Laakosinka Maxaafa 8
8
Torbaane Dhankoke Xassika Offo'lsanjo
1Duuchchi Woddik Gootti Muuse'e hiyyee qic, 2«Aarooni ookkonee torbaane xassuwwa dhankotike offo'lisanji hana uggaa wodda ifi ookkone offo'lisanji edi darre'n ifaashsha asseexxi uggo'a kuli.» 3Aarooninna hiyyeendeshshanni Duuchchi Woddik Gootti Muuse ajajemmashshanni xassuwwi dhankotike ofo'lissanji hana hedheexxi ookkone xasike offo'lisanji edi darri'a xabaashsha asse ugge. 4Dhankotike xassik offo'lisanji giisemeema qici Duuchchi Woddik Gootti Muuse'n kulema qicinnite kadda wodda isike uurrsanjinaa'ni isike daraaruwwi qico'n duuchchingechchi giisemeemak tumendeexxe worqenitemman.#Fula. 25:31-40; 37:17-24.
Leewwito Erganshatee Foyendeexxa
5Duuchchi Woddik Gootti Muuse hiyyee qici: 6«Leewwito Isira'eelitoti giddii'n gargar footettexxi seeriinxe aadashsha insa'nee luqqi assi. 7Insa'ne luqqi hinaashsha assitatto qici luqqi assatiks wode'e insa'ne'n fifixi; biso insa'neeke'n hexxeexxa orda duuchcha haxxineexxi seemmatanna anshe'ne ca'a hinowaal. 8Ookkoneechchi uduma midhatika tolcha zayiteni qushshendeexxi shaqqaxxa bulle mitte jibichchinni welti aa'nowwaal; atinna cubbotike tolchi'a kadaaka wele jibichcha aaxxatton. 9Ookkoneechchi uduuma Leewwito afenshatike duukaani edo uurrittashsha assitettexxi Isira'eelika arda duuchchanna bukki assi. 10Leewwitotanna Duuchchi Woddik Gootti edo shiqise'na'a Isira'eelik ardinna anga ifixxa insa'ne umi hana uggowwaal. 11Ookkoneechchi uduma Aarooni Leewwito Duuchchi Woddike Gootti'a ergatendo'a qophpho'aashsha Isira'eelike ardi giddii'n insa'nee Duuchchi Woddike Gootti edo dolsatixxe uwwashsha shiqishuun.
12«Leewwito anga ifixxa jibichchuwwi hana uggiteechchi uduma mitte Leewwitotixxa cubbo biratike tolcha kadaashsha holqonee cincatike tolcha kadaashsha Duuchchi Woddike Goottia'a shiqishi.
13«Leewwito Aarooni edonna isixxe labbaxxe oose eddo uurrissettexxi dolsatike tolchisha Duuchchi Woddike Gootti'a shiqishi. 14Konnee qicinni Leewwito Isira'eelike ardi giddii'n ani'a gargar foyi; insa'nenna anke kandaan.
15«Leewwito ca'a assite'e dolsatike tochishsha shiqisettechchi uduma ergatemmo'a afenshatik duunkaani giddo e'yinaan. 16Anke kandaashsha insa'ne ani'a uwwendeexxe Isira'eeliton; heene meyyaxxe Isira'eelichchonaa'n ilemaake labbake angafixxa bado ani insa'nee ifi'a adhdheennen. 17Manjokenaa'ni kado horekenaa'ni Isira'eeli giddo ileemeek labbak angafi duuchchi anken; Gibtseke bogi giddo hedheemmake hori manjika angafa shiyeenna wodda ani Isira'eelike hori manjik labbak angafi, anke kadaashsha foyeennen.#Fula. 13:2. 18Isira'eeli giddo ilemeeke labbake angaffuwwixxa badonna Leewwito adhdheennen. 19Isira'eelike ardixxe tukke kandeexxi afenshatike duunkaani giddixxa ergatensha ergatemmo'anna Isira'eelito woyyitte bakka'ni shiqiyyoti ba'neti gannendebaashsha cubbo insa'ne'a birro'a Leewwito Isira'eelitotixxe uwwaashsha aadhenexxi Aarooni'anna isixxe labbaxxe oose'a insa'nee uwwe'eennen.» 20Muusee Aarooninna Isira'eelik ardi Duuchchi Woddik Gootti Muuse ajajemmashshanni Leewwitote assine. 21Leewwito ifi luqqi assexxeexxi seemmatanna anshexxe; ookkoneechchi uduma Aarooni insa'ne'e dolsatike tolchishsha Duuchchi Woddike Gootti edo shiqishe; luqqi hino'aanna cubbo insa'neexxa bire. 22Ookkonechchi uduma Leewwito Aaroonixxenna isixxe labbaxxe oosexxe akeette hunda heexxeexxi afenshatike duunkaani giddixxa ergatensha ergatendo'a e'yite; Duuchchi Woddik Gootti Muuse Leewwitotixxee ajajemmashshanni ardi duuchinxa asse.
23Duuchchi Woddik Gootti Muuse hiyyee qici: 24«Lame tommenna onde woggakinna eettene wogga iimi darrek Leewwitotiki labballi afenshatike duunkaani giddo ergatemo'a dagaan; 25yaane kinni onde tomme wogga wo'maa wodda ergateemammaxxa huje walaan; langaxxa hujabaan. 26Ookkoneechchi uduma ifika dayyuwwa Leewwito afenshatike duunkaanixxa ergatensha qarqaara malee insa'ne umo ifike callin mittechchonna huja hassissabaan; kunni Leewwito ergatendo'a ergatenshatika seera abidissatto qicon.»
Currently Selected:
Laakosinka Maxaafa 8: gdo
Highlight
Copy
Compare
Share
Want to have your highlights saved across all your devices? Sign up or sign in
The Word for the World International, The Word for the World Ethiopia
