Laakosinka Maxaafa 4
4
Qee'atito
1Duuchchi Woddiki Gootti Muuse'ninna Aarooni'n hiyyee qici, 2«Leewwixxe oosenaa'n Qe'aatito insa'nekee mini mini hado'ninna insa'nekee gosa gosati mine'n laakko'i. 3Afenshatike duunkaani giddixxa huje ergatemo'a dagaaka sase tomme wogganaa'n onde tomme wogga hedheeka labballo duuchcha laakko'i.
4«Afenshatike duunkaani giddo Qe'aatotixxi huje hara woyyichcha mi'a heqqaten. 5Ardi kaanbe golsheexxi ke'aa wodda Aarooninna isixxi labbaxxi oose afenshatike duunkaani giddi'a e'yineexxi golleemmaka seemmatika golo dirrinseexxi isinni Kakotika Taabota mirqinowwaal. 6Ookkoneechchi uduma hallisemeeke ama'atike goginni isoo bunqeexxi iimatixxe bifaxxa seemmanna itti hana buyyinuun; isoo dunkammaxxa murguwwanna isexxe bakka bakka'ninni e'yinshuun.
7«Duuchchi Woddike Gootti'a worqeti hujemeeke mi'uwwaara kunninna tolchendeexxi daabbo shiqqammak beeri hana iimatixxe bifaxxa seemma buyyineexxi itti hananna sibiljiinxa qore, saanuwwa, mooqquwwa, buuduwwanna ha'watike tolchik maqorqooruwwa iittani duuchchiinxa yanna ookkoo'n gophendammabaaxxi daabbo itti hana hexxuun. 8Konneechchuwwa duuchcha diimmoxxe seemmanni bunqeexxi hallisemeeka hephphaka goga hana lenbe bunquun; isixxa dukatixxa murguwwanna isexxe bakka bakka'ninni e'yinshuun.
9«Iimixxe bifaxxa seemmanna aa'neexxi torbaane dhankoke xassika offo'limalcho isike xassuwwinninni welti, xassuwwiinka xolsanjuwwa isinge offo'limalchuwwinninni welti, iittanni tenne la'o'n hossaaxxe zayiteka mi'uwwa duuchchanna isenni bunquun. 10Torbaane dhankoke xassika offo'limachonna isinni welti afendeexxa la'o uwwaaka mi'uwwa duuchcha hallisemeeke ama'atike gogike buyyisanjinni mirqati dukisanjiinxe be'co hana ugginuun.
11«Ookkoneechchi uduma worqetike tolchimalchi hana iimixxe bifaxxa seemma farri assineexxi ise hananna hallisemeeka ama'atika goga lenbe buyyati isoo dukatixxa murguwwanna iseenxe bakka bakka'ninni e'yinshuun.
12«Iittanni woyyitte bakkaxxe ergatensha'a la'o uwwaaka mi'a duuchcha aa'neexxi iimatixxe bifaxxe seemmanni mirqine'e itti hananna hallisemeeka ama'atika goga lenbe buyyati dukisanjiinxe beco hana ugginuun.
13«Sageettotike sibiljike Tolchimalchi hanii'n bululo hoyyineexxi isi hananna dhiiletixxe bifaxa seemma farri assinuun. 14Ookkoneechchi uduma Tolchimalchoke'e la'o uuwwaaka mi'a duuchcha giiratixxa laanguwwa, otisanjo qallasumuwwa, faafasunjuwakanna hubbiqqichcha saanuwwa isi hananna uggurruun; isi hana ama'atike gogika buyyisanjo buyyinseexxi dunkisanjo murguwwanna isenxe bakka bakka'inni e'yinshuun.
15«Aarooninna isixxi labbaxxi oose woyyitte bakkanna iseka woyyichcha mi'a duuchcha bunqe ke'neechchi uduma, manni kaambetenaa'n ke'oo'aa qophpheeffatammaxxa yanna Qe'aatito dukko'a daggowwaal; rennabaashsha kinni insa'ne konnee woyyichcha mi'a tunqoqqe'e; tennexxee afenshatik duunkaani giddo hedheeka mi'a dukkaaxxi Qe'aatitoten.
16«Qeesichcho Aaroonik belti Ali'aazaar xassiinxe zayitexxi, fishshammake hixaanixxi, duuchchi wodda shiqammake midhatike tolchixxinna hariirtetixxe zayitexxi yaane isoo uudduun; iittanni Taabotiinka galdumanna isi giddo hedheechcho duuchcha, galmakanna isike mi'inninni welti heqquun.»
17Duuchchi Woddiki Gootti Muusenna Aaroonii'i hiyyee qici, 18«Qee'aatitotixxi gosa Leewwixxenaa'n gargar foyendeexxi galaafatendaashsha assitinoqqe'e. 19Hara woyyichcha mi'ibaa shinqaa wodda hedhoti he'naashshate malee rennabaashsha ha'no insa'nee assitinaa qici, Aarooninna isixxi labbaxxi oose woyyitte bakka giddi'a e'yineexxi mitte mittinga manjo huje hunje'n dhaanbuun; maa hujaaxxanna ege'nishuun. 20Yaane kinni Qe'aatito woyyichcha mi'a heenoxxe yanna'anna midde uuddo'a e'yitoqe'e; e'yinoole rennaan.»
Gediisito
21Duuchchi Woddiki Gootti Muuse hiyyee qici: 22«Gershoonito insa'neke mini mini hado'ninna gosatike ancha ancha'n laakko'i. 23Afenshatike duunkaani giddo ergatemmo'a dangaashsha, sase tomme woggaa'n onde tomme wogga qico'n hedheeka labballo duuchcha laakko'i.
24«Gershoonitotixxi hujetixxinna dukatixxi ergatensha konnechchinni butti'a hexxeeshshaten: 25Insa'ne Taabotinke galdumika goluwwa, afenshatika duunkaanna isika buyyisanjonna isi hana buyyemeeka hallisemeeka ama'atika goga, afenshatike duunkaanixxe huddummeka seemmatika goluwwa, dunkuun. 26Iittanni Taabotiinke galdumixxe'ninna isike tolchimalchixxe dowwe'n hedheeka isixxe huddummeka goluwwa, isixxe huddummexxe hulaka goluwwa, wodaruwwanna tenne ergatensha'a kadaaka mi'uwwa duuchcha dunkuun. 27Gershoonitotixxi ergatensha dukatixxenna kaddo'o wele huje duuchcha, Aaroonixxenna isixxe labbaxxe oosexxe akeette hunda kadduun. Dukiyyo hasissaachcho duuchcha dunko'a deette insa'ne'n uutatton. 28Yoona Gershoonitotixxe gosaxxi ergatensha afenshatike duunkaani giddo tenneten; huje insa'neexxi Aaroonika belto qeesichcho Itamaarixxe akeette hunda kadduun.
Meeraarito
29«Meraarito insa'neke gosa gosati mine'ninnna insa'neke mini mini haddo'n, 30afenshatike duunkaani giddixxa huje ergatemo'a dagaaka sase tomme wogganaa'n onde tomme wogga qico'n hedheeka labballo duuchcha laakko'i. 31Insa'ne afenshatike duunkaani giddo ergatemma wodda hunjaaxxi huje: Taabotiinke galdumixxa gubanuwwa, isika danqarsanjuwwa, utuphphuwwanna isika lekkisanjuwwa, 32iittanni baxxetixxe dowwe'n hedheeka utuphuwwa isi isike lekkisanjuwwinni welti, kaasuwwa, wodaruwwa iittanni konnchuwwinni welti abidendeexxa la'o uwwaachcho duuchchanna wele hooneenna tennee ergatensha'a hasisaaka mi'uwwa duuchcha dunkuun; mitti mitting manji ba'edhaakaa mi'a gargari hiisitineexxi iso'n dhaabbe. 33Yoonna Meraarito afenshatike duunkaani giddo, Aaroonika belto qeesichcho Itamaarixxe akeette hunda he'neexxi hunjaaxxi huje tenneten.»
Leewwixxe Gosati Minika Laakkossa
34Muuse, Aarooninna ardink akeekisanjuwwi Qe'aatito gosati mine mine'n laakkone. 35Afenshatike duunkaani giddixxa huje ergatemo'a dageek sase tomme wogganaa'n onde tomme wogga qico'n hedheek labballi duuchchi, 36ifi ifke gosati mene'n laakko'emeek, lame kumanna torbaane dhibbanna onde tommemman. 37Kunni Qe'aatito duuchchinaa'n afenshatike duunkaani giddo argatemmammake manni duuchchike laakkossan. Duuchchi Woddiki Gootti Muuse darree'n ajajemmashshsanni Muusenna Aarooni konnee manna laakkonne.
38Gershoonito ifike gosatike mine'n ifi ifike mini hado'n laakko'enddeemman. 39Afenshatike duunkaani giddixxa huje ergatemo'a dageeke sase tomme wogganaa'n onde tomme wogga qico'n hedheek labballi duuchchi, 40ifi ifke gosati mine mine'ninna ifi ifike mini hado'n laakko'emmaak duuchchi lame kumanna jaane dhibbanna sase tommemman. 41Kunni Gershoonitotenaa'n afenshatike duunkaani giddo ergatemaammake mannike duuchchiinge laakkossan. Duuchchi Woddik Gootti ajajemmashshanni Muusenna Aarooni konnee manna laakkonne.
42Meraarito ifike gosati mine'n ifi ifike mini haddo'n laakko'enddeemman. 43Afenshatike duunkaani giddixxa huje ergatemmo'a dageeka sase tomme wogganaa'n onde tomme wogga qico'n hedheek labballi duuchchi, 44ifi ifike gosati mine'n laakko'emeek sase kumanna lame dhibbamman. 45Kunni Meraartotike laakkossan; Duuchchi Woddik Gootti Muuse darree'ni insa'ne'n uwwemmake ajajishanni Muusenna Aarooni insa'nee laakkonne.
46Tennexxee Muuse, Aarooninna Isira'eelik akeekisanjuwwi Leewwito gosati mini mini hado'n laakkonne. 47Sase tomme wogganaa'n onde tomme wogga qico'n hedheek afenshatike duunkaani giddo ergatenshatixxa huje hujo'anna mi'a duko'a dageemmake 48mannik laakkossi saddeeta kumanna onde dhibbanna saddeeta tommemman.
49Duuchchi Woddik Gootti Muuse darree'n uwwemake ajajishshanni mitti mitting ergatenshatixxe'ninna mi'a dukkatixxe huje'n dhaabeme.
Duuchchi Woddiki Gootti Muuse ajajemmashshanni laakko'emme.
Currently Selected:
Laakosinka Maxaafa 4: gdo
Highlight
Copy
Compare
Share
Want to have your highlights saved across all your devices? Sign up or sign in
The Word for the World International, The Word for the World Ethiopia
