Laakosinka Maxaafa 22
22
Baalaaqi Balaami'i Ye'ise
1Ookkonechchi uduma Isira'eeli manni Mo'aabike diidiba'a me'eexxi Yordaanoosi qarqara Iyyaariko widdi darre offo'le. 2Eettene yanna Sofoorik belti Baalaqi Isira'eeli Amoorake manna maa asseexxa afe. 3Mo'aabinna ardiinxe birra sa'nenaa'n kexxeexxa culphise; eeti, Moa'aabik ardi Isira'eelike ardinaa'n kexxeexxa sodaate corco hiyye'eman. 4Mo'aabik ardinna Midiyaamike akeekinsanjuwwa'n, «Qotiyyo kalote'n hedhemmaka arsichcho ca'a assite'e itte birtammashsha kunni sannachchi qarqara no'oke'n hedheechcho duuchcha ca'a asse biraaken» hiyye. Tennexxee eettenee yanna Mo'aabike moyanjo kadeemmak Soffork belti Baalaqi, 5galaani qaraqara hedhemmake ilememmake boga'n Faatur hiyyemaake qachchi giddo hedhammaka Bii'oorka belto Bele'aami'i ye'no'a erganjuwwa erge; hiyyeenna ergee qici:
«Kunse laakkosi hara birra sa'eedheek manni Gibtsee'n dageexxi loola anke'n offo'leedheen. 6Konnee arda ifinaa'n dande'annoke kadagopheemmaxxee ta'a daggettexxi insa'nee ani'a badi; akimagaada ookoneechchi uduma insa'ne'e injifatennexxi boga ankenaa'n fulcheedhannoxxe hexxaan; ati eebbissettek eebbisemaaxxa baddettekinna badinemaaxxa ege'neennen.»
7Tennexxee Mo'aabikinna Midiyaamik akeekisanjuwwi morotee'e uunaaka maalaqa abixxineexxi Bele'aamibaa me'ine; Bele'aamibanna genneexxi Baalaqixxa erganna iso'n kulle. 8Bele'aaminna insa'ne'n, «Duuchchi Woddik Gootti ani'a uwwaaka hissichcho ha'no'a uwwaannaxxee'e tennee hashsha kabanni galle» hiyye. Tennexxee Mo'aabike akeekisanjuwwi isineenba turre. 9Magenikinna Bele'aamibaa dageexxi, «Kunni atiba hedheek manni ayyeera?» Hiyye iso qore. 10Bele'aaminna Magenoke'n hiyyee hiissee qic: «Mo'aabik moyanjo Sofoorik belti Baalaqi eraga aniba ergeeke mannani; hiyyeexxi ergee qiccinna, 11‹Gibtsee'n daggeek ardi bogake'n elleqqi hiyyeedheen; tennexxee'e daggettexxi ani'a insa'nee badi; akimagaada ookkoneechchi uduma insa'nee lole shorrannoxxe hexxeen.› »
12Magenkinninna Bele'aamii'i, «Konne manninni welti me'itoxxe'e; ardi eebisemeek kadeemmnaxxe'e baddoxxe'e» hiyye.
13Langa baro gorsa Bele'aami ke'eexxi Baalaaqike akeekisanjuwwa, «Duuchchi Woddik Gootti ha'nonn welti me'abe'noshsha ane'e hoyyeemmaxxe boga ha'nokiba'a illeema higgine me'e» hiyye.
14Tennexxe Mo'aabike akeekisanjuwwi Baalaaqibaa illee iima hingeexxi iso'n, «Bele'aami no'onni daga gibeen» hine kulle.
15Oookkonechchi uduma Baalaqi erganjuwwa eddike laakkosik caalaakanna ulfaate'eke wele ja'laabuwwa erge. 16Insa'nenna Bele'aami'n dange hinee qic:
«Sofoorik belti Baalaaqi hiyye no'o'o ergeeqic: aniba daggabexxoshsha ate'e hoyyaachchi mittichchinna hedhoqe'e. 17Galata ati'a shankaffi asse hissannoni, hitattoxxa duuchchanna assannon; tennexxe daggettexxi konne arda ani'a badi.»
18Yaane kinn Bele'aami insa'ne'n hisse haaso'e hiyyeeqic, «Wele waalin Baalaaqi worqetinna birretik sibil wo'meedheeka ifika mootummatika mine ani'a uwwa'noolenna midde Duuchchi Woddike Gootta anke Magenika ajaja sa'ennexxi tenne caldaaxxa yookaan tennenaa'n heeno'mitaaxxa heene'e yaanenna aasa dande'abe'no. 19Ta'atenna kaddoole weli assemmashshanni ha'nonna tenne hashsha kabanni galdinee'na'a Duuchchi Woddik Gootti ane'n lebeexxi maa haaso'aaxxa laqo.»
20Eeteneenni hashsha Mageni Bele'aamibaa dageexxi, «Kuuni manni dageechchi insa'nen welti me'itotta'ate kaddemmaxxe'e welti me'i; yaane kinni ani ate'n kulannoxxa calla assi.» 21Tennexxee gorsa bariisa Bele'aaminna ke'eexxi harrichcho koodhdheexxi Mo'aabike ja'laabuwwinni welti me'e. 22Kaddomalee Ba'aal me'e wodda Mageni yo'oshsha mufateemmaxxe'e Duuchchi Woddike Goottik iimik erganji isi'a diineexxi me'a'neeke ora'n uurre; Baalaa'aminna harrichchote'n ofo'leke'eman; lame isixxa garboolenna isinni welti hexxemman. 23Harrichchottinna Duuchchi Woddike Goottik iimik erganji wolaantichcho golshe anga abixxeexxi orake'n uure'eexxa affeexxi orakenaa'n fichchi giddi'a gorte; Bele'aaminna orake'n illee iima higgaashsha harrichcho gane. 24Ookkoneechchi uduma Duuchchi Woddik Goottike iimik erganji lamii darree'n woyinetike hiddichchike kinjiniike dalla'ixxe oddonaa'n sa'neeke cu'make ora'n uurre. 25Harrichchotinna Duuchchi Woddike Goottika iimika erganjo affeexxi kinjiinke dalla'iba'a shikki hiteexxi Bele'aamixxa lekka dalla'ake'n ande; tennexxe ise'e higgeenna gane. 26Duuchchi Woddike Goottik iimik erganji edi'a sa'aaxxi middibitta'a hingaabi hedheebaaxxe cu'maxxe bakka'n uurre. 27Harrichchotinna Duuchchi Woddike Goottika iimika erganjo affeexxi Bele'aami hundii'n guguruffi hitte ciisse; Bele'aaminna mufateemmaxxe'e ise siqqichoti gane. 28Ookkoneechchi uduma Duuchchi Woddik Gootti eetene harrichchotika afo'o bannee'naa Bele'aami'i, «Sasele anee'e gandetek atee maasannalete?» Hite.
29Bele'aaminna harrichchote'n, «Ane'ni gacifattettexxeetentaa'a; wolaantichcho anga afeennele silaan ta'anni ate'e shiye'ennan» ise hiyye.
30Eetti harrichchotinna Bele'aami'i, «Eddo, heddo yannanaa'n telchiqico'n ane'n ofolda'n daggettexxe atixxe harrichchobaasi ani? Iitta hedheeka adaba ane'n uudde egendette?»
Isinna «Waawwo!» Hiyye.
31Ookkoneechchi uduma Duuchchi Woddik Gootti Bele'aamixxa ille baqqi asse; isinna Duuchchi Woddike Goottik iimik erganji wolaantichcha goshsheeka anga abixxeexxi orake'n uurreenaa'a afe; Bele'aaminna albik butta gonbiseme.
32Duuchchi Woddike Goottik iimiki erganjinna iso'o, «Harrichcho sasele mayeete gandettek? Ani dagennexxi ora atika cufennki ati ba'netike ora'ni me'itabexxoshsha hoyyonna'a hiyyeeten. 33Harrichcho ane'e affeexxi sasele gamake'n goragophphe'ee'ya, eeti ta'iqico ate'e shiyeennan salaan, harrichcho kinni lubbondinni waalaannan» hiyye.
34Bele'aaminna Duuchchi Woddike Goottika iimika erganjo, «Cubbo hujeennen; ane'e diindota'a orake'n uurriteettexxa ege'nebe'non; ta'atenna kaddoole gammada gophphaattole illeema higannon» hiyye.
35Duuchchi Woddike Goottik iimik erganjinna Bele'aami'i, «Mannik welti me'a me'i yaane kinni ani ate'n haaso'anoxxa calla haaso'i» hiyye; tennexxe'e Bala'aami ja'laabuwwa Balaaqikenni welti me'e.
36Baala'aaqii daga'n ora hedheexxa Bele'aami laqeexxi, iso'o qophedho'a galchammake bogixxe gabala'n hedheeke Arimoonike galaani qarqara'n hedheeke Mo'aabike qachchiba mare. 37Baalaqi Bele'aami'i, «Rakke daggattoshshatebaa ate'n ergennek? Mayee daga gophphete? Dhugandinni galata ati'a hissa dande'abe'noke kadee'naate?» Hiyye.
38Bele'aaminna, «Kunse, dage'ennen; anita heenee yaane dande'e haaso'anno? Ani haaso'iyyo hasissaaxxi Mageni haaso'onna'a afo'o ane'n uggeexxe callan» hiyye hisse haaso'e.
39Ookkoneechchi uduma Bele'aami Baalaqinni welti Qiriyaati Hatsooti me'e. 40Baalaqinna lalokanna gedhebo tolcheexxi ookkone maalakenaa'n Bele'aami'anna isin welti hedhemmake ja'laabuwwi'a erge. 41Langa baro gorsa Baalaqi Bala'aami'i alalle Bamitiba'oolni, Ba'aaliba'a fulche; Bala'aaminna ookko hedheexxi Isira'eelixxe kaanbeke kasa'n hedheeka arda afe.
Currently Selected:
Laakosinka Maxaafa 22: gdo
Highlight
Copy
Compare
Share
Want to have your highlights saved across all your devices? Sign up or sign in
The Word for the World International, The Word for the World Ethiopia
