔlu, gba mi ka ɛlɛ le mafyi mi: Ɛnyi igbɛlɛma mbaa Ɔpɔlu.
22Onzu uwunawuna uwu bɔkɔ e pwu idɛnyi iyi Ɔkwu mo, e kpɛdɔma sa wu. Omarana ta, Bo ŋa loo Ɔkwu!
23Esheshi iyi Ɔkwu nzu Ɔzhizɔsi li yi mbala yi.
24Idɛnyi mi li yi mbala lɛɛbi mu ɛnyi iyi Okrasi Ɔzhizɔsi. Li yi tayi.
Currently Selected:
Ɔkɔrɔti uwu kwonze 16: ETP
Highlight
Copy
Compare
Share
Want to have your highlights saved across all your devices? Sign up or sign in
The Word for the World International and The Word for the World Nigeria
